Iesu Keriso—Hokulo he Fekau Haana

“Mooli ko e talahauaga lahi ne tumau agaia mai i Kapanaumi ne matutaki a ia ke moua e tau loto mo e tau manamanatuaga.”a—TAGATA TOHIA GREGG EASTERBROOK.

KUA malolō lahi e tau kupu. Ko e tau kupu pulotu ne fifili fakamitaki kua maeke ke fakalagalaga e tau loto, omoomoi e amaamanakiaga, mo e hiki e tau momoui. Nakai fai tagata ne mua atu e malolō he tau kupu ke tuga a Iesu Keriso. Ko e tagata ne logona a Iesu he talahau e Lauga he Mouga ne talahaua ne tohi he mogo fakamui: “Kua fakaoti e Iesu e tau kupu nai, ati ofomate ai e lanu tagata ke he hana tau kupu.”—Mataio 7:28.

Ke hoko mai ke he aho nei, loga e tau kupu ha Iesu ne iloa he tau tagata he lalolagi katoa. Manamanatu ke he falu fakataiaga he tau talahauaga ne kakano lahi mahaki.

“Nakai maeke ia mutolu ke fekafekau ke he Atua mo Mamone.”—Mataio 6:24.

“Ko e tau mena oti kua loto a mutolu ki ai, ke eke he tau tagata kia mutolu; ati eke ā e mutolu e tau mena ia kia lautolu.”—Mataio 7:12.

“Ko e tau mena a Kaisara, kia uta a . . . kia Kaisara; ka ko e tau mena he Atua, kia uta a ke he Atua.”—Mataio 22:21.

“Kua mua e monuina [po ke, fiafia] hana ke foaki atu, ke he monuina [po ke, fiafia] hana ke talia mai.”—Gahua 20:35.

Ka e lahi atu e mena ne taute e Iesu he talahau ni e tau kupu talahaua. Ko e fekau ne fakamatala e ia ne malolō ha kua fakamaama e mena mooli hagaao ke he Atua, fakaako e tau tagata ke he puhala ke moua e kakano mooli he moui, mo e fakakite fakamaali e tau tali ke he tau matematekelea oti he tagata—ko e Kautu he Atua. He kumikumi a tautolu ke he fekau nei he tau vala tala ka mumui mai, to kitia e tautolu e kakano ati matutaki a Iesu ke “moua e tau loto mo e tau manamanatuaga” loga lahi mahaki.

[Matahui Tala]