Matagahua Pauaki ke Tufa e Porosua Fou
1 Tokologa e tagata he vaha nei ne tupetupe he tau tutuaga he lalolagi, ka e gahoa ni ne maama e kakano ati pihia e tau mena tutupu, tau mena ne fakatoka mai mua, mo e mena ha lautolu ka taute ke hao mai he fakafiliaga hane hau. (Eseki. 9:4) Ke lagomatai a lautolu ke kitia e kakano he tau vaha ha tautolu, ko e matagahua pauaki ke tufa e porosua fou Kia Mataala! to fakahoko he Aho Gofua, Fepuari 21, ke he Aho Tapu, Mati 20.
2 Maeke e porosua ke foaki ka fakalataha ke he fekafekauaga he taha fale ke he taha fale, ka taute e tau liu ahi atu, ka fakamatala nakai fakatoka pauaki, po ke ka ha ha he tau toloaga tagata. Pete ia, ko e Kia Mataala! kua nakai lata ke tufa fakahanoa. Ka e, ko e tau porosua to age ni ki a lautolu kua fakakite e fiafia ke he tau talahauaga he Tohi Tapu hagaao ke he kakano he tau mena tutupu he lalolagi. Ko lautolu ne tote e fiafia ke he fekau liga lata ke foaki age e tuleke.
3 Liga fanogonogo e tagata ka pehe a koe:
◼ “Tokologa e tagata ne tupetupe ke he tau lekua hagahaga kelea mo e tau mena tutupu ofoofogia ne kua aga mau he vaha nei. [Talahau e fakatai ne iloa he matakavi.] Iloa nakai e koe kua fita he talahau tuai he Tohi Tapu e tau mena pihia? [Fakaata ma e tali. Ti totou e kupu tohi kua felauaki ke he fakatai ne talahau, tuga e Mataio 24:3, 7, 8; Luka 21:7, 10, 11; po ke 2 Timoteo 3:1-5.] Kua fakakite mai he Tohi Tapu e kakano he tau vaha ha tautolu mo e tau mena ne fakatoka mai i mua ma e tagata. Manako nakai a koe ke iloa atu foki? [Fakaata ma e tali. Foaki e porosua ka fakakite e fiafia moli.] Nakai kotofa totogi e porosua. Kaeke manako a koe ke tuku mai taha mena fakaalofa ke he gahua ha mautolu he lalolagi katoa, kua fiafia lahi a mautolu ke talia.”
4 Po ke liga lauia mitaki e fakafeleveia nei ki a koe:
◼ “Tokologa he vaha nei kua tupetupe lahi he tau mena tutupu ofoofogia po ke lahi mahaki e matematekelea fakatagata. Manamanatu e falu ke he kakano ne nakai fakalava mai e Atua ke puipui e tau mena pihia. Kua fakamafana mai he Tohi Tapu ki a tautolu to nakai leva ti fakatotoka he Atua e mamahi he tau tagata. Mailoga e tau mena aoga ka tamai he Atua ke he tau tagata. [Totou Salamo 37:10, 11.] Manako nakai a koe ke iloa atu foki?” Fakaoti tuga i luga.
5 Lali ke moua e higoa mo e kaina he tau tagata takitaha ka talia e lagaki he porosua, ti fakatoka ke liu atu ke feaki e fiafia. Ko e tau puhala kua maeke ke taute aki e mena nei to tu he Ha Tautolu a Fekafekauaga he Kautu he fufuta ia Mati 2005. Kaeke fiafia lahi e tagata he feleveia fakamua, liga maeke ia koe ke kamata e fakaakoaga Tohi Tapu he mogo tonu ia he Kia Mataala! po ke taha tohi, tuga e porosua Manako.
6 Ko e tau lagaki he porosua fou to moua ka hili e Feleveiaaga Fekafekau ne fakatutala e vala nei. Kua pulega atu ke he tau tagata fakailoa mo e tau paionia ke uta mua e tau lagaki ne kua fahia a lautolu ke fakaaoga he kamataaga he matagahua. Kia fakamonuina e Iehova e gahua pauaki nei he fakalilifu ki a ia mo e ke aoga a lautolu ne loto fakamoli he tau matakavi oti.—Sala. 90:17.