Fakaholoaga Fou he Toloaga he Aho Pauaki
1 Hane fakaheke he tau tagata fakapuloa mo e tau ako tokoluga e mautu ke he tau koloa fakatino, kua fakamalolo he Kupu he Atua a tautolu “Kia Maukoloa ke he Tau Gahua Mitaki.” (1 Timo. 6:18) Ko e mataulu a ia he fakaholoaga he toloaga he aho pauaki ka kamata ia Sepetema 2002. Ko e heigoa e fakamaloloaga ka moua e tautolu he toloaga nei?
2 To fakatutala e leveki he takaiaga ke he kakano “Kia Maukoloa Mai he Tuaga he Atua,” ti to huhu atu a ia ke he falu hane eketaha ke maukoloa fakaagaga. He lauga fakamua hana he aho, to fakakite he tagata lauga ahiahi mai e puhala hane taute he tau tagata he Atua e “Tau Gahua Mitaki he Magaaho Helehele Nai.” To fakamalolo takitokotaha ki a tautolu ke manamanatu ke he puhala ka liga fakalataha katoatoa a tautolu ke he gahua helehele ne kotofa he Atua nukua taute he vaha nei.
3 Ko e fiafia ha ia ha tautolu kaeke ke kitia e tautolu e tau fuata Kerisiano hane tutuli e maukoloa fakaagaga! Kua fakatokoluga he mena nei a Iehova mo e lagomatai e tau fuata ke fakatoka e fakaveaga mitaki ma e tau matagahua lilifu he vaha anoiha. Ko e vala “Nava ke he Tau Fuata ma e Tau Gahua Mitaki he Fakaheke a Iehova” ka fakaali e tau gahua mitaki hane taute he tau fanau Kerisiano he matakavi ha tautolu.
4 Ko e heigoa e tau fua he tutuli e tau gahua mitaki? Ko e tagata lauga ahiahi mai ka fakatutala ke he mena nei he lauga fakahiku hana, “Fakatumau ke he Tau Gahua Mitaki mo e Heleheleaga he Tau Monuina ha Iehova.” To fakakite e ia fa e fahi ka helehele e tautolu e tau monuina loga: (1) he tau tagata takitokotaha, (2) he tau magafaoa, (3) he fakapotopotoaga, mo e (4) he fakatokatokaaga he lalolagi katoa.
5 Ko lautolu ne taute e tau tukuleleaga ki a Iehova ka maeke ke papatiso. Ka mautali a koe ke uta e lakaaga ia, kia fakailoa mafiti atu ke he fekafekau leveki he fakapotopotoaga.
6 Ka fakailoa e aho he toloaga ha mutolu, kia fakamafiti ke taute e tau fakatokatokaaga ke maeke ke fakalataha atu. Lali ke hoko tuai atu ke fakalataha ke he lologo mo e liogi hafagi. Ko e fakalataha mo e fanogonogo ke he fakaholoaga he toloaga he aho pauaki ka fakamalolo a tautolu ke fakatumau ke tutuli e puhala kua taute a tautolu ke maukoloa moli mai he tuaga he ha tautolu a Atua, ko Iehova.