Fakaata Nakai e Koe e Kaina Hau?
1 He senetenari fakamua, tokologa e tau Kerisiano ne fakaata e tau kaina ha lautolu ke fakaaoga ma e tau feleveiaaga he fakapotopotoaga. (1 Kori. 16:19; Kolo. 4:15; File. 1, 2) He falu fakapotopotoaga he vaha nei, kua nakai loga e tau matakavi ma e tau matakau Fakaakoaga Tohi he Fakapotopotoaga mo e feleveia ma e fekafekauaga he fonua. Mena tupu anei ke he falu matakau fakaakoaga tohi ne 30 po ke tokologa atu a lautolu ne hohoko atu, ke molea e numera kua lata ko e 15.
2 Ko e Fakamonuinaaga Mitaki: Kua manamanatu nakai a koe ke fakaata e kaina hau ma e Fakaakoaga Tohi he Fakapotopotoaga? Ko e poko lahi kua mea, maama mitaki, mo e maagiagi mitaki kua latatonu ke feleveia ai. Ha ko e fakaakoaga tohi ko e feleveiaaga he fakapotopotoaga mo e vala he fakatokaaga ha Iehova ke fakaako hana tau tagata, ko e taute e fakaakoaga tohi he kaina hau ko e fakamonuinaaga mitaki. Tokologa ne talahau kua aoga fakaagaga ki a lautolu he hafagi e tau kaina ha lautolu ke he puhala nei.
3 Ka manatu a koe kua lata e kaina hau, kia fakailoa atu ke he tau motua. Liga kumi kaina atu foki a lautolu. Ka nakai maeke ke taute e fakaakoaga tohi he kaina hau, maeke nakai ke feleveia he kaina hau ma e fekafekauaga he fonua? Pete ni he nakai fakaaoga he magaaho nei, to loto fakaaue e tau motua ke iloa kua fakaata e kaina hau. To olioli e koe e monuina ia he tau aho ne galo agaia.
4 Fakakite e Tau Mahani Mitaki: Ka fakapotopoto he kaina he tagata, kua lata ke fakalilifu he tau tagata oti ne hohoko atu e tau koloa he tagata he kaina. Kua lata ke iloa moli he tau matua kua nonofo ni e tau fanau ha lautolu he mena ia ne fakaata ma e fakaakoaga, nakai o atu ai ke he falu fahi he kaina. Fakakite foki e manamanatuaga ma e tau katofia, he fakaeneene ke aua neke fakatauhele a lautolu.—2 Kori. 6:3, 4; 1 Pete. 2:12.
5 Kua fakamalolo he Heperu 13:16 a tautolu ke nakai nimo ke “mahani mitaki atu mo e fakaalofa atu; ha ko e tau poa pihia kua fiafia ai e Atua.” Ko e hafagi e kaina hau ma e feleveiaaga he fakapotopotoaga ko e puhala mitaki ke fetutalaaki ke he tau mena mitaki mo e falu mo e ke ‘fakalilifu atu ki a Iehova mo e hau a tau koloa uho.’—Fakatai 3:9.