Lata mo e Lagomatai Hau
1 “Fakaaue ke he tau mena oti ne taute e koe ke lata mo mautolu oti. Kua aoga lahi moli.” Ko e talahauaga ia ne fakakite e loto fakaaue kua logona e tautolu ma e tau motua mo e tau fekafekaua lagomatai. He tupu fakahaga e fakatokatokaaga he Atua, ha ha i ai e manako lahi ma e tau tagata tane motua ke fekafekau ke he teitei 100,000 e fakapotopotoaga he lalolagi katoa. Kaeke ko koe e matakainaga tane papatiso, kua lata mo e lagomatai hau.
2 “Foli Atu”: Maeke fefe ia koe ke foli atu ke he falu matagahua? (1 Timo. 3:1, NW) Mua atu ai, he fakatoka e fakafifitakiaga mitaki ke he tau fahi oti he moui hau. (1 Timo. 4:12; Tito 2:6-8; 1 Pete. 5:3) Fakalataha katoatoa ke he gahua fakamatala, mo e lagomatai e falu ke taute pihia. (2 Timo. 4:5) Fiafia moli ke he tau mena he tau matakainaga talitonu. (Roma 12:13) Kia eke mo tagata fakaako mitaki he Kupu he Atua, ti feaki e ‘puhala fakaako.’ (Tito 1:9; 1 Timo. 4:13) Leveki fakamakutu e tau matagahua ne tuku atu he tau motua ki a koe. (1 Timo. 3:10) Kaeke ko koe e ulu he magafaoa, ‘pule fakamitaki ke he hau ni a magafaoa.’—1 Timo. 3:4, 5, 12.
3 He fekafekau ke he tuaga kotofa kua putoia e gahua malolo mo e kua lata e agaga he foaki noa. (1 Timo. 5:17) Ko e mena ia, he foli atu, hagaaki ke fekafekau fakatokolalo ke he falu. (Mata. 20:25-28; Ioane 13:3-5, 12-17) Manamanatu ke he aga ha Timoteo, ti tutuli ke fifitaki ki ai. (Filipi 2:20-22) Tuga a ia, kia fakamalolo he mahani mitaki hau a koe. (Gahua 16:1, 2) He feaki e koe e tau mahani fakaagaga ne lata ke taute aki e tau matagahua mo e fakaaoga ha hatakiaga ma e tolomaki ki mua kua moua e koe, “[to] kitia ai he tau tagata oti hāu a mafiti.”—1 Timo. 4:15.
4 Tau Mamatua, Fakamahani a Lautolu ne Ikiiki ke Lagomatai: Kamata e tau tama ke fakaako ke lagomatai mai he tau vaha ikiiki. Fakamahani a lautolu ke fanogonogo he tau feleveiaaga, ke fakamatala, mo e mahani mitaki he Fale he Kautu mo e he aoga. Fakaako a lautolu ke taute mena ma e falu, tuga e lagomatai ke he fakameaaga he Fale he Kautu, lagomatai a lautolu ne momotua, mo e falu mena. Fakaata a lautolu ke moua e fiafia lahi he foaki atu. (Gahua 20:35) Ko e fakamahani pihia kua lagomatai a lautolu ke eke mo tau paionia, ko e tau fekafekau lagomatai, mo e tau motua anoiha.