Kia Taute e Talahauaga ma e Fakamouiaga
“Ko e mena fakamomoui a lautolu oti kana kua ui ke he higoa [“a Iehova,” NW].”—ROMA 10:13.
1. Tali mai he fakamauaga tuai, ko e heigoa e tau hatakiaga ne kua fakapuloa?
KUA fakamaama he fakamauaga tuai e ‘tau aho kehekehe a Iehova.’ Ko e Fakapuke he vaha a Noa, ko e fakamahakava a Sotoma mo Komora, mo e moumouaga a Ierusalema he 607 F.V.N. mo e 70 V.N. ko e tau aho mua ue atu mo e matakutakuina a Iehova. Ko e tau aho ia ne fafati e fakafiliaga tonu ki a lautolu ne totoko ki a Iehova. (Malaki 4:5; Luka 21:22) He magahala he tau aho ia, nukua tokologa ne mamate ha ko e ha lautolu a mahani kelea. Ka e fai ne hao. Ne fakapuloa e Iehova e tau hatakiaga, ke iloa he tau tagata mahani kelea e tata he matematekelea lahi mo e foaki taha magaaho ki a lautolu ne loto hakohako ke kumi e fakamouiaga.
2, 3. (a) Ko e heigoa e hatakiaga ne talahau he Penetekoso? (e) Mai he Penetekoso 33 V.N., ko e heigoa kua lata ke ui atu ke he higoa a Iehova?
2 Ko e fakataiaga talahaua e fakaotiaga a Ierusalema he 70 V.N. ke he mena nei. He talahau tuai e magaaho ia he kavi 900 e tau tau, ne tohia he perofeta ko Ioelu: “To tuku atu foki e au e tau mana ke he lagi mo e lalolagi, ko e toto, mo e afi, mo e ahua kua fakatupou. To faliu fakamua e la ke he pouli mo e mahina ke he toto, to hoko mai e aho a Iehova kua lahi mo e matakutakuina.” Kua maeke fefe ha tagata ke hao mai he magaaho matakutakuina pihia? Ne omoi he agaga a Ioelu ke tohia: “Ati oti foki to fakamomoui ai a lautolu oti kana kua ui atu ke he higoa a Iehova; ha ko e mena ha i ai e fakamouiaga ke he mouga ko Siona mo Ierusalema, tuga he pehe mai a Iehova, to ha i ai foki kia lautolu ne toe ko lautolu ne ui ki ai e Iehova.”—Ioelu 2:30-32.
3 He Penetekoso 33 V.N., ne hagaao atu e aposetolo ko Peteru ke he moto tagata Iutaia mo e tau tagata kehe i Ierusalema mo e fatiaki e perofetaaga a Ioelu, he fakakite to mautali he hana tau tagata fanogonogo e fakamoliaga he vaha ha lautolu: “To eke foki e au e tau mana ke he lagi i luga, mo e tau fakamailoga ke he lalolagi i lalo; ko e toto, mo e afi, mo e ahua kua fakatupou. To faliu fakamua e la ke he pouli, mo e mahina ke he toto, to hoko mai e aho [a Iehova] kua lahi mo e talahaua. To fakamomoui foki a lautolu oti kana ke ui atu ke he higoa [a Iehova].” (Gahua 2:16-21, fakatatai NW) Ko e moto tokologa ne fanogonogo ki a Peteru kua ha ha i lalo he Matafakatufono faka-Mose, ti kua iloa e lautolu e higoa a Iehova. Ko e naia ne fakamaama mai ai a Peteru, ko e ui atu ke he higoa a Iehova kua fai mena foki ke putoia ki ai. Nakai taumaleku ai, kua lata foki ke papatiso ke he higoa a Iesu, ko ia ne tamate mo e fakaliu tu mai ke he moui nakai maeke ke mate i luga he lagi.—Gahua 2:37, 38.
4. Ko e heigoa e fekau ne fakailoa he tau Kerisiano?
4 Tali mai he Penetekoso, ne talahau atu he tau Kerisiano e kupu hagaao ke he fakaliu tu mai ko Iesu. (1 Korinito 1:23) Ne fakailoa e lautolu, kua maeke e tau tagata ke hiki mo tau tama fakaagaga he Atua ko Iehova mo e eke ai mo vala he “Isaraela he Atua,” ko e motu fakaagaga ka ‘fakakite atu e mitaki hana.’ (Kalatia 6:16; 1 Peteru 2:9) Ko lautolu ne tua fakamoli ato hoko e mate ka moua e moui nakai maeke ke mate i luga he lagi ko e tau hakega fakalataha mo Iesu i luga he hana Kautu he lagi. (Mataio 24:13; Roma 8:15, 16; 1 Korinito 15:50-54) Mua atu, to fakapuloa he tau Kerisiano nei e aho lahi mo e matakutakuina hane hau a Iehova. Kua mautali a lautolu ke hataki atu ke he lalolagi Iutaia, to hoko ki ai e matematekelea ne mua atu mai he mena ne hoko ki Ierusalema mo e tau tagata talahaua he Atua ato hoko e magaaho ia. Pete ni ia, to fai tagata ka hao mai. Ko hai? Ko lautolu ne ui atu ke he higoa a Iehova.
“Ko e Tau Aho Fakamui”
5. Ko e heigoa e tau fakamoliaga he perofetaaga kua fita he kitia he vaha nei?
5 Ke he tau puhala loga, kua fakatata he tau tutuaga he vaha ia e tau mena ne kitia e tautolu he vaha nei. Tali mai he 1914, kua momoui e tau tagata ke he magaaho pauaki ne hagaao ki ai he Tohi Tapu ko e “vaha ke fakahiku,” “fakaotiaga he lalolagi,” mo e “tau aho fakamui.” (Tanielu 12:1, 4; Mataio 24:3-8; 2 Timoteo 3:1-5, 13) He ha tautolu a senetenari, kua foaki mai he tau felakutaki muitui, tokanoa e favale, mo e moumouaga he kaufakalatahaaga mo e he takatakaiaga e fakamoliaga maaliali he perofetaaga he Tohi Tapu. Ko e tau vala oti anei he fakamoliaga ne perofeta e Iesu, he fakakite kua teitei hohoko tuai e tau tagata ke he fakahiku, he aho matakutakuina okafua a Iehova. Kua tupu e mena nei he tauaga i Amaketo, ko e tapunu he ‘matematekelea lahi, nakai pihia taha mena tali mai he kamataaga he lalolagi, kua hoko ni ke he vaha nai; ti nakai tuai pihia foki.’—Mataio 24:21; Fakakiteaga 16:16.
6. (a) Ko e heigoa ha Iehova ne fa e taute ke fakamoui a lautolu ne mahani molu? (e) Moua i fe e tautolu e fakatonuaga a Paulo ke he puhala ke hao ai?
6 Ha kua tata lahi mai e aho he moumouaga, hane fa e gahuahua a Iehova ma e fakamouiaga he tau tagata mahani molu. He magahala nei he “vaha ke fakahiku,” kua fakapotopoto e ia a lautolu ne toe he Isaraela fakaagaga he Atua mo e taute e tau fekafekau hana he lalolagi, mai he atu tau 1930, ke fakaputuputu “e moto tagata tokologa, kua nakai maeke ia taha ke totou, mai he tau motu oti, mo e tau faoa, mo e tau tagata kehekehe, mo e tau vagahau kehekehe.” Ko e matakau, “kua o mai [a lautolu nei] mai he matematekelea lahi,” nakai mamate. (Fakakiteaga 7:9, 14) Ka e maeke fefe he tau tagata takitokotaha ke iloa moli ha lautolu a fakamouiaga? Kua tali he aposetolo ko Paulo e huhu ia. He veveheaga 10 a Roma, ne foaki e ia e fakatonuaga mitaki ma e fakamouiaga—ko e fakatonuaga ne gahuahua he vaha hana mo e kua gahuahua agaia he vaha ha tautolu.
Ko e Liogi ma e Fakamouiaga
7. (a) Ko e heigoa e amaamanakiaga ne mailoga he Roma 10:1, 2? (e) Ko e ha kua maeke ia Iehova he mogonei ke fakalaulahi atu e fakapuloaaga he “tala mitaki”?
7 He magaaho ne tohia e Paulo e tohi a Roma, kua fita he tiaki e Iehova e motu ko Isaraela. Pete ia, ne fakamoli mai e aposetolo: “Ko e amaamanaki hanai he haku a loto, mo e haku a liogi ke he Atua ma Isaraela, kia fakamomoui a lautolu.” Kua amanaki a ia to moua he tau Iutaia takitokotaha e iloilo tonuhia he finagalo he Atua, ke takitaki atu ke he ha lautolu a fakamomouiaga. (Roma 10:1, 2) Mua atu, kua manako a Iehova ke momoui a lautolu he lalolagi katoa ne fakagahuahua e tua, tuga ne fakakite mai he Ioane 3:16: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” Kua hafagi he poa lukutoto a Iesu e puhala ma e fakamouiaga mua ue atu ia. Tuga e vaha a Noa mo e falu vaha he fakafiliaga ne mui mai, ne taute e Iehova e “vagahau mitaki” ke fakapuloa, ke takitaki ke he puhala he fakamouiaga.—Mareko 13:10, 19, 20.
8. Ha kua fifitaki atu ke he puhala a Paulo, kia hai ne fakaalofa e tau Kerisiano moli ki ai he vaha nei, mo e fefe?
8 He fakakite hana ni a loto mitaki ke he tau Iutaia mo e tau Tagata Motu Kehe, kua fakamatala a Paulo he tau magaaho oti. “Ne ole atu [a ia] ke he tau tagata Iutaia, katoa mo e tau tagata Heleni.” Ne tala age a ia ke he tau patu i Efeso: “Ti nakai toka e au taha kupu aoga, neke nakai fakailoa atu kia mutolu, ti fakaako atu kia mutolu ki mua he tau tagata, katoa foki mo e taha fale mo e taha fale. Kua talahau fakatonu e au ke he tau tagata Iutaia, katoa mo e tau tagata Heleni e tokihala ke he Atua, mo e tua ke he Iki ha tautolu ko Iesu Keriso.” (Gahua 18:4; 20:20, 21) Ke he puhala taha ia, kua fakafita ai e Tau Fakamoli a Iehova he vaha nei ke he gahua fakamatala, nakai hokoia ni ke he tau Kerisiano talahaua teao ka e ke he tau tagata oti, pihia foki “ke hoko ni ke he fakaotiaga he lalolagi.”—Gahua 1:8; 18:5.
Talahau e ‘Kupu ke he Tua’
9. (a) Ko e faga tua fefe ne fakamalolo mai he Roma 10:8, 9? (e) He magaaho fe mo e puhala fe ka taute e tautolu e tau talahauaga ke he ha tautolu a tua?
9 Kua lata e tua fakauka ma e fakamouiaga. He fatiaki e Teutaronome 30:14, ne talahau a Paulo: “Kua tata kia koe e kupu ha he gutu hāu, to ha he loto hāu. Ko e kupu haia ke he tua kua fakamatala atu ai e mautolu.” (Roma 10:8) Ko e mena ka fakamatala e tautolu e ‘kupu ia ke he tua,’ to eke ai ke hokulo ke he tau loto ha tautolu. Kua pihia ai ki a Paulo, mo e kua maeke he falu kupu foki hana ke fakamalolo ha tautolu a fifiliaga ke tuga a ia ke fakalataha e tua ia ke he falu: “Ko e mena kaeke ke talahau e koe ke he hāu a gutu e Iki ko Iesu, mo e talia ke he hāu a loto kua fakatu mai he Atua a ia mai ia lautolu kua mamate, to fakamoui ai a koe.” (Roma 10:9) Nakai ni kua taute e talahauaga nei ki mua he falu he magaaho he papatisoaga ka kua lata ke talahau tumau, ko e fakamoliaga ke he tau tagata ne hagaao ke he tau fahi lilifu oti he kupu moli. Ko e kupu moli ia kua matapatu atu ke he higoa uho he Iki Pule Katoatoa ko Iehova; ke he ha tautolu a Mesia ko e Patuiki mo e Lukutoto, ko e Iki ko Iesu Keriso; mo e ke he tau maveheaga mua ue atu he Kautu.
10. He fakatatai ke he Roma 10:10, 11, kua lata a tautolu ke taute fefe e ‘kupu nei ke he tua’?
10 Kua nakai fai fakamouiaga ma lautolu ne nakai talia mo e nakai fakagahuahua e ‘kupu nei ke he tua,’ tuga ne fakaholo atu e aposetolo ke talahau: “Ha ko e loto ke talia ai, ke hoko mai ai e tututonu; ka ko e gutu ke talahau ai, ke hoko mai ai e fakamouiaga. Nukua pehe mai e Tohi, Nakai ma e taha kua tua kia ia.” (Roma 10:10, 11) Kua lata ia tautolu ke moua e iloilo tonuhia he ‘kupu nei ke he tua’ mo e fakatumau ke feaki ai ke he tau loto ha tautolu ti omoi ai a tautolu ke talahau atu ai ke he falu. Ne fakamanatu mai ni e Iesu ki a tautolu: “Ko e tagata ke ma ia au, mo e haku a tau kupu ke he hau nai kua faivao mo e hala, to ma foki e Tama he tagata kia ia, ka hau a ia fakalataha mo e tau agelu tapu hana, mo e lilifu he hana Matua.”—Mareko 8:38.
11. Ke hoko ki fe e fakapuloaaga he tala mitaki, mo e ko e ha?
11 Tuga ne talahau tuai he perofeta ko Tanielu ‘ko lautolu ne iloilo,’ he vaha fakahiku nei, kua kitia ke kikila “tuga ne kikila he lagi likoliko,” he fakalaulahi atu e fakamatalaaga he Kautu ke hoko atu ke he motuaga he lalolagi. “Kua fakamafoki mai [e lautolu] e tau tagata tokologa ke mahani tututonu,” mo e kua tolomaki tuai e iloilo moli, ha kua fakamaama fakalahi e Iehova e tau perofetaaga ne fakalata ke he magaaho fakahiku nei. (Tanielu 12:3, 4) Hanei e fekau he fakamouiaga kua aoga ke he fakahaoaga ha lautolu oti ne ofania e kupu moli mo e mahani tututonu.
12. Fakatatai fefe e Roma 10:12 mo e matafekau he agelu ne fakamaama he Fakakiteaga 14:6?
12 Ne fakaholo atu e aposetolo ko Paulo: “Ko e mena nakai kehekehe e Iutaia mo e Heleni; ha ko e Iki tokotaha he tau tagata oti kana kua lahi ue atu hana fakaalofa ki a lautolu oti kana kua ui kia ia.” (Roma 10:12) Kua lata e “tala mitaki” ke fakamatala he vaha nei ke he lalolagi katoa—ke he tau tagata oti, ke he motuaga he lalolagi. Kua fakatumau e agelu he Fakakiteaga 14:6 ke lele ke he pulagi, kua tuku mai ai ki a tautolu e “vagahau mitaki tukulagi ke fakamatala atu kia lautolu kua nonofo ke he lalolagi, mo e tau motu kehe oti, mo e tau magafaoa, mo e tau vagahau kehekehe, mo e tau motu.” To aoga fefe e mena nei ki a lautolu ne talia ai?
Ui Atu ke he Higoa a Iehova
13. (a) Ko e heigoa e lauga he tau ha tautolu he 1998? (e) Ko e ha kua latatonu e lauga he tau nei ma e vaha nei?
13 He fatiaki mai e Ioelu 2:32, ne talahau a Paulo: “Ko e mena fakamomoui a lautolu oti kana kua ui ke he higoa a Iehova.” (Roma 10:13) Kua latatonu ha kua fifili e tau kupu ia mo lauga he tau he Tau Fakamoli a Iehova he 1998! Nakaila aoga lahi pihia ia mai he vaha fakamua, ke o atu ki mua mo e tua ki a Iehova, ke fakailoa hana higoa mo e tau finagalo mua ue atu ne lago ke he higoa ia! Tuga he senetenari fakamua, ti pihia he tau aho fakahiku he fakatokaaga kelea he tau mena he magaaho nei, kua tuogo atu: “Kia fakamomoui a a mutolu mai he hau fakakeukeu nai.” (Gahua 2:40) Ko e uiina tuga e ulo pu ma e tau tagata oti kana ne matakutaku ke he Atua he lalolagi katoa, ke ui atu ki a Iehova ke foaki age e fakamouiaga ki a lautolu mo e ki a lautolu foki ne kua fanogonogo mai ke he ha lautolu a talahauaga he tala mitaki.—1 Timoteo 4:16.
14. Ko e Maka fe ka ui atu a tautolu ki ai ma e fakamouiaga?
14 Ko e heigoa ka tupu he magaaho ka fakalutukia mai e aho lahi a Iehova ke he lalolagi nei? Laulahi ka nakai hahaga atu ki a Iehova ma e fakamouiaga. To tokologa e tau tagata ka “pehe age foki ke he mouga mo e tau kau maka, Mafuluhi mai a ki luga ia mautolu, mo e ūfi aki a mautolu mai he fofoga hana kua nofo ke he nofoaiki, mo e ita he Punua mamoe.” (Fakakiteaga 6:15, 16) To amaamanaki a lautolu ke he tau fakatokatokaaga mo e tau fakatuaga he fakatokaaga nei he tau mena ne kua tuga e tau mouga. Ka kua mitaki lahi ha ka falanaki atu a lautolu ke he Maka ne malolo ue atu ke he tau mena oti, ko Iehova ko e Atua! (Teutaronome 32:3, 4) Ki a ia, ne pehe e Patuiki ko Tavita: “Ko Iehova ko e haku a maka tumau haia, mo e haku a kolo, mo e haku a fakamoui.” Ko Iehova ko e “maka tumau he fakamouiaga ha tautolu.” (Salamo 18:2; 95:1) Ko e higoa hana ko e ‘kolo malolo haia,’ ko e “kolo” ni a ia ne malolo lahi ke fakahao a tautolu he magahala he matematekelea hane hoko mai. (Tau Fakatai 18:10) Ko e mena ia, kua lata ke tokologa mai he teitei totou piliona he tau tagata ne momoui he vaha nei ke fakaako ke ui atu ke he higoa a Iehova, ke he tua mo e fakamoli.
15. Ko e heigoa ne fakakite he Roma 10:14 ke he tua?
15 Kua latatonu ai, ne fakaholo atu e aposetolo ko Paulo ke huhu: “Hanai, po ke tauui fefe a lautolu kia ia kua nakai tua ki ai a lautolu?” (Roma 10:14) Kua ha ha agaia e moto tagata ka moua e lagomatai ke taute e ‘kupu ke he tua’ ma lautolu ni, ke maeke ke ui atu ke he higoa a Iehova ma e fakamouiaga. Kua mua ue atu ni e aoga he tua. Ne talahau e Paulo he taha tohi foki: “Ka nakai tua, ti nakai maeke ke fakafiafia [e Atua]; ha ko e mena lata ia ia kua fina atu ke he Atua ke talia kua moui a ia, ko ia foki kua taui mai a lautolu kua kumi fakamakutu kia ia.” (Heperu 11:6) Ka e, o mai fefe, mogoia, e falu totou miliona ke tua ke he Atua? I loto he tohi ke he tau Roma, ne huhu a Paulo: “Ka e tua fefe a lautolu kia ia kua nakai fanogonogo atu ki ai a lautolu?” (Roma 10:14) Kua foaki nakai e Iehova e puhala ma lautolu ke fanogonogo? Kia iloa moli nukua taute ai e ia! Kia fanogonogo ke he tau kupu hololoa a Paulo: “Ka e fanogonogo atu fefe a lautolu, ka nakai fai tagata ke fakamatala atu?”
16. He fakaholoaga faka-Atua, ko e ha kua lata ai mo e tau tagata fakamatala?
16 Mai he fakamauaga a Paulo kua kitia maali ke lata ke fai tagata fakamatala. Kua fakakite mai e Iesu to pihia e mena nei, ke hoko atu ke he “fakaotiaga he lalolagi.” (Mataio 24:14; 28:18-20) Ko e fakamatalaaga ko e vala lata lahi ke he fakaholoaga faka-Atua ke lagomatai aki e tau tagata ke ui atu ke he higoa a Iehova ke moua e moui. Pihia foki he Kerisitenitome kua nakai taute he tokologa ha mena ke fakalilifu e higoa uho he Atua. Tokologa kua fio a Iehova mo e tau mena tokoua, ke he manatu nakai fakai ke fakamaama e Tolu Taha. Kua tokologa foki kua veveli ke he vahega ne vagahau mai he Salamo 14:1 mo e 53:1: “Kua pehe hifo e tagata goagoa ke he hana loto, Nakai fai [“Iehova,” NW].” Kua lata ia lautolu ke iloa ko Iehova ko e Atua moui, mo e lata ia lautolu ke maama e kakano he hana higoa kaeke ke moua e lautolu e moui mai he matematekelea lahi ne tata mai.
Ko e ‘Tau Hui Fulufuluola’ he Tau Tagata Fakamatala
17. (a) Ko e ha ne lata ai ia Paulo ke fatiaki e perofetaaga he liu fakafouaga? (e) Ko e heigoa ne putoia ha ko e ‘fulufuluola e tau hui’?
17 Taha foki e huhu aoga he aposetolo ko Paulo: “Ka e fakamatala atu fefe e tau tagata kaeke ke nakai fekau atu a lautolu ki ai? Tuga he tohi mai, Kua fulufuluola ni e tau hui ha lautolu kua ta mai e tala mitaki ke he monuina, ko lautolu kua ta mai e tala ke he tau mena mitaki.” (Roma 10:15) Kua fatiaki mai e Paulo aenei he Isaia 52:7, ko e vala he perofetaaga he liu fakafouaga ne kua fakagahuahua tali mai he 1919. He vaha nei, kua liu agataha foki, a Iehova ke fakafano mai a ia “kua talahau mai e tala mitaki, ko ia kua ogo mai e monuina, kua talahau mai e tala mitaki; kua fakailoa mai e fakamouiaga.” Kua omaoma, ne fakatumau e “tau tagata toko” ne fakauku he Atua ke kalaga fakalataha. (Isaia 52:7, 8) Ko e tau hui ha lautolu ne fakailoa e fakamouiaga he vaha nei to liga lolelole, mo e efu foki, he o hui a lautolu mai he taha fale ke he taha fale, ka e kua kikila ha e tau fofoga ha lautolu he fiafia! Nukua iloa e lautolu na fekau e Iehova a lautolu ke fakapuloa e tala mitaki he mafola mo e ke fakamafana a lautolu ne maanu, lagomatai a lautolu nei ke ui atu ke he higoa a Iehova mo e fakamouiaga i mua.
18. Ko e heigoa ne talahau he Roma 10:16-18 ke he mena ka tupu fakahiku he fakapuloaga he tala mitaki?
18 Pete ko e ‘talia he tau tagata e ogo’ po ke fifili a lautolu ke nakai omaoma ki ai, kua moli lahi e tau kupu a Paulo: “Ko e moli, Kua hoko ha lautolu a tau leo ke he tau motu oti, mo e tau kupu foki ha lautolu ke he tau kala he lalolagi.” (Roma 10:16-18) Tuga ni “kua talahau he lagi e lilifu he Atua,” ne kua kitia ai ke he hana a tau tufugatia, ti kua lata he Tau Fakamoli hana he lalolagi ke fakapuloa “e tau ke fakaalofa mai ai a Iehova, mo e aho ke lalago ai he Atua ha tautolu . . . ke fakamafana ai a lautolu oti kua tagi.”—Salamo 19:1-4; Isaia 61:2.
19. Ko e heigoa ka tupu ki a lautolu ne “ui atu ke he higoa a Iehova” he vaha nei?
19 Kua tata lahi mai tuai e aho lahi mo e matakutakuina a Iehova. “Oi te fakaalofa ke he aho! ha kua tata mai e aho a Iehova, to hoko mai tuga e malaia mai ia Ia hana e malolo oti kana.” (Ioelu 1:15; 2:31) Ko e liogi ha tautolu a ia ke loga atu foki e moto tagata ka talia fakamafiti ke he tala mitaki mo e fakapotopoto mai ke he fakatokatokaaga a Iehova. (Isaia 60:8; Hapakuka 2:3) Kia manatu na ta mai he falu aho a Iehova e mahaikava ke he tau tagata mahani kelea—he vaha a Noa, he vaha a Lota, mo e he vaha ha Isaraela mo Iuta kolokolovao. Kua haia a tautolu he mogonei he tapatapa he matematekelea lahi mahaki, magaaho ka tatafi kehe he matagi afa ha Iehova e tau mahani kelea he lalolagi nei, he fakamea ai e hala ma e parataiso he mafola tukumuitea. Ko koe nakai taha tagata ka “ui atu ke he higoa a Iehova” mo e tua fakamoli? Kaeke ke pihia, kia olioli! Kua ha ha ia koe e maveheaga ne mai ni he Atua, to fakamoui a koe.—Roma 10:13.
To Tali Fefe e Koe?
◻ Ko e heigoa e tau mena fou ne fakapuloa he mole mai e Penetekoso 33 V.N.?
◻ Kia mataala fefe e tau Kerisiano ke he ‘kupu nei ke he tua’?
◻ Ko e heigoa e kakano he “ui atu ke he higoa a Iehova”?
◻ Ko e heigoa e kakano ne ha ha he tau uta fekau he Kautu e ‘tau hui fulufuluola’?
[Tau Fakatino he lau 16]
Hane talahau he tau tagata he Atua hana mitaki ue atu i Kana, Papua Niu Kini, Peru, Pueto Riko, Senekala—e, he lalolagi katoa