MAVUTO A MULI ICHI CHALO

3 | Mukoteteza ushamwali wanu na ayanu

CHIFUKWA CHAKE NIVOFUNIKA

Mavuto a muli ichi chalo, ochitisha kuti ŵanthu anyinji akonkhala na nkhaŵa. Chifukwa cha vamene ivi mosaziŵa ŵanthu ayakine, ochita vinthu vowonesha kuti okondalini ayawo

Ŵanthu ayakine olipatula kuti akochita vinthu paŵeka.
Ŵanthu ayakine amene ali pabanja ochelwa lini kuyambana.
Chikondi cha makolo pa ŵana ŵawo nichitontho, pamene ayakine oganizilako lini nkhaŵa zakunkhala nazo ŵana ŵawo.

Vamufunikila kuziŵa

Kunkhala na ayanu nkuweme, chifukwa okuyavyani kunkhala na moyo uweme komasoti otitang’isha ngako-ngako keno tukumana na mavuto.
Nkhaŵa zamene zuwela chifukwa cha mavuto a muli ichi chalo, zingachitishe kuti osati mukokatijana m’banja mwanu vamene nivinthu vakuti payakine mwenzeviyembekezela lini.
Ŵana ŵanu akomvwishila pa wailesi olo kulolela nkhani zoyofya pa TV, zingaŵasokoneze ngako.

Vamungachite palipano

Baibolo yunena kuti: “Shamwali ngaye-ngaye okuwonesha chikondi nthawe zonse, ndipo yove ni mkwako wamene evyalikila kuti akuyavye pakawoneka mavuto.”—Miyambo 17:17.

Ganizilani za munthu wamene angakuyavyeni komasoti angakupaseni malangizo oyavya ndipo musengeni. Kuziŵa kuti munthu muyakine okuganizilani kungakuyavyeni kuti mupilile mavuto ŵamukumana nawo.

MAVUTO A MULI ICHI CHALO—Mfundo zamene zingakuyavyeni

Panthawe yamavuto mungateteze ushamwali wanu pokonkheja njila zitatu izi

MUKOTANG’ISHA BANJA YANU

Mukotang’isha banja yanu

Baibolo yunena kuti: “Aŵili opambana mmozi. . . Ngati mmozi mwa ove angapone, muyakine angamuushe muyake wamene uyo.” (Mlaliki 4:9, 10) Ŵanthu olungulana ofunikila kuchita vinthu monga ŵanthu aŵili oyendesha ndeke imozi amene onkhala na cholinga chimozi, osati monga ali mundeke ziŵili zosiyana zamene zufuna kuphulisana.

Mukoyeja-yeja kuti osati mukochita vinthu vachipongwe kuli mwanakazi wanu olo mwanalume wanu chifukwa chamavuto ŵamukumana nawo. Ndipo mukonkhala woleza ntima komasoti wololela.
Payakine kamozi pasondo, mukokambilana na mwanakazi olo mwanalume wanu zamavuto ŵamufunikila kusilisha. Cholinga chanu chikonkhala pa kulimbana na vuto yamene iyo—osati kulimbana mweka-mweka.
Mukofwana nthawe yochita vinthu vamukonda monse muli pamozi.
Mukokumbukila nthawe yosangalasa yemwenzechitila vinthu pamozi, mwachisanzo mungawone mafoto apaukwati wanu muli pamozi.

“Ŵanthu olungulana angokatijana lini pa chinthu chilichonse, koma vamene ivi vutanthauzalini kuti angochitilalini vinthu pamozi. Ove angasankhile pamozi vochita pavuli pake noyavyana kuti akwanilishe vosankha vawo.”—David.

MUKOTANG’ISHA USHAMWALI WANU NA AYANU

Mukotang’isha ushamwali wanu na ayanu

Kuyangijila pa kulondela thandizo yofumila kuli ayanu, mwewo namwe mukoganizila mwamungaŵayavyile. Mukolimbikisa ayakine, mwewo namwe mulimbikisiwa.
Nthawe zonse mukoŵatumila foni komasoti kuŵalembela mamesedji ayanu, kuti muziŵe mwavilili vinthu pamoyo wawo.
Mukokonsha ayanu kuti muziŵe vuŵayavya kuti akwanishe kupilila mavuto olingana na ŵamukumana nawo mwewo.

“Mukakumana na mavuto akulu, ayanu angakuyavyeni. Olo angakukumbusheni vinthu vamuziŵa kale, ove angakuyavyeni kuti muziŵe vamungachite. Ayanu okuganizilani ndipo nawo oziŵa kuti muŵaganizila.”—Nicole.

MUKONKHALA KOLO YOYAVYA

Mukonkhala kolo yoyavya

Baibolo yunena kuti: “Munthu aliyense ankhale wofulumila kumvwa, wodekha polaŵila.” (Yakobo 1:19) Poyamba, ŵana ŵanu angovutika kukufotokozelani vinthu vuŵadesa nkhaŵa komasoti vakuganiza koma mukoŵamvwishila mwatchelu, angamasuke nokufotokozelani.

Mukopeza malo komasoti nthawe iweme kuti ŵana ŵanu amasuke nokufotokozelani nkhaŵa zalinazo. Ŵana ayakine owona kuti omasuka kufotokoza vamuntima mwawo akankhala mmotoka, akoyenda komasoti akolyela pamozi na makolo ŵawo, osati panthawe yakutandala komasoti akololeshana nawo.
Mukonkhala tchelu kuti ŵana ŵanuosati akololela nkhani zoyofya.
Mukoyavya ŵana ŵanu kuziŵa vayakonza banja yanu kuti mukonkhala otetezeka.
Mukoziŵilatu vamungachite keno pangachitike vinthu vamwazizizi, ndipo mukoyeselela kuchita vamene ivi na ŵana ŵanu.

“Mukolaŵila na ŵana ŵanu ndipo mukoŵalolela kuti afotokoze mwakumvwila. Payakine angazifise kuti osati awoneke kuti ali na wowa, nkhaŵa komasoti kuti akalipa. Mukoŵauja ŵana ŵanu kuti nthawe ziyakine namwe niye mwamumvwila, ndipo pavuli pake mukoŵauja vamuchita kuti muyambe kumvwa luweme.”—Bethany.