Lagomatai Fefe he Tua e Tagata Gagao

KO E tau talahauaga he tau mana fakamalolo he Tohi Tapu kua fakamoli ki a tautolu kua kitekite lahi e Atua hagaao ke he ha tautolu a tau momoui, mo e fakakite e lautolu hana malolo ke fakamaulu. Ha ko e tau mana fakamalolo nei kua fakatokoluga aki e Atua mo e tamai ai e olioli lahi, ti kua fai kakano ke huhu, Kua fakagahua agaia nakai e mena fakaalofa noa he fakamauluaga ne mai he agaga Tapu?

Ko e tali ke he huhu ia ko e nakai​—ti ko e kakano kua fakaofo e falu. Ko e tau mana fakamalolo mana pihia he senetenari fakamua kua fakamoli ke he ha lautolu a finagalo. Ne fakakite fakahako mai he The Illustrated Bible Dictionary (Ko e Tohi Fakamaamaaga Tohi Tapu Fakatino): “Ko e kakano he tau fakamauluaga mana ko e kumikumi ke he tau mena fakalotu, nakai ko e fahi malolo tino.” Ko e heigoa falu kakano fakalotu kua fakagahua he tau mana ia?

Ke he taha e mena ko e tau fakamauluaga mana ha Iesu kua fakagahua e kakano he fakakite aki a ia ko e Mesia. He mole atu e hana a mate, kua lagomatai e lautolu ke fakatu ko e fakamonuinaaga he Atua kua ha ha ki luga he tau Kerisiano fou. (Mataio 11:2-6; Heperu 2:3, 4) Fakalaulahi atu, ki mua kua fakatata e lautolu ko e maveheaga he Atua ke fakamaulu e tau tagata oti ke he lalolagi fou to fakamoli. Ne fakamau e tua ha tautolu ha ko e to hoko mai ai e magaaho “to nakai pehe mai foki taha kua nofo ai, Kua gagao au; to fakamagalo ai e tau hala he tau tagata kua nonofo ai.” (Isaia 33:24) He magaaho ne fakamoli ai e tau kakano nei he senetenari fakamua, nakai liu fakaaoga e tau mana.

Kua aoga lahi mahaki ke he tau tutaki ha Iesu he senetenari fakamua kua matematekelea ke he tau tino gagao ne nakai maeke ke fakamaulu he mana. Ko e fakamoliaga mua atu a nei ko e gahua fakamauluaga he mana ha Iesu pihia foki mo e tau aposetolo kua talaga ai ke fakaako e kupu moli mua atu e aoga, nakai ko e foaki he tau gahua fakaekekafo. Ke tauteute taha lagomataiaga ma Timoteo ha ko e tupuaga he tau gagao tumau, ne talia e Paulo e uaina ko e tegavai mitaki, nakai mai he fakamauluaga he tua. Ne taute foki e Paulo e tau mana he fakamauluaga ne ha ha i ai e nakai fiafia mai he “mena mahukihuki ke he tino” ne maeke ke “tatuki” tumau a ia.​—2 Korinito 12:7; 1 Timoteo 5:23.

He magaaho ne mamate e tau aposetolo, ko e mena fakaalofa noa he fakamauluaga kua mole atu foki. Ne fakakite ni e Paulo to tupu e mena nei. Ti tatai ni foki mo e fakapotopotoaga Kerisiano tama mukemuke, he pehe a Paulo: “Ko e vaha tote au ne vagahau au po ke tama tote, ne manamanatu au poke tama tote, ne fakafili au poke tama tote; ka kua lahi au, ti toka ai e tau mahani he tama tote.” Ko e matapatu he hana a fakatataaga ko e tau mena fakaalofa mana he agaga ko e taha vala he tama mukemuke he fakapotopotoaga Kerisiano. Ko lautolu ko e “tau mahani he tama tote.” Ti pihia ne pehi e ia: “To fakaotioti [e tau mena fakaalofa mana] ia.”​—1 Korinito 13:8-11.

Maeke Nakai e Tua ke Lagomatai a Tautolu he Magaaho ka Gagao?

Pete ni he nakai falanaki a tautolu ke he fakamauluaga he tua, kua moli lahi ke lata ke liogi ke he Atua ma e lagomatai he magaaho ka gagao ai a tautolu. Ti nakai koe mena kelea foki ka liogi a tautolu ma e falu ha tautolu. Ka e ko e liogi kua lata ni ke moli mo e fakatatai mo e finagalo he Atua. (1 Ioane 5:14, 15) Nakai fai mena he Tohi Tapu ke moua e tautolu ke liogi ma e fakamauluaga he tua.a Kua lata, ke liogi a tautolu ke he lagomatai fakaalofa ha Iehova he magaaho matematekelea ne fakatupu he tau gagao.

Kua fakakite mai he Tohi Tapu e mena he tau fekafekau fakamoli ne liogi he gagao he magaaho ne pehe ai: “To faihoani a Iehova kia ia ka takoto a ia he hana gagao; kua fuluhi e koe hana mohega oti kana ke he hana gagao.” (Salamo 41:3) Ko e muitua ke he kupu he Atua ke lagomatai a lautolu ne mamahi ke he tau logonaaga he gagao. Ne tohi he salamo: “Ko e hau a fakaalofa-totonu, ma Iehova na e, kua fakatumau ke leveki mai au. He magaaho ne kamata ke loga haku a tau manatu kapaletu i loto ia au, ne kamata hau a tau kupu fakamalolo ke fakamafana haku a solu.”​—Salamo 94:18, 19, NW; kikite foki Salamo 63:6-8.

Ke he tau mena, kua lata a tautolu ke fakakite e tau manamanatuaga mitaki ke he tau mena fakamalolo tino, ti fakatonu mai he Tohi Tapu a tautolu hagaao ke he mena nei. Kua mitaki ke nonofo a tautolu hagaao ke he tau poakiaga he Tohi Tapu ka e aua neke fakalataha ke he fakaaoga fakahehe he tau vai fakagoagoa, ula tapaka, konahia, po ke kai lahi mo e ti ka mui mai mogoia e gagao he magaaho ia, ti fuluhi fakamafiti ke he fakamauluaga he tua. Ko e liogi ma e mana ka lauia he taha e gagao kua nakai fai fakalatahaaga mo e mahani mitaki ke hola ke he mai he gagao, tuga he kai he tau mena kai huhua kaeke ke kua fai po ke kumi atu ke he lagomatai fakaekekafo kua ha ha i ai.

Kua fakaohooho foki he Tohi Tapu a tautolu ke feaki e tau aga manamanatu malolo mitaki ne kua lata mo e ha tautolu a tau malolo tino. Ko e tohi he Tau Fakatai kua fakatonu: “Ko e loto mitaki, ko e moui he tino haia; ka ko e mahekeheke, ko e mena ke popo ai e tau hui motua haia.” “Ko e loto fiafia kua eke mo vai lakai aoga haia; ka ko e loto malipilipi kua magomago ai e tau hui motua.” (Fakatai 14:30; 17:22) Liogi ke he agaga tapu ke fakatolomaki e totoka mo e olioli i loto ia tautolu kua mitaki lahi mahaki ke lata mo e tau momoui tino ha tautolu.​—Filipi 4:6, 7.

Ka e Kua e Fakamauluaga he Tua?

Moli, pete ni e moui monuina e tuaga he tagata, ka e moua agaia ni he gagao. Ti ko e heigoa mogoia? Kua lata kia ke fano ke he tagata fakamaulu he tua mo e amaamanaki ke fakamaulu? E, fai mamahi. Ko e tau tagata fakamaulu he tua he vaha fou nei kua nakai liu fakamaulu noa mo e nakai fai totogi. Ti ko e fakamole he tau tupe ke he tagata fakamaulu he tua kua lata ke fakamole ke he lagomataiaga fakaekekafo kua mua atu e tau uka ki a tautolu. Ke he taha fahi ko e ha kua foaki tupe kia lautolu ne tote e lagomataiaga?

Falu kua tau fetoko: ‘Moli, ko e fakamaulu he tua kua lata ke ha ha i ai e taha tuaga lahi kaeke ke ha ha i ai e tote e pasene ha lautolu ne o atu ke he “tau tagata fakamaulu” ne kua fakamaulu.’ Ka ko e fetokoaga lahi, ko e to maeke he tau tagata fakamaulu he tua ke fakamaulu e tau tagata oti tumau tukulagi. Ko e Encyclopædia Britannica (Tohi Fakamaama mena Peritania) kua talahau mai: “Moli tote lahi e taofiaga kumikumi kua moua ke he tau mena moli ke he fakamauluaga he tua.”

Pihia foki kaeke kua tote e numela kua fakamaulu, nakai ko e fakamoliaga he agaga tapu a nei kua fakagahua. Ke he lauga he Mouga, ne pehe a Iesu: “Tokologa ke pehe mai kia au ke he aho ia, Ko e Iki na e, ko e Iki na e, nakai kia ko e mena perofeta age a mautolu ke he hau a higoa, ko e hau a higoa foki ne vega ai e mautolu ki fafo e tau temoni, ko e hau a higoa foki ne eke aī e mautolu e tau mana loga. Ati tala age ai e au kia lautolu, nakai iloa ni e au a mutolu, kia o kehe a a mutolu ia au, ko mutolu ne eke e tau mahani kelea.” (Mataio 7:22, 23) Talahau foki e Iesu to ha ha i ai a lautolu ne nakai talia he Atua, kua fakaohooho e tau manako ha lautolu kia lautolu ha ko e tau fakamailoga: “Ha ko e mena tutu mai e tau Keriso pikopiko, mo e tau perofeta pikopiko, ti eke e lautolu e tau fakamailoga lalahi mo e tau mana, kia fakahehe aki a lautolu ni kua fifili, kaeke ke maeke ai.” (Matthew 24:24) Moli ni ko e tau tagata fakamaulu he tua kua lata ke fakalataha ke he fakaaogaaga he tau kupu ia, mo e ha lautolu a tau fakailoaga, ke he oleaga tumau ma e tupe, mo e talahauaga ke he tau fakamauluaga fakamana.

Ko lautolu pihia kua nakai muitua ke he tau tuagahui a Iesu. Ko hai, mogoia, kua muitua a lautolu ki ai? Ko e aposetolo ko Paulo ne tuku mai kia tautolu e fakamailoga he magaaho ne pehe a ia: “Ko Satani ni kua faliu e ia a ia mo agelu he maama. Haia ni, nakai ko e mena lahi kaeke ke faliu hana tau fekafekau ke tuga e tau fekafekau he tututonu; ko e ha lautolu a fakahikuaga, tuga e tau gahua ha lautolu haia.” (2 Korinito 11:14, 15) Kaeke ke nakai fakakite he tau tagata fakamaulu he tua e fakamauluaga kua talahaua a lautolu ko e tau tagata fakavai, kua mumui ke he puhala ha Satani, “ko ia kua fakahehe e lalolagi oti.” (Fakakiteaga 12:9) Ka e kua ka ha ha i ai e gahoa e tau mena tupu, kua fakakite e tau fakamauluaga agaia nakai a lautolu? Nakai ki a ko e ha lautolu a “tau mana loga” kua lauia ai ke he malolo ha Satani mo e hana a tau temoni? E, liga ko e mena a ia ka tupu!

Ko e Magaaho he Fakamauluaga Moli

Ko e fakamalolo mana ha Iesu kua fakakite mo e lagomatai he Atua aki e agaga tapu. Ne fakatata e lautolu e hana a finagalo ke fakakatoa e tau malolo kafokia he tagata ke he hana ni a magaaho. Ne mavehe e Iehova ko e “fakamalolo ai e tau motu.” (Fakakiteaga 22:2) Mo e nakai ni fakamaulu e tau gagao ka e uta kehe foki mo e mate. Ne fakamaama e Ioane ne hau a Iesu “kia makai mate taha ne tua kia ia, ka kia moua e ia e moui tukulagi.” (Ioane 3:16) Ko e mitaki ha ia he fakamauluaga ia! To liu foki a Iesu ke fakakite e fakamalolo tuga a lautolu ne fakamau mai he Tohi Tapu ka e ke he fuafuaaga lahi ue atu. To liu foki a ia ke liu fakatutu mai a lautolu ne mamate! (Ioane 5:28, 29) Magaaho fe ka tupu e mena nei?

I loto he lalolagi fou he Atua, ne kua hagaao ke he tau fakamoliaga oti, kua tata lahi mai. Ko e lalolagi fou ia, kua fakaholo ka mole atu e fakatokaaga matahavala nei, kua uta kehe tukulagi, ko e fakamonuinaaga ma lautolu ne loto hako. To nakai ha ha i ai ha mamahi. “To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.” (Fakakiteaga 21:4) Ko e fakatataiaga lahi ha ia ke he mena ne kitia e tautolu ne viko takai ia tautolu!

Ko e mena ia, neke gagao, liogi ke he Atua ma e lagomatai. Ke he gagao po ke malolo, fakaako ko e fefe e moui tukulagi mo e nakai fai gagao ko e mena moli lahi ni. Kia ati hake e tua ke he maveheaga moli he Atua ke fakaako e tau mena kehekehe i loto he Tohi Tapu. Fakaako ko e fefe e finagalo he Atua ke he mena nei kua tata lahi e fakamoliaga hagaao ke he hana a fakaholoaga. Kia nakai fai fakauaua, ha ko e Kupu he Atua kua fakakite moli kia tautolu: “To fakaoti tukulagi e ia e mate; to holoholo kehe foki he Iki ko Iehova e tau hihina mata mai he tau mata oti; to uta kehe foki e ia e mena ke mā ai e hana motu ke he lalolagi oti ni; ha kua vagahau mai ai e Iehova.”​—Isaia 25:8.

[Tau Matahui Tala]

[Fakatino he lau 7]

Ko e tau fakamauluaga mana ha Iesu kua fakamoli e ha lautolu a finagalo

[Fakatino he lau 8]

Kua liu a Iesu ke fatiaki mo e lafilafi loga atu e tau fakamauluaga mana