Kua Taute Agaia Kia e Tau Fakamalolo Mana?
“TALIA a Iesu mo e kia malolo ai!” Ko e tau kupu pehenei ne takitaki atu a Alexandre, ko e tagata he lotu Evagelia, ke talitonu ko e inu vai lakau ma e gagao hana ka fakakite e noa mo e tua. Ati taofi mau ai a ia to ta mai ni he hana tua e malolo mana ne lata mo ia. Ko Benedita, ko e Katolika makutu lahi, kua amotia lahi e loto he magaaho ne logona e ia hagaao ke he tau fakamaloloaga mana he faituga i Aparecida do Norte, he motu ha São Paulo, Parasili. Kua fakaaoga ai e falu kupu mana ne fakaako age he aniti hana ki a ia, ne liogi a Benedita ke he Our Lady ha Aparecida, ki a Anthony, mo e falu he “tau tagata tapu” ma e mana ke fakamalolo aki e tau tagata gagao.
Ti kitia foki he fakahiku he senetenari ke 20 aki, kua tokologa agaia e tagata ne talitonu ke he tau fakamalolo mana—ka e ko e ha? Tuga kua ita e falu he magaaho ka nakai maeke e tau ekekafo ke fakatotoka e gagao, mamahi, mo e matematekelea he tau fakahele ha lautolu, mahomo atu ke he ha lautolu a fanau. Ko lautolu ne lauia he tau gagao kelea ka liga logona hifo ha ko e tau uka he tau vai lakau he vaha fou nei, ko e nakai fai mena a lautolu ke galo he kumikumi atu ke he tau fakamaloloaga he tua. Kua kitia he falu he tivi e tau lotu mo e tau tagata kehekehe ne foaki e tau fakamaloloaga ma e AIDS, fakaagitau, kanesa, ulu vikoia, toto tokoluga, mo e loga foki he falu gagao. Pete ni ko e tua a lautolu ke he tau mena ia po ke nakai, liga to kumi atu a lautolu ki ai ko e puhala fakahiku ma e lagomatai. Ka e, ha ha agaia e falu ne talitonu ko e fakatupu he tau agaga kelea e gagao ha lautolu ka liga ke logona hifo ko e tau vai lakau toka tuai kua noa mo e malolo ke lagomatai a lautolu.
Ke he taha fahi, kua ha ha ai a lautolu ne totoko fakamalolo, mo e fakatikai foki, e manatu he fakamalolo mana he “tau tagata tapu” ne mamate po ke tau tagata momoui ne fakagahuahua ai. Hagaao ai ke he Jornal da Tarde, ne logona hifo he tagata kumikumi puhala puipui ko Dráusio Varella ko e taofiaga kua “fakafiufiu e tua he tau titagata mo e ha lautolu ne matematekelea.” Ne lafi atu a ia: “He falanaki ke he tau mana, liga tokologa ka tiaki e tau tuluiaga fakaekekafo ne mua e aoga ha ko e tau tagata fakavaia nei.” Mo e fakamaama mai he The New Encyclopædia Britannica: “Ko e tau fakamaloloaga fakalotu he vaha i tuai kua fakalataha atu ke he tau matakavi tapu mo e tau aga fakalotu, mo e kua taute ai e saiene fakaekekafo ke tuku age e tau fakamaloloaga ia ke he fakaholoaga fa mahani he manatu ne gahua i lalo he tau tutuaga mitaki.” Ka e, tokologa agaia ne talitonu kua fakamalolo moli a lautolu ha ko e mana. Kia lautolu, kua gahua moli e fakamaloloaga!
Ko lautolu ne mahani mo e Tohi Tapu kua iloa na fakamalolo e Iesu Keriso e tau tagata gagao he tau magaaho loga, ti taute e mena nei ha ko e “mana he Atua.” (Luka 9:42, 43) Ati liga manamanatu a lautolu, ‘Kua gahuahua agaia kia e mana he Atua mo e taute e tau fakamaloloaga mana he vaha nei?’ Kaeke ke pihia, ti ko e ha e tau laliaga ke fakamalolo ne kua kaumahala ai ke ta mai e tau fua ne mavehe? Kua pihia kia ha kua nakai lahi e tua he tagata gagao po ke ha kua nakai lahi hana a mena fakaalofa? Kua hako kia e Kerisiano ke kumi e fakamalolo mana he magaaho ka matematekelea a ia mai he gagao mamahi lahi po ke tuga nakai fai tului? Mo e to liu nakai e tau faga fakamalolo mana ne taute tumau e Iesu ke kitia foki? Maeke ia koe ke moua e tau tali ke he tau huhu aoga nei he vala tala ka mui mai.