‘Kumi Hifo he Agaga e Tau Mena Hokulo he Atua’

“Mena kumi hifo he [a]gaga e tau mena oti, ko e tau mena hokulo ia he Atua.”—1 KORI. 2:10.

1. Ko e heigoa e matagahua he agaaga tapu ne fakamaama e Paulo ia 1 Korinito 2:10, ti ko e heigoa e tau hūhū ne lagā?

MAEKE ia tautolu ke loto fakaaue mooli ma e gahuahuaaga he agaaga tapu ha Iehova! Ne hagaao e tau Tohiaga Tapu ke he agaaga ke eke mo lagomatai, mena fakaalofa, fakamooli atu, mo e ko ia ne ole ma tautolu. (Ioane 14:16; Gahua 2:38; Roma 8:16, 26, 27) Ne fakamaama he aposetolo ko Paulo taha matagahua aoga ne taute he agaaga tapu: “Mena kumi hifo he [a]gaga e tau mena oti, ko e tau mena hokulo ia he Atua.” (1 Kori. 2:10) Mooli, ne fakaaoga e Iehova e agaaga tapu haana ke fakakite e tau kupu mooli fakaagaaga hokulo. Ka nakai ha ha i ai e lagomatai nei, to moua i fe e maama ha tautolu ke he tau finagalo ha Iehova? (Totou 1 Korinito 2:9-12.) Pete ia, kua loga e tau hūhū ne lagā: Fēfē e puhala kua ‘kumi hifo he agaaga e tau mena hokulo he Atua’? Puhala ia hai ne fakakite e Iehova e tau mena nei he senetenari fakamua V.N. ki ai? Maeke fēfē mo e puhala ia hai ne kumi hifo he agaaga e tau mena hokulo nei he vahā ha tautolu?

2. Ko e heigoa e tau puhala ua ka gahuahua e agaaga?

² Ne fakakite e Iesu ua e puhala ka gahuahua ai e agaaga. Nakai leva ato mate a ia, ne tala age a ia ke he tau aposetolo haana: “Ko e [l]agomatai, ko e [a]gaga [t]apu haia, ko ia ke fakafano mai he Matua ke he haku a higoa, to fakaako e ia a mutolu ke he tau mena oti kana; to fakamanatu foki e ia kia mutolu e tau mena oti kua tala atu ai e au kia mutolu.” (Ioane 14:26) To gahuahua e agaaga tapu ke eke mo faiaoga mo e ko ia ko e fakamanatuaga. Ko e faiaoga, to lagomatai ai e tau Kerisiano ke maama e tau mena ne nakai maama fakamua. Ko ia ko e fakamanatuaga, to lagomatai a lautolu ke liu manatu mo e fakaaoga fakahako e tau mena ne fakamaama.

He Senetenari Fakamua

3. Ko e heigoa e tau kupu ne talahau e Iesu ka fakakite fakahaga e ‘tau mena hokulo he Atua’?

³ Ne loga e kupu mooli foou ne fakaako e Iesu ke he tau tutaki haana. Ka kua loga agaia e mena kua lata ia lautolu ke fakaako. Ne tala age a Iesu ke he tau aposetolo haana: “Loga agaia e tau mena ia au ke tala atu e au kia mutolu, ka kua nakai maeke ke talia e mutolu, ke he vaha nai. Ka haele mai a ia, ko e [a]gaga ke tupu ai e kupu moli haia.” (Ioane 16:12, 13) Ti talahau e Iesu he puhala he agaaga tapu, to fakakite fakahaga e tau mena hokulo fakaagaaga.

4. He aho he Penetekoso 33 V.N., gahuahua fēfē e agaaga tapu mo faiaoga mo e ko ia ko e fakamanatuaga?

⁴ He aho he Penetekoso 33 V.N., ko e ‘agaga he kupu moli’ kua haele mai, ti liligi ke he tau Kerisiano ne kavi ke he 120 ne fakapotopoto auloa ki Ierusalema. Ko e tau fakamooliaga kitia mo e logona mooli anei. (Gahua 1:4, 5, 15; 2:1-4) Ne talahau he tau tutaki e tau vagahau kehekehe “ke he tau [“mena homo ue atu,” NW] he Atua.” (Gahua 2:5-11) Magaaho nei, kua fai mena foou ka fakakite. Ne talahau tuai he perofeta ko Ioelu e liligi he agaaga tapu nei. (Ioelu 2:28-32) Ne kitia he tau tagata ne kitekite e fakamooliaga he mena nei ke he puhala ne nakai amanaki a lautolu ki ai, ti maeke fakamua he aposetolo ko Peteru ke fakamaama e mena nei ne tupu. (Totou Gahua 2:14-18.) Ti eke e agaaga tapu mo faiaoga he fakamahino ki a Peteru ko e tau mena ne kitia he tau tutaki ko e fakamooliaga he perofetaaga ia i tuai. Ne gahuahua foki e agaaga ko ia ko e fakamanatuaga, ha kua fatiaki e Peteru a Ioelu ti pihia foki mo e ua he tau salamo ha Tavita. (Sala. 16:8-11; 110:1; Gahua 2:25-28, 34, 35) Ko e tau mena oti ne kitia mo e logona e lautolu ne fakapotopoto i ai kua mooli ko e tau mena hokulo he Atua.

5, 6. (a) He mole e Penetekoso 33 V.N., ko e heigoa e tau hūhū aoga hagaao ke he maveheaga foou ne lata ke fai tali? (e) Puhala ia hai ne fakatutala e tau matakupu nei, ti taute fēfē e tau fifiliaga?

⁵ Loga agaia e tau mena ne lata ke fakahakohako ma e tau Kerisiano he senetenari fakamua. Ma e fakatai, kua ha ha ai e tau hūhū hagaao ke he maveheaga foou ne fakagahua ke he aho ia he Penetekoso. Kua fakakaupā kia e maveheaga foou ke he tau Iutaia mo lautolu ne liliuina faka-Iutaia? To maeke foki kia ke talia mai e tau Tagata Motu Kehe mo e fakauku ai ke he agaaga tapu? (Gahua 10:45) To lata mua kia he tau tagata taane Motu Kehe ke peritome mo e fakaatā ke he Fakatufono faka-Mose? (Gahua 15:1, 5) Ko e tau hūhū aoga lahi mahaki anei. Ti lata ke moua e agaaga ha Iehova ke kumi hifo ke he tau mena hokulo nei. Puhala ia hai mogoia ka gahuahua e agaaga tapu i ai?

⁶ Kua puhala mai he tau matakainaga taane lotomatala ke fakatutala e tau matakupu takitaha. Ko Peteru, Paulo, mo Panapa ne haia he fono he kau fakatufono mo e liu fakatutala ke he puhala ne fehagai a Iehova mo e tau Tagata Motu Kehe ne nakai peritome. (Gahua 15:7-12) He mole e fakatutala ke he fakamooliaga nei mo e maamaaga he tau Tohiaga Tapu Heperu mo e lagomatai he agaaga tapu, ne taute he kau fakatufono e fifiliaga. Ti fakailoa e lautolu he tohi ke he tau fakapotopotoaga hagaao ke he fifiliaga ia.—Totou Gahua 15:25-30; 16:4, 5; Efeso 3:5, 6.

7. Puhala he tau mena fe ne fakakite e tau kupu mooli hokulo?

⁷ Loga foki e falu matakupu ne fakahakohako he puhala he tau tohiaga omoomoi ha Ioane, Peteru, Iakopo, mo Paulo. Ka e fai magaaho he fakakatoatoa e tau Tohiaga Tapu Kerisiano, ne fakaoti e tau mena fakaalofa he perofetaaga mo e maama ne fakakite fakamana. (1 Kori. 13:8) To fakatumau nakai e agaaga ke eke mo faiaoga mo e ko ia ko e fakamanatuaga? To fakatumau nakai ke lagomatai e tau Kerisiano ke kumi hifo ke he tau mena hokulo he Atua? To fakatumau he fakakite he perofetaaga.

Ke he Vahā he Fakahikuaga

8, 9. Ko hai ka “kikila” he iloilo fakaagaaga ke he vahā he fakahikuaga?

⁸ Hagaao ke he vahā he fakahikuaga, ne talahau tuai he agelu: “Ko lautolu foki ne iloilo to kikila mai a lautolu tuga ne kikila he lagi likoliko; ko lautolu foki kua fakamafoki mai e tau tagata tokologa ke mahani tututonu ai, to tuga ne tau fetu a lautolu tukulagi tukumuitea . . . to tupu lahi ai foki e mahani iloilo.” (Tani. 12:3, 4) Ko hai a lautolu ka moua e iloilo mo e ko hai ka kikila mai? Ne foaki e Iesu e tali he fakataiaga haana ke he tau saito mo e tau titania. Hagaao ke he “fakaotiaga [“he fakatokaaga he tau mena,” NW],” ne pehē a ia: “Ati kikila ai a lautolu kua tututonu tuga ne la ke he kautu he Matua ha lautolu.” (Mata. 13:39, 43) He fakamaamaaga ha Iesu, ne fakakite e ia ko “lautolu kua tututonu” ko e “fanau haia he kautu,” ko e tau Kerisiano fakauku.—Mata. 13:38.

⁹ To “kikila” oti kia e tau Kerisiano fakauku? He puhala ia, e, ha kua fakalataha e tau Kerisiano oti ke he gahua fakamatala, taute tutaki, mo e atihake e taha mo e taha he tau feleveiaaga. To fakatoka e lautolu ne fakauku e fakafifitakiaga. (Saka. 8:23) He lafi ke he mena nei mogoia, ko e tau mena hokulo to fakakite ke he vahā he fakahikuaga. Ko e perofetaaga ne tohi e Tanielu kua “fakamau fakamailoga” ato hoko e vahā ia. (Tani. 12:9) Maeke fēfē mo e puhala ia hai ka kumi hifo e agaaga ke he tau mena hokulo nei?

10. (a) Puhala ia hai ne fakakite he agaaga e tau kupu mooli hokulo he magahala he tau aho fakamui? (e) Fakamaama e puhala ne fakahakohako he tau kupu mooli e faituga fakaagaaga lahi ha Iehova.

¹⁰ Ka hoko e magaaho ke fakahakohako e matakupu fakaagaaga he vahā ha tautolu, to lagomatai he agaaga tapu e tau hukui lotomatala he “fekafekau fakamoli mo e loto matala” he tau matapatu la he lalolagi ke mailoga e tau kupu mooli hokulo ne nakai maama fakamua. (Mata. 24:45; 1 Kori. 2:13) Ko e Kau Fakatufono katoa ka fakatutala ke he tau fakamaamaaga ne hikihiki. (Gahua 15:6) Ko e tau mena ne iloa e lautolu, kua tohi fakailoa e lautolu ke aoga ai e tau tagata oti. (Mata. 10:27) He matutaki atu e magahala nei, kua liga lata ke fai fakahakohakoaga foki, mo e kua lata foki e tau mena nei ke fakamaama fakatonu.—Kikite e puha “Puhala ne Fakakite he Agaaga e Kakano he Faituga Fakaagaaga.”

Aoga Mai he Matagahua he Agaaga he Vahā Nei

11. Aoga fēfē e tau Kerisiano oti he vahā nei he matagahua he agaaga tapu he fakakite e tau mena hokulo he Atua?

¹¹ Ko e tau Kerisiano fakamooli oti kua aoga mai he matagahua he agaaga tapu he fakakite e tau mena hokulo he Atua. Tuga e tau Kerisiano he senetenari fakamua, pihia mo tautolu he vahā nei kua fakaako mo e liu manatu he magaaho fakamui mo e fakagahua e tau fakailoaaga ne lagomatai he agaaga tapu a tautolu ke maama. (Luka 12:11, 12) Kua nakai lata a tautolu ke lahi atu e fakaakoaga tokoluga ke maama e tau kupu mooli fakaagaaga hokulo nukua tohi fakailoa. (Gahua 4:13) Liga fakatupu ki mua fēfē e maamaaga ha tautolu ke he tau mena hokulo he Atua? Manamanatu ke he falu lagomataiaga.

12. Magaaho fe ka liogi a tautolu ma e agaaga tapu?

¹² Liogi ma e agaaga tapu. He amanaki a tautolu ke manamanatu ke he tau vala tala he tau Tohiaga Tapu, lata ia tautolu ke ole fakamua he liogi ma e agaaga tapu ke takitaki a tautolu. Kua mooli e mena nei kaeke foki ko tautolu ni tokotaha po ke ka nakai lahi e magaaho ha tautolu. Ko e tau liogi fakatokolalo pihia kua mafanatia mooli ke he loto he ha tautolu a Matua he lagi. Tuga ne fakakite e Iesu, to foaki fakamakai e Iehova e agaaga tapu haana ka ole fakamooli a tautolu.—Luka 11:13.

13, 14. Ko e heigoa e matagahua ne fakatoka he tauteute ma e tau feleveiaaga ke maama e tau mena hokulo he Atua?

¹³ Tauteute ma e tau feleveiaaga. Kua moua e tautolu e “tau mena kai ke he tau magaaho [tonu]” he puhala mai he vahega fekafekau. Kua fakamooli he “fekafekau” e kotofaaga haana he foaki mai e tau vala tala he tau Tohiaga Tapu mo e he fakatokatoka e tau fakaholoaga ma e fakaakoaga mo e tau feleveiaaga. Fai kakano mitaki lahi ati ole ‘ke he tau matakainaga oti’ ke manamanatu ke he tau vala tala pauaki. (1 Pete. 2:17; Kolo. 4:16; Iuta 3) Kua kaufakalataha a tautolu mo e agaaga tapu ka taute katoatoa e tau mena kua maeke ia tautolu ke muitua ke he tau puhala lagomatai ne foaki.—Fakakite. 2:29.

¹⁴ He tauteute ma e tau feleveiaaga Kerisiano, lata ia tautolu ke kumi e tau Tohiaga Tapu ne tutū ai mo e lali ke manamanatu ke he puhala ka fakagahua ke he matakupu hane tutala ki ai. Ko e puhala nei ka fakahokulo fakahaga e maama ha tautolu ke he Tohi Tapu. (Gahua 17:11, 12) He kumi ki ai ka tokaloto ti maeke he agaaga tapu ke lagomatai a tautolu ke liu manatu. Lafi ki ai, ka kitia e tautolu e kupu i loto he Tohi Tapu, to lagomatai he mena ia a tautolu ke mauloto e tūaga he kupu ia ka manako a tautolu ke fakaaoga.

15. Ko e ha kua lata ia tautolu ke fakatumau mo e tau tohi foou ne tohi fakailoa, ti taute fēfē e koe e mena nei?

¹⁵ Fakatumau mo e tau tohi foou. Falu vala tala ne tohi fakailoa kua nakai tutala ki ai he tau feleveiaaga ha tautolu, ka kua tauteute ke aoga ai a tautolu. Pihia mo e tau fufuta he tau senolo ha tautolu ne foaki ke he tau tagata he fonua kua tauteute he tokaloto foki ki a tautolu. He lalolagi uka nei, kua fa fakatali a tautolu ke he taha tagata po ke taha mena. Ka uta e tautolu mo tautolu e tohi ne nakaila totou po ke nakaila oti he totou, liga maeke ia tautolu ke fakaaoga e tau magaaho nei ke totou taha vala. Ko e falu ne fakatumau mo e tau vala foou he fanogonogo ke he tau tapakiaga autiō he tau tohi ha tautolu ka ō hui po ke heke he peleōafi. Ko e tau tohi ne kumikumi fakamitaki kua taute ke lata mo e tau tagata totou fiafia, ti ko e tau tohi oti nei kua fakahokulo e tau loto fakaaue ha tautolu ma e tau mena fakaagaaga.—Hapa. 2:2.

16. Ko e heigoa e aoga ka fakamau hifo mo e kumikumi e tau hūhū ka liu manatu?

¹⁶ Manamanatu fakahokulo. Ka totou e koe e Tohi Tapu po ke tau tohi ne fakavē ki ai, fakatoka e magaaho ke manamanatu. He muitua fakamitaki e koe e holoaga he manatu, liga to tutupu mai e tau hūhū ki a koe. Liga fakamau hifo e koe e tau hūhū pihia mo e kumikumi ki ai he mogo fakamui. Fa mahani ko e tau magaaho ne kumikumi a tautolu ke he tau matakupu ne fakatuahā a tautolu ka fakaako fakahokulo ki ai a tautolu. Ko e maama ne moua e tautolu kua eke mo vala he koloa fakatagata ha tautolu ka manako a tautolu ke fakaaoga ai.—Mata. 13:52.

17. Ko e heigoa e fakaholoaga ne muitua e koe ma e fakaakoaga fakamagafaoa po ke fakatagata?

¹⁷ Fakatoka e magaaho ma e tapuakiaga he magafaoa. Kua fakamalolō he Kau Fakatufono a tautolu oti ke toka kehe taha afiafi po ke taha magaaho he tau faahitapu takitaha ke fakaako fakatagata po ke fakamagafaoa. Ko e fakatokaaga ha tautolu he feleveiaaga ne hiki kua hafagi e puhala ma tautolu ke fakagahua e fakatonuaga nei. Ko e heigoa kua fakaako e koe he tau afiafi he Tapuakiaga he Magafaoa? Falu ne totou e Tohi Tapu, kumikumi e tau kupu tohi ne fakatupu e tau hūhū ke he tau manamanatuaga ha lautolu mo e fakamau hifo e tau fakamaamaaga kū he tau Tohi Tapu ha lautolu. Loga e magafaoa ne fakatoka e magaaho ke fakagahua he magafaoa e vala tala ne fakaako. Falu ulu magafaoa ne fifili e vala tala ne logona hifo e lautolu kua lata mo e magafaoa ke fakatutala ki ai po kua hagaao ke he tau matakupu po ke tau hūhū ne tofi ke he magafaoa ke tutala ki ai. Nakai fakauaua to manamanatu a koe ke he falu matakupu ke fakatutala ki ai ka fai magaaho he mole.a

18. Ko e ha kua nakai lata ia tautolu ke tolomuli ki tua mai he fakaako e tau kupu mooli hokulo he Kupu he Atua?

¹⁸ Ne pehē a Iesu to eke e agaaga mo lagomatai. Ti nakai lata ia tautolu ke tolomuli ki tua mai he fakaako e tau kupu mooli hokulo he Kupu he Atua. Ko e tau kupu mooli pihia ko e vala he “iloilo [uho] ke he Atua,” ti kua uiina a tautolu ke kumikumi ki ai. (Totou Tau Fakatai 2:1-5.) Kua lahi e mena ne fakakite he tau kupu mooli ia hagaao ke he “tau mena kua taute he Atua ma lautolu kua fakaalofa kia ia.” He lali a tautolu ke fakaako fakalahi ke he Kupu ha Iehova, to lagomatai he agaaga tapu a tautolu, ha kua “kumi hifo he [a]gaga e tau mena oti, ko e tau mena hokulo ia he Atua.”—1 Kori. 2:9, 10.

[Matahui Tala]

To Tali Fēfē e Koe?

• Ko e heigoa e tau puhala ua kua lagomatai he agaaga a tautolu ke kumi hifo ke he ‘tau mena hokulo he Atua’?

• Puhala ia hai ne fakakite he agaaga tapu e tau kupu mooli hokulo ki ai he senetenari fakamua?

• Gahuahua fēfē e agaaga tapu ke fakahakohako e tau matakupu he vahā ha tautolu?

• Ko e heigoa haau ka taute ke aoga mai he matagahua he agaaga?

[Puha he lau 22]

Puhala ne Fakakite he Agaaga e Kakano he Faituga Fakaagaaga

He ‘tau mena hokulo he Atua’ ne fakakite he senetenari fakamua ko e fale uta fano mo e magaaho fakamui ko e tau faituga ne fakaata e mena ne mua ue atu, ne fakahigoa he aposetolo ko Paulo ko e “fale uta fano moli” ne fakatū e Iehova, ka e nakai ko e tagata. (Hepe. 8:2) Ko e faituga fakaagaaga lahi anei, ko e fakaholoaga ke matutaki atu ke he Atua ne maeke ai ha ko e poa mo e tuaga ekepoa ha Iesu Keriso.

Ko e “fale uta fano moli” ne kitia ai he 29 V.N., magaaho ne papatiso a Iesu ti talia e Iehova a ia ke eke mo poa mitaki katoatoa. (Hepe. 10:5-10) He mole e mate mo e liu tu mai ha Iesu, ne hū atu a ia ke he Tapu Ue Atu he faituga fakaagaaga ti foaki e uho he poa haana “ki mua he Atua.”—Hepe. 9:11, 12, 24.

Ne tohi he aposetolo ko Paulo he falu kupu tohi hagaao ke he tau Kerisiano fakauku kua “eke mo faituga tapu [ki a Iehova].” (Efeso 2:20-22) Kua tatai kia e faituga nei mo e “fale uta fano moli” ne fakamaama e ia he mogo fakamui he tohi haana ke he tau Heperu? Ke he tau tau loga, ne pihia e manatu he tau fekafekau ha Iehova. Tuga kua latatonu e tau Kerisiano fakauku he lalolagi ke eke mo “tau maka” he faituga ha Iehova he lagi.—1 Pete. 2:5.

Ke hoko ke he tau 1971 mogoia, ko lautolu ne lotomatala he vahega fekafekau ne kamata ke kitia ko e faituga ne talahau e Paulo ia Efeso ne nakai ko e faituga fakaagaaga lahi ha Iehova. Kaeke ko e “fale uta fano moli” ne ha ha i ai e tau Kerisiano fakauku ne fakaliu tū mai, to kitia fakamua he mole e fakaliu tū mai ha lautolu ne kamata he “haele mai [“ha ha hinei,” NW] he Iki.” (1 Tesa. 4:15-17) Ka e hagaao ke he fale uta fano, ne tohi e Paulo: “Ko e fale uta fano nei ko e fakataiaga ke he magaaho kotofa kua ha ha ainei mogonei.”—Hepe. 9:9, NW.

He fakatatai fakamitaki e tau mena nei mo e falu kupu tohi, kua kitia maali ai ko e faituga fakaagaaga kua nakaila talaga ia ti ko e tau Kerisiano fakauku ne nakai ko e “tau maka” ne taute he lalolagi ke fakalataha ki ai. Ka kua fekafekau e tau Kerisiano fakauku he lotopā mo e ke he Tapu he faituga fakaagaaga, he foaki he tau aho takitaha e “poa fakaheke” ke he Atua.—Hepe. 13:15.

[Fakatino he lau 23]

Fakatupu ki mua fēfē ha tautolu a maamaaga ke he ‘tau mena hokulo he Atua’?