Ta Mai he Tauteute Tuai e Olioli
1 Ko e fakalataha ke he fekafekauaga he fonua kua ta mai ki a tautolu e olioli lahi. (Sala. 89:15, 16) Moli, ko e mautauteute ko e kei pauaki he maeke ke moua katoatoa e olioli ia. Ka mitaki e mautauteute ha tautolu, ti lahi e mouaaga, ka lahi e mouaaga ha tautolu, ti lahi mahaki e olioli ha tautolu.
2 Fakaaoga e Tau Kanavaakau kua Foaki: Kamata e tauteute hau he totou mo e kumikumi e vala tala he Ha Tautolu a Fekafekauaga he Kautu. Kua fa foaki mai e tau fakatataaga mitaki ne kua talaga ke lagomatai a koe ke foaki fakamukamuka mo e lauia mitaki e fekau he Kautu. To moua e koe tau fakafifitakiaga ke he puhala ke kautu mai he tau totokoaga fa mahani. Ko e tau manatu pauaki kua foaki ke he puhala ke taute e tau liu ahi atu lauia mitaki, mo e foliaga ke kamata e fakaakoaga Tohi Tapu. Ha ha ia koe e tokanoaaga ke hikihiki e tau pulega nei ke he manatu kua hagahaga mitaki ia koe ke fakaaoga ai. Lafi ke he mena nei, haia koe e tohi Reasoning, kua foaki e tau fakafeleveiaaga kehekehe loga ti pihia mo e tau tali ke he tau tagata taofi tala, he lagomatai a koe ke lauia mitaki ke he loga he tau tutuaga kua fehagai mo koe.
3 Kitekite ke he tohi ka foaki e koe, ti fifili taha po ke ua e manatu aoga kua fakalagalaga ka fakakite e koe ke he tagata he kaina. Ko e tau tala fakaohooho kua logona po ke totou e koe ka liga atu ki a koe e hafagiaga ke kamata e fakatutalaaga. Manamanatu tuai ke he tau totokoaga fa mahani kua liga ke fehagai mo koe, ti tokaloto falu manatu ke he puhala hau ke tali aki. Ti fakatoka falu minuti ke fakagahua e mena ka tutala a koe he gutuhala.
4 Fina Atu Tumau ke he Feleveiaaga Fekafekau: Fanogonogo fakamitaki ke he Feleveiaaga Fekafekau ka fakatutala, liu fakamanatu, mo e fakataitai e tau lagomataiaga he Ha Tautolu a Fekafekauaga he Kautu. Fakamau hifo e tau manatu kua logona e koe ke lavahi ke he fakatutalaaga hau. Liu manatu falu tuaga fa mahani ne fehagai mo koe ke he fekafekauga, ti manamanatu hagaao ke he tau puhala kua maeke ia koe ke lauia lahi e fakamatala. Tutala mo e falu tagata fakailoa ke he tau mena nei to kamata mo e ka oti e feleveiaaga.
5 Maeke ia koe ke iloa moli kaeke ke “taute mo e tau gahua mitaki oti,” to palepale a koe aki e olioli lahi mo e kautu he lagomatai e falu ke kumi e puhala ke he moui.—2 Timo. 2:21.