Tau Fakatonuaga ma Lautolu kua Taute e Tau Vala he Feleveiaaga Fekafekau

Kamata he fufuta nei he Ha Tautolu a Fekafekauaga he Kautu, kua fakakū hifo e tau talahauaga he setulu he Feleveiaaga Fekafekau. Ko e tau fakatonu mo e tau fakamanatu i lalo to fakafoou mo e liu fakamaama e mena ne tohi he vala tala “Puhala ke Tauteute ma e Feleveiaaga Fekafekau,” ne tū he Ha Tautolu a Fekafekauaga he Kautu ia Me 2009.

◼ Lauga: Kua hagaao e mena nei ke he lauga ne fakavē ke he vala tala ne fakatoka ke nakai fai fakatutala auloa. Kua lata e tagata lauga ke hagaaki ke he mena ka aoga lahi ke he fakapotopotoaga.

◼ Tau Hūhū mo e Tau Tali: To taute e vala nei tuga e Fakaakoaga Kolo Toko, he fakakū e kamataaga mo e fakaotiaga, ti talahau e tau hūhū ke he tau paratafa oti. Lata e tagata ne taute e vala ke ua tutala lahi. Totou e tau matapatu kupu tohi ka fai magaaho. Nakai totou e tau paratafa ato fai fakatonuaga ke totou ai.

◼ Fakatutala: Ko e lauga anei kua putoia e falu manatu he toloaga. Nakai ko e lauga, ti nakai ko e tau hūhū mo e tau tali oti.

◼ Tau Fakatātā mo e Tau Hūhū Tala: Ko e tau fakatonuaga ke fakatātā kua kakano ko e matakainaga taane kua kotofa ke taute e vala kua lago ki ai ke putoia e fakatātā; nakai lata ke taute ni e ia e fakatātā. Ko lautolu ne fifili e ia ke lagomatai a ia kua lata ke lotomatala mo e fakafifitaki mitaki, ti lata a ia ke taute tuai e tau fakatokaaga mo lautolu ka maeke. Kua mitaki lahi mahaki ke nakai fakaaoga e tau tagata fakailoa foou mo e nakaila iloa lahi ke fakatātā e puhala he gahua ka taute ke maeke ia lautolu ke ō ki mua, ka e maeke e falu ke fakaaoga mo tau hoa he kaina. Ko e tau tagata fakailoa hane taute e fakataitai kua lata ke mailoga ke haga ke he toloaga. Ko lautolu ne fakaaoga ke hūhū tala ka tutala i mua nakai mai he tau nonofoaga ha lautolu. Kua lata ke fakamahani e tau fakataitai mo e tau hūhū tala. Ka molea e tulā ti lata he matakainaga taane ke fakakū e vala haana, to nakai tiaki e ia e tau fakatātāaga mo e tau hūhū tala. Kua lata e tau fekafekau lagomatai ke fakakia ke he leveki he kau he tau motua po ke taha motua ato fifili e tau tagata ka fakaaoga.

Ka ha ha i ai e vala aoga lahi ne ha ha ai e tau fakatonuaga pauaki, kua lata e tau vala nei ke muitua fakatonu. He taute e tau vala he Feleveiaaga Fekafekau ne tohia i luga, to lafi he tau matakainaga taane ke he tau Feleveiaaga Fekafekau “e tau mena oti mo e fulufuluola mo e taute fakamitaki.”​—1 Kori. 14:40.