Nakai Kia Maeke e Solu ke Mate?

KUA o fano fakaeneene, e tau kapitiga mo e magafaoa he tapa he puha mate. Ne fakapupula a lautolu ke he tino, he tama tane ne 17 e tau he moui. Ko e hana tau kapitiga mai he aoga kua nakai mailoga mitaki a ia. Kua fakafiha he tau vailakau tului e tau lau ulu hana; mo e kua pipili a ia ha ko e kanesa. Ko e kapitiga moli ha lautolu nakai anei? Na momole laia e tau fahi tapu, ne puke a ia ke he tau manatu loga, tau huhu, ke he malolo​—ke he moui! Mo e tau hihina mata he matua fifine he tama tane kua fatiaki tumau: “Kua fiafia lahi a Tommy a e mogonei. Nukua manako e Atua ki a Tommy ke hake ke he lagi ke fakalataha mo ia.”

Kua moua he matua fifine loto malipilipi nei e falu he tau fuafuaaga he amaamanakiaga mo e totokaaga he manatu ne pehe ke he taha puhala ni na moui agaia e tama hana. He fale tapu kua fakaako a ia kua nakai maeke e solu ke mate, ko e mena ia ko e nofoaga he aga fakatagata, tau manatu, tau manamanatuaga​—ko e “ko ia ni.” Ko e solu he tama tane hana, he taofi e ia, kua nakai mate; ko e mena moui fakaagaga, kua toka e tino hana he mate mo e haele hake ke he lagi ke fakalataha mo e Atua mo e tau agelu.

He magaaho matematekelea, kua fakapiki atu e loto he tagata ke he ha lupa he amaamanakiaga, ti kua nakai uka ai ke kitia e kakano lahi ne tataki aki e taofiaga nei. Manamanatu la, ke fakatai, ke he puhala fiafia lahi ne talahau he tagata feua fakaako ke he mahani fakalotu ko J. Paterson-Smyth ki a ia ni, i loto he The Gospel of the Hereafter: “Ko e mate ko e mena kiliiku ka fakatatai mo e mena ka mole mai ai​—ko e lalolagi fulufuluola, fulufuluola, fulufuluola ne uta he Mate a tautolu ki ai.”

He lalolagi katoa mo e he loga he tau lotu mo e tau aga fakamotu, kua talitonu e tau tagata na fai solu i loto he tagata kua nakai maeke ke mate, ko e agaga he manamanatuaga ne fakatumau ke moui he mole e mate he tino. Ko e taofiaga ia kua putoia ai e tau lotu mo e tau vahega lotu Kerisitenitome ke teitei ke maluia e lalolagi katoa. Ko e fakaakoaga taofi mau foki he lotu faka-​Iuta. Kua talitonu e tau Hinitu ko e mena aoga lahi i loto he tagata, po ke solu, kua tufuga ai he kamataaga he lalolagi, kua puipui ai i loto he tino mai he fanauaga, mo e fakaholo atu he magaaho ka mate ai ke he taha tino foki ke fakatumau e puhala fevihuaki ke liu fanafanau mo taha tino foki. Talitonu e tau Musilimi ko e hu e solu ke he tagata ke fakalataha mo e tino mo e moui loa he mole e mate he tino. Ko e falu he tau taofiaga​—ko e tau tagata Aferika ne taofi ko e toka kehe e agaga he tino, ko e Sinito, ti pihia foki e faka-Puta ke he taha puhala ni—​kua kehekehe e tau fakaakoaga ke he matapatu tala nei ni.

Falu he Tau Huhu Fakalekua

Ti pete ni he nakai fakatikai ko e teitei e manatu nakai maeke e solu ke mate ke tataki e lalolagi katoa, ka e mafuta mai agaia e falu he tau huhu fakatupetupe. Ke fakatai ki ai, kua tuaha e tau tagata ko e fano ki fe e solu he fakahele kaeke ke nakai fakamakutu a ia ke he moui mitaki. To liu fanau mai kia a ia mo taha mena moui nakai fai aoga? Po ke to fakafano atu kia a ia ke he pulekatolia, ko e kavi ka fakamea a ia aki e taha fakaholoaga afi ato fifili ko e lata laia ke fano ke he lagi? Ka e muitui e kelea, kua eke kia a ia ke fakakikiveka tukulagi i loto he helo kaka? Po ke kua fakaako kia a ia ke tuga e tokologa he tau lotu ne taofi ko e toka kehe e agaga he tino, ko e agaga ia kua lata ke fakamafola ki ai?

Kua taute he tau manatu pihia e tau amaamanakiaga mamafa ma lautolu ne momoui. To fakamafola kia e tautolu e tau agaga he tau fakahele ha tautolu ne mamate neke taui mai e lautolu ki a tautolu e ita? Kua lata kia a tautolu ke lagomatai a lautolu ke laveaki mai he falu pulekatolia matematekelea? Po ke kua lata kia a tautolu ke ofo he nakai maeke ke lagomatai ha kua matakutakuina ke he manatu ki a lautolu ne fa e matematekelea i helo? Po ke leveki atu kia a tautolu ke he falu he tau manu momoui ke tuga ko e ha ha ia lautolu e tau solu he tau tagata mamate?

Ko e tau huhu ne mafuta mai hagaao ke he Atua hokoia kua nakai lahi e mafanatia. Ke tuga a ia, ko e tau mamatua, tuga e matua fifine ne totoku he kamataaga, kua mafanafana ai he manatu ko e “uta” he Atua e solu nakai maeke ke mate he ha laua a tama ke he lagi ke fakalataha mo ia. Ka e ma e tokologa, mogoia, ka nakai leva to kamata a lautolu ke manamanatu ko e Atua ha a ia ke fakahoko e gagao teteki ia ke he tama nakai agahala, ti amanaki ti hehe kehe mai e fakahele he tau mamatua loto malipilipi, ke uta e tama ke he lagi ato hoko e magaaho. Ai ti ko fe ai e fakafiliaga tonu, ko e fakaalofa, ko e fakaalofa hohofi noa, he Atua pihia? Kua fakauaua atu foki e falu ke he pulotu he Atua pihia. Ko e ha ai mogoia, he huhu he falu, ne tuku ai he Atua pulotu e tau solu oti nei he lalolagi he magaaho fakamua kaeke kua amanaki a lautolu ke fakahiku ke nonofo he lagi? Nakai kia kakano e mena ia ko e tufugatiaaga he lalolagi ko e moli ko e mena moumou magaaho?​—Fakatatai Teutaronome 32:4; Salamo 103:8; Isaia 45:18; 1 Ioane 4:8.

Kua maali, mogoia, ko e taofiaga ko e nakai maeke e solu tagata ke mate, ke he ha tino ni ne fakaako ki ai, kua tuku mai e tau huhu vihi, mo e tau mena nakai tatai foki. Ko e ha? Kua loga pihia ai e lekua ha ko e tau kamataaga he fakaakoaga nei. Liga to fiafia a koe ke kumikumi ke he tau vaka nei ke he magaaho ku; mo e liga to ofo a koe ke ako e mena ne talahau he Tohi Tapu hagaao ke he solu. Kua foaki mai e amaamanakiaga mahomo atu e mitaki ma e moui ka mole e mate mai he mena ne fa fakaako he tau lotu he lalolagi.