“Tapulu ke he Tagata Fou”
1 Loto fakaaue e tau Kerisiano he iloa e kupu moli! Kua ako e tautolu e puhala ke momoui ke maeke ke fehola kehe mai he puhala ha lautolu he lalolagi. Ha “kua mafoki kehe . . . mai he moui ha he Atua,” “kua pouligia ha lautolu a tau loto.” (Efeso 4:18) Ne fakaako a tautolu ke mauokafua e tau manamanatuaga mai he tau manatu fakalalolagi he tuku kehe e tagata tuai ka e tapulu ke he tagata fou.—Efeso 4:22-24.
2 Kua takitaki tumau e tagata tuai ke he puhala fakahanoa he mahani fakalialia, ti fua mai e holifono mo e mate. Ko e mena ia kua tala age a tautolu ki a lautolu ka fanogonogo ke he fekau he Kautu ke tuku kehe e taui, ita lahi, kelea, vagahau ekefakakelea, mo e tutala fakavihia. Ko lautolu kua manako ke he taliaaga he Atua kua lata ke mauokafua mo e katoatoa—ke tuku kehe e tapulu tuai, he puhala ke aaki kehe e tapulu kiva.—Kolo. 3:8, 9.
3 Fakafou ke he Manako he Manamanatuaga: Ko e tapulu ke he tagata fou kua putoia ai e fakafou e manako he tau manamanatuaga ha tautolu. (Efeso 4:23) Maeke fefe ia taha ke taute e manako ia, po ke tuaga he manamanatuaga, ke fou ke maeke ke hagahaga atu ke he puhala hako? Kua taute e mena nei he fakaako fakamakai mo e fakatumau ke he Kupu he Atua mo e manamanatu fakahokulo ke he kakano i ai. Ti, tupu mogoia e puhala fou he manamanatuaga, mo e kitia ai he tagata e tau mena mai he kitiaaga he Atua mo Keriso. Kua fakafaliu e moui he taha he fakatapulu e ia a ia aki e tau fua tuga ha Keriso, putoia e fakaalofa hohofi, totonu, fakatokolalo, mahani molu, fakauka, mo e fakaalofa.—Kolo. 3:10, 12-14.
4 He tapulu ke he tagata fou, kua fakatoka kehe mai e tautolu a tautolu he lalolagi. Ko e puhala he moui ha tautolu kua taute a tautolu ke kehe. Kua vagahau e tautolu e mena moli mo e fakaaoga e vagahau ati hake ke fakamalolo aki e falu. Kua tautaofi e tautolu e ita, kona, taufeauhi, vagahau kelea, mo e tau mena kelea oti ha tautolu mo e hukui aki e tau fua tututonu mahani Atua. Kua mahomo atu ki mua e tauteaga ha tautolu mai he fakamagalo noa. Ko e tau mena oti nei kua taute ai fakamakai mai he loto.—Efeso 4:25-32.
5 Kia nakai aaki kehe e tagata fou. Nakai maeke ia tautolu ke fekafekau ki a Iehova mo e nakai tapulu ai. Fakaata ai ke lagomatai ke futiaki mai e tau tagata ke he kupu moli, ti fakaata foki ke fakatokoluga a Iehova, ko e Tufuga he ha tautolu a tagata fou homo ue atu.—Efeso 4:24.