Fakamaama e Fufuta Faka-Peritania Fakamukamuka
KUA fiafia a mautolu ke fakailoa atu ko e taha e tau ka taute ke kitia ai kamata he fufuta ma e fakaakoaga nei he The Watchtower, to taute fakatatai e mautolu he tau mahina takitaha e tau fufuta faka-Peritania fakamukamuka. To ha ha i ai e tau vala tala fakaako, ka fai vala tokanoa ti tuku ai foki e tau vala tala ikiiki ne fifili. Talitonu a mautolu to fakapuke he mena nei e manako fakaagaaga kua aoga ma e tokologa he Tau Fakamoli a Iehova. Ko e pihia he ha?
Ko e vagahau Peritania e vagahau fa mahani ne fakaaoga he tau matakainaga ha tautolu he tau motu tuga a Fiti, Kana, Kenia, Liperia, Nigeria, Papua Niu Kini, mo e Tau Aelani Solomona. Pete kua fakaaoga he tau matakainaga ha tautolu he tau motu nei e falu vagahau foki he motu, ne fa fakaaoga e lautolu e vagahau Peritania ke matutaki he tau aho oti he tau feleveiaaga he fakapotopotoaga mo e gahua he fonua. Ka ko e vagahau Peritania ne fakaaoga e lautolu kua mukamuka lahi ke he mena ne fakaaoga ai he tau tohi ha tautolu. Ha ha ai foki falu he tau tagata ha Iehova ne hiki ke he tau motu kua lata ia lautolu ke fakaaoga e vagahau Peritania ke matutaki pete kua temotemoai e iloilo ha lautolu ke he vagahau. Mua atu, kua nakai maeke ia lautolu ke o ke he tau feleveiaaga he fakapotopotoaga ne taute ke he vagahau motu ha lautolu.
Ko e tau vala tala ne fakatutala a tautolu ki ai he tau faahi tapu takitaha he Fakaakoaga Kolo Toko ko e tau matapatu puhala ke moua tumau e tautolu e tau mena kai fakaagaaga mitaki he magaaho tonu. Ko e mena ia, ke lagomatai e tau tagata oti ne o atu ke aoga katoa mai he vala tala nei, ko e fufuta faka-Peritania fakamukamuka kua fakaaoga e nakai loga he tau kupu mo e puhala vagahau mukamuka mo e puhala fakatokatokaaga he tau kupu. To kehe e kili he fufuta foou nei. Ko e tau vala mataulu, tau paratafa, tau hūhū fakamanatu, mo e tau fakatino he tau vala tala fakaako to tatai ke he fufuta tumau. Ti maeke oti ke muitua fakalataha ke he tau fufuta ia mo e fai vala ke he Fakaakoaga Kolo Toko. Ke fakakite e kehekehe he tau kupu he tau fufuta ne ua, kitekite e fakataiaga i lalo mai he paratafa 2 he vala tala fakaako fakamua he fufuta nei.
Ko e amanaki ha mautolu ko e foakiaga foou nei to tali e tau liogi he tokologa ne pehē ki a Iehova: “Kia foaki mai e iloilo kia au, kia ako ai e au hāu a tau poaki.” (Sala. 119:73) Kua mauokafua a mautolu ko lautolu ne temotemoai e iloilo he vagahau Peritania, pihia foki falu fanau ne vagahau Peritania, to maeke ke tauteute fakamitaki ma e Fakaakoaga Kolo Toko he tau faahi tapu takitaha. Kua fakaaue katoatoa a tautolu ki a Iehova ha ko e mai he ‘fakaalofa ke he tau matakainaga oti kana,’ hane fakaaoga e ia e “fekafekau fakamoli mo e loto matala” ke foaki e tau mena kai fakaagaaga loga.—1 Pete. 2:17; Mata. 24:45.
Kau Fakatufono he Tau Fakamoli a Iehova