Fonoaga he Fahimotu he “Tua ke he Kupu he Atua” he 1997
1 Ne fakamanatu he aposetolo ko Paulo ki a Timoteo “ko e tau Tohi Tapu oti kana mai he Agaga he Atua ia.” (2 Timo. 3:16) Ha kua mai he agaga e Kupu he Atua, kua fai kakano oti a tautolu ke fakagahuahua e tua ki ai. Ko e matapatu he fonoaga he fahimotu he tau nai ko e “Tua ke he Kupu he Atua.” To fakamalolo he fakaholoaga e tua ha tautolu ke he Tohi Tapu, he kua leva e iloa e tautolu e kupu moli po ke matutaki fou ke he fakatokatokaaga a Iehova. Kua lata oti ia tautolu ke fakatokatoka ke fakalataha ke he fakaholoaga katoa. Ko e ati hake fakamalolo ha ia kaeke ke auloa mai e tau tagata fou ne fiafia, mua atu ki a lautolu ne fakaako Tohi Tapu mo tautolu!
2 Fonoaga Aho Tolu: Ko e fakaholoaga he fonoaga fahimotu aho tolu he tau nei kua fakatokatoka ma e aoga lahi ha tautolu. Ne tohi he Watchtower ia Fepuari 15, 1997, ko e 8 e tau fonoaga ka fakahoko ke he matakavi he la Niu Silani. Hoko mai mogonei kua fita he tala atu ki a koe e fonoaga ne kua kotofa e fakapotopotoaga hau ki ai, mo e kua lata ia koe ke taute e tau fakatokaaga moli ke fina atu oti he tau aho tolu he fakaholoaga. Kua kitia nakai e koe e takitaki gahua hau ke moua e fakaataaga kua lata mai he gahua? Ka fai tama fano aoga a koe mo e hoko ai e fonoaga he magaaho aoga, kua fina atu nakai a koe mo e totonu ke he tau faiaoga ha lautolu ke nakai fakalataha atu e tau tama hau he Aho Faraile ha ko e vala aoga a nei ma e fakamahani fakalotu ha lautolu?—Teu. 31:12.
3 He lafi ke he faka-Peritania, to ha ha ai e fonoaga faka-Samoa. To ha ha ai foki e tau fakaholoaga ke he vagahau-matalima ke he tau fonoaga tolu.
4 To kamata e fakaholoaga he 9:30 a.m. he tau aho takitaha. To hafagi e tau gutuhala he 8:00 a.m. Ko lautolu ni ka fakaata ke huhu atu ato hoko e magaaho ia ko lautolu ne fai kotofaaga ke gahua, ka e nakai fakaata a lautolu ke toka e tau nofoa ato hafagi e fale ma e tau tagata oti.—Filipi 2:4.
5 Kia Mitaki he Manamanatu ki Ai: Ne fakamanatu he aposetolo ko Peteru e tau Kerisiano he senetenari fakamua to mitaki a lautolu he manamanatu ke he kupu fakaperofeta tuga ke he lamepa kua kikila ke he mena pouli. (2 Pete. 1:19) Kua pihia ni ki a tautolu. He nonofo he lalolagi tuai nei i lalo he takitakiaga a Satani kua tuga ke he matakavi pouli. Kua loto fakaaue a tautolu ke ui mai he pouli fakaagaga. (Kolo. 1:13; 1 Pete. 2:9; 1 Ioa. 5:19) Ke tumau e maama, kua lata ke fakatumau e malolo he tua ha tautolu he manamanatu ke he Kupu mai he agaga ha Iehova. Ko e fonoaga fahimotu ha tautolu he vaha mafana nei to fakamalolo a tautolu ke taute pihia.
6 Kua manako ke he laliaga ha tautolu kaeke ke fanogonogo fakamakai a tautolu ke he fakaholoaga, ka e to fakamonuina moli a tautolu he taute pihia. Kua lata ia tautolu he amaamanaki lahi ke o mai ke he matakavi he fonoaga mo e okioki mitaki ke maeke ia tautolu ke mataala he tau fakaholoaga. Kia fakaata fakalahi e magaaho ke o atu ke he matakavi he fonoaga he tau aho takitaha ke maeke ke nonofo ato kamata e fakaholoaga. Ti fakalataha ke he lologo hafagi mo e liogi ke he kamataaga he tau fakaholoaga he tau aho takitaha. Kua lata e tau tagata lalahi ke fakatoka e fakafifitakiaga, mo e kua lata e tau matua ke fakamahani e tau tama ha lautolu.—Efeso 6:4.
7 Kaeke ke onoono a tautolu ke he tau mataulu he tau lauga ato kamata e fakaholoaga he aho, to lali a tautolu ke fakatali e tau manatu ka liga talahau he fakaholoaga ia. To fakaholo ki mua he mena nei e fiafia ha tautolu ke he vala tala ka talahau. To fakamakutu a tautolu ke he tau manatu ka lagomatai a tautolu ke fakakite ke he falu ko e ha ne talitonu a tautolu ke he Atua mo e hana maveheaga moli ke palepale a lautolu kua kumi fakamoli ki a ia. (Hepe. 11:1, 6) Kua manako ke tohi hifo fakaku e tautolu e tau manatu ke lagomatai a tautolu ke manatu e tau matapatu uho he fakaholoaga. Ka loga lahi e tau manatu ha tautolu ne tohi hifo, to liga galo e tautolu e tau matapatu manatu aoga ha kua lahi e lavelave ha tautolu he tohitohi.
8 Tokologa he tau tagata lalahi mo e tau fuata mui he tau kua mole ne kua kitia agaia he nakai fai fakatauaga he o he tau avaloa, takalo fano i fafo, mo e ahi atu ke he falu ka e kua hoko e fakaholoaga, ka e nakai fanogonogo ke he tau mena ne foaki mai he “fekafekau fakamoli mo e loto matala” ma e ha tautolu a aoga. Kua mavehe a Iesu ke foaki mai e tau mena kai fakaagaga ki a tautolu ke he tau magaaho tonu. (Mata. 24:45-47) Ko e mena ia, kua lata ia tautolu ke fakalataha ki ai ke aoga mai he tau mena kai ia mo e nakai fakakite kua noa mo e loto fakaaue ki ai. (2 Kori. 6:1) Kua tuga foki ke kitia ko e falu fanau kua milo, mo e piu he fa ole ke o ke he fale tote. Ko e fakamahaniaga mitaki he kaina to nakai lata ai e o tumau ke he fale tote. He falu magaaho, ko e tau fuata motua kua nonofo mamao ai, tutala, fanafana, mo e feutaaki e tau tohi. Ko e fanau ikiiki ha tautolu, kua fehagai mo e tau pehiaaga loga he vaha nei, kua lata ke manamanatu fakahokulo ke he lauga kua taute, he nakai taute mena kehe he magaaho he fakaholoaga. Ko e tau manako fuata kua nakai tatai mo e tau matapatu fakaakoaga he Tohi Tapu kua lata ke kalo kehe mai ai. (Fakatatai 2 Timoteo 2:22.) Ko e fanogonogo fakamitaki ha tautolu oti, tau tagata lalahi mo e tau fuata, to fakaheke a Iehova mo e taute a ia ke olioli.
9 Kaeke kua lata he taha leveki ke fakatonu taha tagata ke he tau mena nei, kua lata ke talia ko e foakiaga fakaalofa mai ia Iehova. (Kala. 6:1) Kua lata ke manatu oti ko e kakano kua lali oti a tautolu ke o atu ke he fonoaga ke maeke ia tautolu ke ‘fanogonogo mo e ako.’ (Teu. 31:12) Kua “fanogonogo [foki] ai e tagata iloilo, ki a tolomaki atu hana iloilo.” (Fakatai 1:5) Ke he magaaho ne toe ato fina atu a koe ke he fonoaga, tutala mo e magafaoa he lata ke nonofo auloa, fakatumau ke nonofo he fakaholoaga katoa, mo e fanogonogo fakamitaki, ke maeke ke moua e aoga katoa he fakaholoaga.
10 Tauteuteaga kua Lilifu ki a Iehova: Kua fakatata tumau e tau tagata a Iehova ke he kitiaaga he tau tagata he lalolagi. (1 Kori. 4:9) Kua mailoga lahi a tautolu ke he tuaga mitaki mo e tau tapulu mo e tauteuteaga ha tautolu. He fakagahua e tau matapatu fakaakoaga faka-Tohiaga Tapu ne moua ia 1 Timoteo 2:9, 10 mo e 1 Peteru 3:3, 4 kua fua mai e tau hikihikiaga lalahi he tauteuteaga he tokologa, fakatatai mo e puhala tauteute ha lautolu he kamata ke fakalataha mo e fakapotopotoaga Kerisiano. Kua kehekehe lahi mahaki e mena nei ke he kelea lahi he tau tapulu mo e tauteuteaga kua kitia mau e tautolu ke he lalolagi. Kia mataala a tautolu ke nakai eke a tautolu ke tuga e lalolagi ke he puhala tauteute ha tautolu—tui e mena tui fakaliga kehe, fakatolomaki e tau puhala fakalalolagi ke he tau tauteaga ulu, po ke nakai lilifu e puhala tauteute. Ko e fakafifitakiaga he tau tapulu mo e tauteuteaga ha tautolu kua lata ke lagomatai a lautolu ne fou kua o mai ke he fonoaga ke kitia e puhala he tau Kerisiano kua lata ke tauteute e lautolu a lautolu.
11 He kitia ai ke he fua he tau fonoaga he tau kua mole kua lahi e mitaki, kua fakatumau agaia ni e tau tapulu mo e tauteuteaga he falu matakainaga tane mo e fifine ke eke mo mena vihi he tau magaaho ka oti e fonoaga. Ka taute e tau fakatokaaga ha tautolu ke o atu ke he fonoaga, kua lata ke manamanatu a tautolu ke he ha tautolu a tau mena tui mo e tauteuteaga. Tau matua, kia kikite fakapulotu e tau mena ka tui he tau fanau ikiiki mo e tau fuata mui. Kia manatu e tautolu kia nakai fakaata e tau puhala fakalalolagi ke fakakelea ai e tauteuteaga Kerisiano ha tautolu.
12 Tumau e Mahani Mitaki: Ko e mahani mitaki ko e fakamailoga he tau Kerisiano moli. (1 Pete. 2:12) Ko e tau mahani ha tautolu ke he mena fe ni ne ha ha ai a tautolu—ke he fonoaga, ke he tau fale kai, mo e he tau hotela, ti pihia foki ka o fenoga—kua lata ke foaki e fakamoliaga mitaki mo e lagomatai e falu ke kitia e mena kua taute he tua ke he Atua mo e hana Kupu ke he tau tagata. To liga omoi he mena nei e falu ke o mai ke iloa a Iehova. (Fakatatai 1 Peteru 3:1, 2.) Ha ia tautolu e kotofaaga ke fakamatalahi e Atua ke he mahani ha tautolu. Ko e kau leveki he taha hotela ne pehe ko e tau tagata ha tautolu “kua lahi e mitaki mo e ko e matakau mua atu e mahani mitaki ne leveki e lautolu.” Ne lafi e lautolu: “Kua fiafia lahi ke liliu mai a mutolu he vaha i mua.” Ne tohi he matakau leveki he fonoaga mo e tau tagata ahiahi: “Ko e tau tau oti, kua fakatali mo e fakamakai e maaga katoa ha mautolu ke he fonoaga he Sosaiete he Kolo Toko. Ko e tau tagata ha mutolu kua fiafia lahi ki ai; kua taute e lautolu e mahani mitaki mo e fakalilifu ne mua. Kua mailoga he tau pisinisi ha mautolu e mena nei mo e fiafia ke he liliu mai he tau ‘magafaoa’ ahiahi he tau tau takitaha.” Ko e tau hokotaki pehenei kua to lahi e mitaki ke totou, pihia nakai? Kua lata lahi ke tumau e mataala, ke maeke ia tautolu ke puipui e aga mitaki he tau tagata a Iehova.
13 Loga e tau fakamanatuaga kua foaki ke he levekiaga he tau fanau ha tautolu, nakai fakaata a lautolu ke tafepoi viko he tau motela mo e nakai fai levekiaga, ti fakalavelave e falu tagata i ai. He tau tau takitaha, kua moua he Sosaiete e tau hokotaki kua nakai fai levekiaga e falu fanau ha tautolu ke he pa kakau po ke kua kitia ai kua tafepoi ke he tau avaloa mo e tau matakavi api ai e tau tagata he tau motela. Laga ua e ala he taha leveki he mole e 11:00 p.m. ha kua tukituki he matakau he tau fanau ha tautolu e tau gutuhala he tau poko takitaha ke kumi falu he Tau Fakamoli. Pete ni kua foaki he tau fonoaga ki a tautolu e magaaho ke ahi mo e feoaki mo e tau matakainaga ha tautolu, kua lata agaia e tau matua ke manatu e kotofaaga ha lautolu ke leveki e tau tama ha lautolu ke he tau magaaho oti. Ko e matagahua nei kua tuku ai e Iehova ke he tau matua oti. (Fakatai 1:8; Efeso 6:4) Ko e tau gahua he nakai leveki e tau fanau kua maeke ke fakalolelole e aga mitaki ne lali fakalahi falu he Tau Fakamoli a Iehova ke taute.—Fakatai 29:15.
14 Manatu, kia nakai tunu kai he tau poko hotela/motela ato fai peito i ai. Ka ta mai e puha tuku kai hau ke he poko hau, fakamolemole kia mailoga kua nakai pu po ke tataka ai ke moumou e kapete, tau koloa, po ke tau kaupa he poko.
15 Totogi e Tau Fakamoleaga he Fonoaga: Igatia a tautolu mo e fai mena totogi ke lata mo e o atu ke he tau fonoaga. Ha ha i ai foki e taha fakamoleaga kua lata ke manamanatu a tautolu ki ai. Ko e tau mena ne fakaaoga ma e tau fonoaga kua tau uka. Ha ha i ai foki e tau fakamoleaga kua lata ke ono ki ai. Ko e foaki noa fakamokoi he tau mena fakaalofa ha tautolu he tau fonoaga kua lahi e fakaaue.—Gahua 20:35; 2 Kori. 9:7, 11, 13.
16 Tau Nofoa: Ko e tau hatakiaga kua foaki ke he tau tau loga to fakatumau ni ke fakagahua, TOKA NI E TAU NOFOA KE LATA MO E MAGAFAOA TATA HAU MO LAUTOLU NE LIGA FENOGA AULOA MO KOE HE MOTOKA HAU. Kua mitaki ai ke kitia kua tokologa kua muitua ke he tau hatakiaga nei ke he tau tau kua mole, mo e kua fakalahi he mena nei e aga fakaalofa ne fakatata he tau fonoaga. Ke he laulahi he tau fahi kua mukamuka lahi ke moua falu nofoa. Fakamolemole fakakite e fakaalofa, mo e toka e tau nofoa kua mukamuka ma lautolu ne ha ha ai e tau tutuaga kua lata ma e tau nofoa ia.
17 Tau Pokiata, Tau Pokiata Vitio, mo e Tau Tapaki Autiokasete: Ko e tau pokiata mo e tau mena tapaki kua maeke ke fakaaoga he tau fonoaga. Pete ia, ko e fakaaogaaga ha tautolu ke he tau mena ia kua nakai lata ke fakatauhele e falu. Kua nakai lata ke o fano a tautolu he tau fakaholoaga ke poki ata, ha kua fakatauhele he mena ia e falu kua lali ke fanogonogo ke he fakaholoaga. Nakai fai mena talaga tapaki ke matutaki ke he fakatokaaga hila po ke tau leo, ti ua fakalavelave he tau mena nei e hala, tau hala o hui, po ke kitiaaga he falu.
18 Lagomatai Matematekelea: Ko e Fahi Lagomatai Matematekelea kua lata ni mo e tau mena fakaofo. Nakai maeke ke leveki ma e ha tatalu fa mahani. Ko e mena haia kua lata ke manamanatu tuai a koe ke he tau mena fakamalolo tino hau mo e magafaoa hau. Fakamolemole ta mai ni e koe e hau a tegavai, tau lagomatai manava, tau ufiufi matamotu, tau pine fakamau, mo e tau mena pihia, ha ko e mena nakai fai mena pihia he fonoaga. Ko e ha tagata ke matematekelea lahi he tau gagao fakalutukia, mate fua, kelea e ate, mo e falu foki, kua lata ke manamanatu tuai ke he tau manako kua lata. Kua lata ke ha ha ia lautolu e tau vai fakaekekafo kua lata, mo e kua lata ke ha ha ai tumau e tagata he magafaoa po ke fakapotopotoaga mo lautolu ne iloa e gagao ha lautolu ke he tau magaaho oti ke foaki e lagomataiaga kua lata. Kua tupu ai e tau mena vihi he tau fonoaga ha kua toka tokotaha a lautolu ne tatalu ti tupu e gagao. Ti matutaki atu e kau leveki he fonoaga ke he tau matakau fakaekekafo ke uta a lautolu ke he fale gagao. Ka ha ha ai e falu mo e tau manako fakamalolo tino pauaki ne nakai fai magafaoa ke lagomatai a lautolu, kua lata ke fakailoa ke he tau motua he fakapotopotoaga e tuaga mo e taute e tau fakatokaaga kua lata ke lagomatai. Nakai fai foakiaga kua taute he tau fonoaga ma e tau poko pauaki ke leveki ai a lautolu ne ha ha ai e tau allergy.
19 Tau Mena Kai he Fonoaga: He nakai fai gahua taute kai ai he tau fonoaga ti kua ataina ke fanogonogo e tokologa ke he tau fakaholoaga oti he tau mena kai fakaagaga. Loga e tau talahauaga fakaaue ma e fakamukamukaaga nei ne kua moua tali he fakatu e fakatokatokaaga nei. Kua lata oti ke fakatoka ke ta mai ha lautolu ni a tau kai lolo mukamuka ma e okioki mogo la, tuga kua fakakite mai he uho he Our Kingdom Ministry ia Sepetema 1995, paratafa 24. Nakai fai lupo hio po ke tau kava ka ta mai ke he mena ne fono ai. Ko e tau puha tuku kai kua lata ke ikiiki ke hao ni i lalo he nofoa hau. Kua kitia ai e falu he toloaga kua kai mo e inu he fakaholoaga. Kua nakai fakalilifu he taute e mena nei. Kua ha ha ai e tau matakavi ke kai ai he mena ne fono ai po ke matakavi sela kai i tua, kua kitia ai e falu matakainaga ne fa e fakatau i ai he tau fakaholoaga. Ko e tauteaga ia kua nakai tonu.
20 Kua fakaaue moli a tautolu ke he galue fakaagaga mo e takatakaiaga okioki, mafola he feoakiaga he tau okioki mogo la fakaku ha tautolu. He o tatai ai ke he kakano he fakatokaaga nei, he nakai toka e fonoaga he okioki mogo la ke fakatau e tau mena kai, kia fakamolemole ta mai e kai mo koe. Ti, ha ia koe lahi e magaaho ke olioli e feoakiaga he tau matakainaga hau.
21 Ko e fiafia ha ia ha tautolu ko e teitei kamata fai e Fonoaga he Fahimotu he “Tua ke he Kupu he Atua”! Kua manako oti a tautolu ke iloa moli ko e tau tauteuteaga ha tautolu kua fita he taute ke o atu ke he fakaholoaga katoa, ke maeke ia tautolu ke olioli katoatoa e galue fakaagaga mitaki ne taute e Iehova ma tautolu he puhala he fakatokatokaaga hana. He puhala ia to maeke a tautolu ke ‘taute ke he tau gahua mitaki oti kana.’—2 Timo. 3:17.
[Puha he lau 6]
Tau Fakamanatu he Fonoaga he Fahimotu
Papatisoaga: Kua lata e tau tagata ka papatiso ke nonofo ke he matakavi kua toka pauaki ato kamata e fakaholoaga he pogipogi Faiumu. Ko e taute koukou kua gali mo e tauela kua lata ke igatia ta mai e lautolu kua amanaki ke papatiso. Kua mole ne tui he falu e tau mena nakai lata mo e futia kehe mai he fakaholoaga ia. Ko e tau motua ne totou e tau huhu mo e tau tagata ka papatiso e tohi Our Ministry kua lata ke iloa tonu kua maama oti e lautolu e tau manatu nei. Ka mole e lauga papatiso mo e liogi he tagata lauga, to talahau he takitaki fono e lologo. Ke he laini fakahiku, to fakakite he tau leveki e tau tagata papatiso ke he mena ne toka ai e fakaukuaga. Ko e papatisoaga ne fakamailoga e tukuleleaga he tagata ko e fakafetuiaga mo e mena fakatagata hana a ia mo Iehova. Ti, nakai lata ke fepekaaki po ke tui lima e tau tagata ka papatiso.
Tau Lau Pepa Tui Fakakite: Fakamolemole ti tui e lau pepa fakakite he tau magaaho oti he taone he fonoaga mo e ka fenoga ai ki ai. Fa mahani e mena nei ke fakakite e puhala ha tautolu mo e foaki e fakamoliaga mitaki. Ko e tau lau pepa fakakite mo e mena ke tuku aki, kua moua ke he fakapotopotoaga hau, ha kua nakai fai ai he fonoaga. Ua nofo ke teitei e fonoaga to huhu ma e tau lau pepa ma hau mo e magafaoa hau. Manatu ke uta e lau pepa Advance Medical Directive/Release fou hau.
Tau Poko: Ko e tau tohikupu he fakapotopotoaga kua lata ke iloa moli kua ta atu fakamafiti tuai e tau lau tohi Special Needs Room Request ke he kavi ka hoko e fonoaga. Ka nakai uta e koe e poko ne taute ke he fakatokaaga he tau manako pauaki, kua lata ia koe ke fakailoa fakamafiti ke he tagata hana fale po ke hotela mo e Fahi Gahua Poko he fonoaga ke maeke e poko ke liu fakaata.
Tau Peleo Tama mo e Tau Nofoa Nofo Fafo: Ke he tau matakavi loga, kia nakai fakaaoga e tau peleo tama ke he tau toloaga tagata. Kua nakai fakaata he matafakatufono afi ke toka ai ke he tau avaloa mo e tau hala po ke vahaloto he tau atu nofoa. Ha kua fa tupu e tau tuaga mapita he tau toloaga lalahi, kua fa mukamuka ke hagahagakelea e tau peleo ma e tama mukemuke mo e ha tagata ka veli hifo ki luga ia lautolu. Ti fakamolemole kia nakai ta mai e tau peleo toho ke he mena ne fono ai. Kua fakaata ai e tau nofoa motoka tama, ha kua pipi fakatata ai ke he tapa he tau matua. Fakamolemole kia nakai ta mai e tau nofoa nofo fafo. Kua hagahaga kelea mo e nakai fakaata ke he tau matakavi he toloaga. Ko e kau auloa hau kua aoga mo e fakaaue.
Gahua Foaki Noa: Fakatoka kehe nakai e koe taha magaaho he fonoaga ke lagomatai e taha he tau fahi gahua? Ko e gahua ma e tau matakainaga ha tautolu, ke tau tula gahoa, ka lahi e lagomatai mo e to ta mai ai lahi e makona fakatagata. Kaeke ke lagomatai mai a koe, fakamolemole hokotia atu ke he Volunteer Service Department he fonoaga. Ko e tau fanau 16 tau ki lalo kua maeke foki ke lagomatai he gahua ki lalo hifo he matua po ke tagata lahi lotomatala.
Tau Kupu Hataki: Kia mataala ke he tau mena ke tupu mai e tau mena vihi ti maeke ke ataina mai he tau mena uka. Fa mahani ma e tau tagata kaiha mo e falu he tau tagata kunuene ke faiola ke he tau tagata kua o mai he falu matakavi. Manatu ke loka e peleoafi hau he tau magaaho oti, mo e nakai fakatafola ha mena ke kitia he tagata ke maeke ke kaiha. Ko e tau tagata kaiha mo e mulefu kua mataala ke he tau toloaga lalahi. Kua nakai pulotu ke toka ha mena uho he nofoa hau. Kua nakai iloa e koe ko e Kerisiano nakai ne agaagai ia koe. Ko e foaki he ha e kamatamataaga? Kua moua e tau hokotakiaga he taute he falu tagata i tua ke fakataki e tau fanau ikiiki ke he mafoa. KIA LEVEKI TUMAU E FANAU HAU HE TAU MAGAAHO OTI.
Ko e televisoni mo e tau vitio he poko kua fakaata ke he tau motela loga kua fa fakakite e tau fakaholoaga kiva kua kelea. Kia mataala ke he matahele nei, ti nakai fakaata e tau tama ke kitekite fakahanoa e televisoni he poko.
Kia nakai hea telefoni po ke tohi ke he kau leveki he fale fono, ke kumi vala tala hagaao ke he tau mena he fonoaga. Ka nakai moua mai e vala tala he tau motua, kia tohi atu a koe ke he kaina he fonoaga pauaki, ne moua i tua he lau tohi Special Needs Room Request, ne ha ha he tohikupu.