Vagahau e Vagahau Mea mo e Moui Tukulagi!
“Kia kumi e mutolu a Iehova . . . kia kumi e mutolu e mahani tututonu, kia kumi e mutolu e mahani molu, po ke galo nakai a mutolu ke he aho he ita a Iehova.”—SEFANAIA 2:3.
1. (a) Ko e higoa e tau puhala ka fakaaoga he tau tagata fakaako ke fakaako e vagahau he motu kehe? (e) Ko e vagahau he ha e vagahau mea?
KUA maeke e tau tagata fakaako ke fakaako e alelo fou he fakaaoga e puhala he utaaga hako ke tohi mo e vagahau po ke ke he puhala he utaaga vagahau he vagahau. I lalo he puhala he utaaga hako ke tohi po ke ke vagahau, kua fa mahani a lautolu ke fakaaoga e tau tohi fakaako ke iloa e tau fakatufono he puhala he utaaga hako ke tohi po ke vagahau. I lalo he puhala he utaaga vagahau ke vagahau, kua fifitaki a lautolu ke he tau leo mo e tau fakafifitakiaga he tau kupu ne vagahau mai he ha lautolu a faiaoga. Ne fakaaoga ua e puhala he utaaga ke he fakaako he “vagahau mea.” Mo e kua mua atu e aoga lahi ke vagahau e tautolu e vagahau nei kaeke kua amaamanaki a tautolu ke “galo . . . he aho he ita a Iehova.”—Sefanaia 2:1-3; 3:8, 9, NW.
2. To maeke fefe ia tautolu ke fakaako e mena kua liga ne ui ko e fakatufono he puhala hako ke tohi mo e vagahau e vagahau mea?
2 Ko e Tohi Tapu e matapatu tohi ne fakaaoga ke fakaako e vagahau mea. He fakaako fakamakutu lahi ki ai mo e tau tohi fakailoa ne fakave ke he Tohi Tapu ka fakaako atu ki a koe ne liga ke ui aki ko e tau fakatufono he puhala hako ke vagahau mo e tohi e vagahau mea. Ko e kamataaga mitaki e fakaakoaga Tohi Tapu he loto kaina ne takitaki he taha mai he tau Fakamoli a Iehova. Ma lautolu kua fita he tukulele atu ke he Atua, kua mua atu e aoga lahi ke fakamakutu lahi ke fakaako tumau ke he tau kupu he Tohiaga Tapu. Ka e ha ha i ai nakai e tau puhala kua mua atu e lauia mitaki ke fakaako ke he vagahau mea? Mo e ko e heigoa e tau lagomatai ka moua mai ka vagahau ki ai?
Fakaako Fefe e Vagahau Mea
3. Ko e heigoa e taha puhala ke fakaako e vagahau mea?
3 Taha e puhala ke fakaako e vagahau mea ko e fakalataha atu e tau kupu moli hane fa e fakaako e koe mo e tau mena kua fita he iloa e koe, tuga e tagata fakaako vagahau kua liga ke matutaki fakahaga e tau fakatufono he puhala hako ke tohi mo e ke vagahau e vagahau. Ke fakatai ki ai, he taha magaaho i tua liga kua iloa e koe ko e Tama he Atua a Iesu Keriso, ka e tote e mena ne iloa e koe hagaao ke he hana tau matagahua. Talimai he magaaho ia, he fakaako ke he Tohi Tapu kua liga fakaako atu ki a koe kua pule a Keriso he mogonei tuga e Patuiki i luga he lagi mo e ke he vaha he hana Pule he tau Afe Tau, to lagaki hake ke he mitaki katoatoa e tau tagata omaoma. (Fakakiteaga 20:5, 6) E, he fakalataha atu e tau manamanatu fou mo e tau mena kua fita he iloa ka omoi atu e maamaaga hau ke he vagahau mea.
4. (a) Ko e heigoa e taha puhala ke fakaako e ‘tau fakatufono he puhala hako ke tohi mo e vagahau’ e vagahau mea, mo e ko e heigoa e tala ne fakamau he Tohi Tapu ne fakaaoga ke fakatai atu ke he mena nei? (e) Ko e heigoa e mena ne tupu he magaaho ne taute gahua a Kiteona mo e hana tau tagata tane ne toko tolu e teau? (i) Ko e tala ne hagaao ki a Kiteona kua fakaako mai e heigoa?
4 Ko e taha puhala ke fakaako e tau ‘fakatufono he puhala hako’ ke tohi mo e vagahau e vagahau mea kua kitia he loto manamanatu e tau mena ne tutupu he Tohi Tapu. Ke fakatai atu ki ai: Kia lali ke ‘kitia mo e logona’ e tala ne fakamau ia Fakafili 7:15-23. Kitiala! Ko e ikifakafili ha Isaraela ko Kiteona ne vevehe tolu hana kautau malolo ke takitaha e teau he tau tagata tane he matakau. Ke he pouli he po, ne ohifo fakaeneene mai a lautolu he Mouga ko Kilepoa mo e viko takai e kemu he tau Mitiana ne momohe. Kua lahi kia e tau kanavakau ha lautolu nei ne toko tolu e teau? Nakai fakakautau. Ko e ha, kua eke ni a lautolu ke futiaki mai e feki fakafiufiu he tau tagata kautau fakatokoluga! Takitaha ni e tagata tane mo e pu hokoia, gati mena utu vai lahi, mo e moli hulu i loto he gati mena ia. Kia fanogonogo la! Ke he fakailoaga, ko e tau tagata tane ne fakalataha mo Kiteona ne ulo ha lautolu a tau pu mo e lipilipi ha lautolu a tau gati mena utu vai. Ti pihia foki e falu ne ua e teau. He lagaki hake oti e tau moli hulu puho ki luga, kua logona e koe a lautolu he kalaga: “Ko Iehova, mo Kiteona!” Kua fakamatakutakuina lahi he mena nei e tau Mitiana! Kua taveli mai a lautolu he tau fale utafano ha lautolu, ne mahafagi lahi mo e matakutaku e tau mata momohe agaia ha lautolu, he onoono atu ke he tau afi puho lupalupa ne lagaki hake e ata malumalu fai tino kua fakapuho mai e matakutaku aitu. He kamata e tau Mitiana ke fehola, ne matutaki tumau e tau tagata tane ha Kiteona ke ulo ha lautolu a tau pu, mo e kua fakafelatauaki he Atua ha lautolu a tau fi ko e taha ke he taha. Ko e fakaakoaga malolo lahi he vagahau mea! Kua maeke he Atua ke laveaki hana tau fekafekau mo e nakai fai matakau kautau malolo. Ke lafi ki ai, “ha ko e mena nakai tiaki e Iehova hana motu ha ko e hana higoa lilifu.”—1 Samuela 12:22.
5. Maeke fefe he tau feleveiaaga Kerisiano ke lagomatai ke hakahaka ha tautolu a puhala vagahau?
5 He magaaho ka fakaako atu ke he tau tagata fakaako e alelo he motu kehe he puhala atu ke he utaaga he puhala ke he vagahau e vagahau, kua lali a lautolu ke muitua fakahako ke he leo mo e tau fakafifitakiaga he kupu he faiaoga. Kua mitaki lahi e tau magaaho ke vagahau e vagahau mea ke he tau feleveiaaga Kerisiano! Ke he tau mena ia kua logona e tautolu e falu he fakailoa mai e lautolu ha lautolu a tau manatu ke he vagahau he kupu moli he Tohiaga Tapu, mo e liga kua eke foki a tautolu ke monuina ke vagahau foki a tautolu ni. Kua matakutaku kia a tautolu kua liga to talahau e tautolu e tau mena hehe? Kua lata nakai ke pihia ha tautolu a manamanatu, ha ko e mena hehe ka fakahako mo e loto molu he ulumotua ne takitaki e feleveiaaga pihia tuga e Fakaakoaga he Kolo Toko he tau fahi tapu takitaha kua maeke ke hakahaka ha tautolu a puhala vagahau. Ha kua pihia, kia fakalataha atu mo e kau auloa ke tali hake tumau he tau feleveiaaga Kerisiano.—Heperu 10:24, 25.
Kua Totolo Fakahaga e tau Mena Nakai Mea ki Loto
6. Ko e ha kua ha ha ai e kehe lahi ke he vaha loto he tau Fakamoli a Iehova mo e tau fakatokatokaaga lotu fakavai ha Kerisitenitome?
6 Ko lautolu ne tukuogo e finagalo ha Iehova mo e fakapuloa hana a Kautu i luga he lagi ne vagahau e vagahau mea ha ko e tau Fakamoli hana. Kua fakailoa e lautolu hana higoa mo e gahua ke “fekafekau fakalataha” atu ki a ia, po ke mo e loto taha. (Sefanaia 3:9, NW) Pete ni kua ha ha i ai ke he tau lotu a Kerisitenitome e Tohi Tapu, ne nakai vagahau e lautolu e vagahau mea po ke ui atu ke he higoa he Atua ne tua ki ai. (Ioelu 2:32) Kua nakai fai fekau kua felauaki e fakaveaga ke he kupu he Tohiaga Tapu ha lautolu. Ko e ha? Ha kua tuku e lautolu e tau mahani toka tuai fakalotu, tau manamanatu fakataitai fakalalolagi, mo e mahani fakamoli fakapolitika ki luga he Kupu he Atua. Ko e ha lautolu a foliaga, amaamanakiaga, mo e tau puhala he utaaga mena kua eke ni ko e tau mena he lalolagi mahani kelea nei.
7. Ko e heigoa e kehe he vaha loto he tau Fakamoli a Iehova mo e tau lotu fakavai ne fakakite mai he 1 Ioane 4:4-6?
7 Ne moli lahi—ko Kerisitenitome, ko e kautu he lotu fakavai he lalolagi katoa—kua nakai vagahau e vagahau taha tuga ne taute he tau Fakamoli a Iehova. Kua fuluola lahi, ki a lautolu ne vagahau e vagahau mea ne tohia he aposetolo ko Ioane: “Ko mutolu, . . . mai he Atua a mutolu, kua kautu foki a mutolu kia lautolu, nukua mua a ia ha ia mutolu, kia ia ha he lalolagi. Ko lautolu, mai he lalolagi a lautolu, ko e mena ia kua vagahau ai a lautolu ke he tau mena he lalolagi; kua fanogonogo atu foki e lalolagi kia lautolu. Ko mautolu, mai he Atua a mautolu, ko ia kua iloa e Atua, kua fanogonogo mai a ia kia mautolu; ko e tagata kua nakai mai he Atua, kua nakai fanogonogo mai a ia kia mautolu.” (1 Ioane 4:4-6) Ne kautu mai e tau fekafekau a Iehova he tau faiaoga fakavai ha ko e Atua, ko ia ne fakalataha mo e hana tau tagata, “nukua mua a ia . . . kia ia [ko e Tiapolo] ha he lalolagi,” ko e kaufakalatahaaga he tau tagata nakai tututonu. Ha ko e tau tagata ne tiaki e kupu moli kua o “mai he lalolagi,” mo e kua ha ha ia lautolu hana agaga kelea, ti “kua vagahau ai a lautolu ke he tau mena he lalolagi; kua fanogonogo atu foki e lalolagi kia lautolu.” Ka ko lautolu ne tuga e tau mamoe kua fanogonogo ki a lautolu ne o mai he Atua, he iloa ko e vagahau he tau tagata a Iehova e vagahau mea he kupu moli he Tohi Tapu ne foaki mai ti kua puhala mai he hana fakatokatokaaga.
8. Ko e heigoa e fakamailoga ke he tagata holifono?
8 Ko e tiakiaga lahi mahaki he kupu moli ne talahau tuai, mo e mena ‘galo nakai iloa he mahani holifono’ kua fita he gahua i loto he senetenari fakamua V.N. Ti hoko mai ai e vaha, ko e tau tagata ne talia—po ke hamutia—e tau tutuaga fakaako i loto he fakapotopotoaga ne fakaako e tau fakaakoaga fakataitai hehe loga. Kua mamao lahi mai ha lautolu a vagahau ke he mena mea. Ti kua tu hake tuai e “tagata holifono,” ko e vahega fekafekau lotu ha Kerisitenitome, kua pipi ke he tau mahani toka tuai he lotu fakavai, tau manamanatu fakataitai fakalalolagi, mo e tau fakaakoaga kua nakai moua mai he kupu he tohiaga tapu.—2 Tesalonia 2:3, 7, NW.
Ne Logona e Vagahau Mea ke he Lalolagi Katoa
9. Ko e heigoa e tau mena ne tutupu fakalotu he vaha he senetenari ke 19 aki?
9 Kua tote lahi a lautolu ko e tau tagata kua matakutaku ke he Atua ‘ke tau fakalahi ma e tua ne lagataha he tuku mai fakaoti ke he tau tagata tapu.’ (Iuta 3) Kua eke ke moua mai i fe e tau tagata tali tonu pihia? He tau senetenari, ne toka he lotu fakavai e tau tagata tokologa i loto he pouligia fakaagaga, ka e iloa he Atua a lautolu ne gahoa ne moua e taliaaga hana. (2 Timoteo 2:19) Mo e he magaaho ia, i loto he tau fahi gahua tupe, fale gahua, mo e tau liliuaga fakakaufakalatahaaga he senetenari ke 19 aki, kua tutu hake e tau leo ne mahino lahi mai he laulahi ha papelu he tau lotu fakavai ne fekehekeheaki. Ko e tau matakau ikiiki ne lali ke totou e tau fakamailoga he tau vaha mo e talahau tuai e liumaiaga ke ua aki ha Iesu, ka e nakai vagahau e lautolu oti e vagahau mea.
10. Ko e matakau fe he “hauaga ke ua aki” ne fifili he Atua ke vagahau e vagahau mea, mo e ko e ha kua kitia moli ai ko e lima ha Iehova kua fakalataha ki a lautolu?
10 He tau 1879, ka e pete ni, kua maali lahi ko e ha fe e leo he “hauaga ke ua aki” kua fifili e Iehova ke vagahau e vagahau mea ke eke mo tau Fakamoli hana. He mogoia ko e matakau tote ne fakaako Tohi Tapu ne takitaki e Charles Taze Russell kua feleveia i Pittsburgh, Pennsylvania, U.S.A. Kua eke a lautolu ke iloa tonu ko e hauaga ke ua aki ha Iesu kua eke ni ke kamata mai hana hokomaiaga ne nakai maeke ke kitia, ko e haia ni i mua e vaha fakaatukehe, mo e to muitua atu ke he mena nei e Pule he tau Afe Tau ha Keriso ka eke ai ke liuaki mai e Parataiso ke he lalolagi, fakalataha mo e moui tukulagi ma e tau tagata ne omaoma. Ia Iulai he tau 1879 kua kamata e tau Tagata Fakaako Tohi Tapu nei ke tohi e mekasini kua iloa he mogonei Ko e Kolo Toko. Kua 6,000 ni e tau tohi ne tufa viko mai he fufuta tohi fakamua ia. Ka kua ‘ha i ai kia lautolu e lima ha Iehova’ mo e tau Fakamoli ia, ha ko e senolo nei ne tohi he mogonei ke he 111 e tau vagahau, ti ka uta fakaloto uho e totouaga kua lomi ke 15,000,000 ke he tau fufuta he tohi takitaha.—Fakatatai Gahua 11:19-21.
11, 12. Ko e heigoa a falu he tau kupu moli he Tohiaga Tapu kua maama e lautolu ne vagahau e vagahau mea?
11 He puhala mai he Tohi Tapu mo e tau tohi fakailoa he tau Fakamoli a Iehova, mo e mua atu mai he tau Kerisiano fakamakutu lahi nei, ne tukuogo e tala mitaki, kua eke e vagahau mea ke iloa he lalolagi katoa. Mo e lalahi ni e tau lagomatai ne moua e lautolu ne vagahau ki ai! He nakai pehe ko e ‘Atua e Atua, ko e Atua a Keriso, mo e ko e Atua e Agaga Tapu’ ke he vagahau nakai iloa he tau tagata ne tali tonu ke he Atua Tolu Taha Tapu, kua talia e lautolu e tuaga he Tohi Tapu ko e Mua ue atu a Iehova, ko e tote hifo a Iesu Keriso ko e Tama Hana, mo e ko e gahuahua malolo he Atua e agaga tapu. (Kenese 1:2; Salamo 83:18; Mataio 3:16, 17) Kua iloa e lautolu ne vagahau e vagahau mea ko e nakai tupu fakahaga mai e tagata he taha mena moui tokolalo, ka e ne tufugatia he Atua fakaalofa. (Kenese 1:27; 2:7) Ne iloa e lautolu ko e fakaoti ni e moui he solu he magaaho ka mate—ko e mena moli kua uta kehe e matakutaku ke he tau tagata mamate. (Fakamatalaaga 9:5, 10; Esekielu 18:4) Ne maama atu ki ai ko e tukuaga noa he tau tagata e hele, nakai ko e mena fakakikiveka vela ne taute he taha atua mahani vale. (Iopu 14:13) Kua iloa foki e lautolu ko e liliu tumai e amaamanakiaga ne foaki atu he Atua ke he tau tagata ne mamate.—Ioane 5:28, 29; 11:25; Gahua 24:15.
12 Ko lautolu ia ne vagahau e vagahau mea kua fakakite e fakalilifu ke he toto mo e moui. (Kenese 9:3, 4; Gahua 15:28, 29) Ne iloa e lautolu ko e moui fakalalolagi ha Keriso kua totogi e taui ko e lukutoto ma e tau tagata omaoma. (Mataio 20:28; 1 Ioane 2:1, 2) Ne nakai liogi a lautolu ke he tau “tagata tapu,” he iloa kua lata ha lautolu a tau liogi ke tuku atu ke he Atua ko Iehova he puhala atu ia Iesu Keriso. (Ioane 14:6, 13, 14) Ha kua kelea ke he Kupu he Atua e tapuaki ke he tau tupua, ne nakai fakaaoga ai e tau mena ta fakafifitaki i loto he ha lautolu a tapuaki. (Esoto 20:4-6; 1 Korinito 10:14) Mo e kalo kehe mai a lautolu he tau mena hagahaga kelea he tau mena fakatemoni ha kua nakai talia e lautolu e tau mena fakataulatua, ha kua kelea foki ke he Tohi Tapu.—Teutaronome 18:10-12; Kalatia 5:19-21.
13. Ko e ha a lautolu ne vagahau e vagahau mea ne nakai pehe ki ai ko e nakai iloa?
13 Ko e tau fekafekau a Iehova, ne vagahau e vagahau mea, ne nakai pehe kua nakai iloa ko fe a lautolu he magaaho he vaha. Ne fakaako atu e Iehova a lautolu kua ha ha i lautolu “ke he vaha ke fakahiku ai,” mo e kua hoko mai a Iesu ko e agaga lilifu lahi ne nakai maeke ke kitia. (Tanielu 12:4; Mataio 24:3-14; 2 Timoteo 3:1-5; 1 Peteru 3:18) He fakalataha mai e tau kautau malolo lahi he lagi i tua hana, hane amanaki ni a Keriso ke holo atu ke he male tau ke fakahoko atu e fakafiliaga he Atua ke he fakatokaaga he tau mena nei. (Tanielu 2:44; Fakakiteaga 16:14, 16; 18:1-8; 19:11-21) E, kua lavelave a lautolu ne vagahau e vagahau mea he tukuogo e tala mitaki he Kautu he Atua i lalo ia Keriso kua teitei ke tamai e tau monuina lahi mahaki ke he tau tagata oti kana ne omaoma ke he lalolagi parataiso. (Isaia 9:6, 7; Tanielu 7:13, 14; Mataio 6:9, 10; 24:14; Luka 23:43) Ko e tau mena oti ia, ko e kili ni hokoia kua hahalu e tautolu! Kua moli lahi ni, ko e mena uho lahi e vagahau mea, ko e alelo fakahelehele lahi mahaki he lalolagi!
14. Ko e heigoa a falu lagomatai ne moua e lautolu ne vagahau e vagahau mea?
14 Ko e tau lagomatai ne moua e lautolu ne vagahau e vagahau mea kua fakalataha ki ai e “mafola he Atua” kua puipui e tau loto mo e tau malolo he loto manamanatu. (Filipi 4:6, 7, NW) Ne omaoma a lautolu ke he tau matafakatufono he Tohi Tapu, ko e mena kua tuku mai e tino malolo, fiafia lahi, mo e loto mamakona kua moua mai he fakafiafia a Iehova. (1 Korinito 6:9, 10) E, mo e tau tagata ne vagahau e vagahau mea kua ha ha i ai e amaamanakiaga he moui tukulagi i loto he lalolagi fou ne mavehe ki ai e Atua.—2 Peteru 3:13.
Kia Fakaaoga Neke Galo
15. To lagomatai mai fefe ki a koe he iloa mitaki e vagahau mea?
15 Kaeke ke vagahau e koe e vagahau mea i loto he lalolagi fou, kua lata ia koe ke iloa lahi ai ti kua eke ni ko e vagahau kua manamanatu a koe ki ai. He magaaho ne fakaako he tagata e vagahau, ne manamanatu fakamua a ia ke he hana alelo fakamua mo e liliu hana tau manatu ke he mena fou. Ka e he hau a ia ke iloa lahi e vagahau fou, kua kamata a ia ke manamanatu ke he mena ia mo e nakai lata ai ke fakaaoga e utaaga fakaliliu. Ti tuga ni, he puhala mai he fakaakoaga fakamakutu, kua maeke ia koe ke maama mitaki e vagahau mea ti iloa e koe ke fakaaoga fefe e tau matafakatufono he Tohi Tapu mo e tau mahani ke fakamitaki aki e tau mena vihi mo e fano tumau ke he “puhala he moui.”—Salamo 16:11.
16. Ko e heigoa kua maeke ke tupu kaeke kua nakai fakaaoga tumau e koe e vagahau mea?
16 Kua lata ia koe ke fakaaoga e vagahau mea tumau, neke galo ia ko e e iloilo ke vagahau fakamitaki ai. Ke fakatai ki ai: Ke he tau tau kua mole, ne fakaako he falu ia tautolu e taha vagahau he motu kehe. Liga kua maeke ia tautolu ke manatu falu kupu he alelo ia ka e liga kua lahi ne galo he nakai fakaaoga tumau e tautolu. Ko e mena taha ia ni ka tupu ke he vagahau mea. Kaeke kua nakai fakaaoga tumau e tautolu, kua maeke ia tautolu ke galo e iloilo ke fakaaoga ai mo e kua eke e mena ia ke tupu mai e tau mena kelea fakaagaga. Ti kua lata ai ia tautolu ke vagahau tumau ai he tau feleveiaaga mo e ke he fekafekauaga Kerisiano. Ko e tau gahua nei, fakalataha mo e fakaakoaga takitokotaha, ka taute a tautolu ke maeke ke hako e tau mena ne talahau mai he vagahau mea. Mo e kua mua atu e aoga he mena ia!
17. Ko e heigoa kua fakatai ki ai kua maeke e puhala vagahau ke fakahao e moui po ke maeke ke tamate?
17 Kua maeke he puhala vagahau ke fakahao e moui po ke maeke ke tamate. Kua fakakite mai e mena nei he vaha felakutaki ke he vaha loto he faoa he tau Isaraela ko Efaraimo mo e ikifakafili ko Iefeta ha Kiliata. Ke fakamailoga e tau Efaraimo ne lali ke fehola mai he taha fahi he Vailele Ioritana, ne fakaaoga he tau Kiliata e kupu fakaata “Sihipoleta,” ko e mena fai matatohi ne fakaleo “sihi.” Ko e tau tagata tane ha Efaraimo ne afo ne lautolu a lautolu ke he tau kautau Kiliata ne leveki e hala he kolo ha Ioritana he pehe “Sipoleta” ke kehe mai he “Sihipoleta,” kua hehe e fakaleo he kamataaga he kupu. Ti ko e mena ne moua, 42,000 he tau Efaraimo ne kelipopo! (Fakafili 12:5, 6) Ti tuga ki ai, ko e tau mena ne fakaako he vahega fekafekau lotu ha Kerisitenitome kua liga tata lahi e leo ke he vagahau mea ki a lautolu ne nakai mahani lahi mo e kupu moli he Tohi Tapu. Ka e ke vagahau ke he puhala fakalotu fakavai ka kitia moli e kelea lahi he aho he ita ha Iehova.
Tumau a Tautolu ke Fefakalatahaaki
18, 19. Ko e heigoa e kakano ha Sefanaia 3:1-5?
18 Hagaao ki a Ierusalema ne nakai fakamoli mai i tuai mo e hana fakataiaga he vaha fou nei, ko Kerisitenitome, kua pehe ai ia Sefanaia 3:1-5 (NW): “Kia matematekelea a ia kua totoko mo e fakatakiva e ia na ia, ko e taone favale! Ne nakai fanogonogo a ia ke he leo; ne nakai talia e ia e akonakiaga. Ko Iehova ne nakai falanaki a ia ki ai. Ke he hana Atua ne nakai fakatata atu a ia ki ai. Ko e hana tau tama tane he patuiki ia ia ne eke mo tau leona tagi. Ko e hana tau ikifakafili ne eke mo tau luko he afiafi kua nakai gali [polohui motua] ato hoko atu ke he pogipogi. Ko e hana tau perofeta ne nakai mahani fakalilifu, ko e tau tagata tane kua nakai maeke ke falanaki ki ai. Ko e hana tau ekepoa ko lautolu foki ni ne holimafafo e mena tapu; kua taute e lautolu e mahani favale ke [he] matafakatufono. Tututonu a Iehova he vaha loto hana; kua nakai eke a ia ke taute e mahani nakai tututonu. He pogipogi ke he pogipogi ne foaki tumau e ia hana fifiliaga he fakafiliaga tonu. Ke he maama he aho kua nakai fakamoli mai ko e noa. Ka ko ia ne nakai tututonu kua nakai iloa e ma.” Ti ko e heigoa e kakano he tau kupu ia?
19 Tokoua a Ierusalema i tuai mo Kerisitenitome he vaha fou nei ne fakafualoto ki a Iehova mo e ne fakatakivaaki e laua a laua ke he tapuaki fakavai. Ko e tau mena kelea ne taute he ha laua a tau takitaki ne moua mai ai e fakapehia favale. Pete ni he hataki atu laga loga e Atua, ne nakai fanogonogo a lautolu ke fakatata atu ki a ia. Ko e ha lautolu a tau tama tane he patuiki kua tuga e tau leona lotokai lahi, loto fakatokoluga lahi he nakai mailoga e mahani tututonu. Ke tuga e tau luko matehoge, ko e ha lautolu a tau ikifakafili ne hehe e fakafiliaga tonu ke he tau emuemu mena. Ko e ha lautolu a tau ekepoa ‘ne holimafafo e mena tapu; kua taute e lautolu e mahani favale ke [he] matafakatufono’ he Atua. Ti kua teitei a Iehova ke ‘fakamaopoopo mai e tau motu, ke fakapotopoto auloa e tau kautu, ke taute ai ke liligi ki luga ia lautolu hana a talahauaga malolo kua nakai fiafia, hana a ita velagia oti kana.’—Sefanaia 3:8, NW.
20. (a) Ko e heigoa kua lata ke taute ke hao mai he aho he ita ha Iehova? (e) Kua maeke fefe ia koe ke amaamanaki ke moua mai e tau monuina tukulagi he Atua?
20 Ko e aho he ita ha Iehova hane mafiti lahi mai. Ke hao ki loto he lalolagi fou he Atua, ke pihia ai, kia fakaako mo e vagahau e vagahau mea mo e nakai fakamaoki. He taute hokoia ni pihia, kua maeke ia koe ke moua e puipuiaga ke he matematekelea fakaagaga he mogonei mo e ke he moumouaga hane hau mafiti ke he lalolagi katoa. Ko e tau Fakamoli a Iehova ne tukuogo e aho he ita he Atua mo e fekau fakafiafia loto he Kautu hana. Kua fiafia lahi a lautolu ke tutala hagaao ke he lilifu he tuaga fakapatuiki hana! (Salamo 145:10-13) Kia eke ke fefakalatahaaki mo lautolu, mo e maeke ai a koe ke amaamanaki ke moua e moui tukulagi mo e falu monuina mai ia Ia ko e Kamataaga he vagahau mea, ko e Iki ne Pule Katoatoa ko Iehova.
To Tali Fefe e Koe?
◻ Ko e heigoa falu he tau puhala ke fakaako e vagahau mea?
◻ Ko e ha kua aoga lahi ai ke vagahau e vagahau mea?
◻ Ko e heigoa kua maeke ke tupu kaeke kua nakai fakaaoga tumau e koe e vagahau mea?
◻ Kua maeke fefe he tagata ke hao mai he aho he ita ha Iehova mo e moua e tau monuina tukulagi?
[Fakatino he lau 26]
Ko Kiteona mo e hana tau tagata tane ne ulo ha lautolu a tau pu mo e lagaki hake ha lautolu a tau moli hulu
[Fakatino he lau 28]
Mai he tau 1879 mo e holo atu ki mua kua taute fakamali lahi ko Charles Taze Russell mo e hana tau kau feoaki ne fakaaoga he Atua ke omoi e vagahau mea
[Tau Fakatino he lau 30]
Ne fakalataha nakai a koe mo e tau Fakamoli a Iehova ke he vagahauaga he vagahau mea?