Fakatolomaki ki Mua e Lotomatala ha Tautolu he Fekafekauaga—Kamata e Fakaako Tohi Tapu he Gutuhala he Fakaaoga e Porosua Tala Mitaki Mai he Atua!

Kakano kua Aoga Ai: Ke taute tutaki, lata ia tautolu ke eke mo tau faiaoga he Kupu he Atua. (Mata. 28:19, 20) Igatia a tautolu oti mo e fakaako fakamitaki e kupu mooli he fakaaoga e tau foakiaga ne tuku mai ki a tautolu. Ko e porosua Tala Mitaki mai he Atua! ne talaga pauaki ke lagomatai a tautolu ke fakaako e kupu mooli ke he falu. Ti maeke ia tautolu ke fakaaoga ai ke kamata e fakaako Tohi Tapu mo e tagata he kaina he fina atu fakamua ke he gutuhala haana.

Fakatai e Mena Ē he Mahina Nei:

Liogi ma e manako ke moua e fakaako. Olelalo foki ma e lagomatai ha Iehova ke kamata e fakaako Tohi Tapu ti eke mo faiaoga lauia mitaki he kupu mooli.—Filipi 2:13.
He tapuakiaga he magafaoa po ke fakaako fakatagata, fakatoka e magaaho ke fakamau e fakataitaiaga he loto haau. Ti maeke a koe ke vagahau mo e mauokafua mo e kamata e fakaako Tohi Tapu he gutuhala he gahua fakamatala.