Fifiliaga ha Tautolu—Ke Tutuli e Puhala Moui a Iehova
1 Ko e fakakatoatoaaga he tau Fonoaga “Puhala Moui he Atua” ko e fakamoliaga ne moua he lauga fakahiku. Ne kamata aki e fakapuloaaga: “Ko mautolu . . . kua talia katoa mai he tau loto ko e puhala he Atua e puhala kua mua ue atu he moui.” Liu manatu ai falu matakupu aoga lahi he fakamoliaga ia ne kua pehe a tautolu, “E!”
2 Ko e fifiliaga ha tautolu ke fakatumau e mea ki mua a Iehova, he nakai ilaila mai he lalolagi. To matutaki ni a tautolu ke tuku fakamua e finagalo he Atua ke he tau momoui ha tautolu. He fakaaoga e Kupu hana, ko e Tohi Tapu, mo takitakiaga ha tautolu, to nakai afe a tautolu ke he fahi matau po ke fahi hema, ka e o fakatatau ni ke he puhala he Atua kua tokoluga atu mai he puhala he lalolagi.
3 Kua tiaki he lalolagi e puhala moui he Atua mo e kua helehele ai e fua kelea. (Iere. 10:23) Ko e mena ia kua lata ia tautolu ke fakatumau e fakaako mai he Faiaoga Homo Ue Atu ha tautolu, ko Iehova, kua talahau: “Ko e puhala hanai ke o ai a mutolu.” (Isa 30:21) Ko e puhala moui ha Iehova, kua fakatoka mai he tau Tohiaga Tapu, kua mua ue atu ke he tau puhala oti. Ke maeke ke moua e puhala ia, kua lata lahi ke fakaaoga katoatoa e tautolu e tau mena oti ia kua fakaako mai e Iehova ki a tautolu.
4 Ko e Fakaholoaga Fakaako Mua Ue Atu a Iehova: Kua fakaako e Iehova ki a tautolu e finagalo moli he moui mo e puhala ke fakaaoga aki e tau momoui ha tautolu ke he puhala mitaki lahi. Kua fakaako e ia ki a tautolu e puhala ke tupu ki mua e mitaki he tau momoui ha tautolu he manamanatuaga, mahani, mo e fakaagaga. Kua fakaako e ia a tautolu ke he puhala ke nonofo mafola mo e tau matakainaga ha tautolu, tau magafaoa ha tautolu, mo e katofia ha tautolu. Kua taute e ia e mena nei puhala mai he tohi hana, ko e Tohi Tapu, mo e he fakatokatokaaga hana.
5 Kua aoga lahi foki e tau feleveiaaga fakapotopotoaga ha tautolu ke he mena nei. He o tumau a tautolu mo e tali ke he tau feleveiaaga ne lima, kua moua e tautolu e fakamahaniaga maama lahi ko e tau fekafekau he tala mitaki mo e loto matala lagotatai mitaki he moui Kerisiano. (2 Timo. 3:16, 17) Kua lafi mai foki he Faiaoga Homo Ue Atu ha tautolu e fakaakoaga fakateokarasi puhala mai he tau toloaga mo e tau fonoaga. Ko e foliaga ha tautolu ki a nakai lata ke fakato e feleveiaaga po ke magaaho kaeke ke fakaata he malolo tino mo e tau tutuaga ha tautolu a tautolu ke fakalataha.
6 Kia lotomatala a tautolu he fakatumau ke tutuli e puhala moui he Atua ke he tau aho i mua, ke fakaheke mau ki a Iehova mo e ke he ha tautolu ni a mitaki tukulagi!—Isa 48:17.