INDLELA YOKUHLULA IHLOYO

1 | Ungakhethi

IBhayibheli Ithi:

“UZimu akakhethi, kodwana kizo zoke iintjhaba umuntu omesabako begodu enze okulungileko uyamukeleka kuye.”—IZENZO 10:34, 35.

Lokho Kutjho Ukuthini:

UJehovaa uZimu akaqali ukuthi sivela kisiphi isitjhaba, simhlobo bani, umbala wesikhumba sethu unjani namkha isiko lethu. Kunalokho, uqala lokho esingikho ngaphakathi. Iye kuliqiniso ukuthi, “umuntu ubona lokho okubonwa mamehlo kodwana uJehova ubona okusehliziyweni.”—1 Samyela 16:7.

Lokho Ongakwenza:

Nanyana singekhe sakghona ukufunda iinhliziyo, singakghona ukuthi silingise uZimu ngokuthi singakhethi. Lwela ukwazi ukuthi umuntu unjani ungaqali ukuthi uvela kisiphi isitjhaba. Nangabe uzizwa ngasuthi awubathandisisi abantu bomhlobo othileko namkha isitjhaba esithileko, thandaza kuZimu umbawe akusize, ulise ukukhethulula. (IRhubo 139:23, 24) Nawurabhela uJehova ukuthi akuphe amandla wokuthi ungakhethi, qiniseka ukuthi uzowuzwa umthandazwakho bekakusize.—1 Pitrosi 3:12.

a UJehova ligama lakaZimu.—IRhubo 83:18.

“Akhenge khengihlale phasi ngokuthula nomuntu olikhuwa . . . Nje, bengizizwa ngililunga lomndeni obumbeneko wephasi loke.”—U-TITUS

Indaba Eyenzekileko—U-TITUS

Wahlula Ukuba Nehloyo

U-Titus bekalilunga lesiqhema esinenturhu, ebesingazwani nemithetho ehlukanisa abantu ngobutjhaba. Uthi: “Besinokuya edorobheni eendaweni la abantu abanzima bangakavumeleki khona, njengemawotela neendaweni zokusela, ukwenzela bona sivuse ipi.” U-Titus uthi bekazele ihloyo ebeyimbangela ukuthi abe nenturhu. Uraga uthi: “Nakaphikisana nomuntu, kungaba yindoda namkha umfazi, bekaba ngewokuthoma obethako.”

U-Titus wathoma ukutjhuguluka lokha nakathoma ukufunda iBhayibheli naboFakazi bakaJehova. Akufundako eBhayibhelini, kwamthinta ihliziyo. Khulukhulu isithembiso sengomuso esithi, “ukufa angekhe kusaba khona, namkha isizi namkha ukulila namkha ubuhlungu angekhe kusaba khona.”—IsAmbulo 21:3, 4.

Ekuthomeni, bekungasilula ukuthi u-Titus alise ukuhloya abantu. Uthi: “Bekubudisi khulu ukutjhugulula indlela ebengenza nebengicabanga ngayo,” kodwana wasizwa ngilokho akufunda encwadini yezEnzo 10:34, 35 nayithi uZimu akakhethi.

Ubeyini umphumela? U-Titus uthi: “Ngaqiniseka ukuthi aboFakazi bakaJehova basekolweni yeqiniso ngebanga lethando engalibona kibo, kungayi ngokuthi isikhumba sabo sinjani namkha bamhlobo onjani. Ngaphambi kokuthi ngibhajadiswe ngibe nguFakazi, umfowethu olikhuwa osebandleni ebengikilo wangimemela emzinakhe. Bekungathi ngiyabhudanga, akhenge khengihlale phasi ngokuthula nomuntu olikhuwa ingasaphathwa yokudla naye kwakhe. Nje, bengizizwa ngililunga lomndeni obumbeneko wephasi loke.”