Fakaholoaga Foou he Toloaga he Takaiaga
Kua latatonu a Iehova ke fakaheke. Fakaheke fēfē e tautolu a Iehova? Ko e heigoa e tau paleko ne fehagai falu ki ai hagaao ke he mena nei? Ko e heigoa e tau monuina ne moua e lautolu ne fakaheke e Atua he mogonei? Ko e fakaholoaga ma e toloaga he takaiaga he tau he fekafekauaga he 2008 to foaki e tau tali makona ke he tau hūhū nei. Ko e mataulu ‘Kia Eke e Tau Mena Oti Kana ke Fakaheke ke he Atua.’ (1 Kori. 10:31) Kia mailoga e tau mena ne fakatoka mai mua ma tautolu ke he ua e aho hane hoko mai he tau fakaakoaga fakaagaaga loga.
To lauga e leveki faahimotu ke he tau matakupu “Ko e Ha ne Fakaheke ke he Atua?” mo e “Kia Eke mo Fakafifitakiaga Mitaki he Taute e Tau Poaki he Atua.” To taute e ia e lauga ke he tau tagata, “Ko Hai e Tau Tagata ne Fakaheke ke he Atua?,” mo e lauga fakahiku, “Fakaheke Fakalataha e Atua ke he Lalolagi Katoa.” To takitaki foki e ia e Aoga Fekafekau Fakateokarasi. To lauga e leveki takaiaga ke he tau mataulu “Fiafia ke Fakakite e Fakaheke ke he Atua,” “Hagaaki ke he Tau Manako he Takaiaga,” mo e ‘Fakatumau ke he Kupu Mooli,’ ne fakavē ke he 2 Peteru 1:12. Lafi ki ai, to ako a tautolu ke he puhala ne “Fakaheke he Gahua Paionia e Atua.” “Fakaheke e Atua ke he Moui Katoatoa ha Tautolu,” ko e lauga fakamua mai he tau fufuta lauga fakaohooho, ka kumikumi ke he hokulo he kakano he tau kupu omoomoi he 1 Korinito 10:31. Ko e fufuta lauga “Foaki e Fekafekau Tapu ke Fakaheke a Iehova” to tutala ke he tau vala kehekehe he tapuakiaga ha tautolu. To olioli e tautolu e fakamaamaaga he Ko e Kolo Toko mo e fakatutalaaga ke he lauga he aho he Aho Tapu. To fai magaaho foki ma e papatisoaga.
Kua nakai talia e laulahi he tau tagata ke talahau na ha ha ai e Atua. Tokologa kua lavelave lahi ha ko e tau pulega he tagata ke manamanatu atu ke he mua ue atu ha Iehova. (Ioane 5:44) Ka kua mauokafua a tautolu ke he uho he fakaaoga e tau magaaho ke manamanatu ke he puhala ‘Kia Eke e Tau Mena Oti Kana ke Fakaheke ke he Atua.’ Pulega ke fakalataha atu mo e ke aoga katoatoa mai he tau fakaholoaga oti ia ne fā.