Fakaholoaga Foou he Toloaga he Takaiaga

Maeke fēfē ke tutū mau ki a lautolu ne totoko favale ke he tapuakiaga mooli? Maeke fēfē ia tautolu ke kautū mai he tau pule malolō ne lali tumau ke liu toho atu a tautolu ke he lalolagi nakai mahani Atua? Ko e fakaholoaga ma e toloaga he takaiaga he tau he fekafekauaga he 2009 to tali e tau hūhū aoga nei. Ko e mataulu “Kia Mahala e Kelea ke he Mitaki.” (Roma 12:21) Manamanatu ke he fakaholoaga kua fakatoka mai.

To lauga e leveki faahimotu ke he tau matakupu “Fakamalolō ke Mahala e Kelea ke he Mitaki,” “Mataala Neke Molea e Mauokafua!,” “Nakai Leva ti Fakaotioti e Tau Mahani Kelea Oti!,” mo e “Fakamalolō e Tua ha Tautolu ke Kautū Mai he Lalolagi.” To lauga foki e leveki takaiaga ki a tautolu ke he mataulu “Ko e Vahā Anei ke Mataala Tumau!,” ne fakavē ke he Roma 13:11-13, mo e “Ua Fakalolelole a Koe ke he Aho Matematekelea,” ne fakavē ke he Tau Fakatai 24:10. Onoono atu foki a tautolu ke he vala he leveki takaiaga “Hagaaki ke he Tau Manako he Takaiaga.” Ko e taha vala atihake lahi foki “Maeke Nakai ia Koe ke ‘Eke e Fekafekauaga Nei’​—He Paionia?” Ko e lauga fakamua he tau fufuta lauga ne ua ne mataulu “Tutū Mau Mai he Tau Lagatau he Tiapolo.” To lagomatai a tautolu ke kitia mo e tiaki e tau lagatau fakahehē he Tiapolo ke he tau matini foou he vahā nei, fakafiafiaaga, mo e fakaakoaga. Ko e fufuta lauga “Moua e Malolō ke Totoko e Aho Kelea Nei” ka fakakite ki a tautolu e puhala ke fakaaoga katoatoa e tautolu e fakatonuaga omoomoi he Efeso 6:10-18.

Ha ha i ai e matutakiaga pauaki he vahāloto he kautū katoa mai he kelea mo e fakamatala e fekau he Kautu. (Fakakite. 12:17) Ko e mena ia ni ne favale lahi mahaki tumau a Satani ke he Tau Fakamoli a Iehova! (Isaia 43:10, 12) Ka e to kaumahala lahi e Tiapolo ha kua eketaha a tautolu ke “mahala e kelea ke he mitaki.” Taute e tau fakatokatokaaga kua mauokafua ke aoga katoatoa mai he tau fakaholoaga fā he toloaga takaiaga nei.