Tohi he La

Tau Tagata Fakailoa he Kautu Fakahele:

He mahina nei ko e takaiaga fou ne fakatu he la matakavi i Niu Silani, ne katoatoa ai ke 11 e takaiaga. He lafi ke he manako ma e taha takaiaga nei kua putoia ai ua e fakapotopotoaga fou fakalataha mo e malikiti ki mua e numera he tau fakapotopotoaga ke he tau he fekafekauaga he 2006.

Kua fakamoli he gahua atihake e fakapuloa he tala mitaki ke he fonua ne tuku mai ke he tau he fekafekauaga kua mole. Kua iloa moli e mautolu kua olioli e mutolu e matagahua pauaki he foaki e porosua “Kia Mataala!” Ia Fepuari ne hokotia a tautolu ke he tapunu fou ke he numera he tau porosua ne toka mo e tau tagata fiafia. Ko e fakamatala lautonu ha ia ne foaki ke he matagahua ia! Ko e tau magaaho fiafia anei ti kua lata ia tautolu ke mataala tumau ke he aoga mo e mafiti he fakatumau e magaaho he fakafiliaga ha Iehova ki mua he tau tagata.

Kua mafanatia ha ia ha mautolu he Peteli ke logona e tau talahauaga loga ha mutolu hagaao ke he matematekelea he peau kula fakalataha mo e falu puhala foaki ke lagomatai e tau matakainaga ha tautolu ne lauia ai. Kua ha ha i ai foki falu matematekelea tupu pauaki he la matakavi ha tautolu ti kua nava lahi ke mailoga e tali makai mo e mafiti he tau matakainaga ke foaki e lalagoaga. Kua ofania lahi ke he tau loto ha mautolu e tau matakainaga tane mo e fifine ne gahua ke lata mo lautolu ne matematekelea.​—Filipi 2:29.

Ko e tau tagata ne gahua noa i lalo he Tau Komiti Ta Fale he Matakavi ne talaga 3 e Fale he Kautu nukua fou mo e 2 e fakafouaga lalahi he tau fale tuai he tau he fekafekauaga kua mole. Ko e matagahua ke talaga e Fale he Kautu he Aelani a Ha‘apai he matakau he tau Tonga hane taute ai ti amanaki ke fakakatoatoa e gahua nei he 2006. Kua taute foki e tau fakaholoaga ke ta e Fale he Kautu kua fou he aelani ko Aitutaki he tau Aelani Kuki. Ko e aga makai mo e foaki noa ne fakakite he tau tagata gahua noa malolo kua loto fakaaue lahi ki ai.

Ko e tau gahua makai oti ha mutolu he fakatolomaki ki mua he Kautu kua nava lahi! Kua fakaaue lahi foki a mautolu ke he lalagoaga fakamokoi ha mutolu ke he foakiaga fakatupe ke he gahua. (Fakatai 3:9, 10) Kia fakatumau a Iehova ke fakamonuina e tau laliaga auloa ha tautolu ke “fakaheke ai ke he hana lilifu.”​—Efeso 1:12.

Ha mutolu a tau matakainaga,

La Ofisa i Niu Silani