Tau Mekasini ha Tautolu—Taute ke Lata mo e Tokologa
1. Fifitaki fēfē he vahega fakamoli mo e loto matala e aposetolo ko Paulo?
1 Tuga ni he hikihiki e Paulo e puhala ne talahau aki e ia e kupu mooli ke maeke ke moua e “tau tagata oti,” kua fakaaoga foki he fekafekau fakamoli mo e loto matala e tau senolo ha tautolu ke hokotia ke he tau tagata kehekehe mo e tau taofiaga kehekehe. (1 Kori. 9:22, 23) Ke maeke ia tautolu ke fakaaoga fakamitaki he Ko e Kolo Toko mo e Awake! kua lata ia tautolu ke tokaloto a lautolu ka ta atu e tau mekasini nei ki ai.
2. Taute e Awake! ke latatonu mo hai?
2 Awake!: Ko e foliaga he mekasini nei ke hokotia ke he tau vahega tagata tuga ne tutala e aposetolo ko Paulo ki ai he hagaao ke he “tau tagata Atenai.” (Gahua 17:22) Ne nakai feaki he tau tagata ia e puhala faka-Kerisiano, ti tote e maamaaga ha lautolu ke he tau Tohiaga Tapu. Liga pihia foki, ko e Awake! kua tohi ma lautolu ne tote po ke nakai iloa e Tohi Tapu. Liga ai fai mena a lautolu ne iloa ke he tau fakaakoaga faka-Kerisiano, liga nakai falanaki a lautolu ke he lotu, po ke liga nakai mailoga e lautolu e aoga he Tohi Tapu. Ko e matapatu kakano he Awake! ke omoi e tau tagata ka totou ai ke talitonu na fai Atua mooli. Ko e foliaga he mekasini nei ke atihake foki e tua ke he Tohi Tapu mo e lagomatai e tagata totou ke iloa na kehe e Tau Fakamoli a Iehova mai he falu matakau lotu.
3. Ko e heigoa e kakano ati taute ai e tau fufuta takitaha he Ko e Kolo Toko?
3 Ko e Kolo Toko: Kua taute e fufuta ma e fonua he senolo nei ke lata mo e tau tagata ne fai fakalilifuaga ke he Atua mo e tau Tohiaga Tapu. Fai iloaaga a lautolu ke he Tohi Tapu ka e nakai maama e tau fakaakoaga tonu i ai. Kua tatai a lautolu mo e tau tagata fanogonogo ne hagaao a Paulo ki ai kua “matakutaku ke he Atua.” (Gahua 13:14-16) Ko e fufuta ma e fakaakoaga he Ko e Kolo Toko kua tohi pauaki ma e Tau Fakamoli a Iehova. Ne mailoga e Paulo ko lautolu ka totou e tau tohi haana kua mahani a lautolu mo e tau Tohiaga Tapu ti hako e maamaaga ke he kupu mooli. (1 Kori. 1:1, 2) Pihia foki, ko e tau vala tala he fufuta fakaako kua tohi ma lautolu kua fakalataha ke he tau feleveiaaga ha tautolu ti iloa e tau alaga kupu mo e tau fakamaamaaga he Tau Fakamoli.
4. Ko e ha kua lata ia tautolu ke iloa e tau fufuta takitaha he tau mekasini ka fakaaoga e tautolu he fonua?
4 Pete kua mahani a tautolu ke foaki fakalataha ua e mekasini, kua fa taha ni ka fakakite e tautolu he fakafeleveiaaga ha tautolu. Ko e mena ia, kia eke mo foliaga haau ke iloa e tau fufuta takitaha. To maeke mogoia ia koe ke mukamuka ke fakakite e vala kua felauaki mo lautolu ka feleveia mo koe.