To Hoko Mai A Fe e Kautu he Atua?
“KO E Iki na e, ko e vaha nai kia ke liu fakafou mai ai e koe e kautu kia Isaraela?” (Gahua 1:6) Ne manako lahi e tau aposetolo ke iloa e magaaho ka fakatū e Iesu e Kautu haana. He vahā nei, kavi ke he 2,000 e tau he mole, kua manako lahi agaia e tau tagata ke iloa: To hoko mai a fe e Kautu he Atua?
Ha kua taute e Iesu e Kautu mo matakupu he fakamatala haana, to liga amanaki a koe ke tutala a ia ke he hūhū nei. Ti taute pihia e ia! Ne vagahau lagaloga a ia hagaao ke he fakamailoga he magahala ne fakahigoa e ia ko e haana “ha ha hinei.” (Mataio 24:37, NW) Ko e ha ha hinei ia kua matutaki tata ke he fakatūaga he Kautu faka-Mesia. Ko e heigoa e ha ha hinei? To fakatutala a tautolu ke he fā e kupu mooli ne fakakite mai he Tohi Tapu hagaao ke he ha ha hinei he Keriso.
1. To kamata e ha ha hinei he Keriso he leva e mole e mate haana. Ne foaki e Iesu e fakatai he fakakite ko ia ko e tagata ne “fano . . . ke he motu mamao ke moua māna ke fakatu a ia mo Iki.” (Luka 19:12) Puhala fe kua fakamooli e fakataiaga fakaperofeta ia? Ne mate a Iesu ti fakaliu tu mai; ti fano a ia ke he “motu mamao,” ko e lagi haia. Tuga ni he talahau tuai e Iesu he taha fakataiaga pihia foki, ko e liu mai haana he pule fakapatuiki to fakahoko ni ka “mole e tau po loga.”—Mataio 25:19.
Ne fai tau he mole e hake a Iesu ke he lagi, ne tohi he aposetolo ko Paulo: “Ka ko ia [Iesu], kua eke e ia e poa taha mo e tau hala, ti nofo tukulagi ai a ia ke he fahi matau he Atua, Kua fakatalitali atu ai a ia, ato eke a lautolu kua fai fi kia ia mo fakatuagave hana.” (Heperu 10:12, 13) Ti leva e fakatali a Iesu he magaaho ne hoko a ia ke he lagi. Ne oti agataha e fakatali he magaaho ne taute e Iehova ko e Atua e Tama haana mo Patuiki he Kautu faka-Mesia ne kua leva e mavehe mai. Ko e magaaho a ia ne kamata e ha ha hinei he Keriso. To kitia nakai he tau tagata he lalolagi nei e mena lahi mahaki nei ne tupu?
2. Nakai kitia he tau tagata e ha ha hinei ha Iesu. Manatu, ne tutala a Iesu hagaao ke he fakamailoga he haana ha ha hinei. (Mataio 24:3, NW) Ka kitia he tau tagata e haana ha ha hinei, kua lata nakai ke fai fakamailoga? Ke fakatai: Manamanatu la kua fenoga atu a koe ke kitia he moana. Liga kitia e koe e tau fakamailoga he puhalatū ne fakakite atu e puhala he fano a koe, ka e he hoko ke he mataafaga, ti tu he kaukau he puke tahi ne lahi ke hoko atu ki tutavaha, to amanaki nakai a koe ke kitia e fakamailoga mo e matatao lahi ne tuhi atu ki mua mo e tu ai e kupu “Moana”? Nakai! Ko e tuku mohā e fakamailoga ke fakakite aki e taha mena kua kitia maaliali he tau mata haau?
Ne fakamaama e Iesu e fakamailoga he haana ha ha hinei, nakai ke fakakite e mena kua fitā he kitia he tau tagata, ka e lagomatai a lautolu ke mailoga taha mena ka tupu he lagi. Ti pehē a Iesu: “Nakai hau e kautu he Atua mo e kitia.” (Luka 17:20) Kitia fēfē mogoia he tau tagata he lalolagi e fakamailoga kua fitā e kamata e ha ha hinei he Keriso?
3. To kitia e ha ha hinei ha Iesu ke he tau lekua lalahi he lalolagi nei. Ne pehē a Iesu ko e haana ha ha hinei ko e Patuiki he lagi to kitia ai ke he lalolagi he tau felakutaki, tau hoge, tau mafuike, tau tatalu, mo e matahavala. (Mataio 24:7-12; Luka 21:10, 11) Ko e heigoa ka fakatupu e tau matematekelea oti nei? Kua fakamaama he Tohi Tapu ko Satani, ko e “iki he lalolagi nai,” kua ita lahi mahaki kakano kua iloa e ia kua tote haana vahā mogonei ha kua kamata tuai e ha ha hinei he Keriso ko e Patuiki. (Ioane 12:31; Fakakiteaga 12:9, 12) Kua kitia maaliali e ita lahi ha Satani mo e ha ha hinei he Keriso he vahā ha tautolu. Mua atu tali mai he 1914, ko e tau ne mailoga he tau tagata fakamauaga tala tuai ke hiki lahi, ne kua kitia maaliali e fakamooliaga nei ke he puhala lahi mo e ke he lalolagi katoa.
Tuga ko e tau tala kelea oti ni a ia, ka e nakai pihia. Ne kakano kua pule e Kautu faka-Mesia he lagi he magaaho nei. Nakai leva, to fakagahua he fakatufono ia e pule haana ke he lalolagi katoa. Iloa fēfē mogoia he tau tagata e Kautu ia ke maeke ke talia ai mo e nonofo i lalo hifo he pule ia?
4. Kua fakamailoga he gahua fakamatala ke he lalolagi katoa e ha ha hinei ha Iesu. Ne pehē a Iesu ko e haana ha ha hinei to tuga e “vaha kia Noa.”a (Mataio 24:37-39) Ne nakai iloa ni a Noa ko ia ne ta e vaka; ka ko ia foki “ko e ogo he tututonu.” (2 Peteru 2:5) Ne hataki e Noa e tau tagata hane hoko mai e fakafiliaga he Atua. Ne pehē a Iesu to fai mena pihia foki e tau tutaki haana he lalolagi ka taute he magaaho he haana ha ha hinei. Ne perofeta e ia: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.”—Mataio 24:14.
He kitia e tautolu he vala tala fakamua, to moumou he Kautu he Atua e tau fakatufono oti kana he lalolagi nei. Kua taute he gahua fakamatala e tau tagata ke mailoga e kautu he lagi kua teitei gahuahua tuai, ti foaki ke he tau tagata oti kana e magaaho ke fehola he moumouaga hane hau mo e eke mo tau tagata he Kautu ia. Ko e matapatu hūhū mogoia, To tali atu fēfē a koe?
To Kakano Kia e Kautu he Atua ko e Tala Mitaki ki a Koe?
Ko e fekau ne fakamatala e Iesu ko e amaamanakiaga mua ue atu. He mole e totoko i Etena he afe e tau tau kua mole, ne finagalo a Iehova ko e Atua ke fakatū e fakatufono ke fakahako e tau lekua, ti liuaki e tau tagata tua fakamooli ke he tuaga ne manako e Atua ma lautolu he kamataaga—ko e moui tukulagi ke he parataiso he lalolagi nei. Ko e heigoa kua mua atu e ofoofogia ke he iloa ko e maveheaga mai tuai tigahau ke he fakatufono nei kua pule mogonei he lagi? Nakai ko e tau mena fakateaga mo e fakataitai noa ka ko e mena moolioli!
He magaaho nei, kua pule e Patuiki ne kotofa he Atua he vahāloto he tau fī haana. (Salamo 110:2) He lalolagi matahavala nei ne kua tū kehe mai he Atua, kua fakamooli he Mesia e manako he Matua haana ke kumi e tau tagata oti kua manako ke iloa mooli e Atua mo e ke tapuaki ki a ia ke he “agaga mo e fakamoli.” (Ioane 4:24) Ko e amaamanakiaga ke moui tukulagi i lalo hifo he pule he Kautu he Atua kua fakaatā ke he tau tagata oti he tau lanu, tau tau moui, mo e tau tutūaga kehekehe. (Gahua 10:34, 35) Kua fakamalolō e mautolu a koe ke taofi mau ke he magaaho homo ue atu i mua haau. Ako ke he Kautu he Atua mogonei, ke fiafia a koe ka moui tukulagi i lalo hifo he pule tututonu ia!—1 Ioane 2:17.
[Matahui Tala]
a Kua lagomatai he talahauaga ia ha Iesu ke fakahako e manatu hepe ne fakakite he falu Tohi Tapu ne hehē e fakaliliu he kupu “ha ha hinei.” Ne talahau ai he falu fakaliliuaga ko e “haele mai,” “hoko mai,” po ke “liu mai,” ne kakano oti ko e taha mena kū ka tupu he magahala. Mailoga mogoia, ne nakai fakatatai e Iesu e haana ha ha hinei ke he Fakapuke he vahā ha Noa, ko e mena tupu he taha magahala, ka e he “vaha kia Noa,” ko e tapunu he magahala he vahā. Ke tuga e magahala ia i tuai, ne liga ko e vahā he ha ha hinei he Keriso kua lavelave lahi e tau tagata he tau gahua he tau aho takitaha ti nakai mailoga e hatakiaga kua talahau.
[Tau Fakatino he lau 8]
Ko e tau tala kelea ne logona e tautolu he tau aho oti kua fakamooli to hoko mai vave e tau mena mitaki
[Credit Line he lau 8]
Antiaircraft gun: U.S. Army photo