Kodi Baibulo Limati Chiyani pa Nkhani Yokwatirana ndi Munthu wa Mtundu Wina?

Yankho la m’Baibulo

Mulungu amavomereza ukwati wa mwamuna ndi mkazi osiyana mitundu chifukwa amaona kuti anthu a mitundu yonse ndi ofanana. Baibulo limati: “Mulungu alibe tsankho. Iye amalandira munthu wochokera mu mtundu uliwonse.”​—Machitidwe 10:​34, 35.

Mfundo za m’Baibulo zotsatirazi n’zothandiza pa nkhani ya kusiyana mitundu ndiponso ukwati.

Anthu a mitundu yonse ndi ana a Adamu ndi Hava

Anthu onse anachokera kwa anthu oyamba, Adamu ndi Hava. Baibulo limatchula Hava kuti “mayi wa munthu aliyense wamoyo.” (Genesis 3:20) N’chifukwa chake Baibulo limanena kuti: ’Kuchokera mwa munthu mmodzi, [Mulungu] anapanga mtundu wonse wa anthu.’ (Machitidwe 17:26) Anthu a mitundu yonse ndi a m’banja limodzi. Koma kodi mungatani ngati anthu a kumene mukukhala amasala anthu a mitundu ina kapena amene akusiyana nawo zinthu zina?

Anthu anzeru ‘amakambirana’

Ngakhale kuti Mulungu amavomereza ukwati wa anthu osiyana mitundu, anthu ena savomereza zimenezi. (Yesaya 55:​8, 9) Ngati mukuganiza zolowa m’banja ndi munthu wa mtundu wina, mungachite bwino kukambirana mafunso otsatirawa ndi mnzanuyo.

• Kodi mungatani kuti musavutike anthu ena kapena achibale anu akanena kapena kuchita zokhumudwitsa?

• Kodi muthandiza bwanji ana anu kuti asamavutike kwambiri akamasalidwa?

Kukambirana mfundo ngati zimenezi kungathandize kuti banja lanu liziyenda bwino.​—Miyambo 13:10; 21:5.