Fakaako Mai he Tau Tagata Fakailoa Lotomatala Lahi

Tokiofa mooli e tautolu e tau tagata fakailoa lotomatala he fakapotopotoaga. Falu ne fekafekau fakamooli ki a Iehova ke loga e tau tau. Falu ne iloa e tau puhala mitaki he gahua fakamatala he tau mogo kua mole laia. Ko e tau tagata fakailoa nei kua kitia e puhala ne takitaki e Iesu e fakapotopotoaga Kerisiano he tau aho fakamui nei he fakalaulahi e gahua fakamatala mo e taute tutaki. (Mata. 28:19, 20) He taute e gahua fakamatala nei, kua ‘lahi ue atu e malolo’ ne moua e lautolu ka fehagai ke he tau paleko mo e tau kamatamata fakatagata. (2 Kori. 4:7) Loga e mena ke fakaako mai he tau tagata fakailoa lotomatala nei. Ka moua e magaaho, fiafia a lautolu ke fakaako e falu aki e tau mena ne iloa e lautolu. (Sala. 71:18) Ti lata a tautolu ke fakaatā e magaaho ke fakaako mai ia lautolu. Maeke fēfē ke taute e mena nei?

Gahua he Fonua. Ke lauia mitaki e gahua he fonua, lata e tau tagata fakailoa foou po ke nakai lahi e lotomatala ke fakamahani. Lahi e mitaki ka fakaako he kitekite e puhala ne taute he tau tagata fakailoa motua fakaagaaga e fekafekauaga ha lautolu. (Kikite vala tala he Kolo Toko, Fepuari 15, 2015, “Fakatumau e Fakamakutu Haau ke he Gahua he Fonua,” ko e paratafa ke toluaki i lalo he vala mataulu “Lagomatai e Tau Tagata Fakailoa Foou.”) Aoga fēfē a koe he gahua mo lautolu ia he fonua?

Maeke nakai a koe ke uiina e tagata fakailoa lotomatala lahi ke gahua mo koe he fonua? Ka fai matafatia e tagata fakailoa, maeke ia koe ke fakaako e taha he tau fakaako Tohi Tapu haau he falu mogo he kaina haana. Ka oti e fakaako, hūhū ke he tagata fakailoa ma e tau manatu mo e fakatonuaga haana.

Fakaaoga e Magaaho Fakatagata mo Lautolu: Eketaha ke iloa e tau tagata fakailoa lotomatala he fai magaaho mo lautolu. Uiina e taha ia lautolu ke he tapuakiaga he magafaoa ha mutolu ti hūhū tala ki a ia. Ka fai matafatia e tagata fakailoa, maeke nakai ke taute e tau fakatokaaga ke fakahoko e tapuakiaga he magafaoa ke he kaina haana? Hūhū ko e hau fēfē a ia ke he kupu mooli? Ko e heigoa e tau monuina ne olioli e ia? Ko e heigoa e tupuaga kua kitia e ia he fakapotopotoaga? Ko e heigoa e fiafia ne moua e ia he fekafekau ki a Iehova?

Kia maama mo e lagotatai ke he haau a tau amanakiaga. Tuga ni a tautolu oti, ko e tau tagata fakailoa ne leva kua moua e tau mena fakaalofa kehekehe he gahua ke he fonua. (Roma 12:6-8) Falu ne momotua e tau tino, ti liga fakakaupā he mena nei e lahi he magaaho ka fakaaoga e lautolu mo tautolu. Ti maeke ia tautolu ke lahi e mena ka fakaako mai ia lautolu ha ko e lotomatala, po ke iloaaga ha lautolu he fekafekau fakamooli ki a Iehova.