Fahia ke he Tau Mena Tutupu Pauaki

Fakamamao mai he puhala he matematekelea.

“Kua kitia he tagata lotomatala e kelea, mo e fakamumuli ai a ia; ka ko e tau tagata goagoa, kua o age ai a lautolu, ti fakahala ai a lautolu,” he talahau he Tohi Tapu. (Tau Fakatai 22:3) Ko e fakatonuaga pulotu anei ka felauaki mo e tau matematekelea. Ka talahau e hatakiaga hagaao ke he tata lahi mai e pā he mouga, puke hake lahi e vai, po ke hane gutu mai e afā, kua lata ke pulotu ma lautolu ne haia he matakavi ne lauia ke o kehe mo e fehola ke he tau matakavi ke hao ai. Kua mua e aoga he moui ke he fale po ke tau koloa tino.

Ma e falu, liga lata ke fifili ke nakai nonofo he matakavi ne hagahaga kelea lahi. Taha e takitaki ne pehē: “Mua atu e hagahaga kelea he falu matakavi. Ko e vala tote he fuga he Lalolagi kua lahi e hagahaga kelea mo e laulahi he tau matematekelea he mogo i mua ka tutupu he tau matakavi nei.” Ma e fakatai, liga mooli e mena nei ke he tau faahi tahi tokolalo po ke tau matakavi ne tata ke he tau laini mafuike (fault lines) he lalolagi. Ka maeke a koe ke kalo mai he nofo ke he tau matakavi hagahaga kelea po ke hiki atu ke he matakavi haohao mitaki, liga to fakatote hifo lahi e koe e hagahaga kelea haau he lauia he tau matematekelea.

Fakatoka e palana ke fakaaoga.

Pete he taute e tau hatakiaga oti kana, liga lauia agaia a koe he tau matematekelea fakaofo. He fahia ki ai to mukamuka lahi ka fakatoka tuai e palana. Tatai foki e mena nei mo e fakatonuaga he Tau Fakatai 22:3, ne totoku fakamua. Ha ha nakai ia koe e kato ma e magaaho fakaofo (emergency kit) kua tauteute mo e mautali ke fano? Kua fakamalolō he tohi 1-2-3 of Disaster Education ke fai mena pehena foki: Tau koloa leveki pakia po ke gagao, lupo vai, tau mena kai apa, mo e tau tohiaga vala tala aoga. To pulotu ai foki ke liu fakatutala mo e magafaoa haau e tau vahega matematekelea ka tupu mo e mena ka taute he tau magaaho takitaha.

Fakatumau e fakafetuiaga tata mo e Atua.

Maeke e mena nei ke lagomatai ke he ha tuaga ni. Kua tutala e Tohi Tapu hagaao ke he Atua “ko e Matua hana e fakaalofa hofihofi, ko e Atua foki hana e tau fakamafanaaga oti. Ko ia kua fakamafana mai a [t]autolu ke he ha [t]autolu a tau matematekelea oti.” Fakamaama foki he taha kupu tohi a ia ko e Atua kua “fakamafana e tau loto holoilalo.”—2 Korinito 1:3, 4; 7:6.

E, kua mailoga lahi he Atua e tau tuaga kua hoko ki a lautolu kua tua ki a ia. Ko ia ko e Atua he fakaalofa ti foaki e ia e fakamafanaaga atihake ke he tau puhala kehekehe. (1 Ioane 4:8) Nakai liogi ma e tau mana, ka e ma e agaaga tapu malolō lahi he Atua ka foaki e lagomatai ke he ha tuaga ni. Maeke he agaaga tapu ke fakamanatu e tau vala he Tohi Tapu ka fakamafana mo e fakatotoka ki a lautolu kua moua he tau mamahi. Mooli, ko e tau fekafekau tua fakamooli he Atua ka logona hifo tuga a Tavita ko e patuiki a Isaraela i tuai, ne pehē: “Ka fano foki au ke he pahua he ata he mate, ti nakai matakutaku au ke he taha mena kelea; ha ko koe ni kua fakalataha mo au; ko e akau hāu, mo e tokotoko hāu ke mafanatia ai au.”—Salamo 23:4.

Felagomataiaki e tau Matakainaga Kerisiano.

He senetenari fakamua, ko e perofeta Kerisiano ne higoa ko Akapo ne fakakite ko e “hoge lahi ko e tupu ne fai ke he lalolagi oti kana; ne hoko foki ia ke he vaha ne pule ai a Kaisara Kalaotio.” Ne tō e hoge lahi ke he tokologa he tau tutaki a Iesu i Iutaia. Ko e heigoa he tau tutaki he falu matakavi ne taute he mogo ne logona e lautolu e matematekelea he tau matakainaga Kerisiano ha lautolu? Ne pehē e tala: “Ati manatu ai takitokotaha e tau tutaki, ke fakalata ke he tau mena kua monuina ai, ke age ai e fakaalofa ke he tau matakainaga kua nonofo i Iutaia.” (Gahua 11:28, 29) Ne tali fakaalofa atu a lautolu he foaki e tau lagomataiaga.

Ka tutupu e tau matematekelea lahi mahaki he vahā nei, kua tali atu pihia foki e tau fekafekau he Atua. Kua talahaua e Tau Fakamoli a Iehova he lagomatai e tau matakainaga Kerisiano. Ma e fakatai, he tō e mafuike i Chile ia Fepuari 27, 2010, kua mafiti e Tau Fakamoli a Iehova ke lagomatai atu ki a lautolu ne lauia ai. Ko Karla ne tafia he peau kula ne pehē: “Kua mafanatia mo e fakamalolō ke kitia he aho hake ne hohoko mai e [tau matakainaga Fakamoli] he falu matakavi ke lagomatai a mautolu. Ne fakamafana mooli e Iehova a mautolu puhala he mahani mitaki he tau tagata gahua noa ia. Ne logona e au e ofania mo e puipui.” Ko e matua tupuna taane haana, ne nakai ko e Fakamoli, ne mailoga e lagomatai ne foaki. Pehē a ia: “Kehe katoatoa e mena nei mai he mena ne kitia e au ke he tau tagata he lotu haaku.” Ko e mena ne kitia e ia ne omoi a ia ke ole ke he Tau Fakamoli a Iehova ke fakaako e Tohi Tapu mo ia.

He feoaki mo lautolu kua fakaalofa ke he Atua ka lagomatai lahi he tau magaaho matematekelea. Pete he pihia, to ha ha i ai nakai e magaaho ka utakehe e pehiaaga he tau matematekelea he lalolagi? Kia kitekite la tautolu ke he mena ne talahau he Tohi Tapu hagaao ke he matakupu nei.