Taute kia he Tau Fakamoli a Iehova e fakamalolō fakamana?

Kua nakai taute he Tau Fakamoli a Iehova e fakamalolō fakamana. Tuga a Iesu, ne talitonu a lautolu ko e ha lautolu a matapatu fekau ke fakamatala e tala mitaki hagaao ke he Kautu he Atua. Talitonu foki a lautolu nukua kitia e tau Kerisiano mooli, nakai he fakamalolō fakamana, ka e he taha mena ne mua ue atu e aoga.

Ke iloa mooli, ko e fakamaulu fakaalofa hofihofi he tau tagata gagao he senetenari fakamua V.N. ne taute e Iesu Keriso kua aoga lahi mahaki ki a tautolu oti. Ati fakamau e ia e fakamooliaga i lalo he pule haana ko e Patuiki he Kautu he Atua, “to nakai pehe mai foki taha kua nofo ai, Kua gagao au.”—Isaia 33:24.

Ka e kua mogoia e vahā nei? Ko e tau tagata fakamalolō fakamana he Kerisitenitome mo e pihia foki e tau lotu nakai ko e tau Kerisiano ne talahau ke taute e tau fakamalolō fakamana. Ka e totoko fakalahi a Iesu ke he tau tagata ne talahau ke ‘eke e tau mana loga’ ha ko e higoa haana. Ne tala age a ia ki a lautolu: “Nakai iloa ni e au a mutolu, kia o kehe a a mutolu ia au, ko mutolu ne eke e tau mahani kelea.” (Mataio 7:22, 23) Ti, ko e tau mana ne liga taute he tau tagata fakamalolō fakamana he vahā nei kua fakakite mooli kia kua talia po ke monuina mai he Atua?

Manamanatu ke he mena ne talahau he Tohi Tapu hagaao ke he fakamalolōaga ne taute e Iesu. He fakatatai e fakamauaga faka-Tohi Tapu ia mo e tau puhala he tau tagata fakamalolō fakamana he vahā nei, to iloa mooli e tautolu po ke mai he Atua e fakamalolō fakamana he vahā nei.

Ne nakai fakaaoga e Iesu e fakamalolōaga mo puhala ke futiaki e tau tutaki po ke toloaga tagata. Ka e taute e ia e tau fakamalolōaga loga ne nakai kitia ke he tau tagata. Lagaloga ne pehē a ia ke he tau tagata ne fakamalolō e ia ke ua tala age ki a taha.—Luka 5:13, 14.

Nakai totogi tupe a Iesu ma e tau mana haana. (Mataio 10:8) Ti kautū tumau foki e tau gahua haana. Ko lautolu oti ne gagao ne o mai ki a ia kua malolō katoatoa, ti nakai falanaki e fakamalolōaga ke he tua he tagata. (Luka 6:19; Ioane 5:5-9, 13) Ti liu fakatu mai foki a lautolu ne mamate!—Luka 7:11-17; 8:40-56; Ioane 11:38-44.

Pete he taute e ia e tau gahua mana nei, ne nakai hagaaki e fekafekauaga ha Iesu ke moua e tau tagata liliuina ha ko e tau magaaho ne fakakite e tau logonaaga he tau gahuahuaaga fakamana. Ka ko e matapatu he gahua haana ke fakapuloa e tala mitaki he Kautu he Atua. Ne fakatokatoka e Iesu e tau tutaki haana ke taute tutaki, ke fakaako atu ke he falu hagaao ke he amaamanakiaga he moui mitaki katoatoa i lalo he Kautu he Atua.—Mataio 28:19, 20.

Mooli, ne moua he falu tutaki ha Iesu he senetenari fakamua e tau mena fakaalofa pauaki he fakamalolōaga, ka e to fakahiku e tau mena nei. (1 Korinito 12:29, 30; 13:8, 13) Kua kitia e tau Kerisiano mooli he vahā nei, nakai ha ko e tau gahua he fakamalolōaga, ka ko e pipiaga he fakaalofa foaki noa. (Ioane 13:35) Ko e tau fakamalolō fakamana he vahā nei kua nakai moua e magafaoa mooli he tau Kerisiano mai he tau motu mo e tau feakiaga oti nukua pipi fakalataha he fakaalofa pihia.

Ka e ha ha ai e matakau he tau Kerisiano kua kaufakalataha ha ko e pipiaga malolō lahi he fakaalofa ati nakai talia a lautolu ke fakamamahi e taha mo e taha—po ke ha tagata—pihia foki he tau magaaho favale lahi mahaki he totokoaga he tagata. Ko hai a lautolu ia? Ko e Tau Fakamoli a Iehova. He lalolagi katoa, kua talahaua a lautolu he fakakite e fakaalofa tuga he Keriso. He taute e tau tagata he tau motu, aga, mo e tau feakiaga kehekehe ke kaufakalataha ko e mana, ka fakatai ki ai, ti kua maeke ni ha ko e agaaga tapu he Atua. Ko e ha he finatu ke he taha he tau feleveiaaga ha lautolu ke kitia ni e koe?