Taute e Mitaki ti Foaki ma e Falu
1 “Kua loga [e] tau gahua mitaki mo e tau mena fakaalofa” ha Toreta. (Gahua 9:36, 39) Ko e aga fakamokoi hana ne uho lahi ke he tau tagata ne iloa a ia mo Iehova ko e Atua. Pehe e Heperu 13:16: “Aua neke nimo ia mutolu ke mahani mitaki atu mo e fakaalofa atu; ha ko e tau poa pihia kua fiafia ai e Atua.” Maeke fefe ia tautolu ke taute e mitaki ti foaki ma e falu he vaha nei?
2 Taha e puhala ke lagomatai e tautolu e falu he foaki e ‘tau koloa uho’ ha tautolu. (Fakatai 3:9) Ko e tau foakiaga fakatupe ha tautolu ke he gahua he lalolagi katoa kua maeke ke talaga e tau Fale he Kautu, tau Fale he Takaiaga, mo e tau fale he la he lalolagi. Ko e fakamokoi ha tautolu kua maeke he tau miliona ke aoga mai he tau fakaakoaga fakateokarasi mo e feoakiaga fakaagaga atihake.
3 Foaki e Fakamafanaaga: Ka tupu e matematekelea, kua mautali e tau tagata a Iehova ke ‘taute e mitaki’ ke he tau matakainaga talitonu ti pihia ki a lautolu kua nakai fakalataha ke he tua ha tautolu. (Kala. 6:10) He mole e pa hake e fale kemikolo i Falani, taha e hoa mau ne nonofo he tapa he fale ia ne pehe: “Ne o mai mafiti e tau matakainaga Kerisiano ha maua ke lagomatai ke fakamea e fale ha maua ti pihia mo e tau poko he falu. Ne ofo lahi e tau katofia kaina ha maua ke kitia kua tokologa e tagata ne o mai ke lagomatai.” Ne lafi he taha matakainaga fifine: “Ne lagomatai he tau motua a mautolu. Ne o mai a lautolu ke fakamafana a mautolu. Moli ai, ko e mena kua lata anei ma mautolu, mahomo atu mai he lagomatai fakatino.”
4 Ha kua loga e tau puhala kua maeke ia tautolu ke taute e mitaki ke he tau katofia ha tautolu, ko e puhala mua atu e aoga ha tautolu ke lagomatai a lautolu ko e foaki e iloilo uho he kupu moli, ne putoia e “amaamanaki he moui tukulagi” ne mavehe mai e Iehova. (Tito 1:1, 2) Kua tamai he fekau he Tohi Tapu e fakamafanaaga moli ki a lautolu kua maanu ke he tau tuaga he lalolagi mo e tuaga agahala ha lautolu. (Mata. 5:4) Kia taute e tautolu e mitaki mo e foaki ke he falu ka maeke ia tautolu ke taute.—Fakatai 3:27.