Tali Atu Nakai a Koe ke he Fakaalofa he Keriso?
1 He fakaata e puhala moui he Iki hana, ne tohi he aposetolo ko Ioane: “Kua fakaalofa a ia ke he hana tau tagata ha he lalolagi, ti fakaalofa ni a ia kia lautolu kua hoko ke he fakaotiaga.” (Ioane 13:1) He magahala Fakamanatu nei, kua hahaga atu e tau manatu ha tautolu ke he fakakiteaga lahi ue atu he fakaalofa he Keriso. Tali atu a tautolu ke he fakaalofa ia he fakagahuahua e tua ke he lukutoto, he fakalataha fakamakutu ke he gahua fakamatala mo e, tuga a Iesu, he fakauka “ke he fakaotiaga.”—Mata. 24:13; 28:19, 20; Ioane 3:16.
2 Tali Atu ke he Fakaalofa he Keriso: Ne hakahakau lahi a Iesu he fahitapu fakahiku he moui hana ke he lalolagi. (Mata. 21:23; 23:1; 24:3) Ko e tau tagata fifitaki he Keriso, kua fakalagalaga foki a tautolu he fakaalofa ke ‘eke taha a tautolu ke huhū’ ke he fekafekauga ha Iehova. (Luka 13:24) Fakaaoga katoatoa nakai e koe e tau fakatokatokaaga ma e gahua fakamatala lafi ki luga ia Aperila he fakalahi hau a magaaho he fakaaoga ke he fekafekauaga?
3 He tau nei ko e Kaiaga Afiafi he Iki kua hoko ai he afiafi Lotu, Aperila 19. Tokofiha la ka hohoko mai ma e magaaho aoga lahi nei? Ke tokologa ai, kua falanaki ni ki a tautolu. Kua tohi hifo nakai e koe a lautolu kua pulega a koe ke uiina—ko e hau a tau tagata fakaako Tohi Tapu mo e tau tagata loto fiafia, tau magafaoa, tau kapitiga gahua, mo e tau kapitiga aoga? Kua fina atu nakai a koe ki a lautolu mo e foaki e uiina mai he loto? To fakamanatu nakai e koe ki a lautolu he tau aho gahoa ato hoko e Fakamanatuaga? Manako nakai a lautolu ke he lagomatai hau ke hoko atu ki ai? To uiina foki he tau motua a lautolu ne nakai gahuahua ke he fekafekauaga. Ko e kakano ka fakahoko e Fakamanatuaga he po he fahitapu ka e nakai he matahiku vahatapu kua aoga lahi ma e tau tagata ke fakalataha atu.
4 O Mai Tauteute: Kua aoga ma tautolu ke mautauteute mo e ke ha ha ai ke he aga manamanatu kua tonu he fakalataha atu a tautolu ke he Fakamanatuaga. Ne tomatoma e Paulo e tau matakainaga talitonu ke taofi mau e kakano uho he magaaho ia. (1 Kori. 11:20-26) Liga kua totou e koe e veveheaga 13 ke he 17 he Evagelia a Ioane he fakaakoaga Tohi Tapu fakamagafaoa hau ti igatia e tagata mo e talahau e kakano he poa a Iesu ki a ia. Ua nimo e totouaga he Tohi Tapu ke he tau aho takitaha ma e fahitapu he Fakamanatuaga!
5 Ko e fakaalofa ha tautolu ma e Keriso kua hokulo mo e nakai fakakaupa ni ia Aperila 19. Kua fifili a tautolu ke fakatata e fakaalofa ha tautolu ma hana tukulagi! To lagomatai he Fakamanatuaga he tau nei a tautolu ke fakamalolo e fifiliaga ia.