Aoga Nakai ki a Koe e Mena ne Taute e Iehova ke Lukutoto Aki a Koe?

“Fakaaue a [ki a Iehova] ko e Atua a Isaraela, nukua ahi mai a ia, mo e lukutoto hana tau tagata.”—LUKA 1:68.

1, 2. Liga fakatai fēfē e hagahagakelea he tuaga ha tautolu mogonei, ti ko e heigoa e tau hūhū ka fakatutala a tautolu ki ai?

MANAMANATU LA ko koe hane takoto he mohega he fale gagao. Ko koe he ward mo e tau tagata oti ne moua he gagao taha, ko e gagao nakai fai tului. He iloa e koe hane kumi he ekekafo e tuluiaga, ne amaamanaki lahi a koe. Ne fakatali fakamakai a koe ke iloa e vala tala hagaao ke he tau kumikumiaga ia. He taha aho, ne iloa e koe kua moua tuai e tuluiaga! Ko e ekekafo ne moua e kumikumiaga ne taute e tau foakiaga lalahi mahaki ke moua e tuluiaga. To fēfē e logonaaga haau? Mooli, to logona he loto haau e fakalilifu mo e loto fakaaue ke he tagata ne hafagi e puhala ma haau mo e tokologa foki ke lukutoto mai he mate.

² Ko e tuaga ia ne hoko kua tuga ko e mena fakalahi noa, ka ko e tuaga mooli ne fehagai mo tautolu oti. Igatia a tautolu he tuaga ne mua atu e hagahagakelea ke he mena ne fakamaama i luga. Kua manako lahi mahaki a tautolu ke he tagata laveaki. (Totou Roma 7:24.) Ke lukutoto, po ke, fakamoui a tautolu, kua lahi mahaki e mena ne taute e Iehova. Ne uho foki e tau foakiaga ne taute he Tama haana. Kia fakatutala a tautolu ke he fā e matapatu hūhū aoga. Ko e ha kua lata a tautolu ke moua e lukutoto? Ko e heigoa ne foaki e Iesu ke moua e tautolu e lukutoto? Ko e heigoa ne foaki e Iehova? Ti fakakite fēfē e tautolu kua aoga e lukutoto mai he Atua?

Kakano kua Lata a Tautolu ke Moua e Lukutoto

3. Fakatatai fēfē e hala ke he tatalu?

³ Hagaao ke he fuafuaaga foou nei, ko e taha he tau tatalu kelea lahi mahaki he fakamauaga he tagata ko e fulū Sepania he 1918, ne tamate ai hogofulu e miliona tagata. Kua hagahagakelea lahi mahaki foki e falu gagao. Pete he liga pikitia e tau tagata tokogahoa, ne tamate ai e tau tagata tokologa ne pikitia ai.a Ka e kua ka fakatatai e tautolu e hala ke he tatalu pihia? Manatu e tau kupu ia Roma 5:12: “Tuga ni he hoko mai ai e hala ke he lalolagi ke he tagata tokotaha, ko e mate foki ha ko e hala, ti kua hoko mai ai e mate ke he tau tagata oti kana, ha kua hala e tau tagata oti kana.” Ko e numera ne pikitia he hala ko e 100 e pasene, ha kua agahala e tau tagata nakai mitaki katoatoa oti. (Totou Roma 3:23.) Ti tokofiha e tagata ne mamate he hala? Ne tohi e Paulo kua tamai he hala e mate “ke he tau tagata oti kana.”

4. Ko e heigoa e onoonoaga ha Iehova ke he tau momoui ha tautolu, ti kehe fēfē e kitiaaga haana mai he tokologa he vahā nei?

⁴ Tokologa he vahā nei ne nakai kitia e hala mo e mate kua hagahaga kelea lahi pihia. Kua tupetupe a lautolu ke he mena ne higoa ko e mate tuai, ka e talahau e lautolu ko e mate ko e “mena pauaki” ne lauia e tau tagata ha ko e fuakau fakahaga. Kua mukamuka lahi ma e tau tagata ke nimo e onoonoaga he Tufuga. Kua nakai loa e moui ha tautolu ke he mena kua fakatoka e ia. Ti kua nakai fai tagata kua moui ke he ‘taha e aho’ mai he kitiaaga ha Iehova. (2 Pete. 3:8) Ne pehē e Kupu he Atua kua nakai loa e moui ha tautolu tuga e tupu he motie he vahā kū, po ke tuga e fafagu he moui. (Sala. 39:5; 1 Pete. 1:24) Kua lata ia tautolu ke tokaloto e onoonoaga ia. Ko e ha? Ka kitia e tautolu e hagahaga kelea lahi he “gagao” ne lauia ai a tautolu, kua maeke ia tautolu ke loto fakaaue lahi ke he aoga he “tuluiaga”—ko e lukutoto ha tautolu.

5. Ko e heigoa e lauiaaga he hala ki a tautolu takitokotaha?

⁵ Ke maama e hagahaga kelea lahi mo e tau lauiaaga he hala, lata ia tautolu ke iloa e mena ne fakatupu he hala ki a tautolu. Kua liga uka e mena ia he kamataaga ha kua nakaila logona hifo e tautolu e tau mena ne moua he tau matua fakamua ha tautolu. Ne olioli fakamua e Atamu mo Eva e moui mitaki katoatoa. He mitaki katoatoa e manamanatuaga mo e tino, kua maeke ia laua ke fifili ke tautaofi e tau manatu, tau logonaaga, mo e tau gahua ha laua. Ti kua atāina a laua ke tupu ki mua ko e tau fekafekau ha Iehova ko e Atua, ke fakamooli e tau mahani mitaki lahi mahaki kua ha ha ia laua. Ka e tiaki e laua e mena fakaalofa uho ia. He fifili ke agahala ki a Iehova, ne fakagalo e laua ma laua ni mo e fanau ha laua e moui ne fakatoka e Iehova ma lautolu. (Kene. 3:16-19) He magaaho taha, ne fakamatematekelea e laua a laua ni mo tautolu aki e “gagao” hane fakatutala a tautolu ki ai. Ati tonuhia a Iehova ke fakahala a laua. Ka e fakatoka mai e ia ma tautolu e amaamanakiaga he lukutoto.—Sala. 103:10.

Ko e Lukutoto ha Tautolu kua Lauia a Iesu

6, 7. (a) Fakakite fakamua fēfē e Iehova e lauiaaga lahi he lukutoto ha tautolu? (e) Ko e heigoa kua maeke ia tautolu ke fakaako mai he tau poa ne foaki e Apelu mo e he tau tupuna ne momoui ato hoko ke he Fakatufono?

⁶ Ne iloa e Iehova to lauia lahi ke fakahao e fanau a Atamu mo Eva. He perofetaaga ne fakamau ia Kenese 3:15, kua fakaako a tautolu hagaao ke he lauiaaga he lukutoto. To foaki e Iehova e [“tega,” NW], ko e laveaki, ka fakaotioti a Satani he taha aho. Ka ko e tagata laveaki ia to matematekelea he magaaho ia he motu e muihui. Kua uhu mo e nakai fahia e mena nā, ka ko e heigoa e kakano he mena ia? Ti ko e heigoa ka fakauka a Ia ne Fifili e Iehova ki ai?

⁷ Ke fakahao e tau tagata mai he hala, ko e tagata laveaki kua lata ke foaki e puhala he fakafeiloaga, ko e puhala ke fakahao mai e tau tagata ke he Atua he vetevete e tau lauiaaga he hala. Ko e heigoa ka putoia ke he mena ia? Ha ha ai e tau kitiaaga fakamua ne lata mo e poa. Ko e tagata tua fakamooli fakamua, ko Apelu, ne foaki e tau poa manu ki a Iehova, ti moua e ia e taliaaga faka-Atua. Fakamui, ko e tau tupuna matakutaku Atua tuga a Noa, Aperahamo, Iakopo, mo Iopu ne foaki e tau poa pihia ne fakafiafia e Atua. (Kene. 4:4; 8:20, 21; 22:13; 31:54; Iopu 1:5) Fai senetenari he mole, ne fakamaama fakamatafeiga he Fakatufono faka-Mose ke he tau poa.

8. Ko e heigoa ne taute he ekepoa ne mua he Aho he Fakafeiloaga ne lagataha he tau?

⁸ He tau poa aoga lahi ne poaki he Fakatufono ko e tau poa ne foaki lagataha he tau he Aho he Fakafeiloaga. Ke he aho ia, ne loga e tau mena fakatai ne taute he ekepoa ne mua. Ne foaki e ia e tau poa ki a Iehova ma e fakafeiloaga he tau hala—fakamua ko lautolu he vahega fakaekepoa, ti ma lautolu he tau magafaoa nakai ko e tau ekepoa. Ne hū atu e ekepoa ne mua ke he poko Tapu Ue Atu he faituga, ti ko ia ni ka fano ki loto he aho ia he tau. Ne pīpī e ia e toto he tau poa i mua he puha he maveheaga. I luga he puha tapu ia, ko e aolagi kikila mo e maama ne fa tū mai he falu magaaho, ne fakakite kua ha ha i ai a Iehova ko e Atua.—Esoto 25:22; Levi. 16:1-30.

9. (a) He Aho he Fakafeiloaga, ko hai ne fakatino he ekepoa ne mua, ti ko e heigoa ne fakakite he tau poa ne foaki e ia? (e) Ko e heigoa ne fakakite he ekepoa ne mua he hū atu ke he Tapu Ue Atu?

⁹ Ne omoomoi e aposetolo ko Paulo ke fakakite e kakano i tua he tau gahua fakatai ia. Ati fakakite e ia kua fakatino he ekepoa ne mua e Mesia, ko Iesu Keriso, ka e fakamailoga he foakiaga he tau poa e mate he Keriso. (Hepe. 9:11-14) Ko e poa mitaki katoatoa ia ka foaki e fakafeiloaga mooli ma e ua e matakau—ko e vahega fakaekepoa he tau matakainaga fakauku he agaaga ne 144,000 he Keriso mo e ‘tau mamoe kehe.’ (Fakakite. 7:9, 14; Ioane 10:16) He magaaho ne hū atu e ekepoa ne mua ke he Tapu Ue Atu, ne fakaata e ia a Iesu ne finatu ke he lagi ke tuku ki mua ha Iehova ko e Atua e uho he poa lukutoto.—Hepe. 9:24, 25.

10. Ko e heigoa ka hoko ke he Mesia nukua fakakite he perofetaaga he Tohi Tapu?

¹⁰ Maaliali ai, to lauia lahi e lukutoto he fanau a Atamu mo Eva. To poa mooli he Mesia haana moui! Ne fakakite he tau perofeta he tau Tohiaga Tapu Heperu e fakamatafeiga he talahauaga mooli nei. Ma e fakatai, ne hagaao e talahauaga he perofeta ko Tanielu ko e “Mesia ko e Iki [po ke, Takitaki]” to “kelipopo,” po ke tamate, ke ‘eke e lukutoto ha ko e mahani kelea.’ (Tani. 9:24-26) Kua talahau tuai e Isaia to tiaki, favale, mo e tamate, po ke tuina, e Mesia ke hahamo e tau hala he tau tagata nakai mitaki katoatoa.—Isaia 53:4, 5, 7.

11. Ke he tau puhala fe ne fakakite he Tama ha Iehova e makai ke foaki ne ia a ia ma e lukutoto ha tautolu?

¹¹ Ato hau e Tama fuataha he Atua ke he lalolagi, ne mailoga e ia to lauia lahi a ia ke he lukutoto ha tautolu. To matematekelea lahi a ia mo e to tamate ai. He magaaho ne fakaako he Matua haana a ia ke he tau kupu mooli ia, tukumuli po ke totoko nakai a ia? Nakai pihia, ne muitua fakamakai a ia ke he fakaakoaga he Matua haana. (Isaia 50:4-6) He nofo a Iesu he lalolagi, ne omaoma pihia foki a ia he taute e finagalo he Matua haana. Ko e ha? Taha e tali ne foaki e ia ke he tau kupu nei: “Kua fakaalofa au ke he Matua.” Ne foaki e ia falu ke he tau kupu nei: “Nakai mua ni e fakaalofa he taha ke he fakaalofa nai, kia tuku atu e taha hana moui ke hukui aki e hana tau kapitiga.” (Ioane 14:31; 15:13) Ti ko e lukutoto ha tautolu kua fakavē fakalahi ai ke he fakaalofa he Tama a Iehova. Pete kua lauia ai e moui mitaki katoatoa haana ko e tagata, kua fiafia a ia ke taute ai ma e lukutoto ha tautolu.

Ko e Lukutoto ha Tautolu kua Lauia a Iehova

12. Ha hai e fakakiteaga he lukutoto, ti ko e ha ne foaki e ia?

¹² Ko Iesu ne nakai ko e Punaaga po ke Finagalo he poa lukutoto. Ka ko e puhala nei he lukutoto ko e fakakiteaga mua ue atu he finagalo ha Iehova. Ne fakakite he aposetolo ko Paulo ko e tau poa ne huhunu i luga he fatapoa he faituga, ne fakakite e finagalo ha Iehova. (Hepe. 10:10) Ti ko e lukutoto ne moua e tautolu he puhala he poa ha Keriso ko e taha mena ka foaki e tautolu fakamua mo e mua atu ki a Iehova. (Luka 1:68) Ko e fakakiteaga haia he finagalo mitaki katoatoa haana mo e fakaalofa lahi haana ma e tau tagata.—Totou Ioane 3:16.

13, 14. Maeke fēfē he fakafifitakiaga ha Aperahamo ke lagomatai a tautolu ke loto fakaaue ke he mena ne taute e Iehova ma tautolu?

¹³ Ko e heigoa ne lauia a Iehova he fakakite e fakaalofa haana ma tautolu ke he puhala nei? Kua uka ai ia tautolu ke maama. Pete ia, kua fai tala he Tohi Tapu ka lagomatai a tautolu ke maama mitaki e matakupu nei. Ne ole a Iehova ke he tagata tua fakamooli ko Aperahamo ke taute e mena ne mua atu e uka—ke poa e tama haana ko Isaako. Ko Aperahamo ko e matua taane fakaalofa. Ne tutala a Iehova ki a Aperahamo hagaao ki a Isaako ko e ‘hau a tama fuataha ne ofania e koe.’ (Kene. 22:2) Pete ia, kua kitia agaia e Aperahamo ko e taute e finagalo ha Iehova kua mua atu e aoga ke he fakaalofa haana ki a Isaako. Ti taute ni e Aperahamo mo e omaoma. Ka e nakai fakaatā e Iehova a Aperahamo ke taute e mena ka taute e Ia a taha aho. Ne fakafano atu he Atua e agelu ke taofi a Aperahamo neke hoko e lima haana ke he tama haana. Kua eketaha fakalahi a Aperahamo ke omaoma ke he Atua haana ke he kamatamata uka nei, ti logona mooli e ia ko e amaamanakiaga ni ke kitia e tama haana ka liu moui ha ko e liu tu mai. Ka e tua katoatoa a ia to taute he Atua e liu tu mai pihia. Ne pehē a Paulo na moua mooli e Aperahamo a Isaako he liu tu mai “fakatai.”—Hepe. 11:19.

¹⁴ Maeke nakai a koe ke logona e mamahi lahi ha Aperahamo he tauteute a ia ke poa e tama haana? Puhala ia, kua lagomatai he mena ne taute e Aperahamo ke fakatātā kua poa e Iehova a ia ne fakahigoa e Ia “ko e haku a [T]ama fakahele.” (Mata. 3:17) Ka e manatu, kua mamahi lahi mahaki a Iehova. Ne olioli e Ia mo e Tama haana e fakafetuiaga tata ke he tau tau loga ne liga totou piliona foki. Ne gahua fiafia e Tama mo e Matua he eke mo [“iki gahua,” NW] fakahele haana mo e Gutuvagahau haana, ko e “Loko.” (Fakatai 8:22, 30, 31; Ioane 1:1) Kua mua atu e fakauka a Iehova he fakahukia, amuamu, mo e tamate he Tama haana ke tuga e tagata holifono, ke he iloaaga ha tautolu. Ko e lukutoto ha tautolu kua lauia lahi mooli a Iehova! Maeke fēfē mogoia ia tautolu ke fakakite kua uho ki a tautolu e lukutoto ia?

Fakakite Fēfē e Koe kua Aoga e Lukutoto ki a Koe?

15. Fakakatoatoa fēfē e Iesu e gahua lahi he fakafeiloaga, ti ko e heigoa ati maeke e mena nei?

¹⁵ Ne fakakatoatoa e Iesu e gahua lahi he fakafeiloaga he mole e liu fakatū hake ke he lagi. He liu fakalataha mo e haana Matua fakahele, ne fakakite age e Iesu ki a Ia e uho he poa haana. Ti mumui mai e tau monuina loga. Maeke ai e fakamagaloaga katoa ke fakaaoga fakamua ke he tau hala he tau matakainaga fakauku he Keriso, ti pihia mo e he “lalolagi oti kana.” Ha ko e poa ia, ko lautolu oti he vahā nei ne tokihala mooli ke he tau hala ha lautolu ti eke mo tau tutaki mooli he Keriso ka olioli e tuaga meā ki mua a Iehova ko e Atua. (1 Ioa. 2:2) Aoga fēfē e mena nei ki a koe?

16. Liga fakatātā fēfē e tautolu e puhala kua lata ia tautolu ke loto fakaaue ke he lukutoto ne foaki e Iehova ma tautolu?

¹⁶ Liliu la tautolu ke he fakataiaga ne talahau he kamataaga. Liga finatu e ekekafo ne moua e tuluiaga ki a lautolu ne gagao he ward haau mo e talahauaga nei: Ko e ha tagata gagao ne talia e tuluiaga mo e muitua ke he fakamauaga ne tohi to fakamaulu mooli. Ka e kua ka laulahi he tau tagata gagao kua nakai talia ke muitua e takitakiaga he ekekafo, he talahau kua uka lahi ke inu e tegavai po ke pipiki mau ke he fakamauaga ne tohi? To muitua kia a koe ki a lautolu, pete he fitā he iloa e koe na gahua mooli e tuluiaga? Nakai pihia! To fakakite mooli e koe e fakaaue ma e tuluiaga mo e muitua fakamitaki ke he tau fakaakoaga he ekekafo, ti liga tala age foki ke he falu e fifiliaga haau. Ke he puhala mua ue atu, kua lata ia tautolu takitokotaha ke fakamakutu ke fakakite ha tautolu a loto fakaaue lahi ki a Iehova ke he lukutoto ne foaki he puhala he poa lukutoto he Tama haana.—Totou Roma 6:17, 18.

17. Ko e heigoa e tau puhala ka fakakite e koe e loto fakaaue haau ke he mena ne taute e Iehova ke lukutoto aki a koe?

¹⁷ Ka loto fakaaue a tautolu ke he mena ne taute e Iehova mo e Tama haana ke fakahao aki a tautolu mai he hala mo e mate, to fakakite mooli ai e tautolu. (1 Ioa. 5:3) To totoko a tautolu ke he hihiga ke hala. To nakai taute pauaki e tautolu e hala mo e moui ai ke he puhala fakatupua ne fa matutaki ki ai. Ko e puhala pihia ka tupu mai e manatu kua nakai aoga po ke nakai loto fakaaue a tautolu ke he lukutoto. Ka e, to fakakite e tautolu e loto fakaaue he fakamakamaka ke meā tumau ke he fofoga he Atua. (2 Pete. 3:14) To fakakite ai e tautolu he tala age ke he falu e amaamanakiaga homo ue atu ha tautolu ke he lukutoto, ti maeke foki ia lautolu ke moua e tuaga meā mo Iehova mo e moua foki e amaamanakiaga ma e vahā tukulagi anoiha. (1 Timo. 4:16) Kua latatonu mooli a Iehova mo e Tama haana ke moua e magaaho mo e malolō oti kana kua maeke ia tautolu ke foaki katoatoa ke fakaheke a laua! (Mare. 12:28-30) Manamanatu la ki ai! Maeke ia tautolu ke amaamanaki lahi ke he magaaho ka tului katoatoa e hala ha tautolu. Maeke ia tautolu ke momoui ke he puhala ne finagalo e Atua ki ai, ke mitaki katoatoa tukulagi—ha ko e tau mena oti ne taute e Iehova ke lukutoto aki a tautolu!—Roma 8:21.

[Matahui Tala]

To Tali Fēfē e Koe?

• Ko e ha kua manako lahi a koe ke he lukutoto?

• Lauia fēfē a koe ha ko e gahua foaki noa ha Iesu?

• Fēfē e logonaaga haau hagaao ke he mena fakaalofa ha Iehova he lukutoto?

• Ko e heigoa kua fakalagalaga a koe ke taute he talia e tau foakiaga ha Iehova ma e lukutoto haau?

[Fakatino he lau 27]

He Aho he Fakafeiloaga, ko e ekepoa ne mua ha Isaraela ne eke mo fakataiaga mooli he Mesia

[Fakatino he lau 28]

Ko e makai ha Aperahamo ke poa e tama haana kua lahi e mena ne fakaako ki a tautolu hagaao ke he poa mua ue atu ha Iehova