Hogofulumaua e Kakano ke Fakamatala

Ko e ha a tautolu ne fakamatala mo e fakaako atu e tala mitaki? Matapatu kia ke lagomatai ai e tau tagata loto fakamooli he puhala ke he moui? (Mata. 7:14) Ko e kakano fakamua a ia ne tohi i lalo, ka e nakai ko e matapatu a ia ha tautolu. Ha e fe e tau kakano 12 ia ma e gahua he fonua kua manatu a koe kua aoga lahi?

1. Lagomatai ai ke fakahao e tau momoui.​—Ioane 17:3.

2. Taute ai ke hataki e tau tagata mahani kelea.​—Eseki. 3:18, 19.

3. Lafi ai ke he fakamooliaga he perofetaaga he Tohi Tapu.​—Mata. 24:14.

4. Ko e fakakiteaga he tututonu he Atua. Nakai fai fakalagoaga ki a Iehova ka moumou e ia e tau tagata mahani kelea he nakai foaki e magaaho ki a lautolu ke tokihala.​—Gahua 17:30, 31; 1 Timo. 2:3, 4.

5. Fakaatā a tautolu ke fakamooli katoatoa ai e matagahua ha tautolu ke foaki e lagomatai fakaagaaga ke he tau tagata ne totogi aki e toto ha Iesu.​—Roma 1:14, 15.

6. Kua taute ai a tautolu ke kalo kehe he fakamaligi toto.​—Gahua 20:26, 27.

7. Ko e fakavēaga a ia ma e fakamouiaga ha tautolu.​—Eseki. 3:19; Roma 10:9, 10.

8. Fakatātā ai e fakaalofa ma e katofia.​—Mata. 22:39.

9. Fakakite ai e omaoma ki a Iehova mo e haana Tama.​—Mata. 28:19, 20.

10. Ko e vala a ia he tapuakiaga ha tautolu.​—Hepe. 13:15.

11. Fakakite ai e fakaalofa ha tautolu ma e Atua.​—1 Ioa. 5:3.

12. Lafi ai ke he fakatapuaga he higoa a Iehova.​—Isaia 43:10-12; Mata. 6:9.

Mooli, nakai ko e tau kakano ni anei ne taute e tautolu e gahua he fonua. Ma e fakatai, kua fakamalolō he fakamatala e tua ha tautolu mo e foaki foki ki a tautolu e lilifu ke eke mo tau ekegahua he Atua. (1 Kori. 3:9) Ka ko e kakano aoga lahi he fakalataha ke he gahua he fonua ko e numera 12. Pete ne tali kua moua e tautolu, ko e gahua he fonua kua lafi ke he fakatapuaga he higoa he Atua mo e foaki ki a Iehova e tali ki a ia ne fakafiu a Ia. (Fakatai 27:11) Mooli, kua ha ha ia tautolu e tau kakano omoomoi ke ‘nakai oki he fakaako atu mo e fakamatala atu e tala mitaki.’​—Gahua 5:42.