Fanau—Ko Mutolu ko e ha Mautolu a Olioli!
1 Tau fanau tane mo e fifine, kua mahani nakai a koe mo e tau poakiaga a Iehova ke fakalataha ai a koe he tau gahua he fakapotopotoaga? (Teu. 31:12; Sala. 127:3) Ko e olioli ha a ia ke tapuaki auloa mo koe ki a Iehova! Kua mafanatia ha mautolu tau loto he nofo fakaeneene a koe he tau feleveiaaga mo e fanogonogo. Mua atu e fiafia ha mautolu he magaaho ne lalilali a koe ke tali ke he hau ni a tau kupu. Kua fiafia e fakapotopotoaga he magaaho ne taute e koe e taha vala ne kotofa he Aoga Fekafekau Fakateokarasi, magaaho ne hau fiafia a koe mo mautolu ke he fekau he fonua, mo e magaaho ne logona e mautolu a koe ne fakamatala ke he hau tau kapitiga aoga mo e tau faiaoga.—Sala. 148:12, 13.
2 Loto a mautolu ke iloa e koe nukua fiafia lahi a mautolu ki a koe he magaaho ne kitia e mautolu e tau mahani mitaki hau, hau a tauteuteaga maopoopo, hau a mahani mea, mo e fakalilifu hau ke he tau tagata lalahi. Kua mua atu e olioli ha mautolu he magaaho ne fakakite e koe kua ‘manatu e koe a ia ne eke a koe’ he fakatoka e tau foliaga fakateokarasi ma mutolu ni.—Fakama. 12:1; Sala. 110:3.
3 Kia Tala Mai ki a Mautolu Hau Tau Foliaga: Taha e tama tane valu tau ne tala age ke he leveki maaga motu: ‘Fakamua manako au ke papatiso, ti manako au ke lagomatai ke he fakapotopotoaga he gahua he sound system mo e uta e tau microphone, ke taute fekau, lagomatai ke he tau tohi, totou he tau fakaakoaga tohi mo e tau Fakaakoaga Kolo Toko. Ti manako au ke eke mo fekafekau lagomatai, ti eke mo taha he tau motua. Manako foki au ke paionia mo e fano ke he aoga paionia. Ti manako au ke fano ke he Peteli, ke eke mo leveki he takaiaga po ke leveki maaga motu.’ Ko e loto fakaaue mitaki ha a ia ne fakakite e ia ke he kotofaaga he fekafekau ke he Atua!
4 He tupu tolomaki a koe ke he fahi tino mo e fakaagaga, ne fiafia a mautolu ke kitia a koe he hokotia atu ke he tau foliaga hau. (Fakatatai Luka 2:52.) He tau tau takitaha, kua tokoafe ia mutolu ne eke mo tau tagata fakailoa nakala papatiso ti papatiso ai mo tau fekafekau tukulele ha Iehova. Kua tupu ki mua ha mautolu a olioli he liu kitia e mautolu a koe ne fakaholo atu ke paionia fakaku mo e matutaki atu foki ke he fekafekauaga mau. Molioli, ma fanau, ko mutolu ko e ha mautolu a olioliaga mo e punaaga homo ue atu he fakahekeaga ke he ha tautolu a Matua he lagi. Kia mahaki e fakamonuina e Iehova a koe!—Fakatai 23:24, 25.