Ko e Tohi Mai he Kau Fakatufono
HE TUTU a tautolu he tapitapi he fakatokaaga fou hane hau, kua uho lahi ke tumau a tautolu ke fakatalitali ki a Iehova. (Sefa. 3:8) Ne talahau he perofeta ko Tanielu ko e ‘Atua ko e Fakakite he tau mena galo, mo e fakailoa mai e tau mena ke hohoko ke he tau aho a mui.’ (Tani. 2:28) Ko e monuina ha ia ke moui he fakahikuaga he vaha ia ne talahau tuai mo e ke maama e tau mena galo kua fakailoa mai e Iehova mogonei!
Puhala he “fekafekau fakamoli mo e loto matala,” kua fakakite fakahaga mai e Iehova e finagalo hana ke fakapotopoto mai he lalolagi katoa e “moto tagata tokologa” ko e tau tagata tapuaki he magahala he “tau aho fakamui” nei ne puke he tau lekua. (Mata. 24:45; Fakakite. 7:9; 2 Timo. 3:1) Ne talahau he Isaia 2:2, 3 e fakaholoaga nei he lalolagi katoa ke tupu he “tau aho a mui.” He tau tau takitaha, kua fakatumau e fakapotopoto nei pete he fetokoaki mo e vale ne tupufetui he lalolagi nei.
He kalena he tau he 2004, kua hataki fakalahi mai e latatonu ke omaoma e tau kupu ha Iesu: ‘Kia mataala. Kia nonofo tauteute ai a mutolu.’ (Mata. 24:42, 44) Moli ni, ko e tau mena tutupu he lalolagi kua kakano lahi ke he tau Kerisiano, ne fioia e “tau fakamailoga he tau vaha” mo e moui hagaao ki ai. (Mata. 16:1-3) Ke he fakamoliaga he Kupu hana, to fakatumau a Iehova ke fakalataha mo e tau tagata fakatokatoka fakateokarasi hana pete ne tau totokoaga ka fehagai mo lautolu.
Pete he lali falu ke fakalavelave po ke taofi e fakapuloaaga he Kautu, ne fakatumau e tau matakainaga ha tautolu ke vagahau e kupu moli mo e ke fakapotopoto auloa. (Gahua 5:19, 20; Hepe. 10:24, 25) I Rusia ia Iuni 2004, ne lalago he tau hopoaga i Moscow e fifiliaga he hopoaga tote ke pa e tau gahua he Tau Fakamoli a Iehova mo e ke motuhia ha lautolu a tuaga matafakatufono he taone ia. Pete he pihia, ne nakai matakutaku e tau matakainaga; ne iloa e lautolu e mena ne manako e Atua ki a lautolu, mo e omaoma a lautolu ki a ia ko e Pule nakai ko e tau tagata. (Gahua 5:29) Kua mauokafua a tautolu to takitaki e Iehova e tau fekafekau hana pete ko e tau matagahua matafakatufono favale.
He Repapiliki i Georgia he tau tau gahoa kua mole, ne fakafita e tau matakainaga ke he galo he tau koloa ha lautolu, matematekelea ke he vale he tau tagata, mo e kitia mata e tau tohi ha lautolu ne tugi. Ka kua nakai kautu ha kanavaakau ne fakaaoga ke totoko ki a lautolu. (Isaia 54:17) He magahala he tau he fekafekauaga he 2004, ne liu fakaata matafakatufono e Tau Fakamoli a Iehova i Georgia. Ne fakahoko e tau fonoaga mo e nakai fai fakalavelave, ti fakaata e tau tohi ke tamai ke he motu. Kua hokotaki ai e tau tapunu fou he tau tagata fakailoa mo e tau tagata ne o ke he Fakamanatuaga.
I Amenia, Eriterea, Repapiliki ha Korea, Ruanata mo Tuakemenisitani, ne tuku he fale pouli e tau matakainaga ha ko e tua ha lautolu. Pete kua ekefakakelea a lautolu, kua iloa e lautolu e kakano faka-Tohiaga Tapu ne kamatamata a lautolu, ne lagomatai a lautolu ke fakamoli tumau he onoono atu ki a Iehova ma e fakamouiaga.—1 Pete. 1:6; 2 Pete. 2:9.
He kumikumi a koe ke he Hokotaki he Tau he Fekafekauaga he 2004 he Watchtower ia Fepuari 1, 2005, to fiafia a koe ke he mitaki ha Iehova. (Sala. 31:19; 65:11) Kua amanaki a mautolu to fakamalolo he hokotaki nei a koe ke fano tumau he puhala ne fakafiafia e Atua.—1 Tesa. 4:1.
Kua lahi e gahua ke taute ke hokotia ke he tau tagata oti kana mo e kupu moli. Ke fakatai, ko e tau vitio, tau DVD, mo e falu puhala ma e vagahau matalima mo e tau tohi faka-Paraile ne kua tauteute ke lagomatai e tau tagata teliga tuli mo e matapouli fakaagaga. Tokologa e tau tagata fakailoa he Kautu ne kua ako e tau vagahau he tau tagata motu kehe ne nonofo he fonua he fakapotopotoaga ha lautolu.
Ke lafi, kua totou teau e matakau tu mamao ne kua fakatu he tau fonua ne uka ke o ki ai. Taha e la ne molea e 300 he matakau tu mamao ne ha ha i ai molea e 7,000 he tau tagata fakailoa. Kua fakakite moli he mena nei e lata ma e tau fakapotopotoaga fou! Mua atu, mai he 16,760,607 ne o atu ke he Fakamanatuaga he tau he fekafekauaga nei, kua molea e 10 miliona ne nakai ko e Tau Fakamoli. Ko e fakakiteaga lahi anei kua momoho e fonua ke helehele.
Kua fakaaue a tautolu ki a Iehova ma e monuina lahi mo e puhala fakaalofa hana ne leveki e ia a tautolu he tau aho takitaha. (Fakatai 10:22; Mala. 3:10; 1 Pete. 5:7) He o ki mua fakalataha a tautolu he magahala he “tau aho a mui,” kua tuku e tautolu e mauokafua mo e falanaki ha tautolu ia Iehova. Ti ko e heigoa ni e tau lekua ka fehagai mo tautolu, kia tokaloto e tautolu e kupu he tau ma e 2005: “Ko e haku lagomatai, mai ia Iehova ia.” (Sala. 121:2) Fakamolemole kia mauokafua ke he fakaalofa mo e tau liogi ha mautolu ma mutolu.
Ha mutolu a tau matakainaga,
Kau Fakatufono he Tau Fakamoli a Iehov