Magahala Fakamanatuaga—Ko e Magaaho ke Fakamalikiti e Gahua
1. Fefe e lauiaaga he “tau galue” ke he tau Isaraela matakutaku Atua?
1 He magaaho pauaki he tau, ne fakamanatu he tau Isaraela i tuai e ‘tau galue a Iehova.’ (Levi. 23:2) He toka taha magaaho ke manamanatu ke he mitaki he Atua ha lautolu, ne fua mai e fiafia lahi mo e omoi a lautolu ke fakamakutu ke he tapuakiaga mea.—2 Nofo. 30:21–31:2.
2, 3. Ko e ha kua lata ai ke fakamalikiti e gahua fakaagaga ha tautolu he magahala Fakamanatuaga, mo e a fe ka taute e tautolu e Fakamanatuaga?
2 He vaha fou nei, ko e gahua fakateokarasi fiafia ha tautolu kua malagaki hake he tau tau takitaha he magahala Fakamanatuaga. Ko e magaaho a ia ka manamanatu fakahokulo a tautolu ke he mena fakaalofa mua ue atu ne foaki e Iehova ma tautolu—ko e Tama fuataha hana. (Ioane 3:16; 1 Pete. 1:18, 19) He manamanatu a tautolu ke he fakaalofa ne fakakite he Atua mo e Tama hana, kua omoi a tautolu ke fakaheke a Iehova mo e ke fakamakamaka ke taute e finagalo Hana.—2 Kori. 5:14, 15.
3 To taute e Kaiaga Afiafi he Iki he Aho Tuloto, Mati 24, ka mole e toaga la. Puhala fe ka fakamalikiti e fakalataha ha tautolu ke he fekafekauaga he mahina a Mati, Aperila, mo Me?
4, 5. (a) Ko e heigoa ne lagomatai falu ke hokotia ke he tau tagata tokologa e tala mitaki? (e) Ko e heigoa ne moua e koe ke lauia mitaki he matakavi hau?
4 Hokotia ke he Tau Tagata Tokologa: Kumi e tau puhala ke moua e tau tagata tokologa he magaaho ka fakalataha a koe ke he gahua he fonua. Maeke nakai a koe ke fakalataha ke he gahua fakamatala he magaaho ka tokologa ai e tagata i kaina, tuga he pale la po ke afiafi? Ka fai tagata he matakau fakaako tohi hau ne manako ke fakalataha ke he fekafekauaga ato hoko e fakaakoaga tohi, liga to taute he leveki he fakaakoaga tohi e fakaholoaga ke feleveia fakaku ma e fekafekauaga ke maeke ke gahua he fonua ne tata.
5 Taha puhala ke hokotia ke he tau tagata tokologa he fakamatala ke he tau mena ne tolo ai e tau tagata. Ne manako e matakainaga fifine i Sapani ke paionia fakaku pete kua gahua tumau a ia. Ne tala age e motua ki a ia ato fano ke gahua he tau aho takitaha, liga lata ia ia ke fakamatala he puhala tu ne tata ke he tuaga tuleni. He kautu mai he hana fakauaua mo e tau fakafiufiu he falu tagata o tuleni, ne fakatu e ia e fakatokaaga mekasini mo e kavi ke 40 e tagata, putoia ai e tau tagata o tuleni, tau tagata gahua he tuaga tuleni, mo e tau tagata ne fai fale koloa ne tata mai. Ne foaki e ia avelesi ke 235 e mekasini he mahina. Ti he fakatutala fakaku e tau manatu faka-Tohiaga Tapu mo e tau tagata he tau aho takitaha, ne kamata e ia ono e fakaako Tohi Tapu.
6. Maeke fefe e tau fuata ke fakamalikiti e gahua fakaagaga ha lautolu?
6 Tau Magaaho ke Fakamatala: Tokologa e tagata fakailoa o aoga ne fai magahala okioki he tau. Ko e tau magaaho mitaki ainei ke paionia fakaku. Lafi ki ai, maeke he tau fuata Kerisiano ke fakamalikiti e gahua ha lautolu he fakamatala he aoga. To ofo a koe he lahi e fia iloa he tau kapitiga hau he vahega ke he taofiaga hau. He ha he fakaaoga e tau fakatutalaaga mo e tohi esei he poko aoga ke foaki e fakamatala? Kua taute ai he falu he fakaaoga e tau vitio ha tautolu. Falu kua kamata e tau fakaako Tohi Tapu mo e tau kapitiga he vahega mo e lagomatai a lautolu ke hokotia ke he tukuleleaga mo e papatisoaga. Ko e tau puhala mitaki ainei ke ‘fakaheke e higoa a Iehova.’—Sala. 148:12, 13.
7. (a) Fakaaoga fefe he taha matakainaga tane e tau magaaho ke fakamatala ke he falu? (e) Kua fakafita foki nakai a koe ke he olioli pihia?
7 He fakaholoaga mau hau he aho, kia kumi puhala ke vagahau ke he tau tagata hagaao ke he Atua homo ue atu ha tautolu mo e tau maveheaga mitaki lahi hana. Taha e matakainaga tane ne heke tumau he taha ni e tuleni he tau aho oti ne fakamatala ke he tau tagata i loto ka lata ai. Ke fakatai ki ai, he fakatali ke he tuleni, ne fakamatala a ia ke he fuata tane he tau aho oti ke kavi ke lima e minuti. Ko e fua, ne talia he fuata tane mo e hoa gahua hana e fakaako Tohi Tapu. Ati taute e fakaako Tohi Tapu i loto he tuleni. Fakamui, ko e fifine motua ne fanogonogo ke he fakatutalaaga ha lautolu, ne finatu ke he matakainaga mo e ole ki a ia ke fakaako Tohi Tapu. Kua olioli foki he fifine e fakaakoaga hana he tau aho ne heke tuleni ai a ia. Ke he puhala nei, kua fakaako Tohi Tapu e matakainaga mo e tokohogofulu e tagata kehekehe he tuleni.
8. Ko e heigoa e tau puhala kua maeke ia lautolu ne fakakaupa he motua e tau he moui po ke gagao e tino ke fakamalikiti e fakalataha ha lautolu ke he fekafekauaga?
8 Ka e kua ka fakakaupa e mena ka taute e koe ha kua motua e tau he moui po ke gagao e tino? Liga fai puhala agaia ke fakamalikiti e fakaheke hau ki a Iehova. Kua fakamatala nakai a koe he telefoni? Ka nakai iloa mitaki e koe e puhala ke taute ai, ki a tala age ke he leveki he fakaakoaga tohi hau. Liga to taute e ia e fakaholoaga mo e falu tagata fakailoa ne fakaaoga e puhala nei ke gahua mo koe. He gahua takitokoua, maeke ia mutolu ke ako mai he taha ke lauia mitaki e fakamatalaaga. Kua moua e tau lagomatai mitaki ke fakamatala he telefoni he Ha Tautolu a Fekafekauaga he Kautu ia Fepuari 2001, lau 5-6.
9. Puhala fe ka lagomatai e tautolu e tau tagata fakaako Tohi Tapu ke maeke ke fakalataha mo e fakapotopotoaga ke he fekafekau he fonua?
9 He o ke he Fakamanatuaga ka liga fakamalolo e tau tagata fou ke manako ke fakamalikiti e fakaheke ha lautolu ki a Iehova. Maeke ia koe ke lagomatai a lautolu ke kautu mai he matakutaku ke fakalataha ke he fakamatalaaga pauaki, he talahau e tau fakafitaaga atihake he fonua, mo e he fakamahani fakahaga a lautolu ke fakamaama e tau fakaakoaga he Tohi Tapu mo e lalago e tua ha lautolu. (1 Pete. 3:15) Ka manako e tagata fakaako Tohi Tapu ke fakamatala e tala mitaki, tutala ke he leveki fakapotopotoaga. To taute e ia e fakaholoaga ke feleveia mo e tagata fakaako ke kitia kua lata nakai ke fakalataha mo e fakapotopotoaga ke he fekafekau he fonua. Kua fiafia moli ha ia e loto ha Iehova ke kitia e tau tagata fou ne kua lalago e pule katoatoa hana ke he lagi mo e lalolagi!—Fakatai 27:11.
10. (a) Maeke fefe he setulu mitaki ke lagomatai a tautolu ke paionia fakaku? (e) Kua maeke nakai ia koe ke paionia fakaku he tau kua mole he magahala Fakamanatuaga? Taute fefe?
10 Maeke Nakai a Koe ke Paionia Fakaku? Ko e 50 tula ma e gahua paionia fakaku kua lata ke manamanatu fakahokulo ki ai. (Mata. 5:37) Kakano, kua lata ia koe ke taute e fakaholoaga kua avelesi ke 12 e tula he tau fahi tapu takitaha he gahua ke he fonua. Kua lata nakai mo koe e taha setulu fakatai ma e paionia fakaku he lau 5? Ka nakai, maeke nakai ia koe ke fakatoka e setulu ka taute a koe ke paionia fakaku ia Mati, Aperila, po ko Me? Ole ki a Iehova ke fakamonuina e tau laliaga hau ke fakamalikiti e gahua he fekafekauaga.—Fakatai 16:3.
11. Maeke fefe e tau motua mo e tau fekafekau lagomatai ke lalago a lautolu ka gahua paionia fakaku?
11 To lalago katoatoa he tau motua mo e tau fekafekau lagomatai e tau laliaga hau ke taute e magahala Fakamanatuaga nei mo taha he fakahekeaga kua uho ki a Iehova. Ti liga to tokologa ia lautolu ka paionia fakaku foki. To fai feleveiaaga foki ka taute he tau motua ma e fekafekauaga, tuga he tau pale la, he tau afiafi he fahitapu, mo e he matahiku fahi tapu, ka lata ai. Ke iloa ko e i fe mo e a fe ka taute e tau feleveiaaga ia mo e ko hai ne ata ke takitaki ai, liga tutala e tau motua mo lautolu ne fakatoka pauaki ke paionia po ke hane manamanatu ki ai. To lali e tau motua ke fakatokatoka e tau fakaholoaga ke fai tagata fakailoa foki ke gahua tokoua he tau aho mo e tau magaaho ne setulu pauaki e koe ma e fekafekauaga. He puhala nei, to kautu e tau fakatokaaga mo e lahi e mitaki ka moua.—Fakatai 20:18.
12. Ko e heigoa ne omoi a tautolu ke fakaheke a Iehova he tau magaaho oti?
12 Kia Eketaha: Ka nakai fakaata he tau tutuaga hau a koe ke paionia fakaku, kia manatu na talia e Iehova e tau laliaga mo e foaki noa hau ke ‘fakalata ke he tau mena ha ha ia tautolu, nakai fakalata ke he tau mena nakai ha ha ia tautolu.’ (2 Kori. 8:12) Kua loga lahi e tau mena ke fakaaue a tautolu ki a Iehova. Mo e manatu mitaki ne tohia e Tavita: “To fakaaue au kia Iehova ke he tau aho oti kana; nakai noa e fakaheke he haku gutu kia ia.” (Sala. 34:1) Kia pihia e fakamaloloaga ha tautolu he magahala Fakamanatuaga nei.
[Puha he lau 3]
To Fakamalikiti Fefe e Koe e Gahua Hau?
◼ Fakamatala ka nonofo e tau tagata he kaina
◼ Fakamatala he tau mena ne tolo ai e tau tagata
◼ Fakamatala he gahuaaga po ke aoga
◼ Fakamatala he telefoni
◼ Gahua paionia fakaku
[Fakafonua he lau 5]
Tau Setulu Paionia Fakaku Fakatai—Puhala ke Setulu 12 e Tula he Fakafekau he Fonua he Tau Fahi Tapu Takitaha
Tau Pogipogi—Aho Gofua ke he Aho Faiumu
Hukui he Aho Tapu ha aho.
Aho Magaaho Tula
Aho Gofua Pogipogi 2
Aho Ua Pogipogi 2
Aho Lotu Pogipogi 2
Aho Tuloto Pogipogi 2
Aho Faraile Pogipogi 2
Aho Faiumu Pogipogi 2
Katoa Tula: 12
Ua e Aho Katoa
Fifili ua e aho he fahitapu. (He tau aho ka fifili, liga 48 ni e tula he setulu nei he mahina.)
Aho Magaaho Tula
Aho Lotu Aho Katoa 6
Aho Faiumu Aho Katoa 6
Total Hours: 12
Ua e Afiafi mo e Matahiku Fahitapu
Fifili ua e afiafi he fahitapu.
Aho Magaaho Tula
Aho Gofua Afiafi 1 1⁄2
Aho Lotu Afiafi 1 1⁄2
Aho Faiumu Aho Katoa 6
Aho Tapu Hafa Aho 3
Katoa Tula: 12
Tolu e Afiafi mo e Aho Faiumu
Hukui he Aho Tapu ha aho.
Aho Magaaho Tula
Aho Gofua Afiafi 2
Aho Lotu Afiafi 2
Aho Faraile Afiafi 2
Aho Faiumu Aho Katoa 6
Katoa Tula: 12
Setulu Fakatagata Haku he Fekafekauaga
Fifili ko e fiha e tula ma e tau magaaho takitaha.
Aho Magaaho Tula
Aho Gofua
Aho Ua
Aho Lotu
Aho Tuloto
Aho Faraile
Aho Faiumu
Aho Tapu
Katoa Tula: 12