Fakatātā Nakai e Koe e Fakaakoaga he Fina Atu Fakamua?
He magaaho ka foaki e fakaako Tohi Tapu, ne talahau falu tagata he gutuhala kua nakai manako a lautolu po ke na fai fakaako Tohi Tapu a lautolu he lotu ha lautolu. Ha kua maeke ni a lautolu ke fakatatai e iloaaga hagaao ke he fakaako Tohi Tapu ne iloa e lautolu he mogo kua mole, kua nakai iloa e lautolu e fiafia mo e mitaki he puhala fakaako Tohi Tapu ha tautolu. Ko e mena ia, he nakai ni foaki e fakaako Tohi Tapu, ko e ha he fakaaoga falu minuti ke fakatātā e fakaholoaga he fakaako Tohi Tapu he fina atu fakamua? Ke fakatai: Ua tala age hokoia na iloilo a koe he tunu kai ti tala age to liu mai a koe mo e mena kai; age taha mena ke kamata a lautolu he mogoia ni! Hanei e puhala ka maeke a koe ke taute e mena ia he gahoa e tau minuti, fakavē ke he manatu mai he lau 6 he Fekafekauaga he Kautu ha Tautolu ia Ianuari 2006:
“Manatu nakai a koe to hoko mai e aho ka fakamooli e tau kupu nei? [Totou Isaia 33:24, ti fakaatā ma e tali.] To fakakite atu e au taha mena fulufuluola ke he matakupu nei.” Age ke he tagata he kaina e tohi Fakaako he Tohi Tapu, ti tala age ke kikite e paratafa 22 he lau 36. Totou e hūhū i lalo he lau ia, ti ole ke he tagata he kaina ke kumi e tali ka e totou e koe e paratafa. Ti liu talahau foki e hūhū, mo e fanogonogo ke he tali he tagata he kaina. Totou tokoua foki e taha he tau kupu tohi. Talahau e hūhū ke tali ka liu aahi atu, ti taute e tau fakatokatokaaga mauokafua ke liu atu. Kua kamata tuai e koe e fakaako Tohi Tapu!