“Monuina a Koe ke he Tau Puhala Oti”—Fēfē?

“KAUTŪ”—ko e kupu mahuiga! Falu ne toli hake ke he tau kotofaaga gahua ti lahi e kautū ke he puhala monuina mo e taute e higoa ma lautolu ni. Falu ne miti ke kautū ka e feleveia ni mo e kaumahala lahi mahaki.

Laulahi ai, kua falanaki e kautū ke he mena ne hagaaki ki ai e moui haau. Ua foki e puhala aoga ko e fakaaoga haau he magaaho mo e malolō po ke fakakite foki e koe e fakailoilo.

Tokologa e Kerisiano ne moua ko e fakalataha katoatoa ke he gahua he fonua kua tamai ki a lautolu e makona lahi. He eke e fekafekauaga mau mo kotofaaga kua lagomatai a lautolu ne ikiiki mo e fuakau ke kautū. Ka e liga manatu falu kua mateafu e fekafekauaga ti eke ai mo tutuliaga ke uaaki he tau momoui ha lautolu he taute e lautolu falu foliaga foki. Liga tupu he ha e mena nei? Ko e heigoa haau ka taute ke kalo mai he galo e mena ne aoga mooli? Ti maeke fēfē ia koe ke ‘monuina ke he tau puhala oti ke fano ai a koe’?—Iosua 1:8.

Tau Matagahua mo e Tau Matafeua Lafi ki Luga

Lata he tau fuata Kerisiano ke fakatumau e lagotatai mitaki he fekafekau ke he Atua mooli mo e taute falu matagahua. Ko lautolu kua taute pihia hane gutu atu ke he kautū e moui ti latatonu ke nava mafanatia.

Ka ko e falu Kerisiano ikiiki kua putoia lahi mahaki ke he tau matagahua lafi ki luga mo e tau matafeua. Ko e tau matagahua pihia kua liga nakai hepe. Ka e lata he tau Kerisiano ikiiki ke hūhū hifo: ‘Lahi fēfē e magaaho haaku kua lata ma e tau matagahua ia? Ka e kua e tau lafiaga? Ko e heigoa e aga kua fakakite e au ka taute e tau matagahua ia? Ti ko e heigoa ka eke mo hagaaki he moui haaku? Liga mailoga e koe kua maeke he tagata ia ke hufia he tau matagahua pihia ti tote e magaaho po ke malolō ne toe ke fakatumau e fakafetuiaga mo e Atua. Kitia e koe mogoia e kakano kua aoga ke fakatoka e tau mena kua mua.—Efeso 5:15-17.

Mailoga e mena ne tupu ki a Wiktor.a Ne talahau e ia: “He 12 e tau haaku, ne matutaki au ke he kalapu volipolo (volleyball). Fai magaaho, ne moua e au loga e tau fakamailoga mo e tau palepale. Ti moua e au e mogo ke eke mo tagata talahaua.” Fai magaaho ai, ne tupetupe a Wiktor ha ko e tutuliaga haana he sipote kua lauia e tuaga fakaagaaga haana. Taha aho, ne mohe a ia he lali ke totou e Tohi Tapu. Ti mailoga foki e ia kua tote e fiafia ne moua e ia mai he gahua he fonua. “Ne fofō he pelē e malolō haaku, ti nakai leva ne mailoga e au kua fofō foki he mena ia e makutu fakaagaaga haaku. Iloa e au kua nakaila oti e tau mena he taute e au.”

Fakaakoaga Tokoluga Atu Kia?

Ha ha he Kerisiano e kotofaaga faka-Tohi Tapu ke leveki e magafaoa haana, ti putoia ai e levekiaga he tau manako fakatino ha lautolu. (1 Timo. 5:8) Ka e lata mooli nakai e mena nei mo e aoga tokoluga po ke moua e tikulī he univesitī?

To mitaki ke manamanatu ke he tutuliaga he fakaakoaga tokoluga atu ka lauia e fakafetuiaga he tagata mo Iehova. Kia fakatai e tautolu e mena nei he fakatutala ke he fifitakiaga he Tohi Tapu.

Ko Paruka ko e tohikupu ke he perofeta ko Ieremia. He taha magaaho, he nakai hagaaki ke he tau kotofaaga lilifu haana he fekafekau ki a Iehova, ne foli tuaga a Paruka. Ne mailoga e Iehova e mena nei ti puhala ia Ieremia e hatakiaga ki a ia: “Kua kumi kia e koe e tau mena lalahi māu? Aua neke kumi.”—Iere. 45:5.

Ko e heigoa e “tau mena lalahi” ne fakatumau a Paruka ke kumi? Liga kamatamata a ia ke taute e higoa ma haana ni he fakatokaaga faka-Iutaia. Po ke tau mena lalahi kua liga ko e mautū ke he tau koloa. Ko e heigoa ni, ne galo ia ia e tau mena kehekehe po ke, mua e aoga, ko e tuaga uho fakaagaaga. (Filipi 1:10) Ka e fanogonogo mooli a Paruka ke he hataki ha Iehova puhala ia Ieremia ti eke haana moui mo mena haana ne fofō he tau.—Iere. 43:6.

Ko e heigoa ka moua mai e tautolu he tala nei? Fakakite he fakatonuaga ne moua e Paruka kua fai mena ne hepe. Ne kumi e ia e tau mena lalahi ma haana ni. Ka fai koloa a koe ke leveki aki ni a koe, kua lata mooli nakai a koe ke fakaaoga e magaaho, tupe, mo e laliaga ke fakalaulahi atu e fakaakoaga ke moua aki ni e tau foliaga fakatagata po ke he tau matua po ke falu magafaoa haau?

Manamanatu ki a Grzegorz, ko e tagata taute polokalama komopiuta. He fakaohooho he kau gahua haana, ne taute e ia e fakaakoaga fakalaulahi atu foki he fakamahaniaga pauaki. Mogo kū ni ti nakai fai magaaho a ia ne toe ma e tau mena fakaagaaga. Ne talahau e ia: “Kua logona tumau e au e nofo tapitapi. Ne lekua e loto manamanatu haaku he nakai hokotia e tau foliaga fakaagaaga ne fakatoka e au ma haaku.”

Hufia ke he Gahua Tupe he Tagata

Fakamafana he Kupu he Atua e tau Kerisiano mooli ke gahua malolō mo e eke mo tau tagata gahua mo e tau takitaki gahua kua falanaki ki ai. Ne tohi he aposetolo ko Paulo: “Ko e tau mena oti foki kua eke e mutolu kia eke mo e loto, tuga ne eke ke he Iki [Iehova], ka e nakai ke he tau tagata.” (Kolo. 3:22, 23) Pete kua nava ke he gahua malolō, kua fai mena foki kua lata—ko e fakafetuiaga mitaki mo e Tufuga ha tautolu. (Fakama. 12:13) Ka hufia lahi e Kerisiano ke he gahua tupe haana, to mukamuka ke tuku ke he tuaga ke uaaki e tau tutuliaga fakaagaaga.

He hufia lahi ke he gahua tupe ka fofō e malolō kua lata he Kerisiano ke fakatumau e lagotatai fakaagaaga haana mo e ke lagomatai e magafaoa haana. Ne mailoga he Patuiki ko Solomona ko e “puke alolima ua mo e mamahi he gahua” kua fa fakatauō mo e “kai e matagi.” Ka hufia lahi mahaki e Kerisiano ke he gahua tupe, to fakahiku a ia ke tumau e fakaatukehe hagahaga kelea. Kua maeke foki e tagata ia ke fakatupa ke he gahua ke lauia e molea he mategūgū. Ka pihia, maeke mooli nakai a ia ke “olioli . . . mo e fiafia ai ke he tau mena mitaki he hana tau gahua oti”? (Fakama. 3:12, 13; 4:6) Mua atu e aoga, to lahi nakai e malolō ke he tino mo e manamanatuaga haana ne toe ke taute e tau gahua haana he magafaoa mo e fakalataha ke he tau matagahua fakaagaaga?

Ko Janusz, ne nofo he Faahi Uta i Europa, ne hufia lahi ke he pisinisi katene haana. Ne talahau e ia: “Nava he tau tagata he lalolagi au ha kua puke au he fakailoilo ti maeke ke oti e tau gahua takitaha ne kotofa. Ka e matematekelea e tuaga fakaagaaga haaku, ti fakaoti e fakalataha haaku ke he gahua he fonua. Nakai leva ne oti e fano haaku ke he tau feleveiaaga. Fakaikaluga lahi au ti tiaki e au e fakatonuaga he tau motua mo e nofo kehe mai he fakapotopotoaga.”

Maeke ia Koe ke Kautū e Moui Haau

Kua fakatutala a tautolu ke he tolu e faahi ka liga lauia lahi e tuaga fakaagaaga he Kerisiano. Putoia nakai a koe ke he ha mena nei? Ka pihia, ko e tau hūhū, tau kupu tohi, mo e tau talahauaga nā ka lagomatai a koe ke fifili ko koe mooli kia he puhala ke kautū.

Tau matagahua mo e tau matafeua lafi ki luga: Hufia fēfē a koe ke he tau matagahua ia? Kua fofō kia he tau mena nei e tau magaaho ne foaki fakamua e koe ke he tau mena fakaagaaga? Kua tote kia e fiafia haau ne moua he lafi mo e tau matakainaga fakaagaaga haau? Ka pihia, ko e ha he fifitaki ke he Patuiki ko Tavita, ne kumi atu ki a Iehova: “Kia fakakite mai e puhala ke fano ai au.”—Sala. 143:8.

Ko e leveki faifano ne lagomatai a Wiktor, ne totoku fakamua. Ne tala age e leveki ki a ia: “Kua fiafia a koe he tala ke he matafeua volipolo haau.” “Ne fakaofo he mena ia au,” he talahau e Wiktor. “Mailoga e au kua molea lahi e mena ne taute e au. Nakai leva, ne fakaoti e au e lafiaga haaku mo e tau kapitiga fakalalolagi he kalapu ti kumi e tau kapitiga he fakapotopotoaga.” He vahā nei, kua fekafekau a Wiktor ki a Iehova mo e fakamakutu he fakapotopotoaga haana. Talahau e ia: “Hūhū ke he tau kapitiga haau, tau matua haau, po ke tau motua he fakapotopotoaga kua kitia nakai e lautolu nukua fakatata lahi atu he tau matagahua aoga haau a koe ki a Iehova po ke fakamamao mai ia Ia.”

Ko e ha he fakakite ke he tau motua he fakapotopotoaga haau kua manako a koe ke foli atu ke he falu kotofaaga he fekafekauaga ke he Atua? Maeke nakai a koe ke lagomatai e tau fuakau ne manako ke he feoakiaga po ke lalagoaga, liga he lagomatai ke taute e tau fakatau ha lautolu po ke tau fekau he kaina ha lautolu? Pete ne tau tau moui haau, liga maeke ia koe ke fakalataha ke he fekafekauaga mau he talahau ke he falu e kakano he fiafia haau.

Fakaakoaga tokoluga atu: Ne hataki e Iesu ke nakai ‘kumi ne koe haau a fakahekeaga.’ (Ioane 7:18) Ko e heigoa ni ne fifili e koe ke he lahi he fakaakoaga fakalalolagi ka moua e koe, kua mailoga kia e koe e tau mena kehekehe po ke, mua e aoga?—Filipi 1:9, 10.

Ko Grzegorz, ko e tagata taute polokalama komopiuta, ne taute falu hikiaga he moui haana. Pehē a ia: “He uta fakahokulo e fakatonuaga he tau motua, ne fakamukamuka e au e moui haaku. Ne mailoga e au kua nakai lata au ke fakalaulahi atu e fakaakoaga he lalolagi haaku. To fofō ni he naia e magaaho mo e malolō haaku.” Ne putoia lahi a Grzegorz ke he tau matagahua he fakapotopotoaga. Fai magaaho, ne paase a ia mai he mena ne fakahigoa mogonei ko e Aoga Tohi Tapu ma e Tau Matakainaga Taane Nonofo Takitokotaha. E, ne ‘fakatau e ia e magaaho’ ke fakalaulahi atu e fakaakoaga faka-Atua haana.—Efeso 5:16.

Gahua tupe: Kua hufia lahi kia a koe ke he gahua haau ti tuku e tau mena fakaagaaga ke he mafoa? Fai magaaho lahi nakai a koe ke matutaki mo e magafaoa haau? He fakapotopotoaga, kua fakaholo ki mua nakai e koe e tuaga he tau kotofaaga lauga haau? Ka e kua he fakalataha ke he tau tutalaaga atihake mo e falu? “Kia matakutaku a ke he Atua, mo e omaoma ke he hana tau fakatufono,” to moua e koe e monuina lahi ha Iehova mo e ‘kitia e mitaki ke he haau a tau gahua malolō.’—Fakama. 2:24; 12:13.

Ko Janusz, ne totoku fakamua, ne nakai moua e monuina lahi he pisinisi katene haana; ka e feleveia a ia mo e kaumahala. He nakai fai totogi mo e lahi mahaki e kaitalofa, ne fuluhi a ia ki a Iehova. Ne fakatokatoka fakamitaki e Janusz e tau matagahua haana ti fekafekau mogonei ko e paionia tumau mo e motua he fakapotopotoaga. Pehē a ia: “He makona au ke he tau levekiaga tino ke he magaaho taha ne fakaaoga e au e malolō ke he tau mena fakaagaaga ti mafola e logonaaga haaku mo e milino e loto.”—Filipi 4:6, 7.

Fakaaoga taha magaaho ke taute e fifiliaga fakamooli ke he tau manatu mo e tau mena haau kua aoga. Ko e fekafekau ki a Iehova ko e puhala ke he monuina tukulagi. Kia taute ai mo matapatu he moui haau.

Liga lata ia koe ke taute falu hikihikiaga, ti tiaki foki falu mena ne nakai aoga lahi ke maeke ia koe ke kumikumi “po ke heigoa e finagalo he Atua, ko e mena mitaki, kia talia foki mo e fiafia, ti kua katoatoa.” (Roma 12:2) Ka e maeke ke “monuina a koe ke he tau puhala oti” he fekafekau ki a ia mo e loto katoa.

[Matahui Tala]

[Puha/Fakatino he lau 31]

Maeke Fēfē ia Koe ke Monuina ke he Tau Puhala Oti?

Ha kua loga e tau mena ne tauhele e onoonoaga haau, maeke fēfē ia koe ke kalo mai neke galo e mena kua aoga mooli? Fakaaoga taha magaaho ke kumikumi hifo ke he haau a tau logonaaga mo e tau mena kua aoga he manamanatu ke he tau hūhū nā:

TAU MATAGAHUA MO E TAU MATAFEUA LAFI KI LUGA

▪ Ko e tau aga fe kua fakakite ki a koe ka fakalataha a koe ke he tau matagahua ia?

▪ Lahi fēfē e magaaho kua lata ma e tau mena nei?

▪ Liga eke nakai e tau mena nei mo hagaaki he moui haau?

▪ Kua fofō kia he tau mena nei e tau magaaho ne foaki fakamua e koe ke he tau mena fakaagaaga?

▪ Ka e kua e tau lafiaga?

▪ Mua atu kia e fiafia haau ke he tau lafiaga nei ke he tau matakainaga fakaagaaga?

FAKAAKOAGA TOKOLUGA ATU

▪ Ka fai koloa a koe ke leveki aki ni a koe, kua lata mooli nakai a koe ke fakaaoga e magaaho, tupe, mo e laliaga ke fakalaulahi atu e fakaakoaga?

▪ Ke lalago aki a koe, kua lata mooli nakai ke fano he aoga tokoluga po ke moua e tikulī he univesitī?

▪ Ko e heigoa e lauiaaga ke he fano haau he feleveiaaga?

▪ Kua tuku fakamua nakai e koe e tau mena ne mua e aoga?

▪ Lata nakai a koe ke fakamalolō e mauokafua haau ke he lotomatala ha Iehova ke leveki a koe?

GAHUA TUPE

▪ Fakaatā nakai he fifiliaga haau a koe ke ‘fakafiafia mo e kitia e mitaki ke he haau a tau gahua malolō’?

▪ Kua lahi nakai e malolō ke he tino mo e manamanatuaga haau ne toe ke taute e tau gahua haau he magafaoa mo e fakalataha ke he tau matagahua fakaagaaga?

▪ Fai magaaho lahi nakai a koe ke matutaki mo e magafaoa haau?

▪ Kua hufia lahi kia a koe ke he gahua ti tuku e tau mena fakaagaaga ke he mafoa?

▪ Kua lauia kia e tuaga he tau kotofaaga lauga haau ha ko e mena ia?

[Fakatino he lau 30]

Ne hataki e Iehova a Paruka hagaao ke he foli tuaga