Fakaaoga e Tau Porosua ke Hokotia ke he Manamanatuaga mo e Loto
1 Kua lata ke fakakite e kupu moli he Tohi Tapu ke hokotia ua e manamanatuaga mo e loto. He magaaho ne fakamaama e Iesu e kupu moli ki a lautolu ne fanogonogo, ne fifili e ia e tau mataulu tala ka futiaki mo e fakaohooho ki a lautolu. (Luka 24:17, 27, 32, 45) To kautu ni ha tautolu a fekau ha ko e gahua ne fakahoko e tautolu ke kitia aki e manako fakaagaga he tau tagata ne fanogonogo ki a tautolu.
2 Kua eke foki e tau porosua mo tau kanavaakau lauia mitaki ke hokotia atu ke he manamanatuaga mo e loto ha lautolu ne feleveia mo tautolu he fekafekauaga. Kia manatu fakamua ko hai ka manako ke he ogo i loto he tau porosua takitaha ia ka foaki ia Aokuso:
—Kua Leveki Moli Kia he Atua a Tautolu? Ko e tau tagata ne to kelea fakatupe po kua fakafita tuai ke he tau matematekelea, ka fakaaue lahi ke he ogo mafanatia nei ke he vaha anoiha ne nakai fai mamahi.
—“Kitiala, Kua Fakafou Tuai e Au e Tau Mena Oti.” Lagomatai he porosua nei e tau tagata oti ke iloa e mena kua lata ke taute e lautolu ke nonofo he lalolagi fou ka ‘fakafou he Atua e tau mena oti.’
—Ke Fiafia e Moui Tukulagi ke he Lalolagi! Ko e tau fakatino loga mo e tau kupu Tohi Tapu ne tohia i ai ka lagomatai e fanau ikiiki mo lautolu ne nakai iloa lahi ke totou ke maama e tau finagalo he Atua.
—Ko e Fakatufono Ka Tamai e Parataiso. Ko e tau tagata ne fai matutakiaga mo e fakatufono ka liga fiafia ke he ogo nei hagaao ke he puhala ka uta kehe he Kautu he Atua e tau lekua mamahaki he tagata.
—Ka Mate a Ia ne Ofania e Koe. Loga e tau leveki finolo ne fiafia ke moua e tau tohi porosua nei ma e tau magafaoa mauku. Kua fakaaoga he tau tagata fakailoa ne fakamatala he tau tanuaga e tau porosua nei ke fakamafana aki a lautolu ne maanu. Ne o atu e tau matakainaga fifine tokoua ke he magafaoa tokofitu ne liogi he tapa luo. Ti ko e mena ne tupu ha ko e ogo mafanatia he porosua, ne kamata ai e fakaako Tohi Tapu mo e matua fifine he aho hake!
—Tau Agaga he Tau Mena Mamate—Lagomatai Nakai e Lautolu a Koe po ke Fakamamahi a Koe? Gahuahua Moli Nakai a Lautolu? Tokologa ne tuaha ko e maeke kia a lautolu ne mamate ke fakalauia a lautolu ne momoui. Foaki he porosua nei e tali mai he Tohi Tapu ke he huhu fakalagalaga nei.
3 Kia iloa mitaki e tau porosua takitaha, mo e manamanatu ke he puhala mitaki ke fakaaoga ai he ha mutolu a fonua. Kia kikite e lau i tua he Ha Tautolu a Fekafekauaga he Kautu ia Iulai 1998, ma e tau fakafeleveiaaga ke talahau. Kia fakamonuina e Iehova ha mutolu a tau laliaga ke hohokotia atu ke he tau manamanatuaga mo e tau loto he tau tagata.—Mareko 6:34.