Zithunzi Zingakuthandizeni

Mabuku athu amakhala ndi zithunzi zomwe zingakuthandizeni kudziwa mfundo zofunika. Kodi mungatani kuti zithunzi zimenezi zizikuthandizani?

• Muziona zithunzi musanawerenge nkhani yake. Zithunzi zimachititsa chidwi ndipo zingakulimbikitseni kuti muwerenge nkhaniyo. Zimakhala ngati “mwalawa” zimene mukufuna kuwerengazo. Choncho muzidzifunsa kuti, ‘Kodi ndikuona chiyani?’​—Amosi 7:7, 8.

• Mukamawerenga nkhani muzidzifunsa chifukwa chake aikamo chithunzi. Muziwerenga mawu ofotokozera chithunzi ngati alipo. Muziona kugwirizana pakati pa chithunzicho ndi nkhaniyo komanso mmene mungagwiritsire ntchito zimene mukuphunzira.

• Mukamaliza kuwerenga, muzionanso zithunzizo kuti mukumbukire mfundo zazikulu. Muziyesa kuonanso chithunzicho m’maganizo mwanu komanso mfundo imene munaphunzirapo.

• Tayesani kuonanso zithunzi za m’magazini ino n’kuona ngati mukukumbukira zimene munaphunzira.