Moua e Tau Koloa Uho ne Fufū

KUA lagataha nakai e moua e koe e koloa galo ne fufū he mena ne nakai fa mahani? Ne tupu e mena ia he Mati 27, 2005, ki a Ivo Laud, ko e taha he Tau Fakamoli a Iehova i Esetonia. Ne lagomatai e ia a Alma Vardja ko e matakainaga Fakamoli ne fuakau, ke uulu hifo e fale tuai ne toka ai e tau koloa. He utakehe e laua e paka kaupā i fafo, ne mailoga e laua e lapa ne uufi aki e taha faahi he pou. He utakehe e lapa, ne moua e laua e kaava ne kavi ke he 10 e senetimita he laulahi, 1.2 e mita e loa, mo e 10 e senetimita ki loto, ne uufi aki e lapa akau pihia foki. (1) Ko e mena ne fufū ai e tau koloa uho! Ko e heigoa e tau koloa uho? Ko hai ne fufū e tau mena ia?

Ne ha ha i loto e tau afīfī ne viko fakamitaki aki e tau laupepa matolu. (2) Ne ha ha i loto he tau afī e tau tohi he Tau Fakamoli a Iehova, laulahi ke he tau vala tala fakaako he Watchtower, ti ha ha ai foki e falu mai he 1947. (3) Ne tohi lima fakamitaki ai ke he vagahau Esetonia. Falu afī kua tohi ai e tau fakamailoga ke he tagata ne fufū e tau vala tala ia. Ko e tau fakamauaga a ia he ekefakakelea ha Villem Vardja, ko e taane ha Alma. I loto foki he tau mena ne moua ko e vala tala hagaao ke he vahā ne tuku a ia he fale puipui. Ko e ha ne tuku a ia he fale puipui?

Ne eke a Villem Vardja mo fekafekau lotomatala he Tau Fakamoli he Fakapotopotoaga Tartu, ti fakamui ke he Fakapotopotoaga Otepää i Esetonia, ko e taha matakavi fakamua he Soviet Socialist Republics. Ne iloa tuai e ia e kupu mooli he Tohi Tapu, fai magaaho ato hoko e Felakutaki II he Lalolagi. Fai tau gahoa he mole ia Tesemo 24, 1948, ne tapaki he fakatufono faka-Komunisi e Matakainaga ko Vardja ha ko e matagahua fakalotu haana. Ne ekefakakelea mo e fakamamahi he tau leoleo fakagalogalo a ia he lali a lautolu ke fakaohooho a ia ke age e tau higoa he tau matakainaga talitonu haana ki a lautolu. He nakai fakaatā ke papale ne ia a ia he hopoaga, nukua fakahala a ia ke hogofulu e tau he fale puipui he kemuaga pagotā i Rusia.

Ne fakamooli tumau a Villem Vardja ki a Iehova ato mate a ia he Mati 6, 1990. Ne nakai iloa he hoana haana kua fai fufuta tohi pihia. Kua liga manako a ia ke puipui e hoana haana neke ekefakakelea foki. Ko e ha ne fufū ai e ia e tau tohi? Ne fufū e ia ha kua fa mahani e Soviet State Security Committee, ko e KGB, ke veu fakalutukia e tau kaina he Tau Fakamoli a Iehova he kumi ke he tau tohi fakalotu. Ne liga fufū he Matakainaga ko Vardja e tau tohi ke maeke he tau matakainaga talitonu ke moua e tau fufuta kai fakaagaaga neke uta oti he KGB e falu mena foki. Ko e falu tohi ne moua fakamua atu he vahā mafana he 1990. Taha ne moua i Tartu he faahi toga i Esetonia. Ne fufū foki e Villem Vardja.

Ko e ha ne ui e tautolu e tau tohi nei ko e tau koloa uho? Ha ko e tau lagaki nei ne tohi lima fakamatafeiga mo e fufū fakamitaki kua fakakite e loto fakaaue mooli he Tau Fakamoli ma e tau mena kai fakaagaaga ne moua he magaaho ia. (Mata. 24:45) Kua loto fakaaue nakai a koe ke he tau foakiaga fakaagaaga kua moua e koe mogonei he matakavi haau? He tau foakiaga ia ko e The Watchtower faka-Esetonia mo e molea 170 foki e vagahau.