Talia Fakaaue—Foaki Loto Katoa
KO IEHOVA, ko e ha tautolu a Matua fakaalofa he lagi, ne manamanatu mai ki a tautolu takitokotaha. Kua fakamafana mai e Kupu he Atua ki a tautolu kua manatu po ke, leveki lahi a Ia ke he tau fekafekau oti haana. (1 Pete. 5:7) Taha puhala ne fakatātā e Iehova kua leveki e ia a tautolu he foaki mai e tau puhala lagomatai kehekehe ke lalago a tautolu ke fekafekau tua fakamooli ki a ia. (Isaia 48:17) Mua atu ka fehagai a tautolu mo e tau lekua ne fakatupu e fakaatukehe, kua manako a Iehova ke fakaaoga e tautolu e lagomatai ne foaki e ia. Ne fakakite he Fakatufono faka-Mose e talahauaga mooli ia.
I lalo he fakatokatokaaga he Fakatufono, ne foaki e Iehova e lagomatai fakaalofa ma e “tagata nofogati,” tuga e tama nakai fai matua, takape, mo e tagata kehe. (Levi. 19:9, 10; Teu. 14:29) Iloa e ia ko e falu he tau fekafekau haana to manako lagomatai mai he ha lautolu a tau matakainaga tapuaki auloa. (Iako. 1:27) Ko e mena ia, nakai lata ke fakauaua e tau fekafekau haana ke talia e lagomatai mai ia lautolu ne omoi e Iehova ke foaki e lalagoaga ia. Pete ia, ka talia e tautolu e lagomatai, kua manako a tautolu ke talia ai mo e aga kua hako.
He magaaho taha, ne fakamaama he Kupu he Atua kua fai magaaho foki e tau tagata he Atua ke foaki atu. Manatu e tala ke he “fifine takape kua nofogati” ne kitia e Iesu he faituga i Ierusalema. (Luka 21:1-4) Ne liga lagomatai he tau foakiaga fakaalofa ha Iehova ma e tau takape a ia, tuga ne totoku he Fakatufono. Pete kua nofogati, ne manatu e fifine takape ia nakai ha ko e tagata ne talia mai, ka ko e tagata ne foaki atu. Ne liga fakafiafia he aga foaki he takape a ia ha kua talahau e Iesu, “kua mua e monuina [po ke, fiafia] hana ke foaki atu, ke he monuina hana ke talia mai.” (Gahua 20:35) He tokaloto e talahauaga mooli ia, liga maeke fēfē ia koe “kia foaki atu” ti fua mai e fiafia?—Luka 6:38.
“Ko [e] Heigoa Taha Mena ke Taui Aki e Au a Iehova”?
Ne manamanatu e salamo: “Ko [e] heigoa taha mena ke taui aki e au a Iehova he hana mahani mitaki mai oti kana kia au”? (Sala. 116:12) Ko e heigoa e tau mena mitaki ne moua e ia? Ne lalago e Iehova a ia he magaaho “matematekelea mo e mamahi.” Taha mena foki, ne “laveaki e [Iehova a ia] mai he mate.” Mogonei, ne manako a ia ke “taui” ki a Iehova he taha puhala. Ko e heigoa ka taute he salamo? Ne pehē a ia: “To ta atu e au kia Iehova . . . e tau mena ne omonuo ai au.” (Sala. 116:3, 4, 8, 10-14) Ne fifili e ia ke muitua tumau e tau maveheaga aoga oti ne taute e ia ki a Iehova mo e ke fakamooli oti e tau omonuo haana ki a Ia.
Maeke a koe ke taute pihia foki. Puhala fe? He muitua he tau magaaho oti ke he puhala moui ne lagotatai mo e fakatufono mo e tau matapatu fakaakoaga he Atua. Ti, kia fakatumau ke taute mooli e tapuakiaga haau ki a Iehova mo mena kua mua atu e aoga he moui haau mo e fakaatā e koe e agaaga he Atua ke takitaki a koe he tau mena oti ne taute e koe. (Fakama. 12:13; Kala. 5:16-18) Mooli lahi, kua nakai maeke ia koe ke taui katoatoa a Iehova ma e tau mena oti ne taute e ia ma haau. Ka kua ‘fiafia e loto a Iehova’ ke kitia a koe hane foaki mo e loto katoatoa a koe ke he fekafekau haana. (Fakatai 27:11) Ko e lilifu homo ue atu ha ia ke fakafiafia a Iehova ke he puhala nei!
Lafi ke he Levekiaga he Fakapotopotoaga
To nakai fakauaua a koe ke talitonu kua aoga a koe mai he fakapotopotoaga Kerisiano ke he tau puhala loga. Puhala he fakapotopotoaga, kua loga lahi mahaki e tau mena kai fakaagaaga ne foaki e Iehova. Kua moua e koe e kupu mooli ne tokanoa a koe mai he tau hehē fakalotu mo e pouligia fakaagaaga. (Ioane 8:32) He tau feleveiaaga he fakapotopotoaga, tau toloaga, mo e tau fonoaga ne fakatokatoka he “fekafekau fakamoli mo e loto matala,” kua moua e koe e iloilo ka takitaki atu ke he moui tukulagi he lalolagi parataiso ka nakai mamahi mo e matematekelea. (Mata. 24:45-47) Maeke nakai a koe ke kamata ke totou foki e tau fua mitaki oti ne moua e koe pihia mo e tau mena ne nakaila moua ia he puhala he fakapotopotoaga he Atua? Ko e heigoa ka liga liu a koe ke foaki ke he fakapotopotoaga?
Ne tohi he aposetolo ko Paulo: “[Ko e] tino katoa kua fakamau, mo e tutaki fakalataha, kua tupu ai e tino ha ko e lagomatai mai he tau fatia takitaha, ke lata mo e gahua he fafatiaga he tau fahi tino takitaha, kia ati hake ai he tino e ia a ia ni ke he fakaalofa.” (Efeso 4:15, 16) Pete he hagaao pauaki e kupu tohi ia ke he kau he tau Kerisiano fakauku, ko e matapatu fakaakoaga i loto kua maeke ke hagaao ke he tau Kerisiano oti he vahā nei. E, igatia e tagata he fakapotopotoaga ke lafi ke he levekiaga mo e atihake he fakapotopotoaga. Ke he tau puhala fe?
Maeke ia tautolu ke taute e mena nei he eketaha tumau ke eke mo punaaga he fakamalolōaga mo e fakahauhauaga fakaagaaga ke he falu. (Roma 14:19) Maeke foki ia tautolu ke lafi ke he “ati hake ai he tino” he feaki e fua he agaaga he Atua he tau fehagai oti ha tautolu mo e tau matakainaga talitonu. (Kala. 5:22, 23) Lafi ki ai, maeke ia tautolu ke kumi e tau magaaho ke taute e “mahani mitaki . . . ke he tau tagata oti kana, ka e au atu ke he faoa ne tua.” (Kala. 6:10; Hepe. 13:16) Ko e tau tagata oti he fakapotopotoaga—tau matakainaga, tau fuata mo e tau fuakau—kua maeke ke fai vala he ‘ati hake e tino ke he fakaalofa.’
Lafi ki ai, kua maeke ia tautolu ke fakaaoga e tau taleni, tau malolō, mo e tau koloa ha tautolu ke fakalataha ke he gahua fakamoui hane taute he fakapotopotoaga. “Kua moua noa e mutolu,” he talahau e Iesu Keriso. Kua lata ke fēfē e tali ha tautolu? “Kia foaki noa atu e mutolu,” he talahau e ia. (Mata. 10:8) Ko e mena ia, kia fakalataha katoatoa ke he gahua aoga lahi he fakamatala e Kautu mo e taute tutaki. (Mata. 24:14; 28:19, 20) Kua fakakaupā kia e iloaaga haau ke taute e mena nei? Manatu e takape nofogati ne fakamaama e Iesu. Ko e mena ne foaki e ia kua fakakaupā lahi. Pete ia, ne pehē a Iesu kua mua atu e mena ne taute he takape ke he mena ne taute he falu. Ne foaki e ia e tau mena oti ne fahia a ia ke foaki.—2 Kori. 8:1-5, 12.
Talia mo e Aga kua Hako
Pete ia, kua liga fai magaaho ka manako a koe ke moua e lagomatai mai he fakapotopotoaga. Kia nakai fakauaua ke talia e tau lagomatai ka foaki atu he fakapotopotoaga he magaaho ka taufetului a koe ke fahia ke he tau pehiaaga he fakatokaaga nei. Kua foaki e Iehova e tau tagata taane kua lotomatala mo e loto fakaalofa ke “leveki e ekalesia [po ke, fakapotopotoaga]”—ke lagomatai a koe ka hokotia ke he tau kamatamata mo e tau matematekelea. (Gahua 20:28) Ko e tau motua mo e falu he fakapotopotoaga kua manako ke fakamafana, lalago, mo e puipui a koe he tau magaaho uka.—Kala. 6:2; 1 Tesa. 5:14.
Ka e mailoga mooli, ka moua e koe falu lagomatai kua lata, kia talia ai e koe mo e aga kua hako. Talia mo e loto fakaaue tumau e lagomatai ne moua e koe. Onoono ke he lagomatai pihia ne foaki he tau matakainaga talitonu ko e fakakiteaga he fakaalofa noa he Atua. (1 Pete. 4:10) Ko e ha ne aoga ai e mena ia? Ha kua nakai manako a tautolu ke talia ai ke tuga e puhala ne taute he tau tagata tokologa he lalolagi—ne nakai loto fakaaue.
Kia Fakalagotatai mo e Fakalatalata
He tohi haana ke he fakapotopotoaga i Filipi, ne tohia e Paulo hagaao ki a Timoteo: “Kua nakai fai tagata au kua loto fakalataha mo au, ke manamanatu fakamoli a ia ke he tau mena ha mutolu.” Ka e lafi atu e Paulo: “Kua kumi e lautolu oti e tau mena ha lautolu, nakai ko e tau mena a Keriso Iesu.” (Filipi 2:20, 21) He tokaloto e onoonoaga hokulo ha Paulo, maeke fēfē ia tautolu he vahā nei ke kalo mai he tupetupe lahi ke he “tau mena” ha tautolu ni?
Nakai lata ia tautolu ke fakamakamaka ka ole ke he falu he fakapotopotoaga ke foaki mai e magaaho ha lautolu ke lagomatai a tautolu ke fehagai ke he tau lekua ha tautolu. Ko e ha ne nakai pihia ai? Manamanatu ke he mena nei: To loto fakaaue mooli a tautolu kaeke kua mai he matakainaga ki a tautolu e falu koloa ke lagomatai a tautolu ke fahia he magaaho fakalutukia. Ka e to fakamakamaka nakai a tautolu ke moua e tau koloa pihia mai ia ia? Nakai. Ke he puhala pihia foki, he fiafia tumau ha tautolu a tau matakainaga fakaalofa ke lagomatai a tautolu, lata ia tautolu ke lagotatai mo e fakalatalata ke he mena ne amanaki a tautolu ke foaki mai, tuga e tau magaaho ha lautolu. Ha kua taute pihia he tau matakainaga talitonu ke lagomatai a tautolu ke fahia ke he tau magaaho uka, kua manako a tautolu ki a lautolu ke foaki fakamakai.
Nakai fakauaua, kua mautali mo e fakamakai tumau e tau matakainaga Kerisiano haau ke lagomatai a koe. Ka e he falu magaaho kua liga nakai maeke mooli ia lautolu ke foaki atu e lagomatai kua lata. Ka pihia, kia iloa mooli to lagomatai e Iehova a koe, tuga ne taute e ia ke he salamo, he ha kamatamata ni ka fehagai mo koe.—Sala. 116:1, 2; Filipi 4:10-13.
Ti kia nakai fakauaua mogoia ke talia mo e loto fakaaue e tau foakiaga ne taute e Iehova ma haau—mua atu he tau magaaho fakaatukehe mo e vihi. (Sala. 55:22) Kua manako a ia ke taute pihia e koe. Ka e manako foki a ia ki a koe ke “foaki mo e fakamakai.” Mena ia, kia katoatoa he “fifili ke he [haau a] loto” ke foaki e tau mena kua fahia ia koe ke lalago e tapuakiaga mooli. (2 Kori. 9:6, 7) He puhala ia, to maeke foki ia koe ke talia fakaaue mo e foaki loto katoa.
[Puha/Fakatino he lau 31]
“Ko [e] heigoa taha mena ke taui aki e au a Iehova he hana mahani mitaki mai oti kana kia au”?—Sala. 116:12
▪ Foaki e tau magaaho ke taute e ‘mahani mitaki ke he tau tagata oti kana’
▪ Kia eke mo punaaga he fakamalolōaga mo e fakahauhauaga fakaagaaga ke he falu
▪ Fakalataha katoatoa ke he gahua taute tutaki ke he mena kua fahia a koe ki ai