“Fakaheke Ki a Ioha, Ma Tau Tagata!”
“Kia fakaheke atu kia Ioha e tau mena oti kana kua fafagu.”—SALAMO 150:6.
1, 2. (a) Lahi atu fefe e tupuolamoui he puhala Kerisiano moli ke he senetenari fakamua? (e) Ko e heigoa e hatakiaga fakamua ne age ke he tau aposetolo? (i) Tupu fefe e tiaki taofiaga?
NE fakatokatoka e Iesu e hana a tau tutaki ke he fakapotopotoaga Kerisiano, ne kua tupuolamoui ai ke he senetenari fakamua. Pete ni e kona e totokoaga fakalotu, ko e “vagahau mitaki . . . ne fakamatala atu ke he tau tagata oti ke he lalolagi.” (Kolose 1:23) Ka e he mole e mamate he tau aposetolo ha Iesu Keriso, kua fakalagalaga hagahagakelea e Satani e tiaki taofiaga.
2 Kua foaki age mua he tau aposetolo e hatakiaga ke he mena nei. Ma e fakatai, ne tala age a Paulo ke he tau motua i Efeso: “Hanai, a mutolu kia mutolu, katoa mo e fuifui mamoe oti kana kua kotofa a mutolu he Agaga Tapu ke eke ai mo leoleo, kia leveki e ekalesia he Atua ne fakafua e ia māna ke he hana toto ni. Kua iloa e au ka mole haku a fano to hoko mai kia mutolu e tau luko favale, nakai fakahelehele e fuifui mamoe. To tutupu foki ia mutolu ni e tau tagata ke vagahau mai ke he tau mena fakakeukeu, to futiaki ai e tau tutaki kia mumui atu kia lautolu.” (Gahua 20:28-30; kikite foki 2 Peteru 2:1-3; 1 Ioane 2:18, 19.) Ti, ke he senetenari ke fa aki, ko e tau Kerisiano ne tiaki taofiaga kua kamata ke fakalataha e tau malolo mo e Pule Atu Motu Roma. Ko e falu he tau senetenari fakamui ko e Pule Atu Motu Tapu Roma ne matutaki atu ke he faifeau pope a Roma, kua pule katoa ai ke he vala lahi he tau tagata. Ke he magaaho tonu ia, kua totoko atu e Fakafouaga he Lotu Porotesano ke he tau mahani kelea he Tapu Katolika, ka e kaumahala ai ke liuaki mai e puhala Kerisiano moli.
3. (a) Magaaho fe mo e fefe e fakamatala he tala mitaki ke he tau mena fafagu oti? (e) Ko e heigoa e tau amaamanakiaga ne fakave mai he Tohi Tapu kua mailoga ai he 1914?
3 Pete ni ia, he teitei hoko atu ke he fakaotiaga he senetenari 19 aki, ko e vahega loto moli he tau tagata fakaako Tohi Tapu kua liu lavelave ai ke he gahua fakamatala mo e tala age ‘e amaamanaki he vagahau mitaki ke he tau tagata oti ke he lalolagi.’ Ha ko e kakano he ha lautolu a fakaako he perofetaaga he Tohi Tapu, ko e vahega nei kua tuhi atu ki mua ko e molea e 30 e tau tau ke he tau 1914 ko e fakamailoga he fakaotiaga he “tau vaha he tau motu kehe,” ko e magahala he “fitu e tau,” po ke 2,520 e tau tau, ne kamata aki e moumouaga ha Ierusalema he 607 F.V.N. (Luka 21:24; Tanielu 4:16) Moli ke he tau amaamanakiaga, kua eke ai e 1914 mo hikiaga he tau mena he tagata he lalolagi. Ko e tau mena tutupu i tuai kua hoko foki ke he lagi. He magaaho ia kua tuku he Patuiki tukulagi tukumuitea hana Patuiki kaufakalataha, ko Iesu Keriso, ki luga he nofoaiki he lagi, amaamanaki ai ke tatafi oti e mahani kelea mai he fuga he lalolagi nei mo e liu fakatu hake e Parataiso.—Salamo 2:6, 8, 9; 110:1, 2, 5.
Kitiala e Patuiki Faka-Mesia!
4. Moui fefe a Iesu ke lata mo e hana higoa ko Mekaeli?
4 Ia 1914 ko e Patuiki faka-Mesia nei, ko Iesu, kua gahua ai. Ki loto he Tohi Tapu kua fakahigoa foki a ia ko Mekaeli, kakano “Ko Hai ne Tatai mo e Atua?,” ha kua amanaki a ia ke fakatokoluga e pule katoatoa a Iehova. Tuga he fakamau ia Fakakiteaga 12:7-12, kua fakamaama mai he aposetolo ko Ioane e fakakiteaga ke he mena ka tupu: “Kua tau foki a lautolu he lagi; ko Mekaeli mo e hana tau agelu kua tau ke he tarako, ko e tarako foki kua tau a ia mo e hana tau agelu; Ka e nakai kautu a lautolu, ti nakai tuai moua foki ha mena ke he lagi ke nonofo ai a lautolu. Ti liti hifo ni e tarako lahi, ko e gata tuai haia, kua higoa ko e tiapolo, ko Satani foki ia, ko ia kua fakahehe e lalolagi oti; kua liti hifo a ia ke he lalolagi, kua liti hifo foki hana tau agelu fakalataha mo ia.” Ko e veli lahi ue atu moli!
5, 6. (a) Mui mai he 1914, ko e heigoa e fakapuloaaga fuluola lahi ne taute he lagi? (e) Matutaki fefe e Mataio 24:3-13 mo e mena nei?
5 Ko e leo lahi mahaki he lagi kua fakapuloa ai: “Kua hoko mai tuai ainei e fakamouiaga, mo e malolo, mo e kautu he Atua ha tautolu, mo e pule he hana Keriso; ha kua liti ki lalo a ia ne hokotaki e tau matakainaga ha tautolu, ko ia ne hokotaki a lautolu ki mua he Atua ha tautolu ke he aho mo e po. Ka e kautu a lautolu [tau Kerisiano tua fakamoli] kia ia ha ko e toto he Punua mamoe [Iesu Keriso], mo e kupu he tau talahau ha lautolu, kua nakai fakahelehele foki ha lautolu a moui kua hoko ke he mate.” Ko e kakano anei ko e fakahaoaga ma e tau tagata taofi fakamoli, ne kua fakagahuahua e tua he poa lukutoto uho a Iesu.—Tau Fakatai 10:2; 2 Peteru 2:9.
6 Ko e leo lahi he lagi kua holo atu ke fakapuloa: “Ko e mena ia kia fiafia ai a koe ko e lagi, mo mutolu kua nonofo ai. Oi fakaalofa kia mutolu kua nonofo ke he fonua mo e tahi, ha kua iloa e ia kua tote hana vaha.” Ko e “oi fakaalofa” kua perofeta mai ma e lalolagi nei kua kitia ai ke he tau felakutaki he lalolagi, tau hoge, tau gagao, tau mafuike, mo e moumou matafakatufono ne kua fakamalaia e lalolagi ke he senetenari nei. Tuga he talahau fakamatafeiga e Mataio 24:3-13, kua talahau tuai e Iesu ko e tau mena nei ko e vala he ‘fakamailoga he fakaotiaga he lalolagi.’ Moli ke he perofetaaga, tali mai he 1914 kua iloa he tau tagata he lalolagi e oi fakaalofa ne nakai tatai mo e ha fakamauaga tuai he tagata kua mole atu.
7. Ko e ha ne fakamatala ai e Tau Fakamoli a Iehova mo e fakamafiti?
7 He vaha nei he oi fakaalofa fakasatani, maeke nakai he tau tagata ke moua e amaamanakiaga ma e vaha i mua? E, ha kua pehe mai e Mataio 12:21 hagaao ki a Iesu: “Ko e hana higoa foki ke amaamanaki ai e tau motu kehe”! Ko e tau tutuaga kelea he vahaloto he tau motu kua nakai ni ko e ‘fakamailoga he fakaotiaga he lalolagi’ ka e pihia mo e ‘haele mai a Iesu’ ko e Patuiki he lagi he Kautu faka-Mesia. Hagaao ke he Kautu ia, kua holo atu a Iesu ke talahau: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” (Mataio 24:14) Ko e heigoa e taha he tau tagata he lalolagi he vaha nei ne fakamatala e amaamanakiaga mua ue atu he pule he Kautu he Atua? Ko e Tau Fakamoli a Iehova! Mo e fakamafiti ai, kua fakapuloa oti e lautolu ke he taha fale mo e taha fale ko e Kautu tututonu mo e mafola he Atua kua teitei ke pule ke he tau mena he lalolagi. Kua fakalataha atu nakai a koe ke he fekafekauaga nei? Kua nakai fai magaaho foki a koe!—2 Timoteo 4:2, 5.
Hoko Mai Fefe e “Fakaotiaga”?
8, 9. (a) Kamata fefe e fakafiliaga “ke he fale he Atua”? (e) Eke fakakelea fefe he Kerisitenitome e Kupu he Atua?
8 Kua hokotia atu e tau tagata ke he magahala he fakafiliaga. Kua talahau mai ki a tautolu ia 1 Peteru 4:17 ne kamata e fakafiliaga he “fale he Atua”—ko e fakafiliaga he tau fakatokatokaaga he tau tagata ne pehe ko e tau Kerisiano kua kitia ai tali mai he “tau aho fakahiku” kua fita he fakahoko he kelipopoaga he Felakutaki I he Lalolagi he magahala 1914-18. Kua kautu fefe a Kerisitenitome ke he fakafiliaga nei? Kia manamanatu la ke he tuaga he tau lotu he kau atu ke he tau felakutaki tali mai he 1914. Kua nakai kia ilaila e tau takitaki lotu ke he “tau toto he tau moui he tau tagata nonofogati kua nakai hala” ne kua fakamatala atu a lautolu ke he tau male tau?—Ieremia 2:34.
9 Hagaao ki a Mataio 26:52, ne talahau e Iesu: “Ha ko lautolu oti kana ne toto e pelu, to mamate a lautolu he pelu.” Ko e moli ha ia e mena nei ke he tau felakutaki he senetenari nei! Kua fakaohooho he tau takitaki lotu e tau tama tane fuata ke kelipopo e falu fanau tane fuata, pete ni ko lautolu auloa he lotu taha—kelipopo ni he Katolika e Katolika mo e kelipopo ni he Porotesano e Porotesano. Kua fakatokoluga e fakahakehake fakamotu ke he Atua mo Keriso. Nakai la leva, ke he falu he tau motu Aferika, ko e tau matutaki fakamatakavi kua tuku fakamua he tau matapatu fakaakoaga he Tohi Tapu. I Ruanata, ne ha ha i ai e lahi he puke tagata ko e Katolika, kavi ke he hafa e miliona kua kelipopo ke he favale fakamatakavi. Kua talahau he faifeau pope he nusipepa Vatikana L’Osservatore Romano: “Ko e kelipopoaga tagata pauaki katoatoa anei, kua tokihala ai ke talahau kua lago foki ke he tau Katolika.”—Fakatatai Isaia 59:2, 3; Mika 4:3, 5.
10. Ko e heigoa e fakafiliaga ka fakahoko e Iehova ke he lotu fakavai?
10 Fefe e hagaaoaga he Patuiki tukulagi tukumuitea ke he tau lotu ne fakamalolo e tau tagata tane ke fekelipopoaki po ke tu poupou ka e keli ni he taha tagata he fuifui e taha ia lautolu? Hagaao ki a Papelonia Lahi, ko e fakatokaaga he lalolagi katoa he lotu fakavai, kua talahau mai ki a tautolu ia Fakakiteaga 18:21, 24: “Kua lagaki foki he taha agelu malolo e maka tuga ne makaholo lahi, mo e liti ke he tahi, kua pehe atu, To liti hifo fakalahi pihia a Papelonia ko e māga lahi, ti nakai tuai kitia ni. Kua moua foki ia koe e toto he tau perofeta mo e tau tagata tapu, mo lautolu oti ne kelipopo ke he lalolagi.”
11. Ko e heigoa e tau mena fakateteki ne fa e tutupu i Kerisitenitome?
11 He fakamoli e perofetaaga he Tohi Tapu, kua tutupu ai e tau mena fakateteki i Kerisitenitome. (Fakatatai Ieremia 5:30, 31; 23:14.) Lahi mahaki ai kakano ko e aga mahani fakahanoa he tau takitaki lotu, kua hufia e ha lautolu a tau mamoe mo e mahani kelea. Ke he Tau Fahi Kaufakalataha, ne pehe ko e motu Kerisiano, kau ke hafa e tau fakamauaga kua hokotia ke he tau vevehe. Ko e fatunoa he tau tama fifine ikiiki mo e mahani fakasotoma kua lahi mahaki he vahaloto he tau tagata he lotu. Kua fakakelea he tau akoako e tau tama ikiiki ke he mahani fakatane mo e fifine—ke he loga he tau magaaho. Kua talahau ai ko e tau fakatotokaaga he hopoaga kua putoia ai ke he tau mena tutupu nei ko e piliona e tau tupe ne totogi he Lotu Katolika he Tau Fahi Kaufakalataha he vahaloto he tau hogofulu tau. Kua tiaki e Kerisitenitome e hatakiaga he aposetolo ko Paulo ne moua ia 1 Korinito 6:9, 10: “Nakai kia iloa e mutolu nakai moua e lautolu kua mahani hepehepe e kautu he Atua? Aua neke fakahehe ai a mutolu; ko e tau tagata feuaki, mo lautolu kua hufeilo ke he tau tupua, mo lautolu kua faivao, mo lautolu kua fakakelea e lautolu a lautolu, mo lautolu kua eke e mahani Sotoma, Mo lautolu kua kaiha, mo lautolu kua velevelemena, mo lautolu kua konahia, mo lautolu kua tauamuamu, mo lautolu kua fofo mena, nakai moua e lautolu nā e kautu he Atua.”
12. (a) To gahua fefe e Patuiki tukulagi tukumuitea ki a Papelonia Lahi? (e) He nakai tatai ai mo Kerisitenitome, mo e ko e heigoa e kakano ne uhu ai he tau tagata he Atua e tau kupu tali lologo “Haleluia”?
12 Nakai leva, ko e Patuiki tukulagi tukumuitea, ko Iehova, kua gahua ai puhala he Takitaki Kau, ko Iesu Keriso, to fakatoka mai ai e matematekelea lahi. Fakamua, ko Kerisitenitome mo e falu he tau la a Papelonia Lahi to mamahi ke he hokomaiaga he fakafiliaga a Iehova. (Fakakiteaga 17:16, 17) Kua fakakite e lautolu a lautolu kua nakai fai aoga ke he fakamouiaga, ne kua foaki e Iehova he poa lukutoto a Iesu. Kua tiaki e lautolu e higoa tapu he Atua. (Fakatatai Esekielu 39:7.) Ko e fakafiufiu ha ia ke uhu e lautolu “Haleluia” ke he tau kupu tali lologo he ha lautolu a tau fale lalahi fakalotu kua monuina! Kua uta kehe e lautolu e higoa uho a Iehova mai he tau liliuaga he Tohi Tapu ka e kua eke ai ke nakai iloa ke he mena moli ko e “Haleluia” ko e kakano ke “Fakaheke ki a Ioha”—ko “Ioha” ko e fakaku he “Iehova.” Kua lata tonu ai, ne fakamau mai ia Fakakiteaga 19:1-6 ko e tau kupu lologo tali “Haleluia” kua tata lahi mai ke lologo he fakamanatuaga he fakahoko he Atua e fakafiliaga ki a Papelonia Lahi.
13, 14. (a) Ko e heigoa e tau mena ka tutupu mafiti i mua? (e) Ko e heigoa e fua fiafia ma e tau tagata matakutaku Atua?
13 Ke he taha mena foki ko e “haele mai” a Iesu ke fakapuloa mo e fakahoko e fakafiliaga ke he tau motu mo e tau tagata. Ne perofeta mai ni e ia: “Ka hau e Tama he tagata [Iesu Keriso] mo e hana lilifu, ko e tau agelu tapu oti foki fakalataha mo ia, ti nofo ai a ia ke he hana nofoaiki lilifu; To fakapotopoto ki mua hana e tau motu oti kana; ati vevehe kehekehe ai e ia a lautolu, tuga e leveki mamoe kua vevehe e tau mamoe mo e tau koti; To tuku e ia e tau mamoe ke he hana fahi matau hana, ka ko e tau koti ke he fahi hema. Ati tala age ai e Patuiki kia lautolu ha he fahi matau hana, O mai a, ko mutolu kua fakamonuina he haku a Matua, kia eke ma mutolu, e kautu kua taute ma mutolu, ka e nakaila fakave e lalolagi.” (Mataio 25:31-34) Ko e Mat 25 kupu 46 kua fakaholo atu ke fakakite mai ko e vahega he tau koti ka “o atu ai a lautolu ke he fakahala tukulagi; ka ko e tau tagata tututonu ke he moui tukulagi.”
14 Kua fakamaama mai he tohi ha Fakakiteaga he Tohi Tapu e puhala he ha tautolu a “Patuiki he tau Patuiki, mo e Iki he tau Iki,” ko e Iki he lagi, ko Iesu Keriso, he magaaho ia ka heke atu ke he male tau i Amaketo, moumou ai e tau mena fakapolitika mo e fakafua tupe he fakatokaaga a Satani. Ti to liligi mai e Keriso e “ita lahi he Atua hana e malolo” ke he nofoaga katoa a Satani he lalolagi. Ha kua ‘mole atu e mena fakamua,’ ko e tau tagata matakutaku Atua to o atu ke he lalolagi fou homo ue atu mo e i ai “to holoholo kehe [he Atua] e tau hihina mata oti mai he tau mata ha lautolu.”—Fakakiteaga 19:11-16; 21:3-5.
Ko e Magaaho ke Fakaheke a Ioha
15, 16. (a) Ko e ha ne kua aoga ai ke logona e kupu fakaperofeta a Iehova? (e) Ko e heigoa kua fakakite mai he tau perofeta mo e tau aposetolo kua lata ia tautolu ke taute ma e fakamouiaga, mo e ko e heigoa e kakano he mena nei ma e tokologa he vaha nei?
15 Kua tata lahi tuai mai e aho ia ke fakahoko e fakafiliaga! Ti kua lata ia tautolu ke logona e kupu fakaperofeta he Patuiki tukulagi tukumuitea. Ko lautolu ne vihu agaia ke he tau fakaakoaga mo e tau aga he lotu fakavai, ko e leo mai he lagi kua fakapuloa: “Ati o kehe ā mutolu ia ia, neke fakalataha a mutolu mo ia ke he hana tau hala, neke moua foki a mutolu he hana tau malaia.” Ka e fehola ki fe e tau tagata fehola? Ha ha i ai taha ni e kupu moli, ti taha foki ni e lotu hako. (Fakakiteaga 18:4; Ioane 8:31, 32; 14:6; 17:3) Ko e ha tautolu a mouaaga he moui tukulagi kua lago ni ke he kumiaga he lotu ia mo e omaoma ke he hana Atua. Kua takitaki he Tohi Tapu a tautolu ki a ia he Salamo 83:18, ne kua totou: “Ko e hāu a higoa ko IEHOVA, hoko koe ni kua Mua ue atu ke he lalolagi.”
16 Pete ia, kua lata ia tautolu ke lahi atu e mena ke taute nakai ke iloa ni hokoia e higoa he Patuiki tukulagi tukumuitea. Kua lata ia tautolu ke fakaako e Tohi Tapu mo e ako hagaao ke he hana a tau fua mua ue atu mo e tau finagalo. Ti kua lata foki ia tautolu ke taute e hana a finagalo ke he magaaho nei, tuga he fakakite mai ia Roma 10:9-13. Ne fatiaki mai he aposetolo ko Paulo e tau kupu he tau perofeta fakaohooho mo e fakahiku aki: “To fakamomoui ai a lautolu oti kana kua ui atu ke he higoa a Iehova.” (Ioelu 2:32; Sefanaia 3:9) Fakahao? E, ma e tokologa he vaha nei ne fakagahuahua e tua he foakiaga he lukutoto a Iehova puhala ia Keriso to fakahao mai he matematekelea lahi ne hau, ka fakahoko ai e fakafiliaga ke he lalolagi kolokolovao a Satani.—Fakakiteaga 7:9, 10, 14.
17. Ko e heigoa e amaamanakiaga mua ue atu kua fakaohooho aki a tautolu he mogonei ke fakalataha ke uhu e lologo ha Mose mo e he Punua mamoe?
17 Ko e heigoa e finagalo he Atua ma lautolu ne amaamanaki ke hao? Ko e fakalataha a tautolu he mogonei foki he uhu e lologo a Mose mo e he Punua mamoe, he fakaheke ai e Patuiki tukulagi tukumuitea he kaufakalataha ai mo e hana kautuaga. Kua taute ai e tautolu e mena nei he tala age ke he falu hagaao ke he finagalo mua ue atu hana. Ati he tupu ki mua ai e maamaaga ha tautolu ke he Tohi Tapu, kua tukulele e tau momoui ha tautolu ke he Patuiki tukulagi tukumuitea. To takitaki ai ke he ha tautolu a nonofo tukulagi ki lalo hifo he fakatokatokaaga ne kua fakamaama mai he Patuiki mua ue atu nei, ne kua moua ia Isaia 65:17, 18: “Ha ko e mena kitiala, kua eke e au e lagi fou [Kautu faka-Mesia a Iesu] mo e lalolagi fou [ko e fakalatahaaga fou he tau tagata tututonu]; nakai tuai manatu ke he tau mena fakamua, ti nakai hake ai ke he loto e tau mena ia. Ka e olioli ā mutolu mo e fiafia tukulagi ā mutolu ke he mena kua eke e au.”
18, 19. (a) Ko e heigoa kua fakamalolo he tau kupu a Tavita ia Salamo 145 ki a tautolu ke taute? (e) Ko e heigoa ha tautolu kua amaamanaki mo e mauokafua mai he lima a Iehova?
18 Kua fakamaama he salamo a Tavita ko e Patuiki tukulagi tukumuitea ke he tau kupu nei: “Kua homo ue atu a Iehova, ti lata ke fakaheke fakalahi kia ia; kua nakai maeke ke kumikumi hana homo ue atu.” (Salamo 145:3) Ko e hana a homo ue atu kua nakai maeke ke kumikumi tuga e tau kaupaaga he lagi mo e tukulagi tukumuitea! (Roma 11:33) Hane fa e fakatumau a tautolu ke uta e iloilo he ha tautolu a Tufuga mo e he hana a foakiaga he lukutoto puhala mai he hana Tama, ko Iesu Keriso, to manako a tautolu ke fakaheke fakalahi atu ke he ha tautolu a Patuiki tukulagi. To manako a tautolu ke taute tuga ne fakatoka mai ia Salamo 145:11-13: “Kua vagavagahau a lautolu ke he lilifu he hāu a kautu, mo e talatalahau ke he hāu a malolo; Kia fakailoa atu ke he fanau he tau tagata hana tau gahua malolo, mo e lilifu he fulufuluola he hana kautu. Ko e hāu a kautu ko e kautu tukulagi ia; mo e hāu a pule to hahau mo hahau ia.”
19 Kua amaamanaki a tautolu mo e mauokafua to moli ha tautolu a Atua ke he fakailoaaga: “Kua fakamafola e koe hāu a lima, mo e fakamakona e manako he tau mena momoui oti.” To takitaki atu he Patuiki tukulagi tukumuitea a tautolu mo e fakaalofa hofihofi ke hoko atu ke he fakaotiaga he tau aho fakamui, ha kua fakamoli mai e Tavita ki a tautolu: “Kua leoleo e Iehova a lautolu oti kua fakaalofa kia ia; ka e tamate e ia a lautolu oti kana kua mahani kelea.”—Salamo 145:16, 20.
20. Fanogonogo atu fefe a koe ke he uiina he Patuiki tukulagi tukumuitea, ne kua fakatoka mai he tau salamo lima fakahiku?
20 Ke he tau fakaotiaga takitaha he tau salamo lima he Tohi Tapu kua hafagi mo e fakaoti aki e uiina “Haleluia.” Ti kua uiina mai e Salamo 146 ki a tautolu: “[“Fakaheke ki a Ioha, Ma Tau Tagata!” NW] Haku agaga na e, kia fakaheke atu kia Iehova. To fakaheke atu au kia Iehova ka kua moui au; to uhu lologo au ke he haku Atua ka kua moui agaia au.” To tali nakai e koe e uiina ia? Moli kua lata a koe ke manako ke fakaheke a ia! Kia eke a koe mo taha ia lautolu ne fakamaama ia Salamo 148:12, 13: “Ko e tau fuata katoa mo e tau tamāfine, ko e tau fuakau katoa mo e tau tama; Kia fakaheke a lautolu ke he higoa a Iehova; ha ko e hana higoa hokoia kua lilifu; ko e hana a fakahekeaga kua homo ia ke he lalolagi katoa mo e lagi.” Kia fanogonogo mo e loto katoa a tautolu ke he uiina: “Fakaheke ki a Ioha, ma tau tagata.” He fakalataha auloa, kia fakaheke a tautolu ke he Patuiki tukulagi tukumuitea!
Ko e Heigoa Hau a Tali?
◻ Ko e heigoa he tau aposetolo a Iesu ne hataki tuai mai?
◻ He kamata he 1914, ko e heigoa e tau gahua kua mau ke fakahoko?
◻ Ko e heigoa e tau fakafiliaga kua teitei a Iehova ke fakahoko?
◻ Ko e ha ko e vaha aoga lahi a nei ke fakaheke e Patuiki tukulagi tukumuitea?
[Puha he lau 29]
Ko e Vaha Uka Lahi he Matematekelea
Ha ko e vaha he matematekela lahi kua ataata mai tuai he senetenari 20 aki kua kitia ai he tokologa. Ma e fakatai, ke he tau kupu fakamua he tohi Pandaemonium, mai he Ekepule Tokoluga he T.K.F. ko Daniel Patrick Moynihan, ne lomi fakailoa he 1993, ko e talahauaga “ke he matematekelea lahi he 1914” ne totou: “Hoko mai ai e felakutaki ti hiki ai e lalolagi—katoatoa. Ha ha i ai ke he vaha nei valu ni e motu he lalolagi ne tu agaia mai he 1914 mo e nakai hiki ai ha lautolu a fakatufono ha ko e favaleaga tali mai ai. . . . Ke he 170 ne toe po ke tau motu nakai leva, ko e falu ko e fakatu fou laia ke iloa e loga he matematekelea he magaaho ku kua mole.” Moli, ko e vaha tali mai he 1914 kua kitia mata ai e tau matematekelea loga!
Ne lomi fakailoa foki he 1993 e tohi Out of Control—Global Turmoil on the Eve of the Twenty-First Century. Ko e tagata tohi ko Zbigniew Brzezinski, ko e takitaki tuai he National Security Council a T.K.F. Kua tohi e ia: “Ko e kamataaga he senetenari uafulu aki kua fakaheke he tau talahauaga loga ko e kamata moli he Vaha Fakakakano. . . . Nakai tatai ai ke he hana maveheaga, ko e senetenari uafulu aki kua eke ai mo senetenari kua mua atu e fakamaligi toto mo e fevihiatiaaki he tagata, ko e senetenari he tau politika lapeko mo e tau kelipopo kelea. Ko e favaleaga kua fakatokatoka ai ke he tuaga kua nakai fai fakatataiaga, kua fakatokatoka ai e tau puhala iloilo kelipopo ne kua lahi mahaki. Ko e nakai tataiaga he vahaloto he lotomatala fakasaienetisi ma e mitaki mo e pouligia fakapolitika ne kua fakatoka mai kua ofoofogia. Nakaila pihia ia ke he fakamauaga tuai e kelipopo ke holofa fano ke he lalolagi katoa, ne nakai la tamate pihia foki e loga he tau momoui, nakai la pihia foki e moumouaga he tagata kua tutuli mo e kitekite fakamakutu pihia he taute e laliaga ke lata mo e tau foliaga goagoa ne nakai fai manamanatuaga.” Moli ha e mena ia!
[Fakatino he lau 27]
Kua liti hifo e Mekaeli a Satani mo e hana a tau kau ke he lalolagi he mole e fakatu he Kautu he 1914