Taute e Tau Fifiliaga Iloilo he Vahā Fuata

1. Ko e heigoa e tau mena tutupu ofoofogia kua fiafia e tokologa he tau tagata fuata ki ai?

KUA nonofo a tautolu he tau magaaho fiafia. Nakaila pihia fakamua he fakamauaga tala, totou miliona mai he tau motu oti hane fifili ke tapuaki ki a Iehova. (Fakakite. 7:9, 10) Tokologa e tagata fuata hane moua e fiafia lahi he uiina e falu ke ‘uta noa e vai he moui.’ (Fakakite. 22:17) Ko lautolu nei ne fuata kua lagomatai e tau tagata ke fakaako e Tohi Tapu mo e ke fakaholo ki mua e tau momoui ha lautolu. Falu ne talia fakamakutu e paleko he fakaako e vagahau foou ti folafola e tala mitaki he tau fonua vagahau kehe. (Sala. 110:3; Isaia 52:7) Ko e heigoa kua lata ia koe ke taute ke fai vala he gahua fiafia nei?

2. Fakakite fēfē he fakafifitakiaga ha Timoteo kua manako a Iehova ke age ke he tau fuata e tau matagahua? (Kikite fakatino he kamataaga.)

² Maeke a koe ke taute e tau fifiliaga mogonei ka hafagi he magaaho fakamui ke fakalaulahi e tau magaaho ke fekafekau ki a Iehova. Ma e fakatai, ne taute e Timoteo e tau fifiliaga mitaki he tote agaia a ia, ti he fuata mui po ke he mataulu he tau atu tau 20, ne fitā a ia he lata ke eke mo misionare. (Gahua 16:1-3) Liga ko e gahoa laia e mahina he mogo fakamui he ole a Paulo ki a Timoteo ke fano ke he fakapotopotoaga foou i Tesalonia ne favale fakakelea ke he tau matakainaga. Ne omoi a Paulo ke fano kehe i ai, ka e falanaki a ia to fakamalolō e Timoteo e tau matakainaga. (Gahua 17:5-15; 1 Tesa. 3:1, 2, 6) Manamanatu la ke he fiafia ha Timoteo he age ki ai e kotofaaga ia!

FIFILIAGA AOGA LAHI HAAU

3. Ko e heigoa e fifiliaga aoga lahi ka taute e koe he moui, ti magaaho fe kua lata ia koe ke taute ai?

³ Ko e magaaho ke taute e tau fifiliaga aoga ko e mogonei he fuata agaia a koe. Ko e heigoa e fifiliaga aoga lahi ke taute e koe? Ko e fifiliaga haau ke fekafekau ki a Iehova. Ko e magaaho fe kua mitaki lahi ke taute e fifiliaga ia? Tala atu a Iehova ki a koe ke manatu a ia he vahā fuata haau. (Fakama. 12:1) Ko e puhala ni ke manatu a Iehova ko e fekafekau ki a ia mo e loto katoa haau. (Teu. 10:12) Ko e fifiliaga aoga lahi mahaki ke taute e koe. To lauia ai e moui katoa haau.​—Sala. 71:5.

4. Ko e heigoa e tau fifiliaga aoga ka lauia e puhala fekafekau haau ke he Atua?

⁴ Mooli, ko e fifiliaga haau ke fekafekau ki a Iehova ne nakai ni ko e fifiliaga hokoia kua lauia e vahā anoiha haau. Kua lata foki ia koe ke fifili kaeke ke fai taane po ke fai hoana a koe, ko hai ke mau e koe, ti ko e heigoa e gahua haau ka taute. Ko e tau fifiliaga aoga lahi anei, ka e lata fakamua ia koe ke fifili ke fekafekau ki a Iehova mo e loto katoa haau. (Teu. 30:19, 20) Ko e ha? Ha kua matutaki lahi e tau fifiliaga oti nei. Ko e mena ne fifili e koe hagaao ke he fakamauaga mo e gahua to lauia e puhala fekafekau haau ke he Atua. Ti ko e manako haau ke fekafekau ke he Atua to lauia e tau fifiliaga ne taute e koe hagaao ke he fakamauaga mo e gahua. (Fakatatai Luka 14:16-20.) Ti fifili e mena ne mua atu e aoga he moui haau.​—Filipi 1:10.

KO E HEIGOA KA TAUTE E KOE HE FUATA AGAIA?

5, 6. Fakakite fēfē ki a tautolu ke he mena ne tupu ki a Yuichiro, ko e taute e tau fifiliaga hako ka hafagi e magaaho foki ke fakalaulahi e fekafekauaga ki a Iehova? (Kikite foki e vala tala “Mena ne Fifili e Au he Vahā Tote” he fufuta nei.)

⁵ Fifili ke fekafekau ki a Iehova, kumikumi e mena ne manako a ia ke taute e koe, ti fifili mogoia e puhala ke moui a koe. Ko e matakainaga taane Sapanī ne tohi: “He 14 e tau haaku he moui, ne fakamatala au mo e motua he fakapotopotoaga ne mailoga kua nakai moua e au e fiafia he fekafekauaga. Ne talahau totonu a ia ki a au: ‘Fano ki kaina ma Yuichiro. Nofo he nofoa haau ti manamanatu fakamitaki ke he mena ne kua taute e Iehova ma haau.’ Taute pihia e au. Ti fai aho ne matutaki au ke manamanatu mo e liogi. Ne hiki fakahaga e aga haaku. Nakai leva ti moua e au e fiafia he fekafekau ki a Iehova. Fiafia au ke totou hagaao ke he tau misionare, ti manamanatu agataha au ke fakalaulahi e fekafekauaga ke he Atua.”

⁶ Ne kamata a Yuichiro ke taute e tau fifiliaga mitaki. Ha ko e mena nei, ne maeke a ia ke fekafekau ki a Iehova he taha motu. Pehē a ia: “Ma e fakatai, ne fifili au ke taute e fakaakoaga kū faka-Peritania. He oti au mo e aoga, ne fifili au ke gahua vala magaaho he fakaako faka-Peritania ke maeke ia au ke paionia. He 20 e tau haaku, ne kamata au ke fakaako faka-Mongolia ti maeke au ke fina atu ke he matakau he tau tagata fakailoa Mongolia. Ua e tau he mole he mogo fakamui, he 2007, ne ahiahi atu au ki Mongolia. He fano au ke fakamatala mo e falu he tau paionia ti kitia e tokologa he tau tagata ne kumi e kupu mooli, ne manako au ke hiki atu ki ai ke lagomatai. Ne liu au ki Sapanī ke taute e tau fakatokaaga haaku. Paionia au mogonei i Mongolia tali mai ia Aperila he 2008. Nakai mukamuka e moui i hinei. Ka e fiafia e tau tagata ke he tala mitaki, ti maeke au ke lagomatai a lautolu ke fakatata ki a Iehova. Logona e au ko e mena ne fifili e au ko e puhala mitaki lahi mahaki he moui.”

7. Ko e heigoa e tau fifiliaga kua lata ia koe ke taute ma haau, ti ko e heigoa ka fakaako e tautolu mai ia Mose?

⁷ Kua lata ia koe ke taute e tau fifiliaga ni haau ke he puhala ka fakaaoga e koe e moui haau he fekafekauaga ki a Iehova. (Iosua 24:15) Nakai maeke a mautolu ke tala atu ki a koe kua lata ia koe ke fai taane mo e fai hoana po ke ko hai kua lata ia koe ke mau. Nakai maeke a mautolu ke tala atu ki a koe e gahua kua lata ia koe ke taute. To moua nakai e koe e gahua kua nakai lahi e fakamahani? Falu ia mutolu ne nonofo he tau maaga mativa, ti falu ne nonofo he tau taone monuina. Kehekehe ha mutolu a tau aga fakatagata, tau makaka, fakamahani, tau mena ne fiafia, mo e tua. He vahā i tuai, ko e tau tama fuata ne fekafekau ki a Iehova ne kehekehe foki e tau tutupu maiaga. Ma e fakatai, ne tupu hake a Mose i Aikupito, ne maukoloa ai, ka ko e falu fuata Heperu ne tupa. (Esoto 1:13, 14; Gahua 7:21, 22) Tuga a koe, ne momoui a lautolu he tau magaaho fiafia. (Esoto 19:4-6) Ka e igatia a lautolu takitaha mo e fifili e mena ka taute e ia ma e moui haana. Ne taute e Mose e fifiliaga hako ke taute e finagalo ha Iehova.​—Totou Heperu 11:24-27.

8. Moua e koe i fe e lagomatai ke taute e tau fifiliaga mitaki?

⁸ Foaki atu e Iehova e fakatonuaga ki a koe ke lagomatai a koe ke taute e tau fifiliaga hako. Taute fēfē e ia e mena nei? Kua fakaako e ia ki a koe e tau matapatu fakaakoaga Tohi Tapu ka fakaaoga e koe pete ne tau tuaga haau. (Sala. 32:8) Ka nakai iloa mitaki e koe e puhala ke fakaaoga e tau matapatu fakaakoaga nei, maeke a koe ke ole ke he tau matua haau po ke tau motua ke lagomatai a koe. (Fakatai 1:8, 9) Kia onoono la tautolu ke he tolu e matapatu fakaakoaga Tohi Tapu ka lagomatai a koe ke taute e tau fifiliaga mitaki mogonei.

TOLU E MATAPATU FAKAAKOAGA TOHI TAPU KE LAGOMATAI A KOE

9. (a) Fakalilifu fēfē e Iehova a tautolu he foaki ki a tautolu e atāina ke taute e tau fifiliaga? (e) To aoga fēfē ki a koe ka kumi fakamua e koe e Kautu?

⁹ Kumi fakamua e Kautu he Atua mo e haana tututonu. (Totou Mataio 6:19-21, 24-26, 31-34.) Kua fakalilifu e Iehova a koe he foaki ki a koe e atāina ke fifili e mena ka taute aki e magaaho haau. Nakai tala atu a ia ki a koe kua lata ia koe ke fakaaoga oti e magaaho haau ke fakamatala. Ka e fakaako e Iesu ki a tautolu e aoga he kumi fakamua e Kautu. Ka kumi fakamua e koe e Kautu, to loga e hala ka hafagi ki a koe. Ma e fakatai, to loga e puhala ke fakakite e fakaalofa haau ki a Iehova mo e tau katofia haau mo e fakakite kua loto fakaaue a koe ma e amaamanakiaga he moui tukulagi. To fakakite kia he tau fifiliaga haau ke he fakamauaga mo e gahua kua tupetupe lahi a koe ke he tau koloa haau ka e nakai ke he ‘kumikumi fakamua ke he kautu mo e hana tututonu’?

10. Ko e heigoa ne taute a Iesu ke fiafia, ti ko e heigoa kua lata ia koe ke taute ke fiafia?

¹⁰ Moua e fiafia he fekafekau atu ke he falu. (Totou Gahua 20:20, 21, 24, 35.) Ko e matapatu fakaakoaga anei he moui. Iloa e Iesu e mena nei, ti fekafekau a ia ke he haana Matua he taute e finagalo Haana mo e fekafekau ke he falu he fakaako ki a lautolu e tala mitaki. Taute he mena nei a ia ke fiafia. (Luka 10:21; Ioane 4:34) Liga logona hifo e koe e fiafia pihia ka fekafekau a koe ke he falu. Ti fakavē e tau fifiliaga haau ke he tau matapatu fakaakoaga ne fakaako e Iesu. He taute e mena nei ka fakafiafia a koe, ti taute a Iehova ke fiafia foki.​—Fakatai 27:11.

11. Ko e ha ne galo e Paruka e fiafia haana, ti ko e heigoa e fakatonuaga ne age e Iehova ki a ia?

¹¹ Ko e fiafia lahi mahaki ne moua he fekafekau ki a Iehova. (Fakatai 16:20) Tuga kua galo he tohikupu ha Ieremia ko Paruka e fiafia haana he taha mogo he moui haana. Ne kamata a Paruka ke manamanatu lahi ke he mena ne manako a ia ka e nakai ke he mena ne manako a Iehova. Kitia e Iehova e mena nei, ti tala age a Ia ki a Paruka ke ua liu ke ‘kumi e tau mena lalahi’ ma haana. Ka omaoma a ia, to hao a ia he moumouaga ha Ierusalema. (Iere. 45:3, 5) Ko e heigoa ka taute a Paruka ke fiafia lahi? Ko e taute e mena ne manako a ia ki ai ti mate, po ke taute e mena ne manako a Iehova ki ai mo e hao he moumouaga ha Ierusalema?​—Iako. 1:12.

12. Ko e heigoa e tau fifiliaga ne taute e Ramiro ne lagomatai a ia ke fiafia?

¹² Taha e matakainaga taane ne moua e fiafia he fekafekau ke he falu ko Ramiro. Pehē a ia: “Tupu mai au he magafaoa mativa ne nonofo he maaga he tau Mouga Andes. Ti ko e mogo ne foaki he taokete lahi haaku ke totogi e fakaakoaga haaku he univesitī, ko e matagahua lahi. Ka ko e papatiso laia au ko e taha he Tau Fakamoli a Iehova, ti moua foki e au e taha foakiaga​—kua uiina he paionia au ke fakamatala mo ia he taone tote. Ne fano au ke he matakavi ia, fakaako ke hifi ulu, ti hafagi e fale hifi ulu ke lagomatai aki ni au.” Tokologa e tagata he taone ia ne talia ke fakaako e Tohi Tapu. Fakamui, ko e fakapotopotoaga foou ne kamata ke he vagahau ni he motu. Ti fifili a Ramiro ke fakalataha ke he fakapotopotoaga ti kua fekafekau i ai ke hogofulu e tau. Pehē a ia nakai fai gahua foki ka foaki ki a ia e fiafia lahi ka ko e lagomatai he tau tagata ke fakaako e Tohi Tapu he vagahau ni ha lautolu.

13. Ko e ha ko e magaaho mitaki mogonei ma haau ke fekafekau ki a Iehova mo e loto katoa haau?

¹³ Fiafia he fekafekau ki a Iehova. (Totou Fakamatalaaga 12:1.) Ua logona hifo kua lata fakamua a koe ke moua e gahua mitaki to kamata ke paionia. Ko e magaaho mitaki lahi ke kamata fekafekau ki a Iehova mo e loto katoa haau ko e mogonei, ato fai matagahua fakamagafaoa a koe. Ha ha ia koe e malolō tino mo e fahia ke fakafelau mo e tau matagahua uka. Ko e heigoa haau ka manako ke taute ma Iehova? Liga ko e foliaga haau ke paionia, po ke liga manako a koe ke fakamatala ke he tau tagata ke he taha vagahau. Liga fakalahi e koe e mena ka taute he fakapotopotoaga ne fano ai a koe. Ha foliaga ni haau, kua lata ia koe ke gahua ke leveki aki a koe. Hūhū hifo: ‘Ko e heigoa e gahua ka fifili e au, ti lahi fēfē e fakamahani kua lata ke moua e au?’

FAKAAOGA E TAU MATAPATU FAKAAKOAGA TOHI TAPU KE TAUTE E TAU FIFILIAGA ILOILO

14. Ko e heigoa kua lata ia koe ke mataala ka kumi gahua?

¹⁴ Ko e tau matapatu fakaakoaga tolu he Tohi Tapu ne fakatutala ki ai a tautolu to takitaki a koe ka fifili ai e gahua ka latatonu mo koe. Liga iloa he tau tagata fakatonutonu he aoga po ke tau matakau fakatufono e tau gahua kua fai he matakavi haau po ke he matakavi ka amaamanaki a koe ke fekafekau i ai. Liga to lagomatai e tau tagata nei, ka e mataala. Ko e tau tagata ne nakai fakaalofa ki a Iehova ne liga lali ke fakaohooho e loto haau ke fiafia ke he lalolagi. (1 Ioa. 2:15-17) Ka onoono a koe ke he mena ne foaki he lalolagi, ua nimo na mukamuka e loto haau ke fakahehē a koe.​—Totou Tau Fakatai 14:15; Iere. 17:9.

15, 16. Ko hai ka foaki ki a koe e fakatonuaga iloilo hagaao ke he gahua tupe?

¹⁵ Ka iloa e koe e vahega gahua kua fakaatā atu ki a koe, kua lata a koe mo e fakatonuaga aoga. (Fakatai 1:5) Ko hai ka lagomatai a koe ke hakahaka e tau fifiliaga haau ma e tau gahua he fakaaoga e tau matapatu fakaakoaga Tohi Tapu? Fanogonogo ke he tau tagata ne fakaalofa ki a Iehova, fakaalofa ki a koe, mo e iloa mitaki a koe mo e tau tutūaga haau. To lagomatai e lautolu a koe ke onoono hifo fakamooli ke he mena kua maeke a koe ke taute mo e mena ne manako a koe ke taute. Liga ko e mena ne talahau e lautolu to lagomatai a koe ke liu manamanatu ke he tau foliaga haau. Ka fakaalofa e tau matua haau ki a Iehova, to eke a laua mo lagomatai lahi ki a koe. Ko e tau motua foki he fakapotopotoaga haau to foaki ki a koe e fakatonuaga mitaki. Hūhū ke he tau paionia mo e tau leveki faifano ke he kakano kua fifili a lautolu ke fekafekau mau ki a Iehova. Kamata fēfē a lautolu? Ko e heigoa e gahua ne taute e lautolu fakamua? Ko e heigoa e tau monuina ne moua e lautolu?​—Fakatai 15:22.

¹⁶ Ko lautolu kua iloa lahi mooli a koe ka foaki ki a koe e fakatonuaga iloilo. Ma e fakatai, ka e kua ka manako a koe ke oti tuai e aoga tokoluga ti kamata ke paionia ha kua nakai fia loto a koe ke fakamakamaka ke he tau gahua aoga? Ko e tagata ne fakaalofa ki a koe ka kitia maaliali e kakano ne manako a koe ke oti mo e aoga. Ti maeke a ia ke lagomatai a koe ke maama ko e fakamanavalahi ke he aoga ka lagomatai a koe ke fakaako ke nakai fakalolelole mafiti. Ko e mahani nei kua lata kaeke ke manako a koe ke fekafekau tukulagi ki a Iehova.​—Sala. 141:5; Fakatai 6:6-10.

17. Ko e vahega gahua fe kua lata ia koe ke kalo kehe?

¹⁷ Ko e tau tagata oti kua fekafekau ki a Iehova to fehagai mo e tau tuaga ka fakalolelole e tua haana mo e takitaki kehe a ia mai ia Iehova. (1 Kori. 15:33; Kolo. 2:8) Ha ha i ai falu gahua tupe ne liga hagahaga kelea lahi ke he tua haau. Liga mailoga e koe ha ha i ai falu ne galo e tua ha lautolu he mole e fifili e vahega gahua pauaki. (1 Timo. 1:19) Kua pulotu ke kalo kehe he ha vahega gahua ka moumou e fakafetuiaga haau mo Iehova.​—Fakatai 22:3.

FIAFIA HE EKE MO FUATA KERISIANO

18, 19. Ka nakaila manako a koe ke paionia, ko e heigoa haau ka taute?

¹⁸ Ka ha ha ia koe e manako mooli ke fekafekau ki a Iehova, fakaaoga e tau magaaho kua tuku atu ki a koe he fuata agaia a koe. Taute e vahega fifiliaga ka fakaatā a koe ke olioli e fekafekauaga ke he Atua he tau magaaho fiafia nei.​—Sala. 148:12, 13.

¹⁹ Ka e kua ka nakaila logona hifo e koe e manako ke fekafekau ki a Iehova? Ua mahala he lali ke atihake e tua malolō ki a Iehova. Fakamaama e Paulo e mena ne taute e ia ke moua e monuina ha Iehova. Pehē a ia: “Kaeke foki kua manamanatu kehe a mutolu ke he taha mena, to fakakite mai foki he Atua e mena ia kia mutolu. Ka ko e mena kua hoko ki ai a tautolu kia o leva fakalata ke he fakatufono ia, kia manamanatu ke he mena ia ni.” (Filipi 3:15, 16) Manatu kua ofania e Iehova a koe. Kua mitaki lahi mahaki e fakatonuaga haana. Kia fakaatā a ia ke lagomatai a koe ke taute e tau fifiliaga mitaki lahi mahaki mogonei he fuata agaia a koe.