Ko e Ha Ha Hinei he Mesia mo e Hana a Pule

“Ko Iesu hanā, kua ta hake ia mutolu ke he lagi, to liu mai foki pihia a ia, tuga hana haele atu ke he lagi ne kitekite a mutolu ki ai.”​—GAHUA 1:11.

1, 2. (a) Ne fakamafana fefe he tau agelu tokoua e tau aposetolo a Iesu he magaaho ne haele hake a ia ki luga ha lagi? (e) Ko e heigoa e tau huhu ne tutu hake ha ko e amaamanakiaga ke he liu mai a Keriso?

KUA hogofulu ma taha e tau tagata tane ne tutu he fahi uta he kaukau Mouga ­a Olive, ne onoono hake ki luga he lagi. He magaaho ku kua mole ne malagaki hake a Iesu Keriso mai ia lautolu, kua hane fae galo mai hana tino ati maluia he aolu. He tau tau ne fakalataha a lautolu mo ia, ne kitia he tau tagata tane nei a Iesu he taute e tau fakamoliaga loga ko e Mesia a ia; ne hoko foki ha lautolu a tau momoui ke he loto malipilipi ke he mate hana mo e fiafia lahi mahaki ha ko e hana liu tu mai. Ka ko e mogonei kua galo tuai a ia.

² Ne amanaki ni ti tutu e tau agelu ua mo e vagahau e tau kupu fakamafanatia nei: “Ko e tau tagata Kalilaia na e, ko e heigoa e mena ne tutu ai a mutolu, mo e kitekite atu ke he lagi? Ko Iesu hanā, kua ta hake ia mutolu ke he lagi, to liu mai foki pihia a ia, tuga hana haele atu ke he lagi ne kitekite a mutolu ki ai.” (Gahua 1:11) Kua fakamafanatia ha​—ko e haeleaga hake a Iesu ki luga he lagi kua nakai pehe kua oti tuai a ia mo e lalolagi mo e tau tagata! E, kua kehe ai, to liu mai a Iesu. Kua nakai fakauaua ne fakapuke ai he tau kupu nei e tau aposetolo mo e amaamanakiaga. Kua miliona e tau tagata he vaha nei ne pipiki ke he maveheaga a Keriso ke liu mai, ko e mena aoga lahi mahaki. Ne talahau he falu ke he mena ia ko e “Haele Maiaga ke Ua aki” po ke “Hauaga.” Ka e kua tuga kua nakai loto maama e tokologa hagaao ke he kakano moli he liu maiaga a Keriso. Ke he puhala fefe ne liu mai ai a Keriso? He magaaho fe? Mo e to fakalauia fefe he mena nei e tau momoui ha tautolu he vaha nei?

Ko e Puhala he Liu Maiaga a Iesu

3. Ko e heigoa ne tali tonu e tau tagata tokologa ki ai kua hagaao ke he liu mai a Keriso?

³ Hagaao ke he tohi An Evangelical Christol­ogy, “ko e haele maiaga ke ua aki po ke liu maiaga a Keriso (parousia) kua fakatu e kautu he Atua, ati oti ai mo e ke kitia maaliali, mo e ki tukulagi tukumuitea.” Ko e taofiaga ne taofi mau he tau tagata loga ko e to kitia maaliali e liu maiaga a Keriso, to kitia he tau mata he tau tagata oti he palaneta. Ke lagomatai e manatu nei, kua tuhi atu e tokologa ki a Fakakiteaga 1:7, kua totou pehe: “Kitiala, kua haele mai a ia mo e tau aolagi, to kitia foki a ia he tau mata oti kana, katoa mo lautolu ne hoka a ia.” Ka kua kakano kia e kupu nei ke uta tuga e mena he moui nei?

4, 5. (a) Ne iloa fefe e tautolu kua nakai kakano e Fakakiteaga 1:7 ke he fakakakanoaga fakahako he moui nei? (e) Ne fakamoli fefe he tau kupu ha Iesu e maamaaga nei?

⁴ Kia manatu, ne tuku mai e tohi ha Fakakiteaga “ke he tau fakamailoga.” (Fakakiteaga 1:1, NW) Ti kua lata mogoia ke eke ko e mena fakatai e vala taha nei; ha kua maeke fefe mogoia a “lautolu ne hoka a ia” ke kitia a Keriso he liu mai? Ha kua teitei ke 20 e tau senetenari kua mole he mamate a lautolu! Ko e taha mena foki, ne pehe e tau agelu ko e to liu mai a Keriso he puhala kua “tuga” ne fano kehe a ia. Ka e fano kehe fefe a ia? Kua miliona kia ne fakalataha ke kitekite? Nakai, kua gahoa ni a lautolu ne fakamoli ne kitia e mena ne tupu. Mo e he magaaho ne vagahau e tau agelu ki a lautolu, ne kitia mata moli nakai he tau aposetolo a Keriso he fenoga atu a ia ati hoko atu ke he lagi? Nakai, ne ufi he aolu ti malutia a Iesu ke he tau mata ne onoono atu. He taha magaaho ne mole atu, kua liga ne hu atu a ia ke he lagi he tau agaga tuga e mena moui agaga, ko e mena kua nakai maeke ke kitia he tau mata he tagata. (1 Korinito 15:50) Ti kua lahi ni ke kitia he tau aposetolo e kamataaga he fenoga a Iesu; ka e nakai maeke a lautolu ke kitekite atu ke he fakahikuaga, ko e hana liu atu ki luga he lagi ke ha ha i mua he Matua hana, ko Iehova. Kua maeke ni a lautolu ke iloa e mena nei mai he tau mata he ha lautolu a tua.​—Ioane 20:17.

⁵ Kua fakaako mai he Tohi Tapu to pihia e puhala ka liu mai a Iesu. Ne talahau fakamua e ia ni ko Iesu ato hoko hana mate: “Toe tote ti nakai kitia he lalolagi au.” (Ioane 14:19) Ne talahau foki e ia “nakai hau e kautu he Atua mo e kitia.” (Luka 17:20) Ti ko e heigoa mogoia e kakano, ‘to kitia foki he tau mata oti kana a ia’? Ke tali, kua lata mua a tautolu ke maama maaliali e kupu ne fakaaoga e Iesu mo e hana tau tutaki kua hagaao ke he hana liu mai.

6. (a) Ko e ha e tau kupu tuga e “liu mai,” “hoko maiaga,” “hauaga,” mo e “haele maiaga” kua nakai katoatoa lahi e tau liliuaga ke he kupu Heleni pa·rou·siʹa? (e) Kua fakakite he heigoa kua tumau lahi e leva he pa·rou·siʹa po ke “ha ha hinei,” mai he tau mena tutupu fakaku?

⁶ Hanai e moli, nakai ni ko e “liu mai” hokoia a Keriso ka e mua atu e tau mena ne taute e ia. Kua fakahaha ni e kupu ia, tuga e “haele maiaga,” “hoko maiaga,” po ke “hauaga,” ke he mena taha ne tupu ke he magaaho ku. Ka kua lahi mahaki e kakano he kupu Heleni ne fakaaoga e Iesu mo e hana tau tutaki. Ko e pa·rou·siʹa, e kupu ia ko e kakano fakahako he moui nei “ko e ha ha he tapa” po ke “kua ha ha hinei.” Kua talia e tau tagata fakaako tokoluga kua fakalataha i loto he kupu nei nakai ni ko e hoko maiaga hokoia ka ko e magaaho ne mole mai ne ha ha hinei​—tuga e ahiaga ke he Motu he taha tagata he magafaoa patuiki. Nakai ko e mena tupu fakaku ka ha ha hinei; ka ko e vaha pauaki, ko e vaha ne fakamailoga e magaaho. Ia Mataio 24:37-39 (NW), ne pehe a Iesu “to ha ha hinei [pa·rou·sia] e Tama he tagata” to eke ai ke tuga e “tau aho a Noa” ne hoko ke he tapunuaga he Fakapuke. Ne talaga e Noa e vaka mo e hataki atu ke he tau tagata mahani kelea ke hogofulu e tau tau ato hoko mai e Fakapuke mo e holoholo kehe e fakatokaaga kolokolovao he lalolagi. Ti kua pihia foki mogoia, ka ha ha hinei a Keriso ti nakai kitia mata mo e to mau tumau ke he falu he tau tau ne hogofulu ato tapunu aki e fakaotiotiaga lahi mahaki.

7. (a) Ko e heigoa kua fakakite moli kua nakai maeke ke kitia he tau mata he tau tagata e pa·rou·siʹa? (e) Fefe mo e ke he magaaho fe ka fakamoli e tau tohiaga tapu kua fakamaama e liu mai a Keriso kua nakai maeke ke kitia mata moli he “tau mata oti kana”?

⁷ Kua nakai fakauaua, kua nakai maeke e tau mata moli he tagata he moui nei ke kitia e pa·rou·siʹa. Kaeke kua pihia, ko e ha kua maeke a Iesu ke fakamole lahi e tau magaaho, tuga e mena ka kitia e tautolu, ke age ke he hana tau tutaki e fakamailoga ke lagomatai aki a lautolu ke kitia e magaaho nei, ka ha ha hinei?a Ka e pete ni, ka haele mai a Keriso ke fakaotioti e fakatokaaga nei he lalolagi a Satani to kaputia e tau tagata oti ke kitia hana magaaho ka ha ha hinei. Ko e magaaho ia ka “kitia foki a ia he tau mata oti kana.” To maeke foki e tau tagata ne totoko ki a Iesu ke iloa, ofomate foki a lautolu, ko e mena moli e pule a Keriso.​—Kikite Mataio 24:30; 2 Tesalonia 2:8; Fakakiteaga 1:5, 6.

Ne Kamata he Magaaho Fe?

8. Ko e heigoa e tau mena tutupu kua fakamailoga e kamataaga ko e ha ha hinei a Keriso, mo e tupu e mena ia i fe?

⁸ Kua kamata ai e ha ha hinei he Mesia mo e mena tupu kua fakamoli aki e matapatu tala ne fa lagaki tumau mai he tau perofetaaga faka-Mesia. Ne fakafoufou a ia mo Patuiki i luga he lagi. (2 Samuela 7:12-16; Isaia 9:6, 7; Esekielu 21:26, 27) Ne fakakite e ia ni ko Iesu to matutaki hana ha ha hinei ke he hana tuaga patuiki. He falu fakataiaga, ne fakatatai e ia a ia ni ke he iki kua toka hana kaina mo e tau tupa, ti fenoga atu ke he “motu mamao” he vaha leva ke moua mai i ai hana “fakatu . . . mo iki.” Ne taha e vala tala fakatai pihia ne age e ia ke tali aki e tau huhu he tau aposetolo hana hagaao ke he kamataaga he pa·rou·siʹa; kua taha foki ne age e ia ha kua “mena piko na lautolu ko e hoko mai ne fai e kautu he Atua.” (Luka 19:11, 12, 15; Mataio 24:3; 25:14, 19) Ke he vaha he magaaho ne nofo a ia he lalolagi tuga e tagata, kua mamao lahi hana fakauluaga, ko e mena ka tupu he “motu mamao” i luga he lagi. Ati hoko he magaaho fe e mena ia?

9, 10. Ko e heigoa e fakamoliaga i ai kua pule a Keriso he magaaho nei i luga he lagi, mo e ne kamata he magaaho fe a ia ke pule?

⁹ He magaaho ne huhu e tau tutaki a Iesu ki a ia: “Ko e heigoa e fakamailoga he hau a ha ha hinei mo e fakaotiaga he fakatokaaga he tau mena nei?” Ne fai tali a Iesu he age ki a lautolu e fakamaamaaga fakamatafeiga he vaha i mua. (Mataio, veveheaga 24, NW; Mareko, veveheaga 13; Luka, veveheaga 21; kia kikite foki 2 Timoteo 3:1-5; Fakakiteaga, veveheaga 6.) Kua eke ai e fakamailoga nei ko e fakatino fakamatafeiga ke he vaha matematekelea. Ko e vaha ne fakamailoga he tau tau he lalolagi katoa, mahani holifono kua holo ki mua, tupu fakahaga e kelea he moui fakamagafaoa, tau tatalu he tau gagao, hoge, mo e tau mafuike​—nakai ko e tau mena tutupu he matakavi ka ko e tau mena hagahaga kelea ne kaputia e lalolagi katoa. Kua fa logona tumau nakai e mena nei? He mole atu e tau aho oti kua fakakite tonu kua tatai lahi e senetenari ke 20 aki mo e fakamaamaaga a Iesu.

¹⁰ Kua talia e tau tagata tohia fakamauaga tuai ko e tau 1914 e magahala ne faliu mai he fakamauaga tuai he tagata, ko e tau kua aoga ke mailoga he tupu e tau mena vihi loga nei ne kamata ke nakai fai mataofi, ti kua holo ki mua ke he lalolagi katoa. E, kua fakamoli he tau mena tutupu moli he lalolagi e perofetaaga he Tohi Tapu ti kua tuhi oti kana ke he tau 1914 ko e tau ne kamata a Iesu ke pule ko e Patuiki i luga he lagi. Ke lafi ki ai, kua foaki mai he perofeta i loto he Tanielu veveheaga 4 a Tanielu e fakamoliaga ko e tau mena ne tutupu fakapapale kua takitaki atu a tautolu ke he tau taha ia​—1914​—ko e magaaho ne kamata e Patuiki ne kotofa e Iehova ke taute hana pule.b

Ko e ha e Magaaho Matematekelea?

11, 12. (a) Ko e ha kua uka ke he falu ke tali tonu kua pule a Keriso i luga he lagi he magaaho nei? (e) To fakatai fefe e tautolu e mena ne tupu he mole mai he fakafoufou a Iesu mo Patuiki?

¹¹ Ka kua manamanatu e falu, ‘Ko e ha ne matematekelea e lalolagi kaeke kua pule e Mesia mai i luga he lagi? Kua nakai lauia mitaki kia e pule hana?’ Liga to lagomatai mai he fakataiaga. Kua pule e pelesiteni mahani kelea ke he motu. Ne fakatu hake e ia e fakatokaaga kolokolovao ne hoko atu e malolo kelea ke he tau mena oti he motu. Ka kua taute e vili; ti kua mua e tagata tane mitaki. Ti ko e heigoa mogoia? Ke tuga e mena ne tutupu he falu he tau motu ne pule tagata, kua fai magaaho kua toka tuga ke he falu mahina ke taute fakamitaki fakamua ato kamata pauaki e feua he pelesiteni fou. To taute mena fefe e tau tagata tane tokoua nei he vaha he magaaho ia? To amanaki kia e tagata tane mitaki ke totoko mo e moumou e tau mena kelea oti kana ne fakatu hake he tagata fakamau ke he motu katoa? To nakai kia onoono fakalahi fakamua a ia ke he taone mua, fakatu hake e kapeneta fou mo e fakailoa atu ke he kaukelea mo e tau tagata ne lagomatai e pelesiteni fakamua. Ke he puhala ia, he magaaho ka hoko atu hana pule katoatoa, kua maeke a ia ke gahua mai he nofoaga malolo kua mea mo e gahuahua mitaki. Ka ko e pelesiteni kolokolovao, kua nakai kia to fakaaoga e ia e magaaho ne toe ki a ia ke moua e tau koloa kaiha kua maeke a ia ke uta ato galo oti e malolo hana?

¹² Ti kua pehe kua teitei tatai ai e mena ia mo e pa·rou·siʹa. Kua fakakite mai he Fakakiteaga 12:7-12 he magaaho ka taute a Keriso mo Patuiki i luga he lagi, ne tolo hifo fakamua e ia a Satani mo e hana tau temoni mai he lagi, ti kua fakamea ai e nofoaga he fakatufono Hana. He moua e matematekelea he kaumahala ne kua leva e tatali ki ai, ne mahani fefe a Satani he magaaho “kua tote hana vaha” ato fakagahua e Keriso hana pule katoatoa ke he lalolagi? Ke tuga e pelesiteni kolokolovao ia, ne lali a ia ke moua e tau mena oti kua maeke a ia ke uta, mai he fakatokaaga tuai nei. Nakai tutuli a ia ke he tupe; kua tutuli a ia ke he tau momoui he tau tagata. Ne manako a ia ke maeke ke omoi kehe e tokologa he tau tagata mai ia Iehova mo e Hana Patuiki ne pule.

13. Ne fakakite fefe he tau Tohiaga Tapu e kamataaga he pule a Keriso mo e to eke aki ko e magaaho matematekelea he lalolagi nai?

¹³ Ti kua nakai ofo ai mogoia, ko e kamataaga he pule he Mesia kua kakano ai ko e magaaho “oi fakaalofa . . . ke he fonua mo e tahi.” (Fakakiteaga 12:12) Ti kua tatai e mena ia ke he mena ne fakakite mai he Salamo 110:1, 2, 6 ko e to kamata hana pule ‘ki mua he tau fi hana.’ To tukituki katoatoa e ia e “tau motu loga,” fakalataha mo e tau mena oti kana he fakatokaaga kolokolovao nei a Satani, ti oti pitopito!

He Magaaho ka Pule e Mesia ke he Lalolagi

14. Ko e heigoa ka maeke e Mesia ke taute he mole he fakaoti e ia e fakatokaaga mahani kelea nei a Satani?

¹⁴ He mole atu he moumou e ia e fakatokaaga a Satani mo lautolu oti kana ne lagomatai ki ai, ti kua hoko tuai e Patuiki faka-Mesia, ko Iesu Keriso ke tu he tuaga ke fakamoli e tau perofetaaga homo ue atu he Tohi Tapu kua fakamaama mai hana Pule Afe Tau. Kua lagomatai he Isaia 11:1-10 a tautolu ke kitia ko e faga pule fefe e Mesia. Kua talahau mai he Isaia 11 kupu 2 ki a tautolu to ha ha ia ia e “Agaga a Iehova; ko e Agaga he iloilo mo e pulotu; ko e Agaga he fifiliaga mo e malolo.”

15. Ko e heigoa e kakano he ‘agaga malolo’ he pule faka-Mesia?

¹⁵ Kia manamanatu ko e heigoa e kakano he ‘agaga malolo’ ke he pule a Iesu. He magaaho ne pule a ia ke he lalolagi, kua ha ha ia ia e taha vala malolo mai ia Iehova, kua maeke ai a ia ke taute e tau mana. Mo e fakakite e ia kua loto lahi e manako hana ke lagomatai e tau tagata, he pehe mai, “Na loto au ki ai.” (Mataio 8:3) Ka ko e fakakite fakamua ni e tau mana hana ke he mena ka taute e ia he magaaho ka pule mai he lagi. To fakagahua mai e Iesu e tau mana ke he lalolagi katoa! Ko lautolu ne gagao, ne matapouli, ne teliga tuli, ne pakia, mo e kulikuli ka fakamaulu ti oti tukulagi. (Isaia 35:5, 6) To loga lahi e tau mena kai, to tufatufa fakamitaki, ka fakaoti e hoge tukulagi. (Salamo 72:16) Ka e kua a lautolu oti kana e tau miliona i loto he tau tukuaga kua fiafia e Atua ke manatu ki ai? To fakalataha ke he “malolo” a Iesu e fakaliliu tutu maiaga ha lautolu, ti kua age ki a lautolu takitokotaha e magaaho ke momoui tukulagi i loto he Parataiso! (Ioane 5:28, 29) Ka e pete ni, to loto fakatokolalo lahi mahaki tumau e Patuiki faka-Mesia pete ni foki ka moua e malolo lahi mahaki nei. To moua e ia e “fiafia . . . ke he matakutaku ki a Iehova.”​—Isaia 11:3.

16. To eke mo faga Fakafili fefe e Patuiki faka-Mesia, mo e to fakakehekehe fefe he mena ia e fakamauaga he tau tagata fakafili?

¹⁶ To eke foki e Patuiki nei mo Fakafili mitaki katoatoa. To “nakai fakafili ai e ia ke lata mo e kitekite atu he hana tau fofoga; to nakai akonaki foki e ia ke lata mo e logona he hana tau teliga.” Ko e tau tagata fakafili fefe, he vaha tuai, po ke he mogonei, kua maeke ke fakamaama ki ai ko e pihia a ia? Kua eke foki e tagata gahua fakamitaki lahi ke maeke ke fakafili ni hokoia ke he tau mena kua kitia e ia mo e logona, he fakaaoga e pulotu po ke loto maama kua iloa e ia. Ti kua maeke e tau fakafili mo e tau tagata fono fakafili he lalolagi nei ke mapelu po ke fakaloto goagoa he tau puhala tutala iloilo kelea, tau lagatau he hopoaga, po ke tau fakamoliaga ne fekeheaki. Ne famahani lahi ko e tau tagata muhukoloa mo e malolo lahi kua maeke ke totogi e puipuiaga katoatoa, ti kua fakatau ai e fakafili tonu. To nakai pihia i lalo he Fakafili faka-Mesia! Kua totou e ia e tau loto. To nakai fai mena kua galo ke nakai kitia e ia. Ko e fakafiliaga tonu, ne uta fakalataha mo e fakaalofa mo e fakaalofa hofihofi noa, ka nakai eke mo mena fakafua. To kautu tumau ni hokoia.​—Isaia 11:3-5.

Lauia Fefe a Koe he Pule Hana

17, 18. (a) Ko e heigoa e fakatino kikila lahi he vaha i mua he tau tagata ne ta fakatino mai ia Isaia 11:6-9? (e) Hagaao fakamua ki a hai e perofetaaga fakamua nei, mo e ko e ha ne pihia ai? (i) To fai fakamoliaga moli fefe he moui nei e perofetaaga nei?

¹⁷ Ti kua maama lahi, kua ha ha i luga he tau tagata hana e malolo lahi mahaki he pule he Mesia. Kua hiki ai e tau tagata. Kua fakakite mai ia Isaia 11:6-9 ko e lahi fefe e tau hikiaga ia. Kua ta fakatino mai he perofeta nei e fakatino kua amotia e loto ke he tau manu kelea vale ne fa kai e falu manu​—tau urosa, tau luko, tau nameri, tau leona, tau asipi​—ne nonofo fakalataha mo e tau manu fao kua nakai vale he loto kaina mo e nonofo pihia foki mo e tau fanau. Ka e nakai fakahagahaga kelea e lautolu ko e kau ne fa fekaiaki! Ko e ha? Kua tali mai he Isaia 11 kupu 9: “Nakai mahani kelea a lautolu, to nakai moumou mena ai e lautolu ke he haku a mouga tapu oti; ha ko e mena to puke e lalolagi ke he maama kia Iehova, tuga ne toka kua ūfia ke he puke tahi.”

¹⁸ E moli, kua nakai lauia e “maama kia Iehova” ke he tau manu huifa moli he moui nei; ti kua lata e tau kupu nei ke hagaao ke he tau tagata. Ne lagomatai he pule he Mesia e fakaholoaga fakaako ke he lalolagi katoa, kua fakaako e tau tagata hagaao ki a Iehova mo e hana tau puhala, kua fakaako a lautolu oti ke taute fakamitaki ha lautolu a tau faoa he tagata mo e fakaalofa, fakalilifu, mo e fakamatalahi. Ke he Parataiso ka hau, to lagaki hake fakamana he Mesia e tau tagata ke he tino mo e tau mahani mitaki katoatoa. Kua galotia e mahani fegutiaki, tuga he tau manu kua ekefakakelea e mahani nakai mitaki katoatoa he tagata. Ke he kakano moli he moui nei foki, to mafola e tau tagata mo e tau manu huifa​—kua hoko ai tuai!​—Fakatatai Kenese 1:28.

19. Ne lauia fefe e tau momoui he tau tagata mai he pule he Mesia he tau aho fakahiku nei?

¹⁹ Kia manatu, kua pule e Mesia he magaaho nei. Kua pihia foki he magaaho nei, kua ako e tau tagata ke nonofo i lalo he Kautu hana ke nonofo fakalataha mo e mafola, ti kua fakamoli e taha kakano a Isaia 11:6-9. Ke lafi ki ai, kua teitei ke 80 e tau tau kua fita he fakamoli e Iesu a Isaia 11:10: “Ko e aho ia to tu mai ai e Vaka akau ko Iese ke eke mo fakamailoga ke he tau motu, to kumi kia ia he tau motu kehe; ti lilifu ni hana okiokihaga.” Kua fuluhi e tau tagata he tau motu oti kana ke he Mesia. Ko e ha? Tali mai he kamata a ia ke pule, kua fita he “tu mai” a ia “ke eke mo fakamailoga.” He puhala mai he fakaholoaga fakaako lahi mahaki ne fakamaama mai i luga kua fita he taute ke iloa he lalolagi katoa kua ha ha hinei a ia. Kua moli ni, tuga ne talahau tuai mai e Iesu ko e fakamailoga mua atu ke he hana ha ha hinei e gahua fakamatala ke he lalolagi katoa ato fakaoti e fakatokaaga tuai nei.​—Mataio 24:14.

20. Ko e heigoa e tau manamanatu kua lata ke kalo kehe mai e tau tagata oti kana ne nonofo i lalo he pule he Mesia, mo e ko e ha?

²⁰ Kua nakai pehe ko e mena nakai iloa e magaaho kua ha ha hinei a Keriso ke he hana malolo faka-Patuiki, ko e tau tala fakataitai, ko e tau tala taufetoko fakailoilo he tau tagata taute tala fakataitai. Kua amotia he hana pule mo e hikitaki e tau momoui he lalolagi, ke tuga ne mena ne talahau tuai mai e Isaia ke tupu. Kua futiaki mai e Keriso e tau miliona tagata he fakatokaaga kolokolovao he lalolagi nei ke eke mo tau tagata ne nonofo i lalo he Kautu hana. Ko e tagata ne nofo i lalo pihia nakai a koe? Kia fekafekau fakamakutu lahi mahaki a mo e olioli kua lata mo e Pule ha tautolu! E moli, kua mukamuka lahi ke mategugu, ke fakalataha ke he talahauaga fakafiufiu he lalolagi: “Ko fe e kupu talahaua ai ke haele mai a ia?” (2 Peteru 3:4) Ka e tuga ne talahau ne ia ko Iesu, “ka ko ia ke tumau ato hoko ke he fakaotiaga, to fakamoui na ia.”​—Mataio 24:13.

21. Liga to fakamitaki hake fefe e tautolu oti kana ha tautolu a loto fakaaue ma e amaamanakiaga faka-Mesia?

²¹ Ke he tau aho takitaha kua mole ne tata ai a tautolu ke he aho lahi mahaki ka tala age a Iehova ke he Hana Tama ke fakakite ke he lalolagi katoa kua ha ha hinei a ia. Kia nakai toka ke pulefu e amaamanakiaga hau ke he aho ia. Kia manamanatu fakalahi ke he tuaga Mesia a Iesu mo e ke he hana tau fuafuaaga ko e Patuiki kua pule. Kia manamanatu fakahokulo foki, hagaao ke he Atua ko Iehova, ko ia ko e fakatoka manatu mo e loto iloilo lahi ke he amaamanakiaga lahi mahaki faka-Mesia ne tohi mai he Tohi Tapu. He taute pihia e koe, kua nakai fakauaua to lahi mo e lahi e mena ne logona hifo e koe tuga e mena ne tupu ke he aposetolo ko Paulo he magaaho ne tohia e ia: “Oi, oi! ko e hokulo he tanakiaga he iloilo mo e fioiaaga he Atua!”​—Roma 11:33.

[Tau Matahui Tala]

To Tali Fefe a Koe?

◻ Ko e puhala fe ka liu mai a Keriso?

◻ Kua iloa fefe e tautolu ko e nakai maeke ke kitia e pa·rou·siʹa a Keriso mo e leva e vaha ka tumau ai?

◻ Ne kamata ne fe ke ha ha hinei a Keriso, mo e iloa fefe e tautolu e mena nei?

◻ Ko e faga Pule i luga he lagi fefe e Mesia?

◻ Ke he tau puhala fefe ne lauia e tau momoui he tau tagata ne nonofo i lalo he pule a Keriso?

[Fakatino he lau 25]

Kua kakano lahi ke he hana tau aposetolo fakamoli e amaamanakiaga ke he liu mai a Iesu

[Fakatino he lau 27]

Ka pule mai i luga he lagi, to taute e Iesu e tau mana ke he lalolagi katoa

[Credit Line]

Lalolagi: Fakave ke he ata he NASA