Kuwonjezera Luso Lathu mu Utumiki—Mmene Tingayambire Ulaliki Wamwamwayi

N’chifukwa Chiyani Kuchita Zimenezi N’kofunika? Nthawi zina tikamalalikira kunyumba ndi nyumba, timapeza kuti anthu ambiri sali pakhomo. Koma tingathe kukumana ndi anthu amenewa m’basi, kuchipatala, pa nthawi yopuma kusukulu ndi kuntchito komanso m’malo ena. Yehova akufuna kuti anthu onse amve uthenga wa Ufumu. (1 Tim. 2:3, 4) Kuti tilalikire anthu, nthawi zambiri tiyenera kuyamba ndifeyo kulankhula nawo.

Kodi Tingachite Bwanji Zimenezi?

Dziwani kuti n’zosatheka kulalikira aliyense. Choncho onani ngati zingatheke kuyamba kulankhula ndi munthu winawake. Kodi munthuyo akuoneka kuti ndi wochezeka komanso woti mungathe kulankhula naye? Kodi pamalo amene muliwo ndi poti mungathe kukambirana bwinobwino ndi munthuyo? Ofalitsa ena amayang’ana munthu, ndipo akaphana maso amamumwetulira. Nayenso akamwetulira, amayamba kulankhula naye.
Ngati mukuchita mantha kuyamba kulankhula, pempherani mwachidule chamumtima.—Neh. 2:4; Mac. 4:29.
Yambani ndi mawu achidule, mwina kungopereka moni. Pamene Yesu ankalankhula ndi mayi wachisamariya, sanayambe n’kumuuza za Ufumu. (Yoh. 4:7) Mukhozanso kuyamba ndi kuwayamikira. Mwachitsanzo, munganene kuti: “Ana anuwa ndi akhalidwe labwino kwambiri.” Njira ina yoyambira kukambirana ndi anthu, n’kuwafunsa funso lokhudza zimene zachitika. Mwina mungafunse kuti: “Kodi mwamva nkhani yomvetsa chisoni imene alengeza dzulo pa wailesi?”
Mukayamba kucheza ndi munthuyo, musadye mfulumira. Pitirizani kucheza naye mpaka mutaona kuti mungathe kuyamba kumulalikira. Mukaona kuti mungathe kumulalikira, mwina munganene zinazake zomwe zingamuchititse kufuna kudziwa zambiri. Mwachitsanzo ngati mukukambirana nkhani yokhudza kulera ana, munganene kuti, “Ndawerenga nkhani inayake yomwe ikufotokoza malangizo othandiza polera ana.” Ngati mukukambirana za nkhani yomwe yalengezedwa pa wailesi kapena kuonetsedwa pa TV, munganene kuti, “Ndawerenga nkhani inayake yomwe ikusonyeza kuti posachedwa zinthu ziyamba kuyenda bwino.” Musakhumudwe ngati simunathe kulakira munthuyo ngakhale kuti munayamba kucheza naye.
Mukamayenda, muzitenga timapepala ndi zinthu zina zomwe mungapatse anthu omwe asonyeza chidwi.

Tayesani Kuchita Izi Mwezi Uno:

Mlungu uliwonse, yesetsani kuyamba kulankhula ndi munthu n’cholinga choti muthe kuchita ulaliki wamwamwayi.