Mena ne Taute he Agaaga Tapu ke he Gahuaaga he Finagalo he Atua

“To pihia ni haku a kupu kua fina atu ai he gutu haku, . . . to monuina foki ia ke he mena ne fakafano atu ai e au.”—ISAIA 55:11.

1. Fakatai e kehekehe he fakatokaaga mo e finagalo.

MANAMANATU ke he tokoua e tagata taane hane igatia tauteute ke ō fenoga he motokā. Taha ne fakamaimailoga e puhala tonu mo e vala tala he matakavi ka fano a ia ki ai. Ka ko e taha kua iloa mitaki e ia e matakavi ti loga foki e tau lā hala ne iloa e ia. Kua amaamanaki a ia ke hikihiki e puhala haana ke latatonu ai mo e ha tuaga ka feleveia ai. He falu tuaga, ko e tau puhala kehekehe ne fakaaoga he tau tagata taane tokoua nei ne fakakite e fekehekeheaki he fakatokaaga mo e finagalo. Liga fakatatai e fakatokaaga ke he fakamaimailoga he tau vala tala he puhala, ka ko e finagalo kua liga putoia e tokaloto he foliaga ka e nakai lata ke taha ni e puhala pauaki ke hoko ki ai.

2, 3. (a) Ko e heigoa ne lauia he finagalo a Iehova, ti hagaaki fēfē a ia ke he tuaga ne tupu he magaaho ne agahala a Atamu mo Eva? (e) Ko e ha kua lata ke fakatatau tumau a tautolu ke he finagalo a Iehova hane gahuahua?

² Ka fakagahua ai e finagalo a Iehova, ne nakai ha ha ia Ia e fakatokaaga mauokafua, ka ko e finagalo ka fakakatoatoa ai fakahaga. (Efeso 3:11) Ko e finagalo nei kua putoia e mena ne manako a ia he kamataaga ma e tau tagata oti mo e lalolagi—ko e fua lalolagi nei to liliu ai ke eke mo kaina parataiso ke nonofo mafola mo e fiafia tukulagi e tau tagata mitaki katoatoa. (Kene. 1:28) He agahala a Atamu mo Eva, ne hagaaki a Iehova ke he tuaga ia mo e taute e tau fakaholoaga ke kitia to fakakatoatoa ai e finagalo haana. (Totou Kenese 3:15.a) Ne fifili e Iehova ko e fifine fakatai haana ke fanau mai e “tega,” po ke Tama, ka nakai leva ti moumou a Satani mo e utakehe oti e tau hagahagakelea ne fakatupu e ia.—Hepe. 2:14; 1 Ioa. 3:8.

³ Nakai fai malolō he lagi po ke lalolagi ke taofi e Atua he fakamooli e finagalo haana. (Isaia 46:9-11) Ko e ha kua talahau pihia a tautolu? Ha kua lauia e agaaga tapu a Iehova. Ko e malolō fakaohooho ia kua fakamooli e finagalo he Atua “to monuina [po ke, kautū]” ai. (Isaia 55:10, 11) Kua mitaki ki a tautolu ke fakatatau katoatoa tumau ke he finagalo he Atua hane gahuahua. Kua falanaki e tau monuina he tau momoui ha tautolu anoiha ke he fakamooli he finagalo ia. Lafi ki ai, kua fakamalolō e tua ke kitia e puhala ne fakaaoga e Iehova e agaaga tapu. Omai la tautolu ke fakatutala ke he matagahua he agaaga—he vahā kua mole, magaaho nei, mo e anoiha—ke he gahuaaga he finagalo a Iehova.

Matagahua he Agaaga Tapu he Vahā kua Mole

4. Fakakite fakahaga fēfē e Iehova e finagalo haana?

⁴ He vahā Tohi Tapu, ne fakakite fakahaga e Iehova e finagalo haana. Fakamua, ko e kitiaaga he Tega ne mavehe mai ko e “mena galo.” (1 Kori. 2:7) Ato hoko laia ke he 2,000 tau tau fakamui ne liu a Iehova tutala hagaao ke he [“tega,” NW]. (Kene. 12:7; 22:15-18) Ne age e Iehova ki a Aperahamo e maveheaga ka laulahi e fakamooliaga. Ko e talahauaga “hau a [“tega,” NW] foki” ko e fakakiteaga maaliali to hau e Tega ko e tagata, ko e mataohi ha Aperahamo. Maeke ia tautolu ke iloa mooli ne kitekite a Satani mo e fiafia lahi he fakakite fakahaga mai e vala tala nei. Ko e Fī ia kua manako mooli ke moumou po ke matahavala ke he mataohi a Aperahamo mo e kunuene e finagalo he Atua. Ka e nakai kautū e fakahikuaga ia ha kua gahuahua e agaaga nakai kitia he Atua. He tau puhala fe?

5, 6. Fakaaoga fēfē e Iehova e agaaga haana ke puipui e tau tagata takitaha he mataohi ne takitaki atu ke he Tega?

⁵ Ne fakaaoga e Iehova e agaaga haana ke puipui a lautolu he mataohi ne takitaki atu ke he Tega. Ki a Aperamo (Aperahamo), ne pehē a Iehova: “Ko au nai ko e hau a akau punuti ia.” (Kene. 15:1) Kakano lahi e tau kupu ia. Ma e fakatai, manamanatu la ke he mena ne tupu he kavi ke he 1919 F.V.N. he magaaho ne nonofo fakakū a Aperahamo mo Sara i Kira. He nakai iloa ko e hoana a Aperahamo a Sara, ko Apimeleko, ko e patuiki a Kira, ne uta a Sara mo e foliaga ke eke mo hoana haana. Kua gahua fakagalogalo kia a Satani, he lali ke taofi a Sara neke fanau mai e tega a Aperahamo? Nakai talahau he Tohi Tapu. Ko e mena ne talahau mai ki a tautolu kua fakalago mai a Iehova. Ke he miti, ne hataki e ia a Apimeleko ke nakai hoko atu ki a Sara.—Kene. 20:1-18.

⁶ Fai mena foki ne tupu. Ne fakahao lagaloga e Iehova a Aperahamo mo e tau tagata he magafaoa haana. (Kene. 12:14-20; 14:13-20; 26:26-29) Hagaao ki a Aperahamo mo e tau mataohi haana, maeke he salamo ke pehē: “Nakai toka e [Iehova] taha tagata ke favale atu kia lautolu; ne akonaki atu e ia e tau patuiki ha ko lautolu. Kua pehe atu ki ai, Aua neke piki atu kia lautolu ne fakauku e au; aua foki neke mahani kelea ke he haku a tau perofeta.”—Sala. 105:14, 15.

7. He tau puhala fe ne puipui e Iehova e motu ko Isaraela?

⁷ Puhala he agaaga haana, ko Iehova ne puipui e motu a Isaraela i tuai, to fanau mai ai e Tega ne mavehe. Mai he agaaga haana, ne foaki e Iehova ke he tau Isaraela e Fakatufono haana, ne fakamau e tapuakiaga mooli mo e puipui e tau Iutaia mai he kiva fakaagaaga, mahani, mo e fakatino. (Esoto 31:18; 2 Kori. 3:3) Magahala he Tau Fakafili, ne fakamalolō he agaaga a Iehova e falu tagata taane ke fakahao a Isaraela mai he tau fī ha lautolu. (Fakafili 3:9, 10) Ke he tau tau loga ato hoko atu ke he fanauaga a Iesu, ko e matapatu he vala he tega a Aperahamo, kua liga putoia e agaaga tapu he puipui a Ierusalema, Petelehema, mo e faituga—ko e tau mena oti ia to fai vala he fakamooliaga ke he tau perofetaaga ki a Iesu.

8. Ko e heigoa ne fakakite kua putoia fakahako e agaaga tapu ke he moui mo e fekafekauaga he Tama he Atua?

⁸ Ko e agaaga tapu ne putoia katoatoa ke he moui mo e fekafekauaga ha Iesu. He gahuahua ke he nofoaga tama he tamāfine tote ko Maria, ne taute he agaaga tapu e mena ne nakaila pihia fakamua po ke tali mai he magaaho ia. Ne fakatupu e fifine nakai mitaki katoatoa ke fatu mo e fanau mai e Tama mitaki katoatoa, ne nakai ha ha i lalo he fakahala he mate. (Luka 1:26-31, 34, 35) Ko e agaaga he magaaho fakamui ne puipui e tama mukemuke ko Iesu mai he mate tuai. (Mata. 2:7, 8, 12, 13) Kavi ke he 30 e tau tau he moui a Iesu, ne fakauku he Atua a ia ke he agaaga tapu, he fifili a ia ke eke mo hakeaga ke he nofoaiki a Tavita mo e poaki ki a ia ke fakamatala. (Luka 1:32, 33; 4:16-21) Ne fakamalolō he agaaga tapu a Iesu ke taute e tau mana, putoia e fakamaulu a lautolu ne gagao, fagai e moto tagata, mo e fakaliu momoui a lautolu ne mamate. Ko e tau gahua malolō lahi pihia ko e ata ke he tau monuina ka amanaki a tautolu i lalo he pule fakapatuiki a Iesu.

9, 10. (a) Kitia mooli fēfē e agaaga tapu ki luga he tau tutaki a Iesu he senetenari fakamua? (e) Ko e heigoa e tupuaga he matagahua he finagalo a Iehova ne fakakite he senetenari fakamua V.N.?

⁹ Kamata he Penetekoso 33 V.N., ne fakaaoga e Iehova e agaaga haana ke fakauku e vala ke uaaki he tega a Aperahamo, tokologa ia lautolu ne nakai ko e mataohi ha Aperahamo. (Roma 8:15-17; Kala. 3:29) Kua kitia mooli e agaaga tapu ki luga he tau tutaki ha Iesu he senetenari fakamua, ne fakamalolō a lautolu ke fakamatala fakamakutu mo e fakamalolō a lautolu ke taute e tau gahua lalahi. (Gahua 1:8; 2:1-4; 1 Kori. 12:7-11) Puhala he tau mena fakaalofa fakamana pihia, kua fakakite he agaaga tapu e tupuaga ofoofogia he gahuaaga he finagalo a Iehova. Ne nakai liu a Iehova fakaaoga e fakaholoaga tuai ma e tapuakiaga ne fakavē ke he faituga i Ierusalema. Nukua hiki e fiafia haana ke he fakapotopotoaga Kerisiano ne fakatū foou. Tali mai ai, kua fakaaoga e Iehova e fakapotopotoaga fakauku ia ke taute e finagalo haana.

¹⁰ He puipui, fakamalolō, fakauku—ko e falu ni anei he tau puhala ne fakaaoga e Iehova e agaaga tapu he tau vahā Tohi Tapu ke fakatumau e finagalo haana ke hoko atu ke he fakamooliaga. Ka e kua e vahā ha tautolu? Fakaaoga fēfē e Iehova mogonei e agaaga haana ke lalago e finagalo haana? Kua lata ia tautolu ke iloa ha kua manako a tautolu ke gahua fakatatau mo e agaaga. Omai la tautolu ke fakatutala ke he fā e puhala hane fakaaoga e Iehova e agaaga haana he magaaho nei.

Matagahua he Agaaga Tapu he Magaaho Nei

11. Ko e heigoa kua fakakite na lagomatai he agaaga tapu e tau tagata he Atua ke meā, ti fakakite fēfē e koe kua kaufakalataha a koe mo e agaaga?

¹¹ Fakamua, kua lagomatai he agaaga tapu e tau tagata he Atua ke meā. Ko lautolu ne fai vala he finagalo a Iehova kua lata ke mahani meā. (Totou 1 Korinito 6:9-11.) Ko e falu ne eke mo tau Kerisiano mooli ne taute e tau mahani kelea tuga e feuaki, faivao, mo e mahani fakasotoma he vahā fakamua. Ko e tau manako ne fanau mai ke he tau gahua agahala kua maeke ke vakavaka hokulo. (Iako. 1:14, 15) Ka ko e tau tagata pihia nukua “koukou tuai,” ne fakakite kua taute e lautolu e tau hikiaga he tau momoui ha lautolu kua lata ke fakafiafia e Atua. Ko e heigoa ne fakamalolō e tau tagata ne ofania e Atua ke kautū he totoko e fakaohooho ke taute e tau manako hehē? Ko e “[a]gaga foki he Atua ha tautolu,” he talahau he 1 Korinito 6:11. He fakatumau ke mahani meā, kua fakakite e koe na fakaatā e koe e agaaga ia ke gahuahua malolō lahi ke he moui haau.

12. (a) Hagaao ke he fakakiteaga a Esekielu, takitaki fēfē e Iehova e fakatokatokaaga haana? (e) Fakakite fēfē e koe kua gahua fakalagotatai a koe mo e agaaga?

¹² Uaaki, kua fakaaoga e Iehova e agaaga haana ke takitaki e fakatokatokaaga haana ke he puhala nukua manako a ia ke fano ki ai. He fakakiteaga a Esekielu, ko e vala he fakatokatokaaga a Iehova he lagi ne fakatino e kariota kua tumau ke holo ke fakamooli e finagalo a Iehova. Ko e heigoa ne omoomoi e kariota ke holo ke he puhala pauaki? Ko e agaaga tapu. (Eseki. 1:20, 21) Kia manatu e tautolu ko e fakatokatokaaga a Iehova kua moua ai ke he ua e vala, taha he lagi ti taha he lalolagi. Ka takitaki he agaaga tapu e vala he lagi, kua liga pihia foki e vala he lalolagi. He omaoma mo e fakamooli ke he takitakiaga ne moua mai he vala he fakatokatokaaga he Atua he lalolagi, kua fakakite e koe kua fakatatau tumau a koe mo e kariota a Iehova ti kua gahua fakalagotatai mo e agaaga tapu haana.—Hepe. 13:17.

13, 14. (a) Ko hai ne fakakatoa e “hau nai” ne talahau e Iesu? (e) Talahau e fakataiaga he matagahua he agaaga tapu ne fakamaama e tau kupu mooli he Tohi Tapu. (Kikite e puha “Fakatatau Kia a Koe ke he Maama Hane Tupu Lahi?”)

¹³ Toluaki, kua gahuahua e agaaga tapu he fakamaama e tau kupu mooli he Tohi Tapu. (Fakatai 4:18) Kua leva tuai e fakaaoga he “fekafekau fakamoli mo e loto matala” e mekasini nei ko e matapatu halavaka ke fakatoka mai e maama holo ki mua. (Mata. 24:45) Ma e fakatai, manamanatu ke he maamaaga ha tautolu ki a lautolu ne fakakatoa e “hau nai” ne talahau e Iesu. (Totou Mataio 24:32-34.) Hagaao ke he hau fe ne tutala a Iesu ki ai? Ko e vala tala “Ha Ha Hinei he Keriso—Ko e Heigoa e Kakano ki a Koe?” ne fakamaama kua nakai hagaao a Iesu ki a lautolu ne mahani kelea, ka e hagaao ke he haana a tau tutaki, ko lautolu ne nakai leva ti fakauku he agaaga tapu.b Ko e tau tutaki fakauku ha Iesu ke he senetenari fakamua mo e ke he magaaho nei ha tautolu, to nakai ni kitia e lautolu e fakamailoga ka e iloa foki e kakano “kua tata mai tuai [a Iesu], ha he tau gutuhala.”

¹⁴ Ko e heigoa e kakano he fakamaama nei ki a tautolu? Pete he nakai iloa tonu e tautolu e loa he “hau nai,” kua latatonu ia tautolu ke tokaloto e tau mena loga hagaao ke he kupu “hau”: Kua fa hagaao e mena ia ke he tau tagata ne kehekehe e tau tau he moui ne nonofo he taha e vahā; to fai fakaotiaga ni mo e to nakai loa lahi mahaki. (Esoto 1:6) Maeke fēfē mogoia a tautolu ke maama e tau kupu a Iesu hagaao ke he “hau nai”? Ne kakano mooli a ia ko e tau momoui ha lautolu ne fakauku ne ha ha ai he magaaho ne kamata ke kitia e fakamailoga he 1914 to momoui foki fakalataha mo lautolu ne fakauku ka kitia e kamataaga he matematekelea lahi. Ko e hau ia ne fai kamataaga, ti to fai fakaotiaga mooli. Ko e fakamooliaga he tau vala kehekehe he fakamailoga ne kitia maali kua liga tata e matematekelea lahi. He tumau e manamanatuaga fakamafiti mo e mataala haau, kua fakakite e koe kua fakatatau a koe mo e maamaaga holo ki mua mo e muitua ke he tau takitakiaga he agaaga tapu.—Mare. 13:37.

15. Ko e heigoa kua fakakite na fakamalolō he agaaga tapu a tautolu ke fakapuloa e tala mitaki?

¹⁵ Fāaki, kua fakamalolō he agaaga tapu a tautolu ke fakapuloa e tala mitaki. (Gahua 1:8) Ko e heigoa foki ka fakamaama e puhala kua fakamatala e tala mitaki ke he lalolagi katoa? Manamanatu ki ai. Liga ko koe taha ia lautolu ne liga mā po ke fakauaua lahi mahaki he manamanatu he taha magaaho, ‘To nakai fano au ke fakamatala he taha fale ke he taha fale!’ Ka e, makutu lahi a koe mogonei he gahua ia.c Tokologa e Tau Fakamoli ha Iehova ne matutaki ke fakamatala pete e fehagai mo e totokoaga po ke favaleaga. Ko e agaaga tapu ni he Atua ke fakamalolō a tautolu ke kautū ke he tau fakalavelave fakahopoate mo e taute e tau mena ka nakai maeke ke taute ni he malolō ha tautolu. (Mika 3:8; Mata. 17:20) He fakalataha katoatoa ke he gahua fakamatala, kua fakakite e koe e kaufakalataha haau ke he agaaga ia.

Matagahua he Agaaga Tapu ma Anoiha

16. Ko e ha kua mauokafua a tautolu to puipui e Iehova haana tau tagata he magaaho matematekelea lahi?

¹⁶ Anoiha, to fakaaoga e Iehova e agaaga tapu haana ke he tau puhala ofoofogia ke fakamooli e finagalo haana. Manamanatu fakamua ke he puipuiaga. He kitia e tautolu na fakaaoga e Iehova e agaaga haana he vahā kua mole ke puipui e tau tagata takitaha ti pihia mo e motu katoa a Isaraela. Ti, ha ha ia tautolu e tau kakano oti ke talitonu to fakaaoga e ia e agaaga malolō taha ia ke puipui e tau tagata haana he tata atu ke he matematekelea lahi. Kua nakai lata ia tautolu ke fuafua teao e puhala tonu ka leveki e Iehova a tautolu he magaaho ia. Ka e, maeke ia tautolu ke onoono mo e mauokafua ke he anoiha, he iloa ko e tau tagata ne ofania a Iehova to nakai galo mai he onoonoaga haana po ke nakai uka ke moua e agaaga tapu haana.—2 Nofo. 16:9; Sala. 139:7-12.

17. To fakaaoga fēfē e Iehova e agaaga tapu haana he lalolagi foou?

¹⁷ To fakaaoga fēfē e Iehova e agaaga tapu haana he lalolagi foou hane hoko mai? To eke e agaaga ia mo omoomoi ke he tau vakai foou ka hafagi he magaaho ia. (Fakakite. 20:12) Ko e heigoa i loto he tau vakai nei? Mooli ai, ko e tau poakiaga fakamatafeiga a Iehova ma tautolu he afe tau. Onoono atu nakai a koe ke kumikumi ke he tau vala tala he tau vakai ia? Mo e amaamanakiaga makai kua tatali a tautolu ke he lalolagi foou ia. Nakai maeke ia tautolu ke manamanatu agataha to fēfē la ke momoui he lalolagi monuina ia ka fakaaoga e Iehova e agaaga tapu haana ke fakamooli e finagalo haana ma e lalolagi mo e tau tagata i ai.

18. Ko e heigoa e fifiliaga mauokafua haau?

¹⁸ Kia nakai nimo e tautolu to kautū mooli e finagalo a Iehova ha ko e mena fakaaoga e ia haana agaaga tapu ne malolō ue atu he lagi mo e lalolagi katoa, ke fakamooli aki ai. Kua putoia a koe he finagalo ia. Ko e mena ia, kia fifili mauokafua a koe ke olelalo ki a Iehova ma e haana a agaaga mo e gahua fakatatau mo e tau takitakiaga ia. (Luka 11:13) Ati maeke ia koe ke moua e amaamanakiaga he moui tuga ne finagalo a Iehova ke he tau tagata ke momoui tukulagi ke he Parataiso he lalolagi.

[Tau Matahui Tala]

Manatu Nakai e Koe?

• Ke he tau puhala fe ne fakaaoga e Iehova e agaaga tapu haana he tau vahā Tohi Tapu ke fakatumau e holo ki mua he finagalo haana?

• Fakaaoga fēfē e Iehova e agaaga haana he magaaho nei?

• To fakaaoga fēfē e Iehova e agaaga haana anoiha ke fakamooli aki e finagalo haana?

[Puha he lau 10]

Fakatatau Kia a Koe ke he Maama Hane Tupu Lahi?

Kua matutaki a Iehova ke fakakikila e maama ke he tau tagata haana. Ko e heigoa falu fakamaamaaga ne lolomi?

▪ Ko e heigoa e fakaakoaga hako ke he tupuaga fakaagaaga he fakatai ha Iesu ke he mena fakaea? (Mata. 13:33)—Ko e Kolo Toko ia Iulai 15, 2008, lau 19-20.

▪ Magaaho fe ne fakaoti e uiaga he tau Kerisiano ke he amaamanakiaga he lagi?—The Watchtower ia Me 1, 2007, lau 30-31.

▪ Ko e heigoa e kakano ke tapuaki ki a Iehova “mo e agaga”? (Ioane 4:24)—Ko e Kolo Toko ia Aokuso 1, 2002, lau 11.

▪ Ko e lotopā fe he faituga ne fekafekau ai e moto tagata tokologa? (Fakakite. 7:15)—The Watchtower ia Me 1, 2002, lau 30-31.

▪ Magaaho fe ne vehevehe e tau mamoe mo e tau koti? (Mata. 25:31-33)—Ko e Kolo Toko ia Novema 1, 1995, lau 10-20.