Manako Au ke he Fakaakoaga Tohi Tapu!
1 Tokologa ia tautolu ne fakakite e manako ma e fakaako Tohi Tapu, mo e kakano mitaki. Ko e gahua fakaako Tohi Tapu ko e mouaaga he foliaga ha tautolu he taute tutaki fou. (Mata. 28:19, 20) Ka e tokologa ia tautolu kua nakai moua e fiafia uho nei ke he tau mahina, liga ke he tau tau he fakaako taha tagata ke he kupu moli. Ko e heigoa ha tautolu ka taute ke he mena nei ia Novema? Ha ko e foakiaga he tohi Iloilo he mahina nei, maeke ia tautolu ke taute e laliaga pauaki ke fakaaoga ai ke kamata e tau fakaakoaga Tohi Tapu fou.
2 Fakatoka Kehe Taha po ke Loga e Tau Matahiku Vahatapu: Kua fakamalolo e mautolu e tau tagata oti ke fakatoka kehe falu magaaho he mahina nei ke hagaaki mau ke he kamata e fakaakoaga Tohi Tapu fou. Ko e tau leveki he Fakaakoaga Tohi he Fakapotopotoaga kua lata ke fifili e (tau) matahiku vahatapu ke fakaaoga pauaki ma e kakano nei ti fakatokatoka ke he tau matakau ha lautolu ke lali fakalahi ke he gahua liu ahi atu.
3 Ta mai e tau fakamauaga liu ahi atu hau mo koe ke he tau feleveiaaga nei he fekafekauaga. Ti ahi atu ki a lautolu oti ne fakakite e fiafia, uta e tau tohi, po ke o he tau feleveiaaga. Taute e tau ahi atu oti mo e kakano pauaki ke kamata e fakaakoaga.
4 Fakatata e Fakaakoaga Tohi Tapu: He tau feleveiaaga ne fifili ma e fekafekauaga, kua lata ke taute e fakataitaiaga kua mautauteute, fakakite e puhala ke kamata e fakaakoaga he liu ahi atu. Liga pehe a koe: “Tokologa e tau tagata kua fai Tohi Tapu, ka e nakai mailoga e lautolu ha ha i loto e tau tali ke he tau huhu aoga kua fehagai mo tautolu oti he moui. [Fakakite e tau mataulu tala he tohi Iloilo, ti totou e tau mataulu he veveheaga 3, 5, 6, 8, mo e 9.] He fakaaoga e tohi fakaako nei ke he taha e tula he fahitapu, maeke ia koe ke moua e maamaaga aoga ke he Tohi Tapu ke he tau mahina gahoa. Ka manako a koe ke fifili taha he tau mataulu nei, to fiafia au ke fakakite atu e puhala ka fakagahua aki e fakaholoaga.” Ka tehatehaua e tagata ke fakaako ha ko e lavelave, fakamaama kua fai puhala ku foki a tautolu. Fakakite e porosua Manako ti foaki ke fakaako ke he taha e fakaakoaga ku he fahitapu ke 15-30 e minuti.
5 Ka taute e tautolu oti e laliaga fakalataha ke kamata e tau fakaakoaga mo e ka liogi a tautolu ke he fakamonuinaaga a Iehova ke lata mo e amaamanakiaga ha tautolu, to moua moli e tautolu e tau fakaakoaga fou! (1 Ioane 5:14, 15) Ka manako a koe ma e fakaakoaga Tohi Tapu, ko e magaaho anei ma hau ke kamata taha.