Fakaako e Vagahau Mea ke he Falu
1 Pete he loga e ‘tau motu, tau magafaoa, tau tagata kehekehe mo e tau vagahau kehekehe’ ne o mai ai, ko e Tau Fakamoli a Iehova ko e tau tagata kaufakalataha, ko e fakamatakainaga moli he lalolagi katoa. (Fakakite. 7:9) Ke he lalolagi mavehevehe he vaha nai, ko e mena mitaki lahi a ia. Maeke fefe ke pihia? Ha kua foaki mai ki a tautolu e “liliuaga ke he vagahau mea.”—Sefa. 3:9, NW.
2 Tau Lauiaaga Mitaki Ue Atu: Ko e heigoa e vagahau mea nai? Ko e maama hako ke he kupu moli ne moua i loto he Kupu he Atua hagaao ki a Iehova mo e hana tau finagalo, mua atu ke he kupu moli hagaao ke he Kautu he Atua. Tuga ni he talahau tuai e Iesu, kua puhala mai e kupu moli he halavaka kua kitia ha he lalolagi, ko e “fekafekau fakamoli mo e loto matala,” mo e moua e tau tagata mai “he tau vagahau oti he tau motu kehe” hane tapiki mau ke he tapuakiaga moli.—Mata. 24:45; Saka. 8:23.
3 He fa e ako he tau tagata e vagahau mea, kua omoomoi a lautolu ke fakatatau atu e tau momoui ha lautolu ke he tau tutuaga ha Iehova. Kua ako a lautolu ke ‘fakalataha ke he loto taha mo e manatu taha.’ (1 Kori. 1:10) Ko e tau fakaakoaga faka-Atua kua fakatupu foki ia lautolu e mahani hakohako mo e manamanatuaga mitaki, vagahau fakamoli, mua atu ka tutala ke he falu hagaao ke he tala mitaki. (Tito 2:7, 8; Hepe. 13:15) Ko e tau hikihikiaga mitaki ue atu nai kua fakaheke a Iehova.
4 Ma e fakatai, ko e tagata tane ne logona e tala mitaki nukua loga e huhu, ka e tali oti e tau huhu ia mai he Tohi Tapu. Ha kua omoomoi mai he tau mena ne logona e ia, ne kamata a ia ke fakaako lagaua he fahi tapu mo e fina atu ke he tau feleveiaaga. Ne ofo a ia ha ko e fakafeleveia mafanatia ne moua e ia he Fale he Kautu, ha ko e tokologa ne fakalataha ai kua mai he tau lanu kehekehe. Ke he magaaho ku ni, ne hikihiki e ia mo e hana hoana e tau momoui ha laua mo e papatiso. Tali mai he magaaho ia ne lagomatai e ia kavi ke he 40 e tagata ke fekafekau ki a Iehova, mo e putoia e tokologa he tau tagata he magafaoa. Pete kua matematekelea he kulikuli, ne nakai la leva ia he kamata a ia ke paionia.
5 Fakaako ke he Falu: Ko e tau mena tutupu he lalolagi kua fakaohooho e tokologa he tau tagata mahani fakamoli ke liu kumikumi ke he ha lautolu a tau puhala manamanatu mo e tau momoui. Ke tuga a Iesu, kua lata ia tautolu ke manako ke lagomatai a lautolu. Ko e tau liu ahi atu mo e tau fakaako Tohi Tapu lauia mitaki e tau matapatu puhala ke lagomatai aki a lautolu kua manako moli ke ako e vagahau mea.
6 Ko e fakafeleveiaaga kua lauia mitaki moli ma e tau tagata lavelave ko e taute fakaku e fakaakoaga Tohi Tapu ka feleveia he gutuhala. (km 5/02 lau 1) Kua taute pihia nakai e koe? Ka tauteute a koe ke fina atu he liu ahi atu, fifili mai he uho he Ha Tautolu a Fekafekauaga he Kautu ia Ianuari 2002 e fakataitaiaga kua felauaki mo e tagata he fale. Loga e tau fakataitaiaga he uho nai ne taute ke takitaki fakahako atu ke fakatutala ke he porosua Manako po ke tohi Iloilo. Fakamahani e fakataitaiaga ia ke maeke ia koe ke holo mitaki mai he hafagiaga ti hoko ke fakatutala e taha he tau paratafa. Fifili taha po ke ua e kupu Tohi Tapu mai he paratafa ke totou ti fakatutala ki ai, mo e talahau e huhu ke fakaoti aki. To maeke he mena ia ke takitaki atu ke he paratafa kua fakatoka e koe ke fakatutala ki ai ka liu ahi atu.
7 Kua moua he tau tagata ha Iehova e tau monuina loga ha ko e fua he ako e vagahau mea. Kia fakamakamaka a tautolu ke lagomatai falu ke fakalataha mai mo tautolu ke ‘ui atu ke he higoa ha Iehova’ he ‘fekafekau ki a ia mo e loto fakalataha.’—Sefa. 3:9.