KUWONJEZERA LUSO LATHU MU UTUMIKI​—Muzigwiritsa Ntchito Mafunso Mwaluso

KODI ZIMENEZI N’ZOFUNIKA BWANJI? Ngati “maganizo a mumtima mwa munthu ali ngati madzi akuya,” ndiye kuti mafunso ali ngati chotungira madziwo. (Miy. 20:5) Mafunso amathandiza kuti omvera afotokoze maganizo awo ndipo zingatithandize kudziwa mmene tingawathandizire. Yesu ankagwiritsa ntchito mafunso mwaluso. Ndiye kodi ifeyo tingamutsanzire bwanji?

KODI TINGACHITE BWANJI ZIMENEZI?

• Muzifunsa mafunso omwe angachititse munthu kufotokoza maganizo ake. Yesu ankakonda kufunsa mafunso amene ankachititsa ophunzira ake kufotokoza maganizo awo. (Mat. 16:13-16; be 238 ¶3-5) Kodi mungafunse mafunso ati kuti mudziwe maganizo a wophunzira wanu?

• Muzifunsa mafunso othandiza munthu kupeza yekha yankho lolondola. Pofuna kuthandiza Petulo kukhala ndi maganizo oyenera, Yesu anamufunsa mafunso omuthandiza kupeza yankho lolondola. (Mat. 17:24-26) Kodi mungafunse mafunso ati pofuna kuthandiza wophunzira kuti apeze yekha yankho lolondola?

• Muzimuyamikira wophunzira wanu. Mlembi wina ‘atayankha mwanzeru,’ Yesu anamuyamikira. (Maliko 12:34) Kodi mungayamikire bwanji wophunzira ngati wayankha funso limene mwafunsa?

ONERANI MBALI YOYAMBA YA VIDIYO YAKUTI MUZIGWIRA NTCHITO IMENE YESU ANAGWIRA​—MUZIPHUNZITSA, KENAKO YANKHANI MAFUNSO OTSATIRAWA:

• N’chifukwa chiyani kumeneku sikuphunzitsa kwabwino ngakhale kuti mfundozo n’zolondola?

• N’chifukwa chiyani kuphunzitsa kumafuna zambiri osati kungofotokoza mfundo?

ONERANI MBALI YACHIWIRI YA VIDIYOYI KENAKO YANKHANI MAFUNSO OTSATIRAWA:

• Kodi m’baleyu wagwiritsa ntchito bwanji mafunso mwaluso?

• Kodi ndi zinthu zina ziti zimene m’baleyu wachita zomwe tingatengere?